Madumduman Mo Bala?

Naapresyar mo bala ang pagbasa sing bag-o nga mga isyu sang Ang Lalantawan? Bueno, tan-awa kon masabat mo ang masunod nga mga pamangkot:

• Ano ang nagpahapos agod batunon ang Krismas sa Korea?

May pagpati sang una sa Korea kag sa iban pa nga mga kadutaan tuhoy sa isa ka dios sang kusina nga ginapatihan nga nagaagi sa simburyo kag nagadala sing mga dulot kon Disiembre. Subong man, sa tapos sang Bug-os Kalibutan nga Inaway II, ang mga soldado sang Estados Unidos nagpanagtag sing mga regalo kag mga bulig sa lokal nga mga simbahan.​—⁠12/15, pahina 4, 5.

• Sa katumanan sang Isaias 21:​8, sin-o ang “manugbantay” sang Dios sa aton tion?

Ang hinaplas-sang-espiritu nga mga Cristiano, nga nagaalagad subong manugbantay nga klase, nagpaalisto sa katawhan sang kahulugan sang mga hitabo sa kalibutan nga nagatuman sang tagna sang Biblia. Ginbuligan man nila ang mga estudyante sang Biblia sa pagkilala kag sa paglikaw sa di-makasulatanhon nga mga doktrina kag mga buhat.​—⁠1/1, pahina 8, 9.

• Sin-o ang mga “Polish Brethren”?

Isa sila ka diutay relihioso nga grupo sang ika-16 kag ika-17 nga siglo sa Poland nga nagpalig-on sang pagsunod sa Biblia kag busa nagsikway sang nagapanguna nga mga doktrina sang simbahan, subong sang Trinidad, pagbunyag sa lapsag, kag kalayuhon nga impierno. Sang ulihi, ginhingabot sila sing grabe kag napilitan nga maglapta sa iban nga kadutaan.​—⁠1/1, pahina 21-3.

• Ngaa ang mga tagna sang Biblia ang dapat saligan sangsa mga pakotpakot sang mga futurologist ukon mga astrologo?

Ang tawhanon nga mga kuno-propeta napamatud-an nga indi masaligan bangod ginsikway nila si Jehova kag ang Biblia. Ang mga tagna lamang sang Biblia ang makabulig sa imo nga mahibaluan kon paano ang mga hitabo nagasibu sa katuyuan sang Dios, nga makahatag sing benepisyo sa imo kag sa imo pamilya sing dayon.​—⁠1/15, pahina 3.

• Ano ang pila ka pamatuod nga nagakabuhi kita sa katapusan nga mga adlaw?

Makita naton ang mga epekto sang pagtabog kay Satanas gikan sa langit. (Bugna 12:9) Nagakabuhi kita sa tion sang katapusan nga “hari” nga ginsambit sa Bugna 17:​9-11. Ang kadamuon sang matuod hinaplas nga mga Cristiano nagadiutay, apang ang pila sa ila mahimo nga yari pa gihapon sa duta kon magsugod ang dakung kapipit-an.​—⁠1/15, pahina 12, 13.

• San-o ginsulat ang tulun-an nga Habakuk, kag ngaa dapat kita mangin interesado sa sini?

Ining tulun-an sang Biblia ginsulat sang mga 628 B.⁠C.⁠E. Nagaunod ini sing paghukom ni Jehova batok sa dumaan nga Juda kag batok sa Babilonia. Ginabinagbinag man sini ang paghukom sang Dios nga magaabot sa dili madugay sa malaut nga sistema karon.​—⁠2/1, pahina 8.

• Diin sa Biblia naton masapwan ang maalamon nga laygay sang isa ka iloy para sa sangkol nga mga asawa?

Ang katapusan nga kapitulo sang tulun-an sang Hulubaton, ang kapitulo 31, isa ka labing maayo nga tuburan sina nga laygay.​—⁠2/1, pahina 30, 31.

• Ngaa mapinasalamaton kita nga ginpahayag ni Jehova sa aton ang “hunahuna ni Cristo”? (1 Corinto 2:16)

Paagi sa rekord sang Ebanghelyo, ginpaposible ni Jehova nga mahibaluan naton ang mga panghunahuna, balatyagon, hilikuton, kag prioridad ni Jesus. Makabulig ini sa aton nga mangin labi nga kaangay kay Jesus, ilabi na sa pagpadaku nga ginahatag naton sa nagaluwas kabuhi nga pagbantala nga hilikuton.​—⁠2/15, pahina 25.

• Ginasabat bala sang Dios ang mga pangamuyo karon?

Huo. Bisan pa nga ginapakita sang Biblia nga indi tanan nga pangamuyo ginasabat sang Dios, ang modernong-adlaw nga mga eksperiensia nagapamatuod nga sa masami ginasabat niya ang katawhan nga nangamuyo para sa paumpaw kag bulig sa mga butang subong sang paglubad sa mga problema sa pag-asawahay.​—⁠3/1, pahina 3-7.

• Ano ang aton mahimo agod matigayon ang kusog sang Dios?

Mapangabay naton ini sa pangamuyo, makakuha sing espirituwal nga kusog sa Biblia, kag mapalig-on paagi sa Cristianong pagpakig-upod.​—⁠3/1, pahina 15, 16.

• Paano mabuligan sang mga ginikanan ang ila kabataan nga makabenepisyo sing kapin gikan sa Cristianong mga miting?

Mabuligan nila ang ila kabataan nga magpabilin nga nagamata, ayhan paagi sa pagpapiyongpiyong anay sa ila antes ang miting. Mapalig-on ang kabataan nga magkuha sing “mga nota,” subong sang pagmarka sa papel sa kada paggamit sang pamilyar nga mga tinaga ukon mga ngalan.​—⁠3/15, pahina 17, 18.

• Ano ang pila ka butang nga aton matun-an gikan sa halimbawa ni Job?

Gin-una ni Job ang iya relasyon sa Dios, wala sia sing pinilian sa pagpakig-angot sa iya mga isigkatawo, nagtinguha sia nga mangin matutom sa iya asawa, nagpakita sia sing kabalaka sa espirituwalidad sang iya pamilya, kag nagpabilin sia nga matutom sa idalom sang pagtilaw.​—⁠3/15, pahina 25-7.

• Nagaunod bala ang Biblia sing natago nga kodigo nga nagahatag sing kahulugan sa makalilibog nga mga mensahe?

Wala. Ang mga pangangkon tuhoy sa natago kuno nga kodigo sarang man mahimo sa pila ka sekular nga mga libro. Ang ginasiling nga mga kodigo sa Biblia mahimo makabig nga wala sing pulos bangod sang pagkananuhaytuhay sang tigbato sa Hebreong mga manuskrito.​—⁠4/1, pahina 30, 31.