Kita ang Sahi nga may Pagtuo

Pagtukod sing Pagtuo Paagi sa Pagtuon sing Biblia sa India

HALIN sa matahom, natabunan-sing-yelo nga mga Kabukiran sang Himalayas sa aminhan pakadto sa mainit nga mga hunasan sang Indian Ocean sa bagatnan, ang India isa ka duog sang pagkananuhaytuhay, sa nahamtangan kag relihion. Sa populasyon sini nga kapin sa isa ka bilyon, mga 83 porsiento ang Hindu, 11 porsiento ang Muslim, kag ang nabilin ginahuman ilabi na sang nagapangangkon nga mga Cristiano, mga Sikh, mga Budhista, kag mga Jain. Ang tanan may kahilwayan sa pagsimba. “Ang relihion nagatungod sing importante nga papel sa kabuhi sang mga taga-India,” siling sang The World Book Encyclopedia.

Kilala gid nga nagakabuhi suno sa ila Cristianong pagtuo ang mga Saksi ni Jehova, nga nagadamo sing kapin sa 21,200 sa India. Kaangay sang ila espirituwal nga mga kaupod sa iban nga bahin sang kalibutan, ginatamod sang mga Saksi sa India nga isa ka pribilehiyo ang pagbulig sa ila mga isigkatawo nga makatukod sing malig-on nga pagtuo sa Pulong sang Dios, ang Balaan nga Biblia. (2 Timoteo 3:​16, 17) Binagbinaga kon paano ang isa ka pamilya sa Chennai sa bagatnan sang India nakatigayon sing ihibalo sang kamatuoran sa Biblia.

Antes sang ila pagpakig-angot sa mga Saksi ni Jehova, ini nga pamilya aktibo nga nagapakigbahin sa Katolikong karismatik nga mga kahublagan, nagapangangkon nga nakakita sing mga palanan-awon, nagapamulong sing lainlain nga hambal, kag nagaayo sang nagabalatian. Kilala sila sa simbahan kag sa komunidad, ginatawag pa gani sang mga tawo ang pila ka miembro sini nga pamilya nga “swami,” buot silingon “ginuo.” Nian isa ka adlaw ginduaw sang isa ka Saksi ang pamilya kag ginpakita sa ila gikan sa Biblia nga si Jesus Anak sang Dios, indi ang Labing Gamhanan nga Dios, subong sang kinaandan nga ginapatihan. Ginpakita man sa ila sang Saksi nga ang ngalan sang Dios amo si Jehova kag ang katuyuan ni Jehova sa duta amo nga himuon ini nga isa ka matahom nga paraiso. ​​—⁠Salmo 83:​18; Lucas 23:​43; Juan 3:⁠16.

Bangod ginatahod nila ang Pulong sang Dios kag naluyagan ang ila nabatian, ang mga miembro sini nga pamilya nagpasugot sa isa ka regular nga pagtuon sang Biblia upod sa mga Saksi ni Jehova. Bangod sini, ginyubit sila sang ila mga kakilala sa simbahan. Walay sapayan sini, determinado gihapon ang pamilya nga padayunon ang ila pagtuon sa Biblia. Samtang nagauswag ang ila ihibalo kag nagabaskog ang ila pagtuo, gin-untat nila ang ila sayop relihioso nga mga buhat. Sa karon, tatlo ka miembro sini nga pamilya ang makugi, bawtismado nga mga Saksi, kag ang iloy nagaalagad subong auxiliary payunir kon posible.

Pagtuo Agod Malandas ang mga Kasablagan

Si Sunder Lal, isa ka soltero nga nagapuyo sa isa ka minuro sa Punjab, nagkinahanglan sing daku nga pagtuo kag kaisog agod mapaambit ang maayong balita sang Ginharian sang Dios sa iban. (Mateo 24:14) Ang isa ka rason amo nga gintalikdan niya ang madamo-sing-dios nga mga pagtuluuhan sang iya pamilya kag minuro agod simbahon ang matuod nga Dios, nga si Jehova. Dugang pa, wala sing mga tiil si Sunder Lal.

Tubtob sang 1992, ang kabuhi ni Sunder Lal isa ka rutina lamang. Nagtrabaho sia subong kabulig sang isa ka doktor kag nagaupod sa iya pamilya sa pagsimba sa nagkalainlain nga mga dios sa idalom sang pagtuytoy sang ila ginpili nga guru (espirituwal nga manunudlo). Nian isa ka gab-i, natumba sia samtang nagatabok sa isa ka riles. Naipit sia sang tren kag nautod ang iya duha ka tiil sa may paa nayon. Bisan pa nabuhi sia, nagwasaag ang iya kalibutan.  Mahangpan nga ginpung-awan gid si Sunder Lal kag naghunahuna nga maghikog. Masinakdagon ang iya pamilya, apang ang iya palaabuton wala sing paglaum.

Nian ginduaw sang isa sang mga Saksi ni Jehova si Sunder Lal kag ginpakita sa iya gikan sa Biblia nga nagsaad ang Dios nga himuon ang duta nga isa ka makalilipay nga paraiso kag hatagan sing himpit nga panglawas ang tanan nga nagahigugma kag nagakahadlok sa iya. Nagsugot sa isa ka pagtuon sa Biblia si Sunder Lal, kag sa sulod sang isa ka tuig maukod sia nga nagtuon. Gin-agda sia sa pagtambong sa Cristianong mga miting kag sang ulihi nagkadto sia nga nagaangkas sa likod sang bisikleta sang iya abyan. Bisan pa masakit yadto nga biyahe, daku ang padya. Ang iya natun-an sa personal niya nga pagtuon sang Biblia napamatud-an sang makilala niya ang iban pa nga nagpati gid sa mga saad sang Pulong sang Dios kag nagkabuhi nahisuno sa mga panudlo sang Biblia.

Nagsugod si Sunder Lal sa pagpakig-ambit sang maayong balita sa iya mga kaingod, kag sang 1995 ginbawtismuhan sia. Sang primero, nakigbahin sia sa ministeryo paagi sa pagganoy sang iya kaugalingon sa pagpamalaybalay sa iya minuro, nga amo ang kinaandan niya nga paglakat. Apang sa karon may isa sia ka regalo gikan sa iya espirituwal nga mga kauturan​—⁠isa ka traysikad nga pinasahi nga gindesinyo nga “masikaran” sang kamot. Sa bulig sang iya traysikad, mas independiente sia karon kag makalakbay sing dose-kilometros sing isahanon agod magtambong sa mga miting sa kongregasyon. Kon kaisa nagabisikleta sia mismo sa mabunok nga ulan; kon kaisa sa temperatura nga kapin sa 43 degrees Celsius.

Dugang sa pagtambong sa mga miting, nagahiwat sing madamo nga pagtuon sa Biblia si Sunder Lal sa iban nga luyag mabuligan nga makatukod sing mabakod nga pagtuo sa matuod nga Dios, si Jehova. Sa katunayan, pito sang iya anay mga estudyante sa Biblia ang nabawtismuhan na karon, subong man ang tatlo pa ka tawo nga iya nasalapuan apang gintun-an sa Biblia sang mga masigka-Saksi.

Suno sa Biblia, “indi tanan nga tawo may pagtuo.” (2 Tesalonica 3:2) Apang sa sadtong “nahuyog sa kabuhi nga wala sing katapusan,” ang isa ka regular nga pagtuon sang Pulong sang Dios makatukod sang mabakod nga pagtuo. (Binuhatan 13:48) Ina man nga pagtuon makapahalipay upod ang paglaum nga isa ka makalilipay nga palaabuton​—⁠isa ka butang nga ginatuuhan sang nagadamo pa nga mga tawo sa India.

[Mapa sa pahina 30]

(Para sa aktual nga pormat, tan-awa ang publikasyon)

AFGANISTAN

PAKISTAN

NEPAL

BHUTAN

CHINA

BANGLADESH

MYANMAR

LAOS

THAILAND

VIETNAM

CAMBODIA

SRI LANKA

INDIA

[Credit Line]

Mountain High Maps® Copyright © 1997 Digital Wisdom, Inc.