Report sang mga Manugbantala sang Ginharian

Ang Ila Pagtuo Ginpadyaan

SI APOSTOL Pablo isa ka tawo nga may tumalagsahon nga pagtuo, kag ginpalig-on niya ang iya mga masigkatumuluo nga magpalambo man sing pagtuo. Sia nagsiling: “Sia nga nagapalapit sa Dios dapat magpati nga amo sia kag nga sia ang nangin manugpadya sadtong hanuot nga nagapangita sa iya.” (Hebreo 11:6) Ang masunod nga mga eksperiensia gikan sa Mozambique nagapakita kon paano ginapadyaan ni Jehova ang mabakod nga pagtuo kag ginasabat ang hanuot nga mga pangamuyo.

• Nabalaka ang isa ka balo nga utod nga babayi gikan sa naaminhan nga probinsia sang Niassa kon paano sila sang iya anom ka kabataan makatambong sa “Dalanon Sang Dios sa Kabuhi” nga Distrito nga Kombension. Ang iya lamang palangitan-an amo ang pagbulubaligya sa isa ka lokal nga tiendahan, apang sang nag-abot ang petsa sang kombension, ang iya kuwarta iguigo lamang para sa ila pakadto lang nga plete sa tren sang iya kabataan. Walay sapayan, namat-od sia nga magsalig sa mga aman ni Jehova kag naglakat sa pagtambong sa kombension suno sa mga plano niya.

Nagsakay sila sang iya anom ka kabataan sa tren. Sa tion sang pagbiyahe nagpalapit sa iya ang konduktor para sa iya tiket. Nakita ang iya lapel card, ginpamangkot niya sia kon ano nga sahi sang identipikasyon ang iya ginasuksok. Ang sister nagsabat sa iya nga para ini sa pagpakilala sa iya subong isa ka delegado sang distrito nga kombension sang mga Saksi ni Jehova. “Diin hiwaton ining kombension?” pamangkot sang konduktor. Sang mahibaluan nga ang kombension hiwaton sa kaiping nga probinsia sang Nampula, mga 300 kilometros ang kalayuon, wala ginapaabot nga ginsukot niya sia sing katunga lamang sang kinaandan nga bili sang tiket! Ginhatagan dayon niya sia kag ang iya pamilya sing mga tiket pabalik para sa katunga sang iya kuwarta para sa plete. Daw ano gid ang iya kalipay nga nagsalig sia kay Jehova!​—⁠Salmo 121:​1, 2.

• Sa sulod sang mga 25 ka tuig, isa ka tuman ka relihiosa nga babayi ang nangamuyo sa Dios nga ipakita sa iya ang husto nga paagi sa pagsimba sa iya. Ang simbahan nga iya ginatambungan nagasamo sang relihioso nga mga seremonya sa tradisyunal nga mga rituwal, kag nagduhaduha sia nga ini nga sahi sang pagsimba kalahamut-an sa Dios.

Sia nagasaysay: “Pirme ko ginadumdom ang mga pulong ni Jesus nga narekord sa Mateo 7:​7: ‘Padayon sa pagpangayo, kag ihatag ini sa inyo; padayon sa pagpangita, kag inyo makita; padayon sa pagpanuktok, kag buksan ini sa inyo.’ Ginadumdom ini nga kasulatan, nangamuyo ako sing tayuyon sa Dios nga tuytuyan ako sa kamatuoran. Isa ka adlaw ginpangabay sang pastor sang amon simbahan ang tanan nga nagatrabaho sa lokal nga tiendahan nga dalhan sia sing kuwarta upod sang pila sang ila baligya agod mabendisyunan niya sila. Ginkabig ko ining pangabay nga di-makasulatanhon, busa wala ako sing gindala. Sang nakita sang pastor nga wala ako sing gindala nga ‘dulot,’ gin-insultuhan niya ako sa atubangan sang tanan nga miembro sang simbahan. Sadto nga adlaw narealisar ko nga indi ini ang paagi nga luyag sang Dios nga simbahon, busa naghalin ako sa simbahan. Samtang, padayon ako nga nagpangamuyo nga masapwan ang kamatuoran.

“Sang ulihi, nakatipon ako sing kaisog kag ginpakig-angutan ang isa ka himata nga isa sang mga Saksi ni Jehova. Gintanyagan niya ako sing isa ka tract, kag sang nabasa ko ini narealisar ko dayon nga ginsabat sang Dios ang akon mga pangamuyo. Sang ulihi, naapresyar man sang akon ginapuyopuyo ang mga kamatuoran sa Biblia, kag nagpakasal kami. Apang, sang ulihi, nagmasakit sing grabe ang akon bana. Apang tubtob sa iya kamatayon, ginpalig-on niya ako nga magpadayon sa dalanon sang kamatuoran agod magkit-anay kami liwat sa Paraiso.

“Nagapasalamat gid ako pirme kay Jehova nga ginsabat niya ang akon mga pangamuyo kag ginpakita sa akon ang husto nga paagi sa pagsimba sa iya. Nasabat man ang akon mga pangamuyo sa bagay nga nakita ko ang tanan sang akon walo ka kabataan nga nangin dedikado nga mga alagad ni Jehova.”