Isa ka Huwaran nga Tawo nga Nagbaton sing Pagtadlong

“MGA Buaya sa Zambia Nagakaon Sing 30 ka Tawo sa Isa ka Bulan.” Amo ini ang ginreport sang isa ka pamantalaan sa Aprika sang nagligad nga pila ka tuig. Suno sa isa ka zoologist nga nagdakop sining mga reptilya agod tun-an, “kinahanglan ang 12 ka tawo agod madakop ang isa ka buaya.” Bangod sang makusog nga ikog kag mapag-on nga mga apipingig, ang buaya makahaladlok gid nga sapat!

Maathag nga ginapatuhuyan ang buaya subong “Leviatan,” gingamit sang Manunuga ining ‘hari sa tanan nga halangdon kag talunon nga sapat’ agod tudluan ang iya alagad nga si Job sing importante nga leksion. (Job 41:​1, 34) Natabo ini mga 3,500 ka tuig na ang nagligad sa duta sang Uz, mahimo nga sa naaminhan nayon sang Arabia. Samtang ginalaragway ining tinuga, ginsilingan sang Dios si Job: “Wala sing makahas gid agod tublagon niya ini. Kag sin-o ang makatindog sa atubangan ko?” (Job 41:10) Matuod gid! Kon nahadlok kita sa buaya, daw ano pa gid ayhan nga dapat kita mahadlok sa paghambal batok sa Isa nga nagtuga sini! Ginpakita ni Job ang apresasyon sa sining leksion paagi sa pagtu-ad sang iya sala.​—⁠Job 42:​1-6.

Kon ginahinambitan si Job, mahimo naton madumduman ang iya matutom nga huwaran sa pagbatas sing pagtilaw. (Santiago 5:11) Sa pagkamatuod, nahamuot si Jehova kay Job bisan sang wala pa matilawan sing daku ang iya pagtuo. Sa pagtamod sang Dios, sadto nga tion “wala sing kaangay sa iya sa duta, tawo nga wala sing kasawayan kag matarong, nga mahinadlukon sa Dios kag nagalikaw sa malaut.” (Job 1:⁠8) Dapat ini magpahulag sa aton nga magtuon sing dugang pa tuhoy kay Job, kay ang paghimo sini magabulig sa aton nga makita kon paano man naton mapahamut-an ang Dios.

Gin-una ang Kaangtanan sa Dios

Si Job manggaranon nga tawo. Luwas sa bulawan, may yara sia 7,000 ka karnero, 3,000 ka kamelyo, 500 ka asno nga babayi, 1,000 ka baka, kag may daku kaayo nga hubon sang mga alagad. (Job 1:⁠3) Apang nagsalig si Job kay Jehova, indi sa mga manggad. Sia nangatarungan: “Kon ginhimo ko ang bulawan subong akon paglaum, ukon sa bulawan ako nagasiling, ‘Ikaw ang akon salaligan!’ Kon nagkasadya ako bangod madamo ang akon pagkabutang, kag  bangod ang akon kamot nakasalapo sing madamo nga butang . . . , ina man kasaypanan nga dapat talupangdon sang mga hukom, kay ginpanghiwala ko kuntani ang matuod nga Dios sa ibabaw.” (Job 31:​24-28) Kaangay ni Job, dapat naton pabaloran ang suod nga kaangtanan kay Jehova nga Dios labaw sangsa materyal nga mga butang.

Matarong nga mga Pagpakig-angot sa mga Isigkatawo

Paano ginpakig-angutan ni Job ang iya mga alagad? Ginapakita sang mga pinamulong mismo ni Job nga nasapwan nila nga wala sia sing ginapasulabi kag madali sia palapitan: “Kon gindingutan ko sang katarungan ang akon ulipon nga lalaki ukon ang akon ulipon nga babayi sa ila hulusayon sa kasuguan batok sa akon, ano bala nian ang akon himuon kon ang Dios magtindog? Kag kon makighusay sia, ano ang isabat ko sa iya?” (Job 31:​13, 14) Ginpabaloran ni Job ang kaluoy ni Jehova kag sa amo nakig-angot sing maluluy-on sa iya mga ulipon. Daw ano kaayo nga halimbawa, ilabi na sa mga may katungdanan sa pagdumala sa sulod sang Cristianong kongregasyon! Sila man dapat mangin walay nadampigan, walay pinasulabi, kag madali palapitan.

Nagpakita man si Job sing interes sa mga tawo nga yara sa guwa sang iya panimalay. Nagapakita sang iya pag-ulikid sa iban, sia nagsiling: “Kon ginapunggan ko ang mga imol sa ila kalipay, kag ginapaburon ko ang mga mata sang balo nga babayi, . . . kon ginawarawara ko ang akon kamot batok sa bata nga lalaki nga wala sing amay, kon nakita ko nga kinahanglan ang akon bulig sa ganhaan, mahulog kuntani ang akon luwagluwag gikan sa abaga sini, kag mabali kuntani ang akon butkon gikan sa naibabaw nga tul-an sini.” (Job 31:​16-22) Kabay nga mangin subong kita ka mapatugsilingon sa mga nagaeksperiensia sing mga kabudlayan nga kilala naton sa kongregasyon.

Bangod sang iya di-makagod nga interes sa iya mga isigkatawo, maabiabihon si Job sa mga dumuluong. Sa amo, nakasiling sia: “Sa guwa wala sing dumuluong nga pumuluyo nga magpalipas sing gab-i; ginbilin ko nga bukas ang akon mga ganhaan sa alagyan.” (Job 31:32) Maayo gid ini nga halimbawa para sa mga alagad sang Dios karon! Kon ang bag-uhan nga mga interesado sa kamatuoran sang Biblia nagakadto sa Kingdom Hall, ang aton maabiabihon nga pagbaton sa ila mahimo makabulig sa ila pag-uswag sa espirituwal. Sa pagkamatuod, ang nagalakbay nga mga manugtatap kag ang iban pa nga mga Cristiano nagakinahanglan man sang aton mahigugmaon nga pag-abiabi.​—⁠1 Pedro 4:9; 3 Juan 5-8.

Nagpakita si Job sing nagakaigo nga panimuot bisan sa iya mga kaaway. Wala sia magkalipay sa kalamidad nga mahimo matabo sa isa nga nagadumot sa iya. (Job 31:​29, 30) Sa baylo, handa sia sa paghimo sing maayo sa subong sini nga mga tawo, nga daw makita sa iya kahanda nga ipangamuyo ang iya tatlo ka di-matuod nga mga manuglugpay.​—⁠Job 16:2; 42:​8, 9; ipaanggid ang Mateo 5:​43-48.

Seksuwal nga Kaputli

Si Job mainunungon sa iya tiayon, wala gid magtugot sa iya tagipusuon nga magpalambo sing di-nagakaigo nga relasyon sa isa pa ka babayi. Si Job nagsiling: “Nakigkatipan ako sa akon  mga mata. Gani paano ako magpakita sing igtalupangod sa isa ka ulay? Kon ang akon tagipusuon nahaylo sa isa ka babayi, kag pirme ako nagahulat sa ganhaan mismo sang akon kaupod, pagalinga ang akon asawa para sa iban nga lalaki, kag sa ibabaw niya paludha ang iban nga mga lalaki. Kay ina malaw-ay nga paggawi, kag ina mangin sayop nga dapat talupangdon sang mga hukom.”​—⁠Job 31:​1, 9-11.

Wala gintugutan ni Job nga palainon sang imoral nga mga kailigbon ang iya tagipusuon. Sa baylo, naglakat sia sa matadlong nga dalanon. Indi katingalahan nga nahamuot si Jehova sa sining matutom nga tawo nga nagpakig-away batok sa imoral nga mga pagsulay!​—⁠Mateo 5:​27-30.

Nabalaka sa Espirituwalidad Sang Pamilya

Kon kaisa, ang mga anak nga lalaki ni Job naghiwat sing mga bangkete nga gintambungan sang tanan niya nga anak nga lalaki kag babayi. Pagligad sining mga adlaw sang bangkete, nabalaka gid si Job nga basi nakasala ang iya mga anak kay Jehova sa pila ka paagi. Gani naghulag si Job, kay ang Makasulatanhon nga kasaysayan nagasiling: “Mahanabo nga kon ang mga adlaw sang bangkete nakalibot na, si Job nagasugo kag nagapakabalaan sa ila; kag nagbangon sia sing aga pa kag nagdulot sing mga halad nga sinunog suno sa kadamuon nila tanan; kay, si Job nagsiling, ‘basi nakasala ang akon mga anak, kag nagpasipala sa Dios sa ila tagipusuon.’ ” (Job 1:​4, 5) Daku gid ang epekto sa mga miembro sang pamilya ni Job sang iya pagkabalaka amo nga may yara sila matinahuron nga kahadlok kay Jehova kag naglakat sa Iya mga dalanon!

Sa karon, ang mga ulo sang Cristianong mga pamilya dapat magtudlo sa ila mga pamilya tuhoy sa Pulong sang Dios, ang Biblia. (1 Timoteo 5:⁠8) Kag nagakaigo gid nga ipangamuyo ang mga miembro sang pamilya.​—⁠Roma 12:⁠12.

Nagbatas Sing Matutom sa Idalom Sang Pagtilaw

Ang kalabanan nga bumalasa sang Biblia pamilyar sa grabe nga pagtilaw nga natabo kay Job. Ginsiling ni Satanas nga Yawa nga sa idalom sang mabudlay gid nga kahimtangan pakamalauton ni Job ang Dios. Ginbaton ni Jehova ini nga hangkat, kag gilayon nga ginpahanabo ni Satanas ang kalamidad kay Job. Nadula niya ang tanan niya nga kasapatan. Mas malain pa, napatay ang tanan niya nga anak. Wala magdugay pagkatapos sadto, ginpatubuan ni Satanas si Job sing hubag halin sa ulo tubtob sa tiil.​—⁠Job, kapitulo 1, 2.

Ano ang resulta? Sang ginpalig-on sia sang iya asawa nga pakamalauton ang Dios, si Job nagsiling: “Subong sang pagpamulong sang isa sang mga babayi nga buangbuang, nagapamulong ka man. Batunon lamang bala naton ang maayo gikan sa matuod nga Dios kag indi pagbatunon ang malain?” Ang rekord sang Biblia nagadugang: “Sa sini tanan wala makasala si Job sa iya mga bibig.” (Job 2:10) Huo, matutom nga nagbatas si Job kag sa amo napamatud-an nga butigon ang Yawa. Kabay nga batason man naton ang mga pagtilaw kag pamatud-an nga ang aton pag-alagad sa Dios ginapahulag sang putli nga gugma kay Jehova.​—⁠Mateo 22:​36-38.

Mapainubuson nga Nagbaton Sing Pagtadlong

Bisan pa huwaran si Job sa madamo nga paagi, indi sia himpit nga tawo. Sia mismo nagsiling: “Sin-o bala ang makapatubas sing isa nga matinlo gikan sa isa nga di-matinlo? Wala sing isa.” (Job 14:4; Roma 5:12) Gani sang nagsiling ang Dios nga si Job walay kasawayan, matuod ini sa kahulugan nga nahimo niya ang tanan nga ginapaabot sang Dios sa isa sang iya di-himpit kag makasasala nga tawhanon nga mga alagad. Daw ano nga tuburan sang pagpalig-on!

Ginbatas ni Job ang iya pagtilaw, apang nagpakita ini sing kaluyahon. Sang mabatian ang tanan nga kalamidad nga nag-abot sa iya, ginduaw sia sang tatlo ka kuno manuglugpay. (Job 2:​11-13) Nagsiling sila nga ginasilutan ni Jehova si Job bangod sa paghimo sing daku nga mga sala. Natural lamang nga nasaklaw si Job bangod sining butig nga mga panumbungon, kag nagpangapin gid sia. Apang nangin di-timbang sia sa pagtinguha nga pakamatarungon ang iya kaugalingon. Ti, ginpahangop pa gani ni Job nga daw mas matarong pa sia sa Dios!​—⁠Job 35:​2, 3.

Bangod ginahigugma sang Dios si Job, gingamit Niya ang isa ka lamharon nga lalaki agod ipatalupangod ang sayop ni Job. Ang rekord nagasiling: “Nag-init ang kaakig ni Elihu . . . Nagdabdab ang iya kaakig batok kay Job bangod ginpahayag niya ang iya kalag nga matarong sa baylo nga ang Dios.” Suno sa ginsiling ni Elihu: “Si Job nagsiling, ‘Husto gid ako, apang ginpahilayo sang Dios ang paghukom sa akon.’ ” (Job 32:2; 34:⁠5) Apang, wala nagbuylog si Elihu sa tatlo ka “manuglugpay” sa paghinakop sing sayop nga ginasilutan sang Dios si Job bangod sang iya mga sala. Sa baylo, nagpabutyag si Elihu sing pagsalig sa katutom ni Job, kag naglaygay sia sa iya: “Ang legal nga kaso yara sa atubangan [ni Jehova], kag gani dapat ka maghulat sa iya sing mabinalak-on.” Sa pagkamatuod, dapat kuntani naghulat si Job  kay Jehova sa baylo nga maghambal sing padasudaso sa pagpangapin sang iya kaugalingon. Ginpasalig ni Elihu si Job: “Ang katarungan kag ang bugana nga pagkamatarong indi [sang Dios] pagpakadiutayon.”​—⁠Job 35:14; 37:⁠23.

Kinahanglan tadlungon ang panghunahuna ni Job. Busa, ginhatagan sia ni Jehova sing leksion tuhoy sa pagkakubos sang tawo kon ipaanggid sa kadakuon sang Dios. Gintudlo ni Jehova ang duta, ang dagat, ang mabituunon nga kalangitan, ang kasapatan, kag ang madamo pa makatilingala nga tinuga. Sang ulihi, naghambal ang Dios tuhoy sa Leviatan​—⁠ang buaya. Mapainubuson nga ginbaton ni Job ang pagtadlong, kag sa sini nagpahamtang sia sing dugang pa nga halimbawa.

Bisan pa maayo ang aton ginahimo sa pag-alagad kay Jehova, nagasayop kita. Kon ang sayop mabug-at, mahimo nga tadlungon kita ni Jehova sa pila ka paagi. (Hulubaton 3:​11, 12) Mahimo madumduman naton ang isa ka kasulatan nga nagatublag sang aton konsiensia. Ayhan Ang Lalantawan ukon ang iban pa nga mga publikasyon sang Watch Tower Society mahimo magsambit sing pila ka butang nga makapamarasmas sa aton tuhoy sa sayop. Ukon mahimo nga mainayuhon nga ipatalupangod sang isa ka masigka-Cristiano nga wala naton ginaaplikar ang prinsipio sa Biblia. Ano ang aton reaksion sa amo nga pagtadlong? Si Job nagpakita sing mahinulsulon nga espiritu, nga nagasiling: “Ginabawi ko ang akon ginsiling, kag nagahinulsol ako sa yab-ok kag sa abo.”​—⁠Job 42:⁠6.

Ginpadyaan ni Jehova

Ginpadyaan ni Jehova si Job, gintugutan ang iya alagad nga magkabuhi sing 140 pa ka tuig. Sadtong tion, nakabaton sia sing kapin pa sa nadula niya. Kag walay sapayan nga napatay si Job sang ulihi, nakapat-od sia nga banhawon sa bag-ong kalibutan sang Dios.​—⁠Job 42:​12-​17; Ezequiel 14:14; Juan 5:​28, 29; 2 Pedro 3:​13.

Mapat-od man naton ang kahamuot kag pagpakamaayo sang Dios kon ginaalagad naton sia sing matutom kag ginabaton ang tanan nga pasad-sa-Biblia nga pagtadlong nga magaabot sa aton. Subong resulta, matigayon naton ang pat-od nga paglaum sang kabuhi sa bag-ong sistema sang mga butang sang Dios. Sing labi pa ka importante, mapadunggan naton ang Dios. Ang aton matutom nga paggawi pagapadyaan kag magadugang sa pamatuod nga ang iya katawhan nagaalagad sa iya, indi tungod sa makagod nga mga rason, kundi tungod sa bug-os tagipusuon nga gugma. Daku gid ang aton pribilehiyo nga pahalipayon ang tagipusuon ni Jehova, subong sang ginhimo sang matutom nga si Job, nga mapainubuson nga nagbaton sing pagtadlong!​—⁠Hulubaton 27:⁠11.

[Retrato sa pahina 26]

Nagpakita si Job sing mahigugmaon nga pag-ulikid sa mga ilo, mga balo, kag sa iban pa

[Retrato sa pahina 28]

Ginpadyaan sing bugana si Job tungod sang mapainubuson nga pagbaton sing pagtadlong