Report sang mga Manugbantala sang Ginharian

“Madamo Gid Kamo sing Nahibaluan sa Biblia”

SANG ang 12-anyos nga si Jesus maisugon nga nakighambal sa relihioso nga mga lider sa Jerusalem, “ang tanan nga nagapamati sa iya padayon nga natingala sa iya paghangop kag sa iya mga sabat.” (Lucas 2:47) Amo man sa karon, madamong lamharon nga alagad ni Jehova ang nakatigayon sing kaisog sa pagpakighambal sa ila mga manunudlo kag mga kabutho tuhoy sa Dios kag sa Biblia, kag sa masami nakaeksperiensia sila sing makalilipay nga mga resulta.

Si Tiffany, 14 anyos, yara sa isa ka klase diin ginhambalan ang tagna sang Biblia tuhoy sa 70 ka semana sang mga tuig, nga makita sa Daniel 9:​24-​27. Naghatag ang maestro sing pila ka impormasyon tuhoy sa mga bersikulo kag pasapayan lamang nga ginpaathag ang topiko.

Sang primero, nangalag-ag si Tiffany sa pagbayaw sang iya kamot. “Apang tungod sa pila ka rason,” siling niya, “natublag gid ako nga ang mga bersikulo wala mapaathag sing maayo. Sa hingalagan, ginbayaw ko ang akon kamot.” Natingala ang maestro nga may isa gali nga may masiling tuhoy sa topiko, bangod ang kalabanan sang mga estudyante nabudlayan sa paghangop sini.

Ginhatagan sing kahigayunan sa pagpaathag sang tagna, nagtindog si Tiffany kag naghambal sing indi handa. Sang makatapos na sia, mahipos gid kaayo ang hulot klasehan. Medyo kinulbaan si Tiffany. Nian madugay nga nagpalakpak ang klase.

“Dalayawon gid ina, Tiffany, dalayawon gid ina,” sulitsulit nga siling sang maestro. Ginbaton niya nga nahibaluan niya nga may labi pa sa sadto nga mga bersikulo, apang si Tiffany amo ang una nga nakapaathag sini sa iya sing maayo. Pagkatapos sang klase, ginpamangkot niya si Tiffany kon ngaa madamo sia sing nahibaluan sa Biblia.

“Ini bangod isa ako sang mga Saksi ni Jehova,” sabat niya. “Ginpaathag sa akon sang akon mga ginikanan ina nga tagna sing pila ka beses antes ko mahangpan ini.”

Natingala man ang iya mga kabutho sa iya ihibalo sa Biblia. Ang isa ka estudyante nagsiling kay Tiffany: “Nahibaluan ko na karon kon ngaa kamo nga mga Saksi ni Jehova nagapamalaybalay; ina bangod madamo gid kamo sing nahibaluan sa Biblia.” Ang iban nagsaad nga indi na nila sia pagsunlugon tuhoy sa iya mga pagpati.

Sang ginsugiran ni Tiffany ang iya mga ginikanan sang iya eksperiensia, nagpanugyan sila nga tanyagan niya sing Ang Ihibalo nga Nagadul-ong sa Kabuhi nga Walay Katapusan ang iya maestro. Sang ginhimo niya ini kag ginpakita sa maestro ang bahin nga nagapaathag sang tagna ni Daniel, ginbaton niya dayon ang libro kag nagpasalamat sa sini.

Sa pagkamatuod, kon maghambal sing maisugon ang Cristianong mga pamatan-on tuhoy sa gintudlo sa ila sang ila mga ginikanan sa Dios kag sa Biblia, nagahatag sila sing kadayawan kag kadungganan kay Jehova kag sing mga pagpakamaayo sa ila kaugalingon.​—⁠Mateo 21:​15, 16.