Si Jehova​—⁠Ang Isa nga Makusog sa Gahom

“Bangod bugana sa dinamiko nga kusog, makusog man sia sa gahom, wala sing isa sa sini nga nakulang.”​—⁠ISAIAS 40:⁠26.

1, 2. (a) Sa anong pisikal nga ginhalinan sang gahom kita tanan nagasalig? (b) Ipaathag kon ngaa si Jehova amo gid ang Ginhalinan sang tanan nga gahom.

ANG gahom isa ka butang nga ginapasapayanan sang madamo sa aton. Halimbawa, halos wala naton ginahatagan sing igtalupangod ang gahom sang koryente nga nagahatag sa aton sing kapawa kag init ukon ang kasulhay nga masaksak ang bisan anong de-koryente nga kasangkapan nga mahimo ginapanag-iyahan naton. Marealisar lamang naton, sa tion sang brown-out, nga kon wala gali sing koryente, ang mga siudad sang tawo halos nagadulog sa pagpanghikot. Ang kalabanan sang koryente nga ginasaligan naton nagahalin sing indi direkta sa labing masaligan nga ginhalinan sang koryente sa duta​—⁠ang adlaw.⁠ * Kada segundo ining solar reactor nagakonsumo sing lima ka milyon ka tonelada sang nuklear nga gatong, nagahatag sa duta sang nagasakdag-sing-kabuhi nga enerhiya.

² Diin naghalin ining tanan nga gahom sang adlaw? Sin-o ang naghimo sining planta sang koryente sa langit? Si Jehova nga Dios. Tuhoy sa iya, ang Salmo 74:​16 nagasiling: “Ikaw mismo ang naghanda sang kasanag, bisan ang adlaw.” Huo, si Jehova amo gid ang Ginhalinan sang tanan nga gahom, kay sia ang Ginhalinan sang tanan nga kabuhi. (Salmo 36:9) Indi gid naton dapat pagpasapayanan ang iya gahom. Paagi kay manalagna Isaias, si Jehova nagapahanumdom sa aton sa pagtangla sa mga butang sa langit, subong sang adlaw kag mga kabituunan, kag pamalandungan kon paano sila nagluntad. “Itangla ang inyo mga mata sa hitaas kag tan-awa. Sin-o bala ang nagtuga sini nga mga butang? Ini amo ang Isa nga nagapaguwa sang ila kasuldadusan sa isip, ginatawag niya sila tanan sa ngalan. Bangod bugana sa dinamiko nga kusog, makusog man sia sa gahom, wala sing isa sa sini nga nakulang.”​—⁠Isaias 40:​26; Jeremias 32:⁠17.

3. Paano kita nagabenepisyo gikan sa mga pagpadayag sang gahom ni Jehova?

³ Sanglit si Jehova makusog sa gahom, makasalig kita nga ang  adlaw padayon nga magaaman sa aton sing kapawa kag init nga sa sini nasandig ang aton kabuhi. Apang, nagasalig kita sa gahom sang Dios indi lamang para sa aton sadsaran pisikal nga mga kinahanglanon. Ang paggawad sa aton gikan sa sala kag kamatayon, ang aton paglaum sa palaabuton, kag ang aton pagsalig kay Jehova naangot tanan sa iya paggamit sang gahom. (Salmo 28:​6-9; Isaias 50:2) Ang Biblia bugana sing mga halimbawa nga nagapamatuod sang gahom ni Jehova sa pagtuga kag sa paggawad, sa pagluwas sa iya katawhan kag sa paglaglag sa iya mga kaaway.

Ang Gahom Sang Dios Ginapadayag sa Pagpanuga

4. (a) Paano naapektuhan si David paagi sa pagtan-aw sa kalangitan sa kagab-ihon? (b) Ano ang ginasugid sang mga butang sa langit may kaangtanan sa gahom sang Dios?

⁴ Ginpaathag ni apostol Pablo nga ang ‘dayon nga gahom [sang aton Manunuga] mahantop sing maathag sa mga butang nga ginhimo niya.’ (Roma 1:20) Mga siglo antes, si salmista David, subong isa ka manugbantay kag mahimo gid nga masunson nga nagtangla sa kalangitan sa kagab-ihon, nakahantop sang pagkahalangdon sang uniberso kag sang gahom sang Magbubuhat sini. Sia nagsulat: “Kon makita ko ang imo kalangitan, ang binuhatan sang imo mga tudlo, ang bulan kag ang kabituunan nga imo ginhanda, ano bala ang mamalatyon nga tawo nga padayon mo sia nga ginadumdom, kag ang anak sang tawo nga ginaatipan mo sia?” (Salmo 8:​3, 4) Walay sapayan sang iya limitado nga ihibalo tuhoy sa mga butang sa langit, nahangpan ni David nga diutay gid lamang sia kon ipaanggid sa Manunuga sang aton daku nga uniberso. Sa karon, mas madamo ang nahibaluan sang mga astronomo tuhoy sa kadakuon sang uniberso kag sa gahom nga nagasakdag sa sini. Halimbawa, ginasugiran nila kita nga ang aton adlaw kada segundo nagapaguwa sing enerhiya nga katumbas sa paglupok sang 100,000 milyones ka megaton sang TNT.⁠ * Ang tuman ka diutay nga bahin sina nga enerhiya nagalab-ot sa duta; nga nagakaigo na sa pagsakdag sa tanan nga kabuhi sa aton planeta. Apang, ang aton adlaw indi ang pinakamakusog nga bituon sa mga langit. Ang iban nga mga bituon nagapaguwa sa isa lamang ka segundo sing enerhiya nga ginapaguwa  sang adlaw sa bug-os nga adlaw. Handurawa, kon amo, ang gahom nga magamit sang Isa nga nagtuga sining mga butang sa langit! Si Elihu makatarunganon nga nagtuaw: “Tuhoy sa Labing Gamhanan, indi naton sia matungkad; mataas sia sa gahom.”​—⁠Job 37:⁠23.

5. Ano nga pamatuod sang kusog ni Jehova ang makita naton sa iya mga binuhatan?

⁵ Kon aton ‘pangitaon ang mga binuhatan sang Dios’ subong sang ginhimo ni David, makita naton ang pamatuod sang iya gahom bisan diin​—⁠sa hangin kag balod, sa daguob kag kilat, sa masulog nga mga suba kag mataas nga mga bukid. (Salmo 111:​2; Job 26:​12-14) Dugang pa, subong sang ginpahanumdom ni Jehova kay Job, ginapamatud-an sang mga sapat ang Iya kusog. Lakip sa sini amo ang Behemoth, ukon ang hippopotamus. Nagsiling si Jehova kay Job: “Ang iya kusog yara sa iya balikawang . . . Ang iya mabakod nga mga tul-an subong sang mga sungkod nga sinalsal nga salsalon.” (Job 40:​15-18) Ang makahalawhaw nga gahom sang toro nga talunon nakilal-an man sang panahon sang Biblia, kag nangamuyo si David nga kuntani maluwas sia gikan sa “baba sang leon, kag gikan sa mga sungay sang mga toro nga talunon.”​—⁠Salmo 22:​21; Job 39:​9-11.

6. Ano ang ginalaragway sang toro sa Kasulatan, kag ngaa? (Tan-awa ang nota.)

⁶ Bangod sang iya kusog, ang toro ginagamit sa  Biblia sa pagsimbulo sa gahom ni Jehova.⁠ * Ang palanan-awon ni apostol Juan tuhoy sa trono ni Jehova nagalaragway sa apat ka buhi nga tinuga, ang isa sini may nawong kaangay sang isa ka toro. (Bugna 4:​6, 7) Pasad sa ebidensia, ang isa sang apat ka pangunang kinaiya ni Jehova nga ginlaragway sining mga kerubin amo ang gahom. Ang iban pa amo ang gugma, kaalam, kag katarungan. Sanglit ang gahom isa gid ka importante nga bahin sang personalidad sang Dios, ang maathag nga paghangop tuhoy sa iya gahom kag kon paano niya ini ginagamit labi nga magapasuod sa aton sa iya kag magabulig sa aton nga mailog ang iya halimbawa paagi sa paggamit sing maayo sang bisan ano man nga gahom nga magamit naton.​—⁠Efeso 5:⁠1.

“Si Jehova Sang mga Kasuldadusan, ang Gamhanan”

7. Paano kita makapat-od nga madaug sang maayo ang malain?

⁷ Sa Kasulatan, si Jehova ginatawag nga “Dios nga Labing Gamhanan,” isa ka titulo nga nagapahanumdom sa aton nga indi gid naton dapat pagpakadiutayon ang iya gahom ukon pagduhaduhaan ang iya ikasarang sa paglutos sa iya mga kaaway. (Genesis 17:​1; Exodo 6:3) Ang malauton nga sistema sang mga butang ni Satanas mahimo nga nakapanggamot na sing madalom, apang sa mga mata ni Jehova “ang mga pungsod subong sang isa ka tulo gikan sa timba; kag ginaisip sila subong sang manipis nga yab-ok sa timbangan.” (Isaias 40:15) Bangod sining gahom sang Dios, wala duhaduha nga madaug sang maayo ang malain. Sa tion nga ang kalautan magalapnag, malugpayan kita sa paghibalo nga “si Jehova sang mga kasuldadusan, ang Gamhanan sang Israel” magadula sang kalainan sing dayon.​—⁠Isaias 1:​24; Salmo 37:​9, 10.

8. Anong langitnon nga mga kasuldadusan ang ginamanduan ni Jehova, kag paano naton nahibaluan ang ila gahom?

⁸ Ang ekspresyon nga “si Jehova sang mga kasuldadusan,” nga mabasa sing 285 ka beses sa Biblia, isa pa ka pahanumdom sang gahom sang Dios. Ang “mga kasuldadusan” nga ginasambit diri nagapatuhoy sa isa ka guban sang espiritu nga mga tinuga sa idalom sang pagmando ni Jehova. (Salmo 103:​20, 21; 148:2) Sa isa ka gab-i, ginpatay sang isa lamang sining mga anghel ang 185,000 ka soldado sang Asiria nga nagpamahog sa Jerusalem. (2 Hari 19:35) Kon ginakilala naton ang gahom sang langitnon nga mga kasuldadusan ni Jehova, indi kita gilayon mapahog sang mga manugpamatok. Si manalagna Eliseo wala mabalaka sang nakibon sia sang isa ka bug-os nga hangaway nga nagapangita sa iya bangod, indi kaangay sang iya alagad, nakita niya paagi sa mga mata sang pagtuo ang isa ka daku nga kadam-an sang langitnon nga hangaway nga nagasakdag sa iya.​—⁠2 Hari 6:​15-17.

9. Ngaa, kaangay ni Jesus, dapat kita magsalig sa pangamlig sang Dios?

⁹ Nakahibalo man si Jesus sang pagsakdag sang mga anghel sang gin-atubang niya ang isa ka guban nga armado sing mga espada kag batuta sa katamnan sang Getsemane. Sa tapos ginsugo si Pedro nga itagob ang iya espada, nagsiling si Jesus sa iya nga, kon kinahanglanon, mahimo sia makapangabay sa iya Amay sing “kapin sa napulog duha ka lehiyon sang mga anghel.” (Mateo 26:​47, 52, 53) Kon nakahibalo man kita nga may langitnon nga mga kasuldadusan nga pirme nakahanda nga gamiton sang Dios, magasalig man kita sing bug-os sa pagsakdag sang Dios. Si apostol Pablo nagsulat: “Ano, nian, ang aton isiling sa sining mga butang? Kon ang Dios para sa aton, sin-o ang mangin batok sa aton?”​—⁠Roma 8:⁠31.

10. Tungod kay sin-o ginagamit ni Jehova ang iya gahom?

¹⁰ Kon amo, may rason gid kita sa pagsalig sa pangamlig ni Jehova. Pirme niya ginagamit ang iya gahom nga may mapuslanon nga resulta kag nahisanto sa iya iban pa nga mga kinaiya​—⁠katarungan, kaalam, kag gugma. (Job 37:​23; Jeremias 10:12) Samtang masunson nga ginahalitan sang gamhanan nga mga tawo ang mga imol kag mga kubos tungod sa makagod nga ganansia, si Jehova ‘nagabayaw sang mga imol gikan sa yab-ok’ kag ‘bugana sa gahom sa pagluwas.’ (Salmo 113:​5-7; Isaias 63:1) Subong sang nahangpan ni Maria, ang maugdang kag mapainubuson nga iloy ni Jesus, ang “Gamhanan” di-makagod nga nagagamit sang iya gahom tungod sa mga nagakahadlok sa iya, nagapaubos sa mga matinaastaason kag nagabayaw sa mga kubos.​—⁠Lucas 1:​46-53.

 Ginapahayag ni Jehova ang Iya Gahom sa Iya mga Alagad

11. Anong pamatuod sang gahom sang Dios ang nasaksihan sang mga Israelinhon sang tuig 1513 B.⁠C.⁠E.?

¹¹ Sa pila ka hitabo, ginpadayag ni Jehova ang iya gahom sa iya mga alagad. Ang isa sina nga mga hitabo amo ang sa Bukid Sinai sang 1513 B.⁠C.⁠E. Sadto nga tuig nakita na sang mga Israelinhon ang dalayawon nga ebidensia sang gahom sang Dios. Ginpakita sang napulo ka malaglagon nga kalalat-an ang makusog nga kamot ni Jehova kag ang pagkawalay ikasarang sang mga dios sang Egipto. Wala madugay pagkatapos sadto, ang milagruso nga pagtabok sa Dagat nga Mapula kag ang paglaglag sa kasuldadusan ni Paraon naghatag sing dugang pa nga pamatuod sang kusog sang Dios. Tatlo ka bulan sang ulihi, sa tiilan sang Bukid Sinai, gin-agda ni Jehova ang mga Israelinhon nga mangin iya “pinasahi nga pagkabutang gikan sa tanan nga katawhan.” Sa ila bahin, nagsaad sila: “Ang tanan nga pinamulong ni Jehova himuon namon.” (Exodo 19:​5, 8) Nian, naghatag si Jehova sing maathag nga pagpasundayag sang iya gahom. Sa tunga sang daguob kag kilat kag mabaskog nga tunog sang budyong, ang Bukid Sinai nag-aso kag nagtay-ug. Ang katawhan, nga nagatindog sa malayo, hinadlukan. Apang ginsilingan sila ni Moises nga ini nga eksperiensia dapat magtudlo sa ila sing diosnon nga kahadlok, ang kahadlok nga magapahulag sa ila nga tumanon ang ila labing gamhanan kag lamang matuod nga Dios, si Jehova.​—⁠Exodo 19:​16-19; 20:​18-20.

12, 13. Anong mga sirkunstansia ang nagdul-ong agod bayaan ni Elias ang iya hilikuton, apang paano sia ginpabakod ni Jehova?

¹² Mga pila ka siglo sang ulihi, sang panahon ni Elias, nasaksihan sang Bukid Sinai ang isa pa ka pagpakita sing gahom sang Dios. Nakita na sang manalagna ang gahom sang Dios nga nagpanghikot. Sa sulod sang tatlo ka tuig kag tunga, ‘gintakpan [sang Dios] ang mga langit’ bangod sang apostasya sang pungsod sang Israel. (2 Cronica 7:13) Sa tion sang nagresulta nga tigpalamangag, ginpakaon sang mga uwak si Elias sa kasulgan nga nalupyakan sang Carit, kag sang ulihi ang diutay nga suplay sang harina kag lana sang balo nga babayi milagruso nga wala nagakaubos agod may makaon sia. Ginhatagan pa gani ni Jehova sing gahom si Elias sa pagbanhaw sa anak nga lalaki sining balo. Sang ulihi, sa isa ka dramatiko nga pagtilaw tuhoy sa pagka-Dios sa Bukid Carmel, ang kalayo nanaug gikan sa langit kag gin-upos ang halad ni Elias. (1 Hari 17:​4-24; 18:​36-40) Walay sapayan sina, wala madugay pagkatapos sadto, si Elias hinadlukan kag naluyahan sing buot sang namahog si Jesebel nga patyon sia. (1 Hari 19:​1-4) Nagpalagyo sia sa pungsod, sa paghunahuna nga natapos na ang iya hilikuton subong manalagna. Agod liwat sia nga pasaligon kag pabakuron, mainayuhon nga ginpakita ni Jehova sa iya ang personal nga pagpasundayag sang diosnon nga gahom.

¹³ Samtang si Elias nagapanago sa kuweba, nakita niya ang makahalawhaw nga pagpasundayag sang tatlo sang mga puwersa nga kontrolado ni Jehova: ang mabaskog nga hangin, ang linog, kag sang ulihi ang kalayo. Apang, sang nakighambal si Jehova kay Elias, ginhimo niya ini sa “kalmado, mahinay nga tingog.” Ginhatagan niya sia sing dugang pa nga hilikuton kag ginsugiran sia nga may 7,000 pa ka matutom nga sumilimba ni Jehova sa pungsod. (1 Hari 19:​9-18) Kon, kaangay ni Elias, maluyahan kita sing buot bangod wala sing mga resulta ang aton ministeryo, makapangabay kita kay Jehova sing “gahom nga labaw sa kinaandan”​—⁠ang gahom nga makapabakod sa aton nga magpadayon sa pagbantala sing maayong balita nga walay langan.​—⁠2 Corinto 4:⁠7.

Ginagarantiya Sang Gahom ni Jehova ang Katumanan Sang Iya mga Saad

14. Ano ang ginapakita sang personal nga ngalan ni Jehova, kag paano ang iya gahom naangot sa iya ngalan?

¹⁴ Ang gahom ni Jehova naangot man sing suod sa iya ngalan kag sa pagtuman sang iya kabubut-on. Ang pinasahi nga ngalan, Jehova, nga nagakahulugan sing “Ginapahanabo Niya,” nagapakita nga ginapahanabo niya nga mangin Manugtuman sia sang mga saad. Wala sing bisan ano ni bisan sin-o man ang makapugong sa Dios sa pagtuman sang iya mga saad, bisan ginakabig ini sang mga maduhaduhaon nga indi gid matabo. Subong sang ginsiling anay ni Jesus sa iya mga apostoles, “sa Dios ang tanan nga butang posible.”​—⁠Mateo 19:⁠26.

15. Paano ginpahanumdom sanday Abraham kag Sara nga wala sing bisan ano man nga tumalagsahon kay Jehova?

¹⁵ Sa pag-ilustrar, nagsaad anay si Jehova kanday Abraham kag Sara nga himuon niya ang ila kaliwatan nga isa ka daku nga pungsod. Apang, madamong tinuig na nga wala sila sing anak. Tigulang na sila nga duha sang ginsugiran sila ni Jehova nga ang saad buot na matuman kag si Sara nagkadlaw. Sa pagsabat, ang anghel nagsiling: “May bisan ano bala nga butang nga tumalagsahon gid kay Jehova?” (Genesis 12:​1-3; 17:​4-8; 18:​10-​14) Apat ka siglo  sang ulihi, sang natipon na ni Moises ang kaliwatan ni Abraham​—⁠nga isa ka daku nga pungsod na karon​—⁠sa Kapatagan sang Moab, ginpahanumdom niya sa ila nga gintuman sang Dios ang iya saad. Si Moises nagsiling: “Nagpabilin ka nga buhi, bangod ginhigugma [ni Jehova] ang imo mga katigulangan amo nga ginpili niya ang ila binhi sa ulihi nila kag ginpaguwa ka gikan sa Egipto sa iya panulok paagi sa iya daku nga gahom, agod subulon ang mga pungsod nga mas daku kag mas gamhanan sangsa imo gikan sa atubangan mo, agod pasudlon ka, agod ihatag sa imo ang ila duta subong panublion subong sang sa sini nga adlaw.”​—⁠Deuteronomio 4:​37, 38.

16. Ngaa ang mga Saduceo nahulog sa sayop sang pagpanghiwala sa pagbanhaw sa mga patay?

¹⁶ Mga siglo sang ulihi, ginpakamalaut ni Jesus ang mga Saduceo, nga wala magpati sa pagkabanhaw. Ngaa nagdumili sila sa pagpati sa saad sang Dios nga banhawon niya ang mga patay? Si Jesus nagsiling sa ila: “Wala kamo makahibalo sang Kasulatan ni sang gahom sang Dios.” (Mateo 22:29) Ang Kasulatan nagapasalig sa aton nga ‘ang tanan nga yara sa handumanan nga lulubngan makabati sang tingog sang Anak sang tawo kag magaguwa.’ (Juan 5:​27-29) Kon nahibaluan naton ang ginasiling sang Biblia tuhoy sa pagkabanhaw, ang aton pagsalig sa gahom sang Dios magakumbinsi sa aton nga ang mga patay banhawon. “Lamunon [sang Dios] ang kamatayon sing dayon, . . . kay si Jehova mismo ang nagpamulong sini.”​—⁠Isaias 25:⁠8.

17. Sa anong palaabuton nga adlaw mangin kinahanglanon sa pinasahi nga paagi ang pagsalig kay Jehova?

¹⁷ Sa malapit nga palaabuton, magaabot ang tion nga ang tagsatagsa sa aton dapat magsalig sa gahom sang Dios sa pagluwas sa isa ka pinasahi nga paagi. Si Satanas nga Yawa magasalakay sa katawhan sang Dios, nga daw indi protektado tan-awon. (Ezequiel 38:​14-16) Nian ipadayag sang Dios ang iya daku nga gahom para sa aton, kag makilala sang tanan nga sia si Jehova. (Ezequiel 38:​21-23) Karon na ang tion sa pagpabakod sang aton pagtuo kag pagsalig sa Dios nga Labing Gamhanan agod indi kita mationg sa sinang ital-ital nga tion.

18. (a) Anong mga benepisyo ang matigayon naton gikan sa pagpamalandong sa gahom ni Jehova? (b) Anong pamangkot ang binagbinagon sa masunod nga artikulo?

¹⁸ Sa walay duhaduha, may madamo nga rason agod pamalandungan ang gahom ni Jehova. Samtang ginapamalandungan naton ang iya mga binuhatan, mapainubuson kita nga ginapahulag nga dayawon ang aton Dakung Manunuga kag magpasalamat nga ginagamit niya ang iya gahom sa subong sini ka maalamon kag mahigugmaon nga paagi. Indi gid kita mapahog kon nagasalig kita kay Jehova sang mga kasuldadusan. Ang aton pagsalig sa iya mga saad indi mationg. Apang, dumduma nga gintuga kita sa larawan sang Dios. Gani kita man may gahom​—⁠bisan pa nga limitado lamang. Paano naton mailog ang aton Manunuga sa kon paano naton ginagamit ang aton gahom? Binagbinagon ini sa masunod nga artikulo.

[Mga nota]

Masabat Mo Bala Ining mga Pamangkot?

• Paano ang pagpanuga nagapamatuod sang gahom ni Jehova?

• Anong mga kasuldadusan ang sarang magamit ni Jehova sa pagsakdag sa iya katawhan?

• Ano anay ang pila ka hitabo nga ginpakita ni Jehova ang iya gahom?

• Ano ang aton garantiya nga tumanon ni Jehova ang iya mga saad?

[Mga Pamangkot sa Pagtinuon]

[Mga retrato sa pahina 10]

“Itangla ang inyo mga mata sa hitaas kag tan-awa. Sin-o bala ang nagtuga sini nga mga butang?”

[Credit Line]

Retrato ni Malin, © IAC/RGO 1991

[Mga retrato sa pahina 13]

Ang pagpamalandong sa mga pagpasundayag sang gahom ni Jehova nagapabakod sang pagtuo sa iya mga saad