Kadalag-an Paagi sa Pagkamapinadayunon

ANG pagkamapinadayunon nangin talagsahon nga kinaiya sa modernong panahon. Madamo nga tawo ang nagapati nga ang kadalag-an nasandig sing daku sa mangin yara sa husto nga lugar sa husto nga tion sangsa pagkamapinadayunon. Sin-o ang makabasol sa ila? Ang media puno sang mga islogan sa pasayod nga di-hilmunon nga nagapahangop nga ang halos bisan ano man nga butang nga luyag mo sarang matigayon paagi sa pinakadiutay nga panikasog kag sa dugangdugang gawa nga kuwarta. Ang mga pamantalaan padayon nga nagabalhag sing madamo nga sugilanon tuhoy sa hinali nga mga kadalag-an kag sa maabilidad nga mga negosyante nga may minilyon nga kita sa gilayon pagkatapos makagradwar.

Ang kolumnista nga si Leonard Pitts nagapanalabiton: “Sa katilingban nga madamo sing nahibaluan, mahapos gid ini tan-awon. . . . Daw subong bala nga ang isa ka butang sarang mahimo ni bisan sin-o kon nahangpan lamang niya ang pamaagi, kon may ikasarang sia, ukon kon nakabaton sia sing bulig sang Dios.”

Ano ang Pagkamapinadayunon?

Ang pagpadayon nagakahulugan sing ‘pagpabilin sing malig-on kag mapag-on sa pila ka katuyuan, kahimtangan, ukon hilimuon walay sapayan sang mga balagbag ukon mga kapaslawan.’ Nagapahangop ini sing determinasyon nga magpadayon walay sapayan sang kapiutan, mangin mabakod, wala nagapangampo. Ginapadaku sang Biblia ang pagkaimportante sining kinaiya. Halimbawa, ginalaygayan kita sang Pulong sang Dios: “Padayon, nian, nga pangitaa anay ang ginharian,” “padayon sa pagpanuktok, kag kamo pagabuksan,” “magpadayon kamo sa pagpangamuyo,” kag “hupti ang maayo.”​—⁠Mateo 6:​33; Lucas 11:​9; Roma 12:​12; 1 Tesalonica 5:⁠21.

 Ang isa ka importante nga bahin sang pagkamapinadayunon amo ang paglandas sa di-malikawan nga mga kapaslawan. Ang Hulubaton 24:​16 nagasiling: “Ang matarong mahimo mapukan bisan sing makapito, kag pat-od nga magabangon sia.” Sa baylo nga ‘mag-untat’ kon makasumalang sang kabudlayan ukon kapaslawan, ang mapinadayunon nga tawo ‘nagabangon,’ ‘nagapadayon,’ kag nagatinguha liwat.

Apang, madamo ang indi handa sa mga kabudlayan kag mga kapaslawan nga mahimo nila masumalang. Bangod wala nila mapalambo ang determinasyon sa pagbatas, nagapangampo sila gilayon. “Ginaatubang sang madamo gid nga tawo ang kapaslawan sa paagi nga nagahalit-sa-kaugalingon,” siling ni Morley Callaghan. “Ginakaluy-an nila ang ila kaugalingon, ginabasol nila ang tanan, nagahinakit sila kag . . . nagauntat.”

Makapasubo gid ini. “Ginakalimtan naton,” patalupangod ni Pitts, “nga may yara rason sa pag-agom sing pagtilaw, may pila ka kabilihanan nga masapwan sa kapiutan.” Ano nga kabilihanan ina? Sia naghinakop: “Matun-an [sang isa] nga ang kapaslawan indi makamamatay, ni ang kalutusan wala sing katapusan. Matigayon sang isa ang paghantop. Ang isa mangin handa.” Ang Biblia nagasiling sini sing simple: “Sa tanan nga sahi sang pagpangabudlay may yara kapuslanan.”​—⁠Hulubaton 14:⁠23.

Sa pagkamatuod, ang pag-organisar liwat pagkatapos sang kapaslawan indi pirme mahapos. Kon kaisa nagaatubang kita sang mga kabudlayan nga daw nagasablag sang aton tanan nga panikasog nga malandas ini. Sa baylo nga labi nga nagalapit, ang aton mga tulumuron mahimo nga amat-amat nga nagakaalimunaw. Mahimo kita magbatyag sing kaugot, wala-ikasarang, kag mahimo nga maluyahan sing buot, mapung-awan pa gani. (Hulubaton 24:10) Apang, ang Biblia nagapalig-on sa aton: “Dili kita magpangampo sa paghimo sing maayo, kay sa nagakaigo nga dag-on magaani kita kon indi kita pagpunawon.”​—⁠Galacia 6:⁠9.

Ano ang Makabulig sa Aton sa Pagpadayon?

Ang una nga tikang agod makapadayon sa ginpili nga dalanon amo ang pagpahamtang sing mga tulumuron nga mapuslanon kag sarang malab-ot. Pat-od nga nahangpan ini ni apostol Pablo. Ginsilingan niya ang mga taga-Corinto: “Ang paagi sang akon pagdalagan indi wala sing kapat-uran; ang paagi sang akon pagtumod sang akon mga sumbag indi agod makasumbag sa hangin.” Nakahibalo si Pablo nga kon luyag niya nga magmadinalag-on ang iya mga panikasog, kinahanglan niya ang maathag nga mga tulumuron, kaangay sang isa ka manugdalagan nga nagatuon sang iya hunahuna sa pagtabok sa inangan sa palumba. “Wala bala kamo makahibalo nga ang mga manugdalagan sa isa ka palumba nagadalagan tanan, apang isa lamang ang nagabaton sing padya? Magdalagan kamo sa paagi nga maagom ninyo ini,” laygay niya sa ila. (1 Corinto 9:​24, 26) Paano ini naton mahimo?

“Ang mahalungon nagabinagbinag sang iya mga tikang,” siling sang Hulubaton 14:⁠15. Maalamon nga binagbinagon liwat ang aton mga estratehiya sa kabuhi sa pulupanag-on, ginapamangkot ang aton kaugalingon kon diin kita nagapadulong kag kon bala kinahanglan himuon ang mga pagpasibu. Importante nga hunahunaon naton sing maathag ang luyag naton himuon kag kon ngaa. Indi kita madali mangampo kon ginahuptan naton nga malig-on sa aton hunahuna ang ginapanan-aw naton nga aton katapusan nga lalab-uton. “Kon tuhoy sa imo mga mata, dapat ini magtulok sing matadlong sa unhan,” siling sang inspirado nga hulubaton, agod nga “ang tanan mo nga dalanon [mahimo] mapasad sing malig-on.”​—⁠Hulubaton 4:​25, 26.

Sa tapos mahibaluan ang imo mga tulumuron, ang masunod nga tikang amo ang pagbinagbinag sing maayo kon paano ini malab-ot. Si Jesus namangkot: “Sin-o sa inyo nga nagahandum sa pagtukod sing torre ang wala anay nagalingkod kag bulubantaon ang kabilihanan?” (Lucas 14:28) Nahisuno sa sining prinsipio, ang isa ka eksperto sa kapagros sang hunahuna nagsiling: “Ang isa sang mga butang nga natalupangdan ko sa madinalag-on nga mga tawo amo nga may yara sila maathag nga paghangop sa kaangtanan sa ulot sang kabangdanan kag epekto sa ila kabuhi. Nahangpan sang madinalag-on nga mga tawo nga kon luyag nila ang isa ka butang, dapat nila himuon ang tanan nga kinahanglanon nga butang agod matigayon ini.” Ang maathag nga paghangop sa tanan kinahanglanon nga tikang nga dapat naton himuon agod matigayon ang luyag naton magabulig sa aton nga magkonsentrar. Magapahapos man ini sa aton nga makaorganisar liwat kon mapaslawan kita. Ini nga pagtulutimbang amo ang yabi sa kadalag-an nanday Orville kag Wilbur Wright.

Busa, kon mapaslawan, himua ang imo masarangan nga tamdon ini sa positibo nga paagi kag subong makatudlo nga eksperiensia. Binagbinaga sing maayo ang kahimtangan, hibalua kon sa diin ka nagsayop, kag dayon tadlunga ang sayop ukon batui ang kahuyangon. Makabulig man ang pagpakighambal sa iban, sanglit “paagi sa laygay malig-on nga ginapasad ang mga plano.” (Hulubaton 20:18)  Matuod, sa tagsa ka panikasog, nagapalambo ikaw sing dugang nga kalantip kag ikasarang, nga nagabulig gid sa imo kadalag-an.

Ang ikatlo nga importante nga bahin sang pagkamapinadayunon amo ang dalayon nga aksion. Si apostol Pablo nagalaygay sa aton: “Sa kasangkaron nga nakahimo kita sing pag-uswag, magpadayon kita sa paglakat sing mahim-ong sa sini gihapon nga kinabatasan.” (Filipos 3:16) Suno sa ginsiling sang isa ka edukador, “ang pagkahaganhagan kag pagkadalayon sa sulod sang isa ka hut-ong sang tion nagabunga sing importante nga mga resulta.” Gin-ilustrar ini sing maayo sa bantog nga pabula ni Aesop tuhoy sa bao kag sa kuneho. Nagdaug ang bao sa palumba, bisan pa mahinay sia katama sangsa kuneho. Ngaa? Bangod ang bao may determinado kag disiplinado nga paagi. Wala sia magdulog kundi nagpili sing kadasigon nga realistiko nga masarangan niya, kag dayon ginhuptan niya ini tubtob nakalab-ot sia sa inangan. Sanglit ang organisado, malig-on nga tawo nagahimo sing dalayon nga pag-uswag, padayon sia nga napahulag kag sa amo indi sia madali mag-untat ukon mapahalin sa palumba. Huo, ‘magdalagan sa paagi’ nga malab-ot ninyo ang inyo tulumuron.

Pagpili Sing Mapuslanon nga mga Tulumuron

Sa pagkamatuod, agod ang pagkamapinadayunon may bisan ano man nga balor, dapat may yara kita mapuslanon nga mga tulumuron. Ginapanikasugan sang madamo nga tawo ang mga butang nga wala nagahatag sing kalipay. Apang ang Biblia nagasiling: “Sia nga nagatan-aw sa himpit nga kasuguan nga natungod sa kahilwayan kag nagapadayon sa sini . . . mangin malipayon sa paghimo niya sini.” (Santiago 1:25) Huo, ang pagtuon agod mahangpan ang kasuguan sang Dios nga makita sa Biblia isa ka mapuslanon gid nga tulumuron. Ngaa? Sing importante, ini bangod ang kasuguan sang Dios napasad sa iya himpit, matarong nga mga talaksan. Subong Manunuga, nahibaluan niya kon ano ang labing maayo sa iya mga tinuga. Gani kon magpadayon kita sa pagtuon sa mga instruksion sang Dios kag sa pag-aplikar sini sa aton kabuhi, pat-od gid nga ining pagpadayon magahatag sa aton sing kalipay. “Magsalig kay Jehova sa bug-os mo nga tagipusuon . . . Sa tanan mo nga dalanon talupangda sia, kag tadlungon niya ang imo mga banas,” siling sang Hulubaton 3:​5, 6.

Dugang pa, ang pagkuha sing ihibalo tuhoy sa Dios kag kay Jesus “nagakahulugan sing kabuhi nga walay katapusan,” siling ni Jesus. (Juan 17:3) Ginapakita sang tagna sang Biblia nga nagakabuhi kita sa “katapusan nga mga adlaw” sining sistema. (2 Timoteo 3:​1-5; Mateo 24:​3-​13) Sa indi madugay pamatud-an sang Ginharian sang Dios, ang iya matarong nga panguluhan, ang paggahom sini sa mga pumuluyo sang duta. (Daniel 2:​44; Mateo 6:10) Ining panguluhan magapaluntad sing walay kaanggid nga dag-on sang paghidait, kahamungaya, kag kaayuhan sang tanan matinumanon nga katawhan. (Salmo 37:​10, 11; Bugna 21:4) “Ang Dios wala sing ginapasulabi,” siling sang Binuhatan 10:⁠34. Huo, ginaagda ang tanan sa pagtigayon sing mga benepisyo!

Ang Biblia isa ka dumaan nga libro nga puno sang kaalam kag kahulugan. Ang paghangop sini nagakinahanglan sing tion kag panikasog. Apang paagi sa bulig sang Dios​—⁠kag kon magpadayon kita sa pagpangita sang ihibalo sini​—⁠mangin bukas ini nga libro sa aton. (Hulubaton 2:​4, 5; Santiago 1:5) Ibutang ta nga ang pag-aplikar sang aton natun-an mahimo nga mangin isa ka hangkat. Mahimo kinahanglan nga himuon naton ang mga pagpasibu sa aton panghunahuna ukon pamatasan. Ang maayo-sing-tuyo nga mga abyan ukon mga katapo sang pamilya mahimo nga magpamatok pa gani sa aton pagtuon sa Biblia. Gani importante ang pagpadayon. Ginapahanumdom kita ni apostol Pablo nga ang Dios magahatag sing kabuhi nga walay katapusan sa mga nagapakita sing “pagbatas sa buhat nga maayo.” (Roma 2:7) Malipay gid ang mga Saksi ni Jehova sa pagbulig sa imo nga matigayon ining tulumuron.

Saligi nga matigayon mo ang kadalag-an kon magpadayon ka sa pagtuon tuhoy sa Dios kag sa iya kabubut-on kag mapinadayunon sa pag-aplikar sang imo natun-an.​—⁠Salmo 1:​1-3.

[Retrato sa pahina 6]

Matigayon mo ang kadalag-an kon magpadayon ka sa pagtuon tuhoy sa Dios kag sa iya kabubut-on

[Picture Credit Line sa pahina 4]

Culver Pictures