Mga Pamangkot Gikan sa mga Bumalasa

Tatlo sa mga Ebanghelyo ang nagasaysay sang reklamo tuhoy sa paghaplas kay Jesus sing malahalon nga lana. Madamo bala nga apostoles ang nagreklamo, ukon si Judas lamang?

Masapwan naton ining hitabo nga ginsaysay sa mga Ebanghelyo nanday Mateo, Marcos, kag Juan. Daw si Judas ang nanguna sa pagreklamo, kag nian sa di-magkubos nag-ugyon sa iya ang iban nga mga apostoles. Ginapakita sining hitabo kon ngaa dapat kita magpasalamat nga may yara kita apat ka kasaysayan sang Ebanghelyo. Ang ginsulat sang tagsa ka manunulat sibu, apang indi tanan naghatag sing pareho nga mga detalye. Sa pagpaanggid sa pareho nga mga kasaysayan, matigayon naton ang mas masangkad, mas detalyado nga pagtamod sa madamo nga hitabo.

Ginahatag sang kasaysayan sa Mateo 26:​6-13 ang lokasyon​—⁠ang balay ni Simon nga aruon, sa Betania⁠—apang wala maghingalan sang babayi nga nagbubo sing mahumot nga lana sa ulo ni Jesus. Si Mateo nagsiling: “Sang makita ini ang mga disipulo naakig” kag nagreklamo nga ginbaligya na lang kuntani ang lana kag ginhatag ang kuwarta sa mga imol.

Ang kasaysayan ni Marcos nagalakip sang kalabanan sadtong mga detalye. Apang nagdugang pa sia nga ginbuong niya [sang babayi] ang suludlan. Nagaunod ini sang mahumot nga lana nga “tunay nga nardo,” subong sang mahimo nga naghalin sa India. Tuhoy sa reklamo, nagreport si Marcos nga “may pila nga nagsingkal,” kag “nagbatyag sila sing daku nga kaugot sa iya.” (Marcos 14:​3-9) Gani, ginapakita sang duha ka kasaysayan nga kapin sa isa ka apostoles ang nadalahig sa pagreklamo. Apang paano ini nagsugod?

Si Juan, nga nakasaksi mismo, nagdugang sing mga detalye may kaangtanan sini. Ginhingadlan niya ang babayi​—⁠si Maria, nga utod nanday Marta kag Lazaro. Ginhatag man ni Juan ini nga detalye, nga makabig naton subong paghatag sa kon ano ang kulang sa baylo nga pagsumpakil: “Ginhaplasan niya ang mga tiil ni Jesus kag ginpahiran ang iya mga tiil sang iya buhok.” Sa pagtingob sa mga kasaysayan, makita naton nga mahimo nga ginbubo ni Maria ang lana, nga ginpamatud-an ni Juan nga “tunay nga nardo,” sa ulo kag mga tiil ni Jesus. Suod gid si Juan kay Jesus kag may huyog nga maakig sa mga pag-insulto sa Iya. Aton mabasa: “Si Judas Iscariote, isa sang iya mga disipulo, nga buot na magluib sa iya, nagsiling: “Ngaa ining mahumot nga lana wala ginbaligya sa tatlo ka gatos ka denario kag ihatag sa imol nga mga tawo?’ ”​—⁠Juan 12:​2-8.

Sa pagkamatuod, si Judas “isa sang iya mga disipulo,” apang mamutikan mo ang kaakig ni Juan nga may isa sa sining katungdanan nga nagaplano sa pagluib kay Jesus. Ang manugbadbad nga si Dr. C. Howard Matheny nagsiling tuhoy sa Juan 12:​4: “Ang present participle ‘nga buot’ [ukon, “buot na”] kag ang present infinitive nga ‘pagaluiban’ [ukon, “buot na magluib”] lunsay nagapabutyag sing alagisod ukon dalayon nga buhat. Ginapakita sini nga ang pagluib ni Judas kay Jesus indi isa ka umalagi nga buhat nga ginhimo sing hinali lang kay ini ginpamensaran kag ginplano sa sulod sang madamo nga adlaw.” Nagdugang pa si Juan sing paghantop nga nagreklamo si Judas “indi bangod nabalaka sia sa mga imol, kundi bangod makawat sia kag yara sa iya ang kahon sang kuwarta kag ginakuha ang mga kuwarta nga ginabutang sa sini.”

Daw makatarunganon kon amo nga ang makawat nga si Judas nagsugod sang pagreklamo bangod madamo sia kuntani sing makawat kon ang malahalon nga lana ginbaligya kag ang kuwarta ginbutang sa kahon sang kuwarta nga yara sa iya. Sang ginpautwas ni Judas ining reklamo, ang iban nga mga apostoles mahimo nga nagkumod man nga nag-ugyon sa daw makatarunganon nga rason. Apang, si Judas ang panguna nga nagsugyot sa reklamo.