Ang Musika nga Mahamuot ang Dios

Ang musika ginalaragway subong “ang pinakakaraan kag labing kinaugali sa tanan nga maayong taliambong.” Kaangay sang lenguahe, isa ini ka tumalagsahon nga dulot nga nagapakilala sang mga tawo nga tuhay sa mga sapat. Ang musika nagapukaw sang mga emosyon. Makapahalipay ini sa palamatin-an kag madugay madula sa hunahuna. Labaw sa tanan, ang musika mahimo magpahamuot sa Dios.

SUBONG sang ginapakita sang Biblia, ang mga Israelinhon mahuyugon kag may kinaadman sa musika. Ang musika “isa ka nagapanguna nga taliambong sa dumaan nga mga tion sang Biblia,” siling sang Unger’s Bible Dictionary. Subong bahin sang matag-adlaw nga pagkabuhi, ang pag-amba kag pagtokar sing instrumento ginagamit sa ila pagsimba. Apang ang tawhanon nga tingog amo gid ang panguna nga ginagamit.

Nagtangdo si Haring David sing mga tiglawas sa tunga sang mga Levinhon “para sa pagdumala sang pag-amba” sa tabernakulo, antes gin-inagurahan ang templo nga ginpatindog ni Solomon, nga iya anak. (1 Cronica 6:​31, 32) Sang ang kaban sang katipan, nga nagatiglawas sa presensia ni Jehova, nag-abot sa Jerusalem, naghimo sing kahimusan si David para ang pila ka Levinhon “magdumdom kag magpasalamat kag magdayaw kay Jehova.” Gin-akompayaran nila ang ila tingog sa pagdayaw sing “mga instrumento nga may mga kwerdas kag sing mga arpa, . . . sing mga pompiyang nga nagatunog sing mabaskog, . . . sing mga trumpeta.” Ini nga mga tawo “gintangduan sa ngalan sa pagpasalamat kay Jehova, bangod ‘tubtob sa tion nga di-napat-od amo ang iya mahigugmaon nga kaayo.’ ”​—⁠1 Cronica 16:​4-6, 41; 25:⁠1.

Ang koro nga “ang mahigugmaon nga kaayo [ni Jehova] tubtob sa tion nga di-napat-od” mabasa sing madamo nga beses sa mga Salmo, ang tulun-an sang Biblia nga naangot gid sa musika. Halimbawa, amo ini ang ikaduha nga bahin sang kada isa sang 26 ka bersikulo sang Salmo 136. “Ang kalip-uton sini nagapahapos nga ambahon sang mga tawo,” siling sang isa ka iskolar sa Biblia. “Ang tanan, sa pagkabati sini, makadumdom sini.”

Ginapakita sang mga superskripsion sa mga salmo ang lapnag nga paggamit sing mga instrumento sa musika. Ang Salmo 150 nagasambit  sang budyong, arpa, pandereta, plawta, kag mga apiping, dugang sa mga kuwerdas. Apang, ang panguna nga makabilihag amo ang tawhanon nga tingog. Ang bersikulo 6 nagalaygay: “Ang tanan nga nagaginhawa nga butang​—⁠magdayaw ini kay Jah. Dayawa si Jah, kamo nga katawhan!”

Bangod ang musika nagapabutyag sang aton mga balatyagon, ang masinulub-on nga mga panghunahuna sa panahon sang Biblia amo ang rason kon ngaa may mga panalabiton ukon pagbalakhuon. Apang, ini nga sahi sang pag-amba limitado lamang sa koleksion sang musika sang Israel. “Sa pagbalakhuon ukon panalabiton lamang nga ang estilo sang pag-amba mahimo ibagay sa melodiya sang musika ukon sa tuno kag pagpadaku sa hambal lamang,” siling sang ensiklopedia sa Biblia nga Insight on the Scriptures.⁠ *

Si Jesus kag ang iya matutom nga mga apostoles nag-amba sing mga pagdayaw kay Jehova sang gab-i antes sang kamatayon ni Jesus, wala sing duhaduha nga nagasambit sang mga dinalan sang Hallel nga mga Salmo. (Salmo 113-118) Nagpalig-on gid ini sa mga disipulo ni Jesus nga atubangon ang pagtaliwan sang ila Agalon! Labaw pa sa sina, ang ila pamat-od nga magpabilin nga matutom nga mga alagad sang Supremo nga Soberano sa uniberso, si Jehova, nagdalom sang gin-amba nila sing lima ka beses ang koro nga “kay ang iya mahigugmaon nga kaayo tubtob sa tion nga di-napat-od.”​—⁠Salmo 118:​1-4, 29.

Ang unang mga Cristiano sa Efeso kag Colosas nag-amba sing “mga salmo kag mga pagdayaw sa Dios” (sing literal, “mga himno”). Sa sini gindugang nila ang “espirituwal nga mga ambahanon” nga gin-amba nila sing tinagipusuon. (Efeso 5:​19; Colosas 3:16) Paagi sa ambahanon kag pulong, gingamit nila sing nagakaigo ang ila mga baba sa pagpabutyag sing pagdayaw. Wala bala nagsiling si Jesus nga “gikan sa kabuganaan sang tagipusuon magahambal ang baba”?​—⁠Mateo 12:⁠34.

Musika nga Wala Nagapahamuot sa Dios

Indi tanan nga musika nga ginsambit sa Biblia nagpahamuot sa Dios. Binagbinaga ang hitabo sa Bukid Sinai, diin si Moises nagbaton sing Kasuguan, lakip ang Napulo ka Sugo. Sang nagapanaug si Moises sa bukid, ano ang iya nabatian? “Indi ang kagahod sang ambahanon para sa daku nga binuhatan,” “indi ang gahod sang ambahanon sang kalutusan,” kundi “kagahod sang lain nga pag-amba.” Musika ini may kaangtanan sa idolatriya, isa ka buhat nga wala magpahamuot sa Dios kag nagresulta sa kamatayon sang mga 3,000 sadtong naghimo sing musika.​—⁠Exodo 32:​18, 25⁠–​28.

Bisan pa nga ang mga tawo makakomposo, makatokar, kag makapangalipay sa tanan nga sahi sang musika, wala ini nagakahulugan nga ini tanan nagapahamuot sa Dios. Ngaa indi? Ang Cristiano nga si apostol Pablo nagapaathag: “Ang tanan nagpakasala kag nakulangan sing himaya sang Dios.” (Roma 3:23) Ang mga rituwal sang pagano tuhoy sa pagmuad, ang doktrina sang pagkadi-mamalatyon sang tawhanon nga kalag, kag ang pagsimba kay Maria subong “iloy sang Dios” masami nga ginapadaku subong mga tema sang ginkomposo nga mga musika. Apang, ini nga mga pagpati kag mga buhat nagapakahuya sa Dios sang kamatuoran, kay supak ini sa kon ano ang ginpahayag sang iya inspirado nga Pulong, ang Biblia.​—⁠Deuteronomio 18:​10-12; Ezequiel 18:​4; Lucas 1:​35, 38.

Maalamon nga Pagpili Sing Musika

Ang pagpili sang maayo nga musika makalilibog. Ang mga panghapin sang mga compact disc gindesinyo sa pagbuyok sa mga kustomer nga baklon ang tanan nga sahi sang rekord sa musika. Apang kon ang sumilimba sang Dios luyag magpahamuot sa Iya, mangin mainandamon kag maalamon sia sa pagpili agod malikawan ang vocal kag instrumental nga musika nga gin-inspirar sang butig relihioso nga mga pagpati ukon nasentro sa imoralidad kag demonismo.

Si Albert, nga isa anay ka Cristianong misyonero sa Aprika, nagbaton nga diutay lamang ang iya kahigayunan nga makatokar sing piano didto. Apang, pirme niya ginapamatian ang mga plaka nga dala niya. Sa pagbalik sa iya kaugalingon nga pungsod, nagaduaw karon si Albert sa Cristianong mga kongregasyon subong nagalakbay nga manugtatap. Ang iya tion sa pagpamati sa musika limitado lamang. “Ang akon paborito nga kompositor amo si Beethoven,” siling niya. “Sa pagligad sang mga tinuig, nakatipon ako sing mga rekording sang iya mga symphony, concerto, sonata, kag mga quartet.” Ang pagpamati sa sini naglingaw gid sa iya. Sa pagkamatuod, ang kada isa may kaugalingon nga luyag sa musika, apang subong mga Cristiano ginadumdom naton ang laygay ni Pablo: “Bisan nagakaon kamo ukon nagainom ukon bisan ano ang inyo ginahimo, himua ang tanan nga butang sa kahimayaan sang Dios.”​—⁠1 Corinto 10:⁠31.

 Musika kag Dedikasyon

Ang una gid nga naluyagan ni Susie amo ang musika. “Nagsugod ako sa pagtokar sing piano sa edad nga 6 anyos, sang biyolin sa 10 anyos, kag sang ulihi sa arpa sa 12 anyos,” paathag niya. Nag-eskwela sang ulihi si Susie sa Royal College of Music sa London, Inglaterra, agod magtuon sing arpa. Nagtuon sia sing apat ka tuig sa bantog nga manuglanton sing arpa nga taga-Espanya kag isa pa ka tuig sa Paris Conservatoire, diin nakatigayon sia sing mga titulo sa musika subong man sing mga diploma tungod sang pagtokar sing arpa kag pagtudlo sing piano.

Nakig-upod si Susie sa isa ka kongregasyon sang mga Saksi ni Jehova sa London. Nakita niya didto ang tunay nga interes kag gugma sa tunga sang mga masigka-Saksi. Sing amat-amat, naglambo ang iya gugma kay Jehova, kag ang iya kakugi sa pag-alagad nagpahulag sa iya nga mangita sing mga paagi nga maalagad sia. Nagresulta ini sa dedikasyon kag bawtismo. “Ang paghimo sa musika subong karera isa ka pagkabuhi nga dapat ukuran, busa ang dedikado nga pagkabuhi indi bag-o sa akon,” siling ni Susie. Ang iya tion para sa mga konsierto nabuhinan samtang masako sia sa Cristianong ministeryo sa pagbantala sing maayong balita sang Ginharian sang Dios bilang pagtuman sa mga sugo ni Jesus.​—⁠Mateo 24:​14; Marcos 13:⁠10.

Karon nga nagahinguyang na lamang sia sing limitado nga tion sa pagtokar sing musika, ano ang iya balatyagon? “Kon kaisa medyo nasubuan ako nga wala na ako sing tion sa pag-ensayo,” baton niya, “apang nagatokar gihapon ako sang akon mga instrumento kag nalipay sa musika. Ang musika isa ka dulot halin kay Jehova. Labi ko ini karon nga naapresyar kay gin-una ko na ang pag-alagad sa iya sa akon kabuhi.”​—⁠Mateo 6:⁠33.

Musika nga Nagadayaw sa Dios

Sanday Albert kag Susie lakip ang halos anom ka milyon pa nga Saksi ni Jehova regular nga nagadayaw kay Jehova nga Dios paagi sa musika. Sa Cristianong mga miting nga ginahiwat sa mga Kingdom Hall sa 234 ka kadutaan, ginasugdan nila kag ginatapos ang ila mga miting, kon diin posible, paagi sa pag-amba sing mga ambahanon kay Jehova. Sa major kag minor nga mga nota, ang matahom nga mga melodiya may mga liriko nga pasad sa Kasulatan sa pagdayaw kay Jehova nga Dios.

Ang tanan nga nagatambong nagabayaw sang ila mga tingog agod mag-amba sing mainit nga si Jehova isa ka mainulikdon nga Dios (Ambahanon 44). Nagaamba sila sing isa ka ambahanon sang pagdayaw kay Jehova (Ambahanon 190). Ang ila mga ambahanon nagakilala sang mga kalipay kag mga responsabilidad sang Cristianong paghiliutod, Cristianong pagkabuhi, kag Cristianong mga kinaiya. Nagadugang pa sa ila kalipay amo ang nagkalainlain nga sahi sang estilo sang musika nga gingamit sang mga Saksi gikan sa Asia, Australia, Europa, kag Aminhan kag Bagatnan nga Amerika sa pagkomposo sa mga melodiya.⁠ *

“Mag-amba kay Jehova sing isa ka bag-o nga ambahanon. Mag-amba kay Jehova, tanan kamo nga katawhan sang duta. Mag-amba kay Jehova, pakamaayuha ang iya ngalan,” amo ang nagabukas nga mga pulong sang daku harianon nga ambahanon nga ginsulat sang adlaw sang salmista. “Adlaw-adlaw isugid ang maayong balita sang kaluwasan paagi sa iya. Ipahayag sa tunga sang mga pungsod ang iya himaya, sa tunga sang tanan nga katawhan ang iya makatilingala nga mga binuhatan.” (Salmo 96:​1-3) Amo sini ang ginahimo sang mga Saksi ni Jehova sa inyo duog, kag ginaagda nila kamo sa pagbuylog sa ila sa pag-amba sini nga pagdayaw. Ginaabiabi ikaw sa ila mga Kingdom Hall, diin makatuon ka kon paano madayaw si Jehova paagi sa musika nga nagapahamuot sa iya.

[Mga nota]

[Retrato sa pahina 28]

Pag-amba sing mga pagdayaw kay Jehova