‘O Dios, Ipadala ang Imo Kapawa’

“Ipadala ang imo kapawa kag ang imo kamatuoran. Kabay nga tuytuyan nila ako.”​—⁠SALMO 43:⁠3.

1. Paano ginapahayag ni Jehova ang iya mga katuyuan?

SI Jehova tuman ka mapatugsilingon sa kon paano niya ginasugid ang iya mga katuyuan sa iya mga alagad. Sa baylo nga isugid ang tanan nga kamatuoran sa isa lamang ka tion sa makabululag nga pag-iwag sang kapawa, ginapasanagan niya kita sing amat-amat. Ang aton paglakbay sa banas sang kabuhi mahimo mapaanggid sa paglakat sang isa ka tawo sa malawig nga banas. Nagasugod sia sing kaagahon pa kag diutay lamang ang makita. Samtang nagabutlak ang adlaw sing amat-amat sa bulutlakan, maaninaw sang tawo nga nagalakat ang pila ka  butang sa palibot niya. Ang iban pa nga mga butang daw garhom lamang sa iya panan-aw. Apang samtang ang adlaw padayon nga nagataas, makita na niya ang mga butang sa malayo. Amo man sini sa espirituwal nga kapawa nga ginaaman sang Dios. Ginatugutan niya kita nga mahantop ang pila ka butang sa isa ka tion. Ang Anak sang Dios, si Jesucristo, naghatag sing espirituwal nga kasanagan sa kaanggid nga paagi. Binagbinagon naton kon paano ginpasanagan ni Jehova ang iya katawhan sang una nga panahon kag kon paano niya ini ginahimo karon.

2. Paano si Jehova naghatag sing kasanagan sang antes-Cristiano nga mga panahon?

² Ang mga kompositor sang ika-43 nga Salmo mahimo nga mga anak nga lalaki ni Core. Subong mga Levinhon, may pribilehiyo sila sa pagtudlo sang Kasuguan sang Dios sa katawhan. (Malaquias 2:⁠7) Siempre pa, si Jehova amo ang ila Dakung Manunudlo, kag ginatamod nila sia subong ang Tuburan sang tanan nga kaalam. (Isaias 30:20) “O Dios, . . . ipadala ang imo kapawa kag ang imo kamatuoran,” pangamuyo sang salmista. “Kabay nga tuytuyan nila ako.” (Salmo 43:​1, 3) Tubtob ang mga Israelinhon matutom sa iya, gintudluan sila ni Jehova sang iya mga dalanon. Mga siglo sang ulihi, ginkahamut-an sila ni Jehova paagi sa kapawa kag kamatuoran nga may tumalagsahon gid nga sahi. Ginhimo ini sang Dios sang ginpadala niya ang iya Anak sa duta.

3. Sa anong paagi gintilawan ang mga Judiyo paagi sa panudlo ni Jesus?

³ Subong ang tawo nga si Jesucristo, ang Anak sang Dios amo ang “kapawa sang kalibutan.” (Juan 8:12) Gintudluan niya ang katawhan sing “madamo nga butang paagi sa mga ilustrasyon”​—⁠sing bag-ong mga butang. (Marcos 4:⁠2) Ginsilingan niya si Poncio Pilato: “Ang akon ginharian indi bahin sining kalibutan.” (Juan 18:36) Isa yadto ka bag-o nga ideya para sa isa ka Romano kag pat-od gid para sa nasyonalistiko nga mga Judiyo, kay naghunahuna sila nga sakupon sang Mesias ang Romanong Emperyo kag ipasag-uli ang Israel sa iya sini anay himaya. Ginpabanaag ni Jesus ang kapawa gikan kay Jehova, apang ang iya ginsiling wala magpahalipay sa Judiyong mga manuggahom, nga ‘naghigugma sang pagdayaw sang mga tawo sing labi pa sa pagdayaw sang Dios.’ (Juan 12:​42, 43) Madamo sa mga tawo ang nagpili nga manguyapot sa ila tawhanon nga tradisyon sa baylo nga batunon ang espirituwal nga kapawa kag kamatuoran gikan sa Dios.​—⁠Salmo 43:3; Mateo 13:⁠15.

4. Paano naton nahibaluan nga ang mga disipulo ni Jesus padayon nga magauswag sa paghangop?

⁴ Apang, ang pila ka bunayag-sing-tagipusuon nga mga lalaki kag mga babayi malipayon nga nagbaton sang kamatuoran nga gintudlo ni Jesus. Padayon sila nga nag-uswag sa ila paghangop sa mga katuyuan sang Dios. Apang, samtang nagahingapos ang kabuhi sang ila Manunudlo sa duta, madamo pa gihapon sila sing dapat tun-an. Nagsiling si Jesus sa ila: “May madamo pa ako nga butang nga inugsiling sa inyo, apang indi kamo makadala sa ila karon.” (Juan 16:12) Huo, ang mga disipulo dapat magpadayon sa pag-uswag sa paghangop sa kamatuoran sang Dios.

Ang Kapawa Padayon nga Nagaiwag

5. Anong pamangkot ang nag-utwas sang unang siglo, kag sin-o ang may salabton sa paghusay sini?

⁵ Sang napatay kag nabanhaw na si Jesus, ang kapawa gikan sa Dios nag-iwag sing mas masanag sangsa nagligad. Sa isa ka palanan-awon nga ginhatag kay Pedro, ginpahayag ni Jehova nga ang di-sirkunsidado nga mga Gentil mahimo na mangin mga sumulunod ni Cristo sugod karon. (Binuhatan 10:​9-17) Isa yadto ka pagpahayag! Walay sapayan sina, nag-utwas sang ulihi ang isa ka pamangkot: Ginsugo bala ni Jehova ining mga Gentil nga magpasirkunsidar sang nangin mga Cristiano na sila? Yadto nga pamangkot wala masabat sa palanan-awon, kag mainit ini nga ginbaisan sang mga Cristiano. Dapat ini husayon, kay kon indi ang ila hamili nga paghiusa magaluya. Busa, sa Jerusalem, “ang mga apostoles kag ang mga tigulang nga lalaki nagtipon agod husayon ini.”​—⁠Binuhatan 15;1, 2, 6.

6. Ano nga paagi ang ginsunod sang mga apostoles kag sang mga tigulang nga lalaki sang ginhambalan nila ang pamangkot tuhoy sa sirkunsisyon?

⁶ Paano nahibaluan sang mga nagtambong sa sadto nga pagtinipon ang kabubut-on sang Dios para sa tumuluo nga mga Gentil? Si Jehova wala magpadala sing anghel agod pangunahan ang mga paghambalanay, ni ginhatagan niya ang mga nagtambong sing isa ka palanan-awon. Apang, ang mga apostoles kag ang mga tigulang nga lalaki wala ginpabay-an sing bug-os nga wala sing panuytoy. Ginbinagbinag nila ang testimonya gikan sa pila ka Judiyong mga Cristiano nga nakakita kon paano ang Dios nagsugod sa pagpakig-angot sa mga tawo sang mga pungsod, ginpasagahay ang iya balaan nga espiritu sa di-sirkunsidado nga mga Gentil. Gin-usisa man nila ang Kasulatan sa pagpangita sing panuytoy. Subong resulta, naghimo si disipulo Santiago sing isa ka rekomendasyon pasad sa nagapasanag  nga kasulatan. Samtang ginapamalandungan nila ang ebidensia, ang kabubut-on sang Dios nag-athag. Yadtong sa mga pungsod indi kinahanglan magpasirkunsidar agod matigayon ang kahamuot ni Jehova. Ang mga apostoles kag ang iban pa nga mga tigulang nga lalaki wala mag-uyang sing tion sa pagsulat dayon sang desisyon agod ang mga masigka-Cristiano matuytuyan sini.​—⁠Binuhatan 15:​12-29; 16:⁠4.

7. Sa anong paagi progresibo ang unang-siglo nga mga Cristiano?

⁷ Indi kaangay sa Judiyong relihiosong mga lider, nga nanguyapot sa mga tradisyon sang ila mga katigulangan, ang kalabanan nga Judiyong mga Cristiano nagkalipay sang mabaton nila ining tumalagsahon nga bag-ong paghangop sang katuyuan sang Dios may kaangtanan sa katawhan sang mga pungsod, bisan pa nga ang pagbaton sa sini nagkinahanglan sing pagbag-o sa pagtamod tuhoy sa mga Gentil. Ginpakamaayo ni Jehova ang ila mapainubuson nga espiritu, kag “ang mga kongregasyon padayon nga naglig-on sa pagtuo kag nagdugang sa kadamuon adlaw-adlaw.”​—⁠Binuhatan 15:31; 16:⁠5.

8. (a) Paano naton nahibaluan nga ang dugang pa nga kapawa mahimo mapaabot sang matapos na ang unang siglo? (b) Anong may kaangtanan nga mga pamangkot ang binagbinagon naton?

⁸ Ang espirituwal nga kapawa padayon nga nag-iwag sang unang siglo. Apang wala ginsugid ni Jehova ang tanan nga bahin sang iya mga katuyuan sa unang mga Cristiano. Si apostol Pablo nagsiling sa unang-siglo nga mga masigkatumuluo: “Sa karon nakakita kita sing malubog nga balayan paagi sa metal nga salaming.” (1 Corinto 13:12) Ini nga salaming wala sing pinakamaayo nga kadaygan sa pagpabanaag. Kon amo, sang una, ang paghangop sa espirituwal nga kapawa limitado lamang. Sang napatay na ang mga apostoles, ang kapawa nagdulom sa makadali, apang sining ulihi nga mga tion ang Makasulatanhon nga ihibalo nagbugana. (Daniel 12:⁠4) Paano karon ginapasanagan ni Jehova ang iya katawhan? Kag ano ang dapat nga mangin reaksion naton kon ginapasangkad niya ang aton paghangop sa Kasulatan?

Ang Kapawa Amat-amat nga Nagasanag

9. Anong pinasahi kag epektibo nga paagi sang pagtuon sa Biblia ang gingamit sang unang mga Estudyante sang Biblia?

⁹ Sa modernong panahon, ang una gid nga pag-iwag sang kapawa nagsugod sa katapusan nga un-kuwarto nga bahin sang ika-19 nga siglo sang ang isa ka grupo sang Cristianong mga lalaki kag mga babayi hanuot nga nagtuon sang Kasulatan. Naghimo sila sing praktikal nga paagi sa pagtuon sing Biblia. Ang isa nagapautwas sing pamangkot; dayon ang grupo nagatuon sang tanan may kaangtanan nga mga teksto sa Kasulatan. Kon ang isa ka bersikulo sang Biblia daw nagasumpakil sa iban, ginpanikasugan sining sinsero nga mga Cristiano nga ipahisanto ang duha. Indi kaangay sa relihiosong mga  lider sadto, determinado ang mga Estudyante sang Biblia (ang pagkakilala anay sa mga Saksi ni Jehova) nga ang Balaan nga Kasulatan, indi ang tradisyon ukon hinimo-sang-tawo nga doktrina, mangin giya nila. Sa tapos nila mabinagbinag ang tanan matigayon nga pamatuod sa Kasulatan, ginrekord nila ang ila mga konklusion. Sa sina nga paagi ang ila paghangop sa madamong sadsaran nga doktrina sang Biblia nag-athag.

10. Anong mabuligon nga mga bulig sa pagtuon sa Biblia ang ginsulat ni Charles Taze Russell?

¹⁰ Ang talalupangdon sa tunga sang mga Estudyante sang Biblia amo si Charles Taze Russell. Nagsulat sia sing isa ka serye sang anom ka mapuslanon nga mga bulig sa pagtuon sing Biblia nga natig-uluhan Studies in the Scriptures. Tuyo ni Brother Russell nga magsulat sing ikapito nga tomo, nga magapaathag sang mga tulun-an nga Ezequiel kag Bugna sang Biblia. “Kon makita ko na gani ang butang nga magapaathag sini,” siling niya, “sulaton ko ang Ikapito nga Tomo.” Apang, nagsiling pa sia: “Kon ihatag sang Ginuo ang butang nga magapaathag sini sa iban, sarang niya ini masulat.”

11. Ano ang kaangtanan sa ulot sang tiempo kag sang aton paghangop sa mga katuyuan sang Dios?

¹¹ Ang bag-o lang nasambit nga pinamulong ni C. T. Russell nagapakita sang isa ka importante nga bahin sa aton ikasarang sa paghangop sa pila ka teksto sa Biblia​—⁠ang tiempo. Nakahibalo si Brother Russell nga indi niya mapilit ang kapawa sa pag-iwag sa tulun-an sang Bugna kon paano ang isa ka tawo nga nagalakat sing malangkagon indi makauluulo sa adlaw sa pagbutlak antes sang gintalana nga tion sini.

Ginpahayag​—⁠Apang sa Gintalana nga Tion Sang Dios

12. (a) San-o maathagan sing labing maayo ang tagna sang Biblia? (b) Anong halimbawa ang nagapakita nga ang aton ikasarang sa paghangop sa tagna sang Biblia nagasandig sa orasan sang Dios? (Tan-awa ang nota.)

¹² Subong nga nahangpan lamang sang mga apostoles ang madamo nga tagna nahanungod sa Mesias sang napatay kag nabanhaw na si Jesus, nahangpan karon sang mga Cristiano ang tagna sang Biblia sing detalyado gid pagkatapos ini matuman. (Lucas 24:​15, 27; Binuhatan 1:​15-21; 4:​26, 27) Ang Bugna isa ka matagnaon nga libro, gani mapaabot naton nga mahangpan ini sing labing maayo samtang ang mga hitabo nga ginalaragway sini nagakatuman. Halimbawa, mahimo nga wala mahangpan sing husto ni C. T. Russell ang kahulugan sang simbuliko nga duag-eskarlata nga sapat nga mapintas nga ginsambit sa Bugna 17:​9-11, kay nagluntad lamang ang mga organisasyon nga ginatiglawas sang sapat, nga amo, ang Liga de Nasyones kag ang Nasyones Unidas, sang patay na sia. *

13. Ano kon kaisa ang nagakatabo kon ginapaiwag ang kapawa sa isa ka topiko sang Biblia?

¹³ Sang mahibal-an sang unang mga Cristiano nga ang di-sirkunsidado nga mga Gentil mahimo na mangin mga masigkatumuluo, yadto nga pagbalhin nagdul-ong sa isa ka bag-ong pamangkot tuhoy sa kon bala ang katawhan sang mga pungsod kinahanglan magpasirkunsidar. Nagpahulag ini sa mga apostoles kag sa iban pa nga mga tigulang nga lalaki nga usisaon liwat ang bug-os nga problema tuhoy sa sirkunsisyon. Amo gihapon nga pagsulundan ang ginahimo karon. Ang masanag nga pag-iwag sang kapawa sa isa ka topiko sa Biblia nagatuytoy kon kaisa sa hinaplas nga mga alagad sang Dios, “ang matutom kag mainandamon nga ulipon,” nga usisaon liwat ang may kaangtanan nga mga topiko, subong sang ginapakita sang masunod nga halimbawa sining ulihi lang.​—⁠Mateo 24:⁠45.

14-16. Paano ang pagbag-o sa aton pagtamod nahanungod sa espirituwal nga templo nagaapektar sang aton paghangop sa Ezequiel kapitulo 40 tubtob 48?

¹⁴ Sang 1971 ang paathag tuhoy sa tagna ni Ezequiel ginbalhag sa libro nga “The Nations Shall Know That I Am Jehovah”​—⁠How? Ang isa ka kapitulo sina nga libro nagapaathag sing malip-ot sang palanan-awon ni Ezequiel tuhoy sa isa ka templo. (Ezequiel, kapitulo 40 tubtob 48) Sadto, ang igtalupangod natuon sa kon paano ang palanan-awon ni Ezequiel tuhoy sa templo matuman sa bag-ong kalibutan.​—⁠2 Pedro 3:⁠13.

¹⁵ Apang, naapektuhan ang aton paghangop tuhoy sa palanan-awon ni Ezequiel sang duha ka artikulo nga ginbalhag sa Ang Lalantawan sang Hunyo 1, 1973. Ginbinagbinag sini ang dakung espirituwal nga templo nga ginlaragway ni apostol Pablo sa Hebreo kapitulo 10. Ginpaathag sang Ang  Lalantawan nga ang Balaan nga hulot kag ang nasulod nga luwang sang espirituwal nga templo nagapatuhoy sa kahimtangan sang mga hinaplas samtang yari sila sa duta. Sang ang Ezequiel kapitulo 40-48 ginrepaso mga tinuig sang ulihi, nahantop nga subong nga ang espirituwal nga templo nagapanghikot karon, ang templo nga nakita ni Ezequiel sa palanan-awon dapat nga nagapanghikot man karon. Paano?

¹⁶ Sa palanan-awon ni Ezequiel, ang mga saserdote nakita nga nagapakadto-pakari sa mga luwang sang templo samtang nagaalagad sila sa di-saserdotenhon nga mga tribo. Ining mga saserdote maathag nga nagatiglawas sa “harianon nga pagkasaserdote,” ang hinaplas nga mga alagad ni Jehova. (1 Pedro 2:⁠9) Apang, indi sila magaalagad sa dutan-on nga luwang sang templo sa bug-os nga Isa ka Libo ka Tuig nga Paggahom ni Cristo. (Bugna 20:⁠4) Sa kalabanan nga bahin sina nga tion, kon indi man tanan sini, ang mga hinaplas magaalagad sa Dios sa Labing Balaan sang espirituwal nga templo, “sa langit mismo.” (Hebreo 9:24) Sanglit ang mga saserdote nakita nga nagapakadto-pakari sa mga luwang sang templo ni Ezequiel, yadto nga palanan-awon mahimo gid nga nagakatuman karon, samtang ang iban sang mga hinaplas yari pa sa duta. Sing nahisuno, ginpakita sang Marso 1, 1999, nga guwa sining magasin ang bag-o nga pagtamod sa sining topiko. Sa amo, tubtob sa katapusan sang ika-20 nga siglo, ang espirituwal nga kapawa nag-iwag sa tagna ni Ezequiel.

Mangin Handa sa Pagpasibu Sang Inyo Pagtamod

17. Anong mga pagpasibu sa personal nga pagtamod ang ginhimo mo sugod sang makadangat sa ihibalo sang kamatuoran, kag paano ini nakabulig sa imo?

¹⁷ Ang bisan sin-o nga luyag makadangat sa ihibalo sang kamatuoran dapat mangin handa sa pagdala sang “tagsa ka panghunahuna sa pagkabihag agod himuon ini nga matinumanon kay Cristo.” (2 Corinto 10:⁠5) Indi ina pirme mahapos, ilabi na kon ang mga pagtamod madugay na nga ginapatihan. Halimbawa, antes matun-an ang kamatuoran sang Dios, ayhan nalipay ka sa pagsaulog sang pila ka relihiosong mga selebrasyon kaupod sang imo pamilya. Sang nagsugod ka sa pagtuon sa Biblia, nahangpan mo nga ining mga selebrasyon may pagano gali nga ginhalinan. Sa primero, ayhan nagaalang-alang ka sa pag-aplikar sang imo natun-an. Apang, sa katapusan, ang gugma sa Dios napamatud-an nga mas mabaskog sangsa relihioso nga sentimiento, kag nag-untat ka sa pagsaulog sa mga selebrasyon nga wala nagapahamuot sa Dios. Wala bala ginpakamaayo ni Jehova ang imo desisyon?​—⁠Ipaanggid ang Hebreo 11:⁠25.

18. Ano ang dapat nga mangin reaksion naton kon ginaathag ang aton paghangop sa kamatuoran sang Biblia?

¹⁸ Pirme kita nagapanginpulos paagi sa paghimo sang mga butang sa paagi sang Dios. (Isaias 48:​17, 18) Gani kon ang aton pagtamod sa isa ka teksto sa Biblia ginapaathag, magkalipay kita sa nagauswag nga kamatuoran! Sa pagkamatuod, ang padayon nga pagpasanag sa aton nagapamatuod nga yara kita sa husto nga banas. Ini amo ang “banas sang mga matarong,” nga “kaangay sang masanag nga kapawa nga nagasanag kag nagasanag tubtob sa himpit nga adlaw.” (Hulubaton 4:18) Matuod, “buron” sa karon ang aton panan-aw sa pila ka bahin sang katuyuan sang Dios. Apang kon mag-abot ang gintalana nga tion sang Dios, makita naton ang kamatuoran sa bug-os nga katahom sini, basta ang aton mga tiil nagapabilin nga nagadapat sing malig-on sa “banas.” Sa karon, kabay nga magkalipay kita sa mga kamatuoran nga gin-athag ni Jehova, nagahulat sing kasanagan sa mga wala pa mahangpan sing maathag.

19. Ano ang isa ka paagi sa pagpakita nga ginahigugma naton ang kamatuoran?

¹⁹ Paano naton mapakita ang aton gugma sa kapawa sa praktikal nga paagi? Ang isa ka paagi amo ang pagbasa sa Pulong sang Dios sing regular​—⁠sa adlaw-adlaw kon mahimo. Ginasunod mo bala ang isa ka regular nga programa sang pagbasa sing Biblia? Ang Lalantawan kag Magmata! nga mga magasin nagahatag man sa aton sing bugana nga espirituwal  nga pagkaon. Binagbinaga, man, ang mga libro, mga brosyur, kag iban pa nga mga publikasyon nga ginhanda para sa aton kaayuhan. Kag kamusta naman ang makapalig-on nga mga report sang mga hilikuton sa pagbantala nga ginabalhag sa Yearbook of Jehovah’s Witnesses?

20. Ano ang kaangtanan sa ulot sang kapawa kag kamatuoran gikan kay Jehova kag sang aton pagtambong sa Cristianong mga miting?

²⁰ Huo, ginsabat ni Jehova sa makalilipay nga paagi ang pangamuyo nga ginpabutyag sa Salmo 43:⁠3. Sa katapusan sina nga bersikulo, aton mabasa: “Kabay nga dalhon ako [sang imo kapawa kag kamatuoran] sa imo balaan nga bukid kag sa imo halangdon nga tabernakulo.” Ginahulat mo bala sing malangkagon ang pagsimba kay Jehova, upod sang kadam-an pa nga iban? Ang espirituwal nga panudlo nga ginahatag sa aton mga miting isa ka importante nga paagi nga si Jehova nagahatag sing kasanagan karon. Ano ang himuon naton agod madugangan pa sing labi ang aton apresasyon sa Cristianong mga miting? Ginaagda namon ikaw nga binagbinagon sing mapangamuyuon ini nga topiko sa masunod nga artikulo.

[Nota]

Masabat Mo Bala?

• Ngaa ginapahayag ni Jehova ang iya katuyuan sing amat-amat?

• Paano ginhusay sang mga apostoles kag sang mga tigulang nga lalaki sa Jerusalem ang problema tuhoy sa sirkunsisyon?

• Anong paagi sang pagtuon sa Biblia ang ginhimo sang mga Estudyante sang Biblia, kag ngaa pinasahi ini?

• Ipakita kon paano ang espirituwal nga kapawa ginapahayag sa gintalana nga tion sang Dios.

[Mga Pamangkot sa Pagtinuon]

[Retrato sa pahina 12]

Nahibaluan ni Charles Taze Russell nga magaiwag ang kapawa sa tulun-an sang Bugna sa gintalana nga tion sang Dios