Hatagi sing Igtalupangod ang Matagnaon nga Pulong sang Dios sa Aton Adlaw

“Hangpa, O anak sang tawo, nga ang palanan-awon para sa tion sang katapusan.”—⁠DANIEL 8:⁠17.

1. Ano ang luyag ni Jehova nga mahibaluan sang tanan nga katawhan tuhoy sa aton adlaw?

WALA ginatago ni Jehova ang ihibalo kon ano ang matabo sa palaabuton. Sa baylo, sia ang Manugpahayag sang mga tinago. Sa katunayan, luyag niya nga mahibaluan naton tanan nga yara na kita sa hingapusan nga bahin sang “tion sang katapusan.” Importante gid ini nga balita para sa anom ka bilyon ka tawo nga nagakabuhi karon sa duta!

2. Ngaa nabalaka ang mga tawo tuhoy sa palaabuton sang katawhan?

² Makatilingala bala nga malapit na matapos ining kalibutan? Ang tawo makalakat sa bulan, apang sa madamo nga duog indi sia makadayandayan sa mga kalye sining planeta nga wala nagakahangawa. Masangkapan niya ang isa ka puluy-an sing moderno nga mga kagamitan, apang indi niya mapunggan ang pagdamo sang nagakaguba nga mga pamilya. Kag mapaluntad niya ang dag-on sang impormasyon, apang indi niya matudluan ang mga tawo nga magkabuhi sing tingob nga may paghidait. Ginasakdag sini nga mga kapaslawan ang bugana nga pamatuod sa Kasulatan nga nagakabuhi na kita sa tion sang katapusan.

3. San-o ang mga tinaga nga “tion sang katapusan” una nga gingamit sa duta?

³ Inang talalupangdon nga mga pulong​—⁠“tion sang katapusan”​—⁠una nga gingamit sa duta sang nagligad nga mga 2,600 ka tuig ni anghel Gabriel. Ang hinadlukan nga manalagna sang Dios nakabati kay Gabriel nga nagsiling: “Hangpa, O anak sang tawo, nga ang palanan-awon para sa tion sang katapusan.”​—⁠Daniel 8:⁠17.

Karon Na ang “Tion Sang Katapusan”!

4. Sa anong iban pa nga mga paagi nga ginpatuhuyan sang Biblia ang tion sang katapusan?

⁴ Ang mga ekspresyon nga “tion sang katapusan”  kag “gintalana nga tion sang katapusan” anom ka beses nga mabasa sa tulun-an sang Daniel. (Daniel 8:​17, 19; 11:​35, 40; 12:​4, 9) Nagapatuhoy ini sa “katapusan nga mga adlaw” nga gintagna ni apostol Pablo. (2 Timoteo 3:​1-5) Si Jesucristo nagpatuhoy sa sini nga tion subong ang “presensia” niya subong ginpalingkod sa trono nga Hari sa langit.​—⁠Mateo 24:​37-39.

5, 6. Sin-o ang ‘nagpakadto-pakari’ sa tion sang katapusan, kag ano ang resulta?

⁵ Ang Daniel 12:4 nagasiling: “Nahanungod sa imo, O Daniel, ilikom ang mga pulong kag pat-ini ang tulun-an, tubtob sa tion sang katapusan. Madamo ang magapakadto-pakari, kag ang matuod nga ihibalo magabugana.” Ang daku nga bahin sang sinulatan ni Daniel ginhuptan nga isa ka tinago kag ginpat-inan nga indi mahangpan sang tawo sa sulod sang mga siglo. Apang kamusta na karon?

⁶ Sa sining tion sang katapusan, madamong matutom nga Cristiano ang ‘nagpakadto-pakari’ sa mga pahina sang Pulong sang Dios, ang Biblia. Ano ang resulta? Bangod sang pagpakamaayo ni Jehova sa ila mga panikasog, nagbugana ang matuod nga ihibalo. Halimbawa, ang hinaplas nga mga Saksi ni Jehova ginpakamaayo sing paghantop, agod mahangpan nila nga si Jesucristo nangin Hari sa langit sang tuig 1914. Bilang pagsunod sa pinamulong sang apostol sa 2 Pedro 1:​19-21, ining mga hinaplas kag ang ila mainunungon nga mga kaupod ‘nagahatag sing igtalupangod sa matagnaon nga pulong’ kag nakapat-od gid nga karon na ang tion sang katapusan.

7. Ano ang pila ka kasaysayan nga naghimo sa tulun-an sang Daniel nga tumalagsahon?

⁷ Ang tulun-an sang Daniel tumalagsahon sa pila ka paagi. Sa mga pahina sini, isa ka hari ang namahog nga pamatyon ang tanan niya nga mangin-alamon bangod indi nila masugid kag mapatpat ang iya makalilibog nga damgo, apang nalubad ini sang manalagna sang Dios. Ang tatlo ka pamatan-on nga lalaki nga nangindi sa pagsimba sa isa ka mataas nga larawan gindap-ong sa isa ka ginpainit sing tama nga hurno, apang nakalampuwas sila nga wala man lang masirabi. Sa tion sang isa ka sinalusalo, nakita sang ginatos ka tawo ang isa ka kamot nga nagasulat sing makatalanhaga nga mga tinaga sa dingding sang palasyo. Ginpatagbong sang malaut nga mga manughimbon ang isa ka tigulang na nga tawo sa lungib sang mga leon, apang wala sia mahaliti. Apat ka sapat ang nakita sa isa ka palanan-awon, kag ginhatagan sila sing matagnaon nga kahulugan nga nagalab-ot tubtob sa tion sang katapusan.

8, 9. Paano kita makabenepisyo sa tulun-an sang Daniel, ilabi na karon, sa tion sang katapusan?

⁸ Maathag nga ang tulun-an sang Daniel nagaunod sing duha ka magkatuhay gid nga bahin. Ang isa panaysayon, ang isa naman matagnaon. Lunsay ini makapalig-on sang aton pagtuo. Ginapakita sa aton sang panaysayon nga bahin nga ginapakamaayo ni Jehova nga Dios ang mga nagahupot sang ila integridad sa iya. Kag ang matagnaon nga bahin nagapalig-on sang pagtuo paagi sa pagpakita nga nahibaluan ni Jehova ang lakat sang maragtas sing siniglo​—⁠sing mga milenyo pa gani​—⁠nga abanse.

⁹ Ang nanuhaytuhay nga mga tagna nga ginrekord ni Daniel nagapatalupangod sa Ginharian sang Dios. Samtang ginatan-aw naton ang katumanan sining mga tagna, nagabakod ang aton pagtuo kag amo man ang aton malig-on nga pagpati nga nagakabuhi kita sa tion sang katapusan. Apang ginamulay sang iban si Daniel, sa pagsiling nga ang mga tagna sa tulun-an nga nagadala sang iya ngalan ginsulat sa tapos sang mga hitabo nga daw nagtuman sini. Kon matuod ining mga pangangkon, magapautwas ini sing serioso nga mga pamangkot tuhoy sa gintagna sang tulun-an sang Daniel may kaangtanan sa tion sang katapusan. Ginaduhaduhaan man sang mga maduhaduhaon ang mga panaysayon sang tulun-an. Gani mangusisa kita.

Ginkasaba!

10. Sa anong kahulugan nga ang tulun-an sang Daniel ginsumbong?

¹⁰ Handurawa ang imo kaugalingon nga yara ikaw sa isa ka hukmanan, nga nagapamati sa isa ka kasaba. Ang abogado sang nagaakusar nagainsister nga ang akusado nakasala sing pagdaya. Bueno, ang tulun-an sang Daniel nagapresentar sang iya kaugalingon subong isa ka mapatihan nga sinulatan nga ginsulat sang isa ka Hebreong manalagna nga nagkabuhi sa tion sang ikapito kag ikan-um nga siglo B.⁠C.⁠E. Apang ginapilit sang mga kritiko nga ang tulun-an isa ka daya. Gani, tan-awon anay naton kon bala ang panaysayon sang tulun-an nagahisanto sa katunayan sang maragtas.

11, 12. Ano ang natabo sa panumbungon nga si Belsasar isa lamang ka himohimo nga karakter?

¹¹ Halimbawa, binagbinagon naton ang kaso sang isa kuno ka nadula nga hari. Ginapakita sang Daniel kapitulo 5 nga si Belsasar nagahari sa Babilonia sang napukan yadto nga siudad sang 539 B.⁠C.⁠E. Ginpamatukan sang mga kritiko ini nga punto bangod ang ngalan ni Belsasar makita lamang sa Biblia. Sa baylo, ginapakilala sang dumaan nga mga istoryador  si Nabonido subong ang katapusan nga hari sang Babilonia.

¹² Apang, sang tuig 1854, may pila ka magamay nga mga silindro nga daga nga nakutkutan sa kagulub-an sang siudad sang Ur sa dumaan nga Babilonia nga amo karon ang Iraq. Ining cuneiform nga mga dokumento naglakip sing isa ka pangamuyo diin ginpatuhuyan ni Hari Nabonido si “Bel-sar-ussur, nga akon kamagulangan nga anak nga lalaki.” Bisan gani ang mga kritiko napilitan sa pag-ugyon: Amo ini si Belsasar sa tulun-an sang Daniel. Gani ang nadula nga hari wala gali madula, kundi wala lang mahibal-an pa sa sekular nga mga tiliman-an. Isa lamang ini sang madamo nga pamatuod nga ang mga sinulatan ni Daniel matuod gid. Ginapakita sini nga pamatuod nga ang tulun-an sang Daniel isa gid ka bahin sang Pulong sang Dios kag takus nga binagbinagon naton sing maayo karon mismo, sa tion sang katapusan.

13, 14. Sin-o si Nabocodonosor, kag sa anong butig nga dios debotado gid sia?

¹³ Ang isa ka bahin sang tulun-an sang Daniel amo ang mga tagna tuhoy sa pagpaagisod sang mga kagamhanan sa kalibutan kag ang mga ginhimo sang pila sang ila mga manuggahom. Ang isa sining mga manuggahom mahimo tawgon nga isa ka hangaway nga nagpatindog sing isa ka emperyo. Subong amo ang masunod nga magahari sa Babilonia, ginlutos niya kag sang iya hangaway ang mga puwersa ni Paraon Necho sang Egipto sa Carquemis. Apang bangod sang isa ka mensahe, napilitan ang madaugon nga prinsipe nga itugyan sa iya mga heneral ang hingapusan nga mga pagpakig-away. Sang mahibal-an nga napatay ang iya amay, si Nabopolasar, ining lamharon pa nga si Nabocodonosor nagbulos sa trono sang 624 B.⁠C.⁠E. Sa sulod sang 43 ka tuig nga paggahom niya, nagpatindog sia sing isa ka emperyo nga nagsakop sang mga teritoryo nga sakop anay sang Asiria, kag ginpasangkad niya ang iya teritoryo tubtob sa Siria kag Palestina tubtob sa dulunan sang Egipto.

¹⁴ Debotado sing relihioso si Nabocodonosor ilabi na kay Marduk, ang pangulo nga dios sang Babilonia. Ginpadungog sang hari kay Marduk ang tanan niya nga pagpanakop. Sa Babilonia, ginpatindog kag ginpatahom ni Nabocodonosor ang mga templo ni Marduk kag sang madamo iban pa nga mga diosdios sa Babilonia. Ang bulawan nga larawan nga ginpatindog sini nga hari sang Babilonia sa kapatagan sang Dura mahimo nga gindedikar kay Marduk. (Daniel 3:​1, 2) Kag daw subong gid nga si Nabocodonosor nagsandig sing daku sa pagpamakot kon nagaplano sang iya militar nga mga hublag.

15, 16. Ano ang ginhimo ni Nabocodonosor para sa Babilonia, kag ano ang natabo sang ginpabugal niya ang kadakuon sini?

¹⁵ Paagi sa pagpatapos sa daku kag doble nga mga pader sang Babilonia nga ginsugdan nga ipatindog sang iya amay, ginhimo ni Nabocodonosor ang kapital nga siudad nga daw indi gid maagaw. Agod pahalipayon ang iya Medianhon nga reyna, nga nahidlaw sa mga pukatod kag mga kagulangan sang iya dutang natawhan, ginpatindog kuno ni Nabocodonosor ang hanging gardens​—⁠isa sang pito ka kalatingalahan sang dumaan nga kalibutan. Ginhimo niya ang Babilonia nga pinakadaku napaderan nga siudad sadto nga tion. Kag ginpabugal gid niya yadtong sentro sang butig nga pagsimba!

¹⁶ “Indi bala amo ini ang Babilonia nga Daku, nga ginpatindog ko?” pabugal ni Nabocodonosor isa ka adlaw. Apang, suno sa Daniel 4:​30-36, “samtang ang pulong yara pa sa baba sang hari,” nagbuang sia. Indi bagay sa paggahom sa sulod sang pito ka tuig, nagkaon sia sing mga gamhon, suno sa gintagna ni Daniel. Nian ginpasag-uli ang iya ginharian. Nahibaluan bala ninyo ang matagnaon nga kahulugan sini tanan? Mapaathag bala ninyo kon paano ang daku nga katumanan sini nagadala gid sa aton sa tion sang katapusan?

Pagbinagbinag sa mga Bahin Sang Tagna

17. Paano mo ilaragway ang matagnaon nga ginpadamgo sang Dios kay Nabocodonosor sang ikaduha nga tuig sang iya paggahom subong manuggahom sa kalibutan?

¹⁷ Binagbinagon naton karon ang pila ka bahin sang tagna sa tulun-an sang Daniel. Sang ikaduha nga tuig sang paghari ni Nabocodonosor subong manuggahom sa kalibutan sa tagna sang Biblia (606/605 B.⁠C.⁠E.), ginpadamgo sia sang Dios sing  isa ka makakulugmat nga damgo. Suno sa Daniel kapitulo 2, ang damgo nagadalahig sa isa ka daku nga larawan nga may ulo nga bulawan, pilak nga dughan kag mga butkon, saway nga tiyan kag mga paa, salsalon nga mga batiis, kag mga tiil nga salsalon nga namikslahan sing daga. Ano ang ginalaragway sang nanuhaytuhay nga bahin sang larawan?

18. Ano ang ginalaragway sang ulo nga bulawan, dughan kag mga butkon nga pilak, kag tiyan kag mga paa nga saway, sang gindamgo nga larawan?

¹⁸ Ang manalagna sang Dios nagsiling kay Nabocodonosor: “Ikaw, O hari, . . . ikaw mismo ang ulo nga bulawan.” (Daniel 2:​37, 38) Si Nabocodonosor ang pangulo sang isa ka dinastiya nga naggahom sa Emperyo sang Babilonia. Ginpukan ini sang Medo-Persia, nga ginalaragway sang pilak nga dughan kag mga butkon sang larawan. Ang nagsunod amo ang Emperyo sang Gresya, nga ginalaragway sang saway nga tiyan kag mga paa. Paano nagsugod yadto nga kagamhanan sa kalibutan?

19, 20. Sin-o si Alejandro nga Daku, kag anong papel ang gintungdan niya sa paghimo sa Gresya nga isa ka kagamhanan sa kalibutan?

¹⁹ Sang ikap-at nga siglo B.⁠C.⁠E., isa ka lamharon nga tawo ang nagtungod sing isa ka importante nga papel sa katumanan sang tagna ni Daniel. Natawo sia sang 356 B.⁠C.⁠E., kag gintawag sia sang kalibutan nga Alejandro nga Daku. Sang ginpatay ang iya amay, nga si Phillip, sang 336 B.⁠C.⁠E., ginpanubli sang 20-anyos nga si Alejandro ang trono sang Macedonia.

²⁰ Sang maaga nga bahin sang Mayo 334 B.⁠C.⁠E., ginsugdan ni Alejandro ang kampanya sa pagpanakop. May yara sia diutay lamang apang sampaton gid nga mga hangaway sang 30,000 ka soldado kag 5,000 ka kabalyero. Sa Suba Granicus sa aminhan-katundan sang Asia Minor (Turkey karon), nagdaug si Alejandro sa iya una gid nga pagpakig-away batok sa mga Persianhon sang 334 B.⁠C.⁠E. Sang 326 B.⁠C.⁠E., ining determinado gid nga manlulutos nagsakop sa ila kag nakalab-ot tubtob sa sidlangan sa Suba Indus, nga nahamtang sa modernong-adlaw nga Pakistan. Apang nalutos si Alejandro sa iya hingapusan nga pagpakig-away samtang didto sa Babilonia. Sang Hunyo 13, 323 B.⁠C.⁠E., sa tapos magkabuhi sing 32 ka tuig kag 8 ka bulan lamang, nag-ampo sia sa daku gid nga kaaway, ang kamatayon. (1 Corinto 15:55) Apang, paagi sa iya mga pagpanakop, ang Gresya nangin isa ka kagamhanan sa kalibutan, subong sang gintagna ni Daniel.

21. Dugang sa Emperyo sang Roma, ano pa nga kagamhanan sa kalibutan ang ginlaragway sang salsalon nga mga batiis sang gindamgo nga larawan?

²¹ Ano ang ginalaragway sang salsalon nga mga batiis sang daku nga larawan? Bueno, ang tulad-salsalon nga Roma amo ang nagdugmok kag naglaglag sa Emperyo sang Gresya. Wala magpakita sing pagtahod sa Ginharian sang Dios nga ginbantala ni Jesucristo, ginpapatay sia sang mga Romano sa isa ka usok sang pag-antos sang 33 C.⁠E. Sa panikasog nga laglagon ang matuod nga Cristianismo, ginhingabot sang Roma ang mga disipulo ni Jesus. Apang, ang salsalon nga mga batiis sang larawan nga gindamgo ni Nabocodonosor naglaragway indi lamang sa Emperyo sang Roma kundi sa politikal nga siwil man sini​—⁠ang Anglo-Amerikano nga Kagamhanan sa Kalibutan.

22. Paano ang gindamgo nga larawan nakabulig sa aton nga makita nga yara na kita sa hingapusan nga bahin sang tion sang katapusan?

²² Ginapamatud-an sang maayo nga pagtuon nga yara na kita sa hingapusan nga bahin sang tion sang katapusan, kay nakalab-ot na kita sa salsalon kag daga nga mga tiil sang gindamgo nga larawan. Ang pila ka panguluhan karon tulad-salsalon ukon diktatoryal, samtang ang iban naman tulad-daga. Walay sapayan sang matapok nga kinaugali sang daga, nga ginhalinan sang “kaliwat sang mga tawo,” ang tulad-salsalon nga mga pagginahom naobligar nga tugutan ang kinaandan nga mga tawo nga makapabutyag sang ila opinyon sa mga panguluhan nga nagagahom sa ila. (Daniel 2:​43; Job 10:9) Sa pagkamatuod, ang diktatoryal nga paggahom kag ang kinaandan nga mga tawo indi magtapikay subong sang salsalon kag daga. Apang dulaon sang Ginharian sang Dios sa indi madugay ining nabahinbahin sa politika nga kalibutan.​—⁠Daniel 2:⁠44.

23. Paano mo ilaragway ang damgo kag ang mga palanan-awon nga nakita ni Daniel sang nahauna nga tuig sang paghari ni Belsasar?

²³ Ang ika-7 nga kapitulo sang makahalawathawat nga tagna sang Daniel nagadala man sa aton sa tion sang katapusan. Ginasaysay sini ang isa ka hitabo sang nahauna nga tuig ni Hari Belsasar sang Babilonia. Nian sa edad nga setentahon, nakakita si Daniel sing “isa ka damgo kag mga palanan-awon sang iya ulo sa iya higdaan.” Hinadlukan gid sia sa sadto nga mga palanan-awon! “Yari karon!” tuaw niya. “Ginapaalimbukad sang apat ka hangin sang langit ang malapad nga dagat. Kag apat ka dalagku nga sapat ang nagtakas gikan sa dagat, nga tuhay ang isa sa isa.” (Daniel 7:​1-8, 15) Tumalagsahon gid nga mga sapat! Ang una isa ka leon nga  may pakpak, kag ang ikaduha subong sang oso. Ang masunod amo ang isa ka leopardo nga may apat ka pakpak kag apat ka ulo! Ang tumalagsahon kakusog nga ikap-at nga sapat may dalagku salsalon nga mga ngipon kag napulo ka sungay. Sa tunga sang napulo ka sungay sini may nag-ulhot nga “isa ka diutay” nga sungay nga may “mga mata nga kaangay sa mga mata sang tawo” kag “baba nga nagapamulong sing dalagku nga mga butang.” Daw ano ka makatalanhaga nga mga tinuga!

24. Suno sa Daniel 7:​9-14, ano ang nakita ni Daniel sa langit, kag ano ang ginatudlo sini nga palanan-awon?

²⁴ Ang masunod nga mga palanan-awon ni Daniel amo ang sa langit. (Daniel 7:​9-​14) “Ang Dumaan sang mga Adlaw,” si Jehova nga Dios, makita nga mahimayaon nga nagalingkod sa trono subong Hukom. ‘Ang mga linibo sang mga linibo nagaalagad sa iya, kag ang linaksa sang mga linaksa nagatilindog sa atubangan niya.’ Sa paghukom sa mga sapat, ginkuha sang Dios ang paggahom gikan sa ila kag ginlaglag ang ikap-at nga sapat. Ang dayon nga paggahom sa “mga katawhan, mga pungsod kag mga hambal” ginhatag sa “isa nga kaangay sa anak sang tawo.” Nagatudlo ini sa tion sang katapusan kag sa paglingkod sa trono sang Anak sang tawo, nga si Jesucristo, sang tuig 1914.

25, 26. Ano nga mga pamangkot ang mahimo mag-utwas kon basahon naton ang tulun-an sang Daniel, kag ano nga publikasyon ang makabulig sa pagsabat sini?

²⁵ Ang mga bumalasa sang tulun-an sang Daniel pat-od gid nga may mga pamangkot. Halimbawa, ano ang ginalaragway sang apat ka sapat sa Daniel kapitulo 7? Ano ang paathag sa tagna tuhoy sa “kapituan ka semana” sang Daniel 9:​24-27? Kamusta naman ang Daniel kapitulo 11 kag ang matagnaon nga inaway sang “hari sang aminhan” kag “hari sang bagatnan”? Ano ang mapaabot naton sa sining mga hari sa tion sang katapusan?

²⁶ Si Jehova naghatag sing paghantop sa sining mga butang sa iya hinaplas nga mga alagad sa duta, sa “mga balaan sang Isa nga Supremo,” subong amo ang pagtawag sa ila sa Daniel 7:⁠18. Dugang pa, “ang matutom kag mainandamon nga ulipon” nag-aman sa aton agod mahantop naton sing dugang pa ang inspirado nga mga sinulatan ni manalagna Daniel. (Mateo 24:45) Matigayon na ini karon paagi sa ginpaguwa sining karon lang nga libro nga Binagbinaga ang Tagna ni Daniel! Ginatuptupan sining publikasyon nga may matahom nga mga ilustrasyon kag 320 ka pahina ang tagsa ka bahin sang tulun-an sang Daniel. Ginabinagbinag sini ang tagsa ka makapalig-on sing pagtuo nga tagna kag ang tagsa ka panaysayon nga ginrekord sang hinigugma nga manalagna nga si Daniel.

Matuod nga Kahulugan sa Aton Adlaw

27, 28. (a) Ano ang matuod tuhoy sa katumanan sang mga tagna sa tulun-an sang Daniel? (b) Sa ano nga panag-on kita nagakabuhi, kag ano ang dapat naton himuon?

²⁷ Binagbinaga ining importante nga punto: Ang tanan nga tagna sa tulun-an sang Daniel natuman na luwas sa pila ka detalye. Halimbawa, makita naton karon ang kahimtangan sa kalibutan nga ginalaragway sang mga tiil sang gindamgo nga larawan sa Daniel kapitulo 2. Ang pikit sa tuod sang kahoy sa Daniel kapitulo 4 ginhukas sang naglingkod sa trono ang Mesianikong Hari, nga si Jesucristo, sang tuig 1914. Huo, subong gintagna sa Daniel kapitulo 7, ginhatag sadto sang Dumaan sang mga Adlaw ang pagbulut-an sa Anak sang tawo.​—⁠Daniel 7:​13, 14; Mateo 16:⁠27⁠–​17:⁠9.

²⁸ Ang 2,300 ka adlaw sa Daniel kapitulo 8 subong man ang 1,290 ka adlaw kag ang 1,335 ka adlaw sa kapitulo 12 nagligad na tanan​—⁠naglipas sa aton sa lakat sang tion. Ang pagtuon sa Daniel kapitulo 11 nagapakita nga ang inaway sa ulot sang “hari sang aminhan” kag sang “hari sang bagatnan” nakalab-ot na sa hingapusan nga mga hugna sini. Ini tanan nagadugang sa Makasulatanhon nga pamatuod nga yara na kita karon sa hingapusan nga bahin sang tion sang katapusan. Nagabinagbinag sang aton tumalagsahon nga nahamtangan sa lakat sang tion, ano dapat ang determinado naton nga himuon? Wala sing duhaduha, dapat naton hatagan sing igtalupangod ang matagnaon nga pulong ni Jehova nga Dios.

Paano Mo Sabton?

• Ano ang luyag sang Dios nga mahibaluan sang tanan nga katawhan tuhoy sa aton adlaw?

• Paano ang tulun-an sang Daniel makapalig-on sang aton pagtuo?

• Ano ang mga bahin sang larawan nga gindamgo ni Nabocodonosor, kag ano ang ginalaragway sini?

• Ano ang talalupangdon tuhoy sa katumanan sang mga tagna nga makita sa tulun-an sang Daniel?

[Mga Pamangkot sa Pagtinuon]