Inyo Bala Ginarekomendar ang Inyo Kaugalingon sa Iban?

‘Wala sing kabilinggan sa akon kon ano ang ginahunahuna sang iban!’ Sa tion sang kaakig ukon kaugot, ayhan nasapwan mo ang imo kaugalingon nga nagasiling sini sing maisugon. Apang kon magtahaw na ang kaakig, mahimo mabalaka gid ikaw. Ngaa? Bangod kalabanan sa aton nabalaka gid kon ano ang ginahunahuna sang iban sa aton.

SA PAGKAMATUOD, dapat mabalaka kita sa mga balatyagon sang iban. Ilabi na gid kita subong mga Cristiano, ordenado nga mga ministro ni Jehova nga Dios, dapat may nagakaigo nga kabalaka kon paano kita ginatamod sang iban. Kay man, kita “talan-awon sang kalibutan.” (1 Corinto 4:9) Sa 2 Corinto 6:​3, 4, masapwan naton ang maayong laygay ni apostol Pablo: “Sa bisan ano nga paagi wala kami nagahatag sing bisan ano nga kasandaran, agod nga ang amon ministeryo indi makitaan sing sayop; apang sa tagsa ka paagi ginarekomendar namon ang amon kaugalingon subong mga ministro sang Dios.”

Apang, ano ang buot silingon nga irekomendar naton ang aton kaugalingon sa iban? Nagakahulugan bala ini nga ipadayaw ang aton kaugalingon ukon hatagan sing indi nagakadapat nga atension ang aton kaugalingon kag ang aton mga ikasarang? Indi. Kundi nagakinahanglan ini sang pag-aplikar sang mga pulong sa 1 Pedro 2:​12: “Hupti ang inyo maayong pagginawi sa tunga sang mga pungsod, agod . . . sila subong resulta sang inyo maayong binuhatan nga ila nasaksihan magahimaya sa Dios.” Ginarekomendar sang mga Cristiano ang ila kaugalingon paagi sa ila paggawi! Sa ulihi, magadala ini sing kadayawan, indi sa aton, kundi sa Dios. Walay sapayan, ang pagrekomendar sang aton kaugalingon sa iban may personal nga mga benepisyo man. Usisaon naton ang tatlo ka bahin nga mangin matuod ini sa inyo.

Subong Isa ka Tiayon sa Ulihi

Binagbinaga, subong halimbawa, ang butang tuhoy sa pagminyo. Dulot ini gikan kay Jehova nga  Dios, ang isa nga “ang tagsa ka pamilya sa langit kag sa duta utang ang ngalan sini.” (Efeso 3:15) Ayhan handum mo nga magminyo sa pila ka adlaw. Kon amo, tubtob sa anong kasangkaron ginarekomendar mo ang imo kaugalingon subong maayo nga tiayon? Huo, ano ang imo reputasyon subong di-minyo nga Cristianong lalaki ukon babayi?

Sa pila ka kadutaan interesado gid sa sini ang mga pamilya. Halimbawa, kon ang duha ka tawo sa Ghana luyag magminyo, kinabatasan na para sa mga manugpangasawa nga pahibaluon ang ila mga ginikanan. Sila naman ang magapahibalo sa bug-os nga pamilya. Nian ang pamilya sang lalaki magapat-od kon ano ang reputasyon sang babayi sa kasilingan. Kon makumbinsi ang mga ginikanan nga bagay ang babayi, pahibaluon nila ang pamilya sang babayi sa tuyo sang ila anak nga lalaki nga pangasaw-on ang ila anak nga babayi. Usisaon naman karon sang pamilya sang babayi kon ano ang reputasyon sang lalaki antes magpasugot sa pagpakasal. Sa amo ang hulubaton sa Ghana nagasiling, “Pamangkuta yadtong nakakilala sang imo palangasaw-on ukon pamanahon antes ka magpakasal.”

Kamusta naman sa Nakatundan nga kadutaan, diin ang mga indibiduwal kinaandan na nga amo ang ginatugutan sa pagpili sang ila mangin tiayon? Bisan didto, maalamon para sa isa ka hamtong nga Cristiano nga lalaki ukon babayi nga pangayuon ang isa ka bunayag nga rekomendasyon gikan sa mga nakakilala sing maayo sa iya palangasaw-on ukon pamanahon, subong sang mga ginikanan ukon hamtong nga mga abyan. Suno sa libro nga Ang Sekreto sang Kalipay sa Pamilya, ang isa ka lamharon nga babayi mahimo mamangkot: “ ‘Ano ang reputasyon sining lalaki? Sin-o ang iya mga abyan? Nagapakita bala sia sing pagpugong sa kaugalingon? Paano niya ginapakig-angutan ang mga tigulang? Ano nga sahi sang pamilya ang iya ginhalinan? Ano ang relasyon niya sa ila? Ano ang panimuot niya sa kuwarta? Palainom bala sia? Mainiton bala sia, kag mapintas pa gani? Ano ang iya mga salabton sa kongregasyon, kag paano niya ginatuman ini? Matahod ko bala sia sing tudok?’​​—⁠Levitico 19:​32; Hulubaton 22:​29; 31:​23; Efeso 5:​3-5, 33; 1 Timoteo 5:​8; 6:​10; Tito 2:​6, 7.”⁠ *

Mahimo man mamangkot ang lalaki tuhoy sa bisan sin-o nga Cristianong babayi nga ginahunahuna niya nga pangasaw-on. Suno sa Biblia, nangin interesado si Boaz kay Rut, ang babayi nga ginpangasawa niya sang ulihi. Sang namangkot si Rut: “Paano nga nahamut-an mo ako, kay isa ako ka dumuluong?” Si Boaz nagsiling: “Ginhatag ang bug-os nga report sa akon sa tanan mo nga ginhimo.” (Rut 2:​10-12) Huo, wala lamang matalupangdan ni Boaz nga si Rut isa ka matutom, dedikado, kag mapisan nga babayi kundi nakabaton man sia sing maayo nga mga komento gikan sa iban.

Sing kaanggid, ang imo paggawi may epekto sa pagtamod sang iban kon bala isa ikaw ka maayo nga tiayon. Paano gid bala nimo ginarekomendar ang imo kaugalingon sa iban may kaangtanan sini?

Subong Isa ka Empleyado

Ang ulubrahan isa pa ka duog diin ang paghupot sing maayo nga paggawi mangin sa imo kaayuhan. Mahimo mabaskog ang kompetisyon sa trabaho. Ang mga empleyado nga kilala nga wala nagapasakop, pirme ulihi, kag di-bunayag masami nga ginapahalin. Mahimo man pahalinon sang  kompanya ang eksperiensiado nga mga empleyado agod makakinot. Kon ang mga wala sing trabaho mangita sing bag-o nga mga trabaho, mahimo masapwan nila nga ang mga kompanya magapamangkot sa nagligad nila nga mga amo agod pat-uron ang ila mga batasan, panimuot, kag eksperiensia sa trabaho. Madamo nga Cristiano ang madinalag-on nga nagrekomendar sang ila kaugalingon sa ila mga amo paagi sa ila matinahuron nga panimuot, maugdang nga pamayo, maayo nga batasan, kag pinasahi nga Cristianong mga kinaiya.

Ang pagkabunayag subong sina nga kinaiya​—⁠isa nga ginahatagan sing mataas nga prioridad sang madamo nga amo. Kaangay ni apostol Pablo, luyag naton nga “maggawi sing bunayag sa tanan nga butang.” (Hebreo 13:18) Sa isa ka kompanya sang minahan sa Ghana, ginreport ang pagpalapaw. Nahuptan sang superbisor sa planta, nga isa ka Saksi, ang iya trabaho samtang ang iban ginpahalin. Ngaa? Nakita sang tagdumalahan sa sulod sang mga tinuig ang iya pagkabunayag. Ang iya kapisan kag pagtahod sa kasuguan nabantugan man. Huo, ang iya matarong nga paggawi nag-amlig sa iya trabaho!

Ano ang pila pa ka butang nga sarang mahimo sang isa ka Cristiano agod marekomendar niya ang iya kaugalingon sa trabaho? Tun-i nga mangin lantip sa bisan ano nga trabaho nga ginapaobra sa imo. (Hulubaton 22:29) Magtrabaho sing mapisan kag maukod. (Hulubaton 10:​4; 13:4) Tahura ang imo amo kag superbisor sa trabaho. (Efeso 6:5) Ang pag-abot sing temprano, pagkabunayag, kalantip, kag kapisan amo ang mga kinaiya nga naluyagan sang mga amo, kag yadtong mga kinaiya makabulig sa imo nga makakita sing trabaho bisan malaka ang palamugnan.

Mga Pribilehiyo sa Kongregasyon

Kinahanglanon labi na karon ang hamtong nga mga lalaki sa pagpanguna sa Cristianong kongregasyon. Ang rason? Si Isaias nagtagna: “Palapara ang imo kayangkayang. Kag pasangkara ang mga layanglayang sang imo daku nga tabernakulo.” (Isaias 54:2) Sa katumanan sini nga tagna, ang kongregasyon ni Jehova sa bug-os nga kalibutan nagapadayon sa pag-uswag.

Busa kon isa ikaw ka Cristianong lalaki, paano mo marekomendar ang imo kaugalingon subong kalipikado sa tinangduan nga palangakuan? Binagbinaga ang halimbawa sang pamatan-on nga lalaki nga si Timoteo. Ginreport ni Lucas nga si Timoteo “ginrekomendar sing maayo sang mga kauturan sa Listra kag Iconio.” Huo, paagi sa iya maayo nga paggawi, ining pamatan-on nga lalaki nagrekomendar sang iya kaugalingon sa iban sa duha ka siudad. Busa gin-agda ni Pablo si Timoteo nga mag-upod sa iya sa nagalakbay nga ministeryo.​—⁠Binuhatan 16:​1-4.

Paano ang isa ka tawo karon ‘makatinguha sang palangakuan sang pagkamanugtatap’ sa isa ka nagakaigo, diosnon nga paagi? Pat-od nga indi paagi sa pagkampanya agod matangdo kundi paagi sa pagpalambo sang espirituwal nga mga kinaiya nga kinahanglanon sa sina nga mga responsabilidad. (1 Timoteo 3:​1-​10, 12, 13; Tito 1:​5-9) Mapakita man niya nga sia “maluyag sing maayong hilikuton” paagi sa pagpakigbahin sing bug-os sa pagbantala kag sa paghimo-sing-disipulo nga hilikuton. (Mateo 24:​14; 28:​19, 20) Yadtong nagarekomendar sang ila kaugalingon subong responsable nga Cristianong mga lalaki nagapakita sing sinsero nga interes sa kaayuhan sang ila espirituwal nga mga kauturan. Ginasunod nila ang laygay ni apostol Pablo: “Magpaambit sa mga balaan suno sa ila kinahanglanon. Magmaabiabihon.” (Roma 12:13) Paagi sa paghimo sini nga mga butang, ang isa ka Cristianong lalaki sa pagkamatuod ‘nagarekomendar sang iya kaugalingon subong ministro sang Dios.’

Sa Tanan nga Tion

Ang pagrekomendar sang aton kaugalingon sa iban wala nagakahulugan nga magpakunokuno ukon mangin “manugpahamuot sang mga tawo.” (Efeso 6:6) Nagakahulugan gid ini sang pagrekomendar sang aton kaugalingon sa aton Manunuga, si Jehova nga Dios, paagi sa pagsunod sing matutom sang iya mga kasuguan kag mga prinsipio. Kon napalambo mo ang imo espirituwalidad kag napalig-on ang imo relasyon kay Jehova nga Dios, makita sang iban ang pag-uswag sa kon paano mo ginapakig-angutan ang mga miembro sang imo pamilya, mga kaupod sa trabaho, kag mga masigka-Cristiano. Makita man nila ang imo kapag-on kag pagkabalanse, ang imo maayo nga paghantop, ang imo ikasarang sa pag-atipan sang responsabilidad, kag ang imo pagkamapainubuson. Matigayon mo ang ila gugma kag pagtahod sa imo kag, ang mas importante, matigayon mo ang kahamuot ni Jehova nga Dios bangod ginarekomendar mo ang imo kaugalingon sa iban!

[Nota]

[Retrato sa pahina 19]

Madamo nga ginikanan ang maalamon nga nagapulupamangkot kon ano ang reputasyon sang isa nga luyag pangasaw-on ukon pamanahon sang ila anak

[Retrato sa pahina 20]

Ginrekomendar sang isa ka utod nga lalaki ang iya kaugalingon sa mga pribilehiyo sang pag-alagad paagi sa pagpatugsiling sa iban