Pamatii ang Ginasiling sang Espiritu

“Ang imo mismo mga dulunggan magapamati sang pulong sa likod mo nga nagasiling: ‘Ini ang dalan. Lakat sa sini, kamo nga katawhan,’ pananglit nga magkadto kamo sa tuo ukon pananglit nga magkadto kamo sa wala.”​—⁠ISAIAS 30:⁠21.

1, 2. Paano nakigkomunikar si Jehova sa mga tawo sa bug-os nga maragtas?

ANG pulo sang Puerto Rico amo ang nahamtangan sang pinakadaku kag labing sensitibo nga single-dish radio telescope. Sa sulod sang mga dekada, ang mga sientipiko nagalaum nga makabaton sing mga mensahe gikan sa buhi nga mga tinuga sa guwa sang duta, nga nagagamit sining daku nga instrumento. Apang wala pa sing subong sini nga mga mensahe ang nabaton. Walay sapayan sini, sa kabaliskaran, may yara maathag nga mga mensahe gikan sa guwa sang ginapuy-an sang tawo nga sarang mabaton sang bisan sin-o sa aton sa bisan ano nga tion​—⁠nga wala nagagamit sing masibod nga kasangkapan. Naggikan ini sa isa ka Ginhalinan nga mas mataas sangsa bisan anong nahanduraw nga atmospera sa guwa sang duta. Sin-o ang Ginhalinan sining mga komunikasyon, kag sin-o ang nagabaton sini? Ano ang ginasiling sang mga mensahe?

² Ginarekord sang Biblia ang pila ka okasyon nga ang mga mensahe halin sa Dios nabatian sang tawo. Kon kaisa ining mga mensahe ginpadala paagi sa espiritu nga mga tinuga nga nagaalagad subong mga mensahero sang Dios. (Genesis 22:​11, 15; Zacarias 4:​4, 5; Lucas 1:​26-28) Sa tatlo ka okasyon, ang tingog mismo ni Jehova nabatian. (Mateo 3:​17; 17:​5; Juan 12:​28, 29) Nagpamulong man ang Dios paagi sa tawhanon nga mga manalagna, ginsulat sang madamo sa ila ang ginbugna niya nga ihambal nila. Sa karon, may yara kita Biblia, nga nagalakip sang isa ka nasulat nga rekord sang madamo sining mga komunikasyon, subong man sang mga  panudlo ni Jesus kag sang iya mga disipulo. (Hebreo 1:​1, 2) Sa pagkamatuod, si Jehova nagapaalinton sing impormasyon sa iya tawhanon nga mga tinuga.

3. Ano ang katuyuan sang mga mensahe sang Dios, kag ano ang ginapaabot sa aton?

³ Diutay lamang ang ginasugid sining tanan ginbugna nga mga mensahe halin sa Dios tuhoy sa pisikal nga uniberso. Nagakonsentrar ini sa mas importante nga mga butang, nga may epekto sa aton kabuhi sa karon kag sa palaabuton. (Salmo 19:​7-11; 1 Timoteo 4:8) Ginagamit ini ni Jehova sa pagpaalinton sang iya kabubut-on kag sa paghatag sa aton sang iya panuytoy. Isa ini ka paagi nga ang mga pinamulong ni manalagna Isaias nagakatuman: “Ang imo mismo mga dulunggan magapamati sang pulong sa likod mo nga nagasiling: ‘Ini ang dalan. Lakat sa sini, kamo nga katawhan,’ pananglit nga magkadto kamo sa tuo ukon pananglit nga magkadto kamo sa wala.” (Isaias 30:21) Wala kita ginapilit ni Jehova nga magpamati sa iya “pulong.” Nagadepende na sa aton ang pagsunod sa panuytoy sang Dios kag paglakat sa iya dalanon. Tungod sina ang Kasulatan nagalaygay sa aton nga pamatian ang mga mensahe halin kay Jehova. Sa tulun-an sang Bugna, ang pagpalig-on nga ‘pamatii ang ginasiling sang espiritu’ mabasa sing makapito.​—⁠Bugna 2:​7, 11, 17, 29; 3:​6, 13, 22.

4. Makatarunganon bala sa aton panahon ang magpaabot nga magkomunikar sing direkta ang Dios halin sa langit?

⁴ Sa karon, si Jehova wala nagapakighambal sa aton sing direkta gikan sa langit. Bisan sang panahon sang Biblia, ining labaw-sa-kinaugali nga mga komunikasyon talagsahon lamang nga mga hitabo, kon kaisa may kal-ang nga mga siglo. Sa bug-os nga maragtas, si Jehova masunson nga nakigkomunikar sa iya katawhan sa indi gid direkta nga paagi. Amo sina ang kahimtangan sa aton adlaw. Binagbinagon naton ang tatlo ka paagi nga si Jehova nagapakigkomunikar sa aton karon.

“Ang Bug-os nga Kasulatan Ginbugna”

5. Ano ang panguna nga instrumento sang komunikasyon ni Jehova sa karon, kag paano kita makabenepisyo gikan sa sini?

⁵ Ang panguna nga instrumento sang komunikasyon sa ulot sang Dios kag sang mga tawo amo ang Biblia. Ginbugna ini sang Dios, kag ang tanan nga yari sa sini mapuslanon sa aton. (2 Timoteo 3:16) Ang Biblia madamo sing mga halimbawa sang matuod nga mga tawo nga naggamit sang ila hilway nga pagbuot sa pagdesisyon kon bala pamatian ang tingog ni Jehova ukon indi. Ini nga mga halimbawa nagapahanumdom sa aton kon ngaa kinahanglan nga pamatian ang ginasiling sang espiritu sang Dios. (1 Corinto 10:11) Ang Biblia may praktikal man nga kaalam, nagahatag sa aton sing laygay sa mga tion nga kinahanglan kita nga maghimo sing mga desisyon sa kabuhi. Daw subong bala nga ang Dios yara sa likod naton, nagahambal sa aton dulunggan sang mga tinaga: “Ini ang dalan. Lakat sa sini.”

6. Ngaa ang Biblia nagalabaw gid sa tanan iban pa nga mga sinulatan?

⁶ Agod mabatian ang ginasiling sang espiritu paagi sa mga pahina sang Biblia, dapat naton ini basahon sing tayuyon. Ang Biblia indi lamang isa ka nasulat-sing-maayo kag popular nga libro, isa sang madamo nga matigayon karon. Ang Biblia ginbugna sang espiritu kag may mga panghunahuna sang Dios. Ang Hebreo 4:​12 nagasiling: “Ang pulong sang Dios buhi kag gamhanan kag matalom pa sa bisan ano nga espada nga duha sing sulab kag nagalapos tubtob sa nautlan sang kalag kag espiritu, kag sang mga lutalutahan kag ila utok, kag may ikasarang sa paghantop sang mga hunahuna kag mga tinutuyo sang tagipusuon.” Samtang ginabasa naton ang Biblia, ang mga kaundan sini nagalapos sa aton nasulod nga mga panghunahuna kag mga motibo kaangay sang espada, nagasugid sang kasangkaron nga ang aton kabuhi nagahisanto sa kabubut-on sang Dios.

7. Ngaa ang pagbasa sing Biblia importante, kag ginapalig-on kita nga himuon ini sing ano kasunson?

⁷ Ang “mga hunahuna kag mga tinutuyo sang tagipusuon” mahimo magbag-o samtang nagaligad ang tion kag samtang naapektuhan kita sang aton mga eksperiensia sa kabuhi​—⁠maayo man kag mabudlay. Kon wala naton ginatun-an sing dalayon  ang Pulong sang Dios, ang aton mga hunahuna, mga panimuot, kag mga balatyagon indi na mangin suno sa diosnon nga mga prinsipio. Gani, ang Biblia nagalaygay sa aton: “Padayon ninyo nga tilawan kon yara kamo sa pagtuo, padayon ninyo nga pamatud-an kon ano gid kamo.” (2 Corinto 13:5) Agod padayon naton nga mabatian ang ginasiling sang espiritu, dapat naton pamatian ang laygay nga basahon ang Pulong sang Dios adlaw-adlaw.​—⁠Salmo 1:⁠2.

8. Anong mga pulong ni apostol Pablo ang nagabulig sa aton nga usisaon ang aton kaugalingon may kaangtanan sa pagbasa sing Biblia?

⁸ Amo ini ang isa ka importante nga pahanumdom para sa mga bumalasa sang Biblia: Hatagi sing nagakaigo nga tion nga mahangpan ang imo ginabasa! Sa panikasog nga masunod ang laygay nga basahon ang Biblia kada adlaw, indi naton luyag dalion ang pagbasa sa pila ka kapitulo nga wala ginahangop kon ano ang nabasa naton. Bisan pa nga ang tayuyon nga pagbasa sing Biblia kinahanglanon, ang aton motibo indi lamang dapat ang pagsunod sa isa ka iskedyul; dapat nga handum gid naton nga matun-an ang tuhoy kay Jehova kag sa iya mga katuyuan. May kaangtanan sini, mahimo naton gamiton ining mga pulong ni apostol Pablo sa pag-usisa sa kaugalingon. Nagasulat sa mga masigka-Cristiano, sia nagsiling: “Ginaluhod ko ang akon mga tuhod sa Amay, agod ihatag niya sa inyo . . . agod magpuyo si Cristo paagi sa inyo pagtuo sa inyo tagipusuon nga may gugma; agod manggamot kamo kag matukod sa sadsaran, agod bug-os ninyo nga mahangpan sa hunahuna kaupod sang tanan nga balaan kon ano ang kasangkaron kag kalabaon kag kataason kag kadalumon, kag agod makilala ang gugma ni Cristo nga nagalabaw sa ihibalo, agod mapun-an kamo sang tanan nga kabug-usan nga ginahatag sang Dios.”​—⁠Efeso 3:​14, 16-19.

9. Paano naton mapalambo kag mapatudok ang aton handum nga magtuon gikan kay Jehova?

⁹ Matuod, ang pila sa aton kinaugali na nga indi mahuyugon sa pagbasa, samtang ang iban naman maukod nga mga bumalasa. Apang, bisan ano man ang aton indibiduwal nga disposisyon, mapalambo kag mapatudok naton ang aton handum nga magtuon gikan kay Jehova. Ginpaathag ni apostol Pedro nga dapat naton handumon ang ihibalo sa Biblia, kag ginkilala niya nga ini nga handum dapat palambuon. Sia nagsulat: “Subong sang mga lapsag nga bag-o natawo, magtigayon kamo sing kahidlaw sa wala masimbugan nga gatas nga natungod sa pulong, agod nga paagi sini magatubo kamo sa kaluwasan.” (1 Pedro 2:2) Ang disiplina sa kaugalingon kinahanglanon agod ‘matigayon naton ang kahidlaw’ sa pagtuon sa Biblia. Subong nga mapalambo naton ang kaluyag sa bag-o nga pagkaon sa tapos ini matilawan sing pila ka beses, ang aton panimuot sa pagbasa kag pagtuon magauswag kon ginadisiplina naton ang aton kaugalingon sa pagsunod sing isa ka regular nga rutina.

“Pagkaon sa Nagakaigo nga Tion”

10. Sin-o ang nagahuman sang “matutom kag mainandamon nga ulipon,” kag paano sila karon ginagamit ni Jehova?

¹⁰ Ang isa pa ka paagi nga ginagamit ni Jehova sa pagpakighambal sa aton sa karon ginapakilala ni Jesus sa Mateo 24:​45-47. Didto nagpamulong sia tuhoy sa ginhaplas-sang-espiritu nga Cristianong kongregasyon​—⁠“ang matutom kag mainandamon nga ulipon” nga gintangdo sa pag-aman sing espirituwal nga “pagkaon sa nagakaigo nga tion.” Subong mga indibiduwal, ang mga katapo sining klase “mga panimalay” ni Jesus. Sila, upod ang “dakung kadam-an” sang “iban nga mga karnero,” nagabaton sing pagpalig-on kag panuytoy. (Bugna 7:​9; Juan 10:16) Ang kalabanan sining pagkaon sa nagakaigo nga tion yara sa porma sang naimprinta nga mga publikasyon, subong sang Ang Lalantawan, Magmata!, kag iban pa nga mga publikasyon. Ang dugang pa nga espirituwal nga pagkaon ginahatag  sa porma sang mga pamulongpulong kag mga demonstrasyon sa mga kombension, mga asambleya, kag mga miting sa kongregasyon.

11. Paano naton pamatud-an nga nagapamati kita sa ginasiling sang espiritu paagi sa “matutom kag mainandamon nga ulipon”?

¹¹ Ang impormasyon nga ginaaman sang “matutom kag mainandamon nga ulipon” ginadesinyo agod pabakuron ang aton pagtuo kag hanason ang aton mga ikasarang sa paghantop. (Hebreo 5:14) Ini nga laygay mahimo nga pangkabilugan sing kinaugali agod tugutan ang kada isa sa pagsunod sini sing personal. Sa tion kag tion, nagabaton man kita sing laygay may kaangtanan sa espesipiko nga mga bahin sang aton paggawi. Ano ang dapat nga panimuot naton kon ginapamatian gid naton ang ginasiling sang espiritu paagi sa ulipon nga klase? Si apostol Pablo nagasabat: “Mangin matinumanon sa mga nagapanguna sa inyo kag mangin mapinasakupon.” (Hebreo 13:17) Matuod, ang tanan nga nadalahig sa sining kahimusan di-himpit nga mga tawo. Walay sapayan sini, nalipay si Jehova nga gamiton ang iya tawhanon nga mga alagad, bisan pa mga di-himpit, sa pagtuytoy sa aton sa sining tion sang katapusan.

Panuytoy Gikan sa Aton Konsiensia

12, 13. (a) Anong iban pa nga ginhalinan sang panuytoy ang ginahatag ni Jehova sa aton? (b) Ano ang positibo nga impluwensia sang konsiensia bisan sa mga tawo nga wala sing sibu nga ihibalo sa Pulong sang Dios?

¹² Si Jehova naghatag sa aton sing isa pa ka ginhalinan sang panuytoy​—⁠ang aton konsiensia. Gintuga niya ang tawo nga may nasulod nga pagkilala sa husto kag sala. Bahin ini sang aton kinaugali. Sa iya sulat sa mga taga-Roma, si apostol Pablo nagpaathag: “Kon san-o nga ang mga tawo sang mga pungsod nga walay kasuguan nagahimo sa kinaugali sang mga butang sang kasuguan, ining mga tawo, walay sapayan nga walay kasuguan, kasuguan sa ila kaugalingon. Sila mismo amo ang mga nagpasundayag nga ang kahulugan sang kasuguan masulat sa ila mga tagipusuon, samtang ang ila konsiensia nagapanaksi upod sa ila kag, sa ulot sang ila kaugalingon nga mga panghunahuna, ginasumbong ukon ginapasaylo pa gani sila.”​—⁠Roma 2:​14, 15.

¹³ Madamo sang wala makakilala kay Jehova ang mahimo magpahisuno, sa pila ka kasangkaron, sang ila panghunahuna kag mga buhat sa diosnon nga mga prinsipio sang husto kag sala. Daw subong bala nga nagapamati sila sa isa ka mahinay nasulod nga tingog nga nagatuytoy sa ila sa husto nga direksion. Kon matuod ini sa mga tawo nga wala sing sibu nga ihibalo sa Pulong sang Dios, daw ano pa gid inang nasulod nga tingog nga nagahambal sa matuod nga mga Cristiano! Sa pagkamatuod, ang Cristianong konsiensia nga ginaputli sang sibu nga ihibalo sa Pulong sang Dios kag nagapanghikot suno sa balaan nga espiritu ni Jehova makahatag sing masaligan nga panuytoy.​—⁠Roma 9:⁠1.

14. Paano ang nahanas-sa-Biblia nga konsiensia makabulig sa aton nga masunod ang panuytoy sang espiritu ni Jehova?

¹⁴ Ang maayong konsiensia, isa nga nahanas-sa-Biblia, makapahanumdom sa aton sang dalanon nga luyag sang espiritu nga laktan naton. Mahimo nga may mga tion nga ang mga Kasulatan ukon ang aton pasad-sa-Biblia nga mga publikasyon wala nagakomento sing espesipiko sa isa ka partikular nga sitwasyon nga naeksperiensiahan naton. Walay sapayan sina, ang aton konsiensia mahimo maghatag sing paandam, nagapaandam sa aton batok sa ayhan makahalalit nga dalanon. Sa sining mga kahimtangan, ang indi pagsapak sa mga dikta sang aton konsiensia mahimo, sa katunayan, magkahulugan sang indi pagsapak sa ginasiling sang espiritu ni Jehova. Sa pihak nga bahin, paagi sa pagtuon sa pagsalig sa aton nahanas nga Cristianong konsiensia, makahimo kita sing maayong mga desisyon bisan pa nga wala sing nasulat nga espesipiko nga panuytoy. Apang, kinahanglan pirme dumdumon nga kon wala sing ginhatag-sang-Dios nga prinsipio, pagsulundan, ukon kasuguan, indi nagakaigo nga ipilit ang mga desisyon sang aton mismo konsiensia sa mga masigka-Cristiano sa personal gid nga mga butang.​—⁠Roma 14:​1-4; Galacia 6:⁠5.

15, 16. Ano ang mahimo tunaan nga indi magpanghikot sing nagakaigo ang aton konsiensia, kag paano naton mapunggan nga mahanabo ini?

¹⁵ Ang matinlo kag nahanas-sa-Biblia nga konsiensia isa ka maayo nga dulot halin sa Dios. (Santiago 1:17) Apang dapat naton amligan ini nga dulot gikan sa malain nga mga impluwensia agod magpanghikot ini sing nagakaigo subong isa ka kasangkapan sa pag-amlig sa moralidad. Kon sundon, ang lokal nga mga kustombre, mga tradisyon, kag mga kinabatasan nga supak sa mga talaksan sang Dios mahimo tunaan nga indi magpanghikot sing nagakaigo ang aton konsiensia kag mapaslawan sa pagtuytoy sa aton sa husto nga direksion. Mahimo nga indi kita makadesisyon sing husto kag mahimo pa gani magdaya sang aton kaugalingon sa pagpati nga ang isa ka malain nga buhat maayo gid.​—⁠Ipaanggid ang Juan 16:⁠2.

¹⁶ Kon padayon naton nga wala ginasapak ang  mga paandam sang aton konsiensia, ang tingog sini magahinay kag magahinay tubtob mangin kabalan kita ukon indi sensitibo sa moral. Ang salmista naghambal tuhoy sa subong sini nga mga tawo sang nagsiling sia: “Ang ila tagipusuon wala na nagabatyag subong sang tambok.” (Salmo 119:70) Ang iban nga wala nagasapak sa mga panuytoy sang ila konsiensia nadulaan sing ikasarang sa pagpamensar sing nagakaigo. Wala na sila ginatuytuyan sang diosnon nga mga prinsipio kag indi sila makahimo sing nagakaigo nga mga desisyon. Agod malikawan ini nga kahimtangan, dapat kita mangin sensitibo sa mga panuytoy sang aton Cristianong konsiensia bisan pa nga ang mga butang nga ginaduhaduhaan daw diutay lamang.​—⁠Lucas 16:⁠10.

Malipayon ang mga Nagapamati kag Nagatuman

17. Samtang ginapamatian naton ang ‘pulong sa likod naton’ kag ginasunod ang aton nahanas-sa-Biblia nga konsiensia, paano kita pakamaayuhon?

¹⁷ Samtang nagatukod kita sing isa ka sulundan sang pagpamati sa ‘pulong sa likod naton’​—⁠subong ginaaman paagi sa Kasulatan kag sa matutom kag mainandamon nga ulipon​—⁠kag samtang ginapamatian naton ang mga pahanumdom sang aton nahanas-sa-Biblia nga konsiensia, si Jehova magapakamaayo sa aton paagi sa iya espiritu. Ang balaan nga espiritu naman magapasangkad sang aton ikasarang sa pagbaton kag sa paghangop sa ginasiling ni Jehova sa aton.

18, 19. Paano makabulig sa aton ang panuytoy ni Jehova sa aton ministeryo kag sa aton personal nga kabuhi?

¹⁸ Ang espiritu ni Jehova magapalig-on man sa aton sa pag-atubang sa mabudlay nga mga kahimtangan nga may kaalam kag kaisog. Kaangay sa mga apostoles, ang espiritu sang Dios makapapagsik sang aton mga ikasarang sa hunahuna kag makabulig sa aton sa pagpanghikot kag sa paghambal pirme suno sa mga prinsipio sang Biblia. (Mateo 10:​18-20; Juan 14:​26; Binuhatan 4:​5-8, 13, 31; 15:28) Ang kombinasyon sang espiritu ni Jehova kag sang aton mismo personal nga mga panikasog magahatag sa aton sing kadalag-an samtang nagahimo kita sing importante nga mga desisyon sa kabuhi, nagahatag sa aton sing kaisog agod masunod ining mga desisyon. Halimbawa, mahimo nga ginahunahuna mo nga bag-uhon ang imo estilo sang pagkabuhi agod makahinguyang sing dugang pa nga tion sa espirituwal nga mga butang. Ukon mahimo nga kinahanglan nga maghimo ka sing importante nga mga desisyon nga magabalhin sang imo kabuhi, subong sang pagpili sing tiayon, pagtulutimbang sa isa ka tanyag nga trabaho, ukon pagbakal sing balay. Sa baylo nga tugutan ang aton tawhanon nga mga balatyagon nga mangin ang lamang nga rason sa paghimo sang aton mga desisyon, dapat kita magpamati sa ginasiling sang espiritu sang Dios kag manghikot suno sa panuytoy sini.

¹⁹ Ginaapresyar gid naton ang mainayuhon nga mga pahanumdom kag laygay nga mabaton naton gikan sa mga masigka-Cristiano, lakip na ang mga gulang. Apang, indi kinahanglan nga maghulat kita pirme sa iban agod ipatalupangod ini sa aton. Kon nahibaluan naton ang maalamon nga dalanon nga dapat laktan kag ang mga pagpasibu nga kinahanglan naton himuon agod ang aton panimuot kag paggawi nagapahamuot sa Dios, magpanghikot kita. Si Jesus nagsiling: “Kon nahibaluan ninyo ini nga mga butang, malipayon kamo kon himuon ninyo ini.”​—⁠Juan 13:⁠17.

20. Ano nga pagpakamaayo ang matigayon sang mga nagapamati sang ‘pulong sa likod nila’?

²⁰ Sing maathag, agod mahibaluan kon paano pahamut-an ang Dios, ang mga Cristiano indi kinahanglan nga makabati sing literal nga tingog halin sa langit, ukon kinahanglan nga duawon sila sang isa ka anghel. Ginapakamaayo sila paagi sa pagtigayon sing nasulat nga Pulong sang Dios kag mahigugmaon nga panuytoy paagi sa iya hinaplas nga klase sa duta. Kon pamatian nila sing maayo ining ‘pulong sa likod nila’ kag sundon ang panuytoy sang ila nahanas-sa-Biblia nga konsiensia, mangin madinalag-on sila sa paghimo sa kabubut-on sang Dios. Nian makita gid nila ang katumanan sang saad ni apostol Juan: “Sia nga nagahimo sang kabubut-on sang Dios nagapabilin sing dayon.”​—⁠1 Juan 2:⁠17.

Malip-ot nga Repaso

• Ngaa nagakomunikar si Jehova sa iya tawhanon nga mga tinuga?

• Paano kita makabenepisyo gikan sa programa sang tayuyon nga pagbasa sing Biblia?

• Ano ang dapat nga reaksion naton sa panuytoy gikan sa ulipon nga klase?

• Ngaa indi naton dapat pasapayanan ang mga dikta sang isa ka nahanas-sa-Biblia nga konsiensia?

[Mga Pamangkot sa Pagtinuon]

[Retrato sa pahina 13]

Ang tawo wala nagakinahanglan sing masibod nga kasangkapan agod makabaton sing mga mensahe halin sa Dios

[Credit Line]

Courtesy Arecibo Observatory/David Parker/Science Photo Library

[Retrato sa pahina 15]

Si Jehova nagapamulong sa aton paagi sa Biblia kag paagi sa “matutom kag mainandamon nga ulipon”