Sugilanon sang Kabuhi

Nabuligan sa Paglandas sang Akon Pagkamahuluy-on

PANUGIRON NI RUTH L. ULRICH

Indi ko mapunggan ang akon kaugalingon kag naghilibion ako sa atubangan mismo sang ganhaan sang pari. Bag-o lang niya ginhambal ang butig nga mga panumbungon batok kay Charles T. Russell, nga nag-alagad anay subong nahauna nga presidente sang Watch Tower Bible and Tract Society. Pasugira ako kon ngaa, nga bisan bata pa, nagaduaw ako sa mga tawo.

NATAWO ako sa isa ka relihioso katama nga pamilya sa isa ka kaumhan sa Nebraska, E.⁠U.⁠A., sang 1910. Ginabasa sang amon pamilya ang Biblia kada aga kag gab-i sa tapos magkaon. Si Tatay ang superintendente sang Sunday school sang Metodista nga simbahan sa diutay nga banwa sang Winside, mga anom ka kilometro ang kalayuon sa amon uma. May kalesa kami nga may mga kurtina ang bintana, amo nga bisan ano man ang panahon, makasimba kami kon Domingo sang aga.

Sang mga otso anyos ako, nagmasakit ang akon manghod nga lalaki sing polio, kag ginpabulong sia ni Nanay sa sanatorium sa Iowa. Walay sapayan sang iya maayo gid nga pag-atipan, napatay ang akon manghod samtang didto sila. Walay sapayan, sa amo man nga tion didto sa Iowa, nasugilanon ni Nanay ang isa ka Estudyante sang Biblia, ang pagtawag anay sa mga Saksi ni Jehova. Nagsugilanunay sila sing madamong beses, kag nag-upod pa gani si Nanay sa babayi sa pila ka miting sang mga Estudyante sang Biblia.

Sang nagpauli si Nanay, gindala niya ang pila ka tomo sang Studies in the Scriptures, nga ginbalhag sang Watch Tower Society. Nakumbinse sia sang ulihi nga ang mga Estudyante sang Biblia nagatudlo sang kamatuoran kag nga ang mga panudlo tuhoy sa pagkadimamalatyon sang tawhanon nga kalag kag walay katapusan nga pagpaantos sa mga malauton indi matuod.​—⁠Genesis 2:​7; Manugwali 9:​5, 10; Ezequiel 18:⁠4.

Apang, naakig gid si Tatay, kag ginpamatukan niya ang mga panikasog ni Nanay sa pagtambong  sa mga miting sang mga Estudyante sang Biblia. Pirme niya kami ginapaupod sang akon magulang nga lalaki, nga si Clarence, sa simbahan. Apang kon wala sa balay si Tatay, ginatun-an kami ni Nanay sing Biblia. Subong resulta, may kahigayunan gid kami nga mga bata nga ipaanggid ang mga panudlo sang mga Estudyante sang Biblia sa iya sang amon simbahan.

Pirme kami ni Clarence nagatambong sa Sunday school sa simbahan, kag ginpamangkot niya ang maestra sing mga pamangkot nga indi masabat sang maestra. Sa pagpauli namon, ginsugiran namon ang amon iloy, kag nagdul-ong ini sa malawig nga paghambalanay tuhoy sini nga mga topiko. Sang ulihi, wala na ako magkadto sa simbahan kag nagsugod ako sa pagtambong sa mga miting sang mga Estudyante sa Biblia kaupod ni Nanay, kag wala madugay amo man ang ginhimo ni Clarence.

Paglandas sa Pagkamahuluy-on

Sang Septiembre 1922, nagtambong kami ni Nanay sa indi gid malipatan nga kombension sang mga Estudyante sang Biblia sa Cedar Point, Ohio. Madumduman ko gihapon ang daku nga karatula nga ginhumlad samtang ginapalig-on ni Joseph F. Rutherford, presidente sadto sang Watch Tower Society, ang kapin sa 18,000 nga tumalambong, sa pinamulong sa karatula: “Ibantala ang Hari kag ang Ginharian.” Napahulag gid ako kag nagbatyag sing pagkahilingagawon nga isugid sa iban ang tuhoy sa maayong balita sang Ginharian sang Dios.​—⁠Mateo 6:​9, 10; 24:⁠14.

Sa mga kombension nga ginhiwat kutob sang 1922 tubtob 1928, isa ka serye sang mga resolusyon ang ginbaton, kag ang mga mensahe ginlakip sa minilyon ka tract nga ginpanagtag sang mga Estudyante sang Biblia sa mga tawo sa bug-os nga kalibutan. Mataas ako kag maniwang​—⁠gintawag nila ako nga greyhound (isa ka sahi sang ido nga ginagamit sa mga palumba)​—⁠kag madasig ako nga nagpamalaybalay nga nagapanagtag sining naimprinta nga mga mensahe. Nanamian gid ako sa sini nga hilikuton. Apang, tuhay naman nga butang ang makighambal sa mga ganhaan, personal nga ginasugiran ang iban nahanungod sa Ginharian sang Dios.

Kay man, tama gid sa akon ka mahuluy-on amo nga ginakulbaan gani ako kon ginaagda ni Nanay ang dalagku nga mga grupo sang mga paryente kada tuig. Nagapanago ako sa akon kuwarto kag nagapabukot didto. Isa ka bes, luyag ni Nanay nga magparetrato ang bug-os nga pamilya, kag gintawag niya ako nga magguwa. Bangod indi ko luyag nga magbuylog sa ila, nagtiyabaw ako samtang ginaganoy niya ako pagguwa sa akon kuwarto.

 Apang, nag-abot ang adlaw nga namat-od ako nga sudlan sing pila ka literatura sa Biblia ang bag. Sulitsulit ko nga ginsiling, “Indi ko ini mahimo,” apang ginsilingan ko dayon ang akon kaugalingon, “Dapat ko ini himuon.” Sang ulihi, naglakat gid man ako sa pagbantala. Pagkatapos sadto, nalipay gid ako nga nagpangisog ako sa paglakat. Ang akon labing daku nga kalipay amo ang kaayawan nga nahimo ang hilikuton, indi sa aktuwal nga paghimo sini. Amo sadto nga tion nga nasugilanon ko ang pari nga ginsambit sa umpisa kag naglakat nga nagahilibion. Sa pagligad sang panahon, sa bulig ni Jehova nasarangan ko nga masugilanon ang mga tawo sa ila mga ganhaan, kag nagdugang ang akon kalipay. Nian, sang 1925, ginsimbuluhan ko ang akon dedikasyon kay Jehova paagi sa pagpabawtismo sa tubig.

Pagsugod sa Bug-os Tion nga Ministeryo

Sang 18 anyos ako, ginbakal ko sing salakyan ang kuwarta nga napanubli ko sa akon tiya kag nagpayunir, nga amo ang pagtawag sa bug-os tion nga ministeryo. Duha ka tuig sang ulihi, sang 1930, nakabaton kami sang akon kaupod sa pagpayunir sing isa ka asaynment nga bantalaan. Nagsugod man sa pagpayunir si Clarence sadto nga tion. Wala madugay sang ulihi ginbaton niya ang pangagda nga mag-alagad sa Bethel, ang bug-os kalibutan nga ulong-talatapan sang mga Saksi ni Jehova sa Brooklyn, New York.

Sa amo man nga tion nagbulagay ang amon mga ginikanan, gani nagpahimo kami ni Nanay sing trailer nga balay kag nagpayunir. Tion yadto sang Great Depression sa Estados Unidos. Ang pagpadayon sa payunir nga hilikuton nangin isa gid ka hangkat, apang determinado kami nga indi mag-untat. Ginbayluhan namon ang mga literatura sa Biblia sing mga manok, itlog, kag utanon, subong man sang mga butang kaangay sang daan nga baterya kag inughaboy na nga aluminyum. Ginbaligya namon ang baterya kag aluminyum agod makabakal sing gasolina para sa salakyan kag mabayaran ang iban pa nga mga galastuhan. Natun-an ko man ang paggrasa sa salakyan kag pagchange oil agod makakinot. Naeksperiensiahan namon nga si Jehova, suno sa iya panaad, nagbukas sang dalan agod buligan kami nga malandas ang mga balagbag.​—⁠Mateo 6:⁠33.

Pakadto sa Misyonero nga mga Asaynment

Sang 1946, gin-agda ako nga mag-eskwela sa ikapito nga klase sang Watchtower Bible School of Gilead, nga nahamtang malapit sa South Lansing, New York. Sadto nga tion kapin sa 15 ka tuig na kami nga nagpayunir ni Nanay, apang indi niya luyag nga balabagan ang higayon ko nga makabaton sing paghanas para sa misyonero nga hilikuton. Gani ginpalig-on niya ako nga batunon ang pribilehiyo nga mag-eskwela sa Gilead. Pagkatapos sang gradwasyon, nangin magkaupod kami ni Martha Hess nga taga-Peoria, Illinois. Ginpadala kami, kaupod sang duha pa, sa Cleveland, Ohio, sa sulod sang isa ka tuig samtang nagahulat kami sing asaynment sa pungsod sa luwas.

Nag-abot yadto nga asaynment sang 1947. Ginpadala kami ni Martha sa Hawaii. Sanglit mahapos nga makasaylo sa sini nga mga isla, nag-apas si Nanay kag nag-istar malapit sa amon sa siudad sang Honolulu. Nagaluya ang iya panglawas, gani dungan sa pag-atipan ko sa akon mga hilikuton bilang misyonero, ginbuligan ko si Nanay. Gin-atipan ko sia tubtob sang mapatay sia sa Hawaii sang 1956, sa edad nga 77 anyos. Sang mag-abot kami, may mga 130 ka Saksi sa Hawaii, apang sang napatay si Nanay, may yara na sing kapin sa isa ka libo, kag indi na kinahanglan ang mga misyonero.

Nian nakabaton kami ni Martha sing sulat halin sa Watch Tower Society nga nagtanyag sa amon sing asaynment sa Japan. Ang una namon nga ginkabalak-an amo ang kon bala sa amon pangidaron makatuon pa kami sing hambal nga Hapones. Kuwarenta’y otso anyos na ako sadto, kag manghod sa akon si Martha sing apat lamang ka tuig. Apang gintugyan namon sa mga kamot ni Jehova ini nga butang kag ginbaton ang asaynment.

Pagkatapos mismo sang internasyonal nga kombension sa Yankee Stadium kag Polo Grounds sa New York City sang 1958, nagsakay kami sa barko padulong sa Tokyo. Ginsugata kami sang bagyo  samtang nagapalapit kami sa pantalan sa Yokohama, diin ginsugat kami nanday Don kag Mabel Haslett, Lloyd kag Melba Barry, kag sang iban pa nga mga misyonero. Sadto, may yara lamang 1,124 ka Saksi sa Japan.

Ginsugdan namon sa gilayon ang pagtuon sing Hapones nga hambal kag ang pagpakigbahin sa ministeryo sa mga ganhaan. Nagagamit sang Ingles nga alpabeto, ginabadbad namon sing literal ang amon presentasyon sa Hapones, nga amon ginabasa. Ang mga tagbalay magasabat sing, “Yoroshii desu” ukon, “Kekko desu,” nga natun-an namon nga nagakahulugan sing, “Maayo ini.” Apang indi namon pirme mahibaluan kon bala interesado ang tagbalay ukon indi, kay ginagamit man yadto nga mga tinaga kon nagapangindi. Nagadepende ang kahulugan sa tono sang tingog ukon sa pangguyahon sang isa ka tawo. Madugay namon natun-an nga mahangpan ini.

Mga Eksperiensia nga Nagpahalipay Sang Akon Tagipusuon

Nabudlayan gihapon sa lenguahe, nagduaw ako sa isa ka dormitoryo sang Mitsubishi Company sang isa ka adlaw kag nasugilanon ang isa ka 20-anyos nga babayi. Nag-uswag sia sa ihibalo sa Biblia kag ginbawtismuhan sang 1966. Sang masunod nga tuig nagpayunir sia kag wala madugay pagkatapos sadto gintangdo sia subong espesyal payunir. Nag-alagad sia nga amo sina kutob sadto. Nangin inspirasyon gid sa akon nga makita kon paano niya gingamit ang iya tion kag kusog sugod sa pagkapamatan-on sa bug-os tion nga ministeryo.

Daku gid nga hangkat ang manindugan sa kamatuoran sang Biblia ilabi na para sa mga tawo nga nagakabuhi sa di-Cristiano nga katilingban. Apang, nalandas sang linibo ini nga hangkat, lakip ang pila sang mga gintun-an ko sing Biblia. Ginhaboy nila ang malahalon nga mga altar sa Budhismo kag Shintoismo nga kinaandan na nga makita sa mga puluy-an sang mga Hapon. Bangod sayop nga ginahangop kon kaisa sang mga paryente ini nga mga  buhat subong indi pagtahod sa patay nga mga katigulangan, kinahanglan sang mga bag-uhan ang kaisog agod himuon ini. Ang ila maisugon nga mga buhat nagpahanumdom sa kaisog nga ginpakita sang una nga mga Cristiano nga naghaboy sang ila mga pagkabutang nga may kaangtanan sa butig nga pagsimba.​—⁠Binuhatan 19:​18-20.

Nadumduman ko ang isa ka estudyante sa Biblia, isa ka ginang sa puluy-an, nga nagaplano sa paghalin sa Tokyo kaupod sang iya pamilya. Luyag niya magsaylo sa isa ka bag-o nga balay nga wala sing mga butang nga may kaangtanan sa pagano nga pagsimba. Gani ginsugid niya sa iya bana ang iya mga luyag, kag kinabubut-on nga nagkooperar ang iya bana. Malipayon niya nga ginasugid sa akon ang tuhoy sini sang nadumduman niya nga may naputos gali sia nga isa ka daku kag malahalon nga marmol nga plorera nga ginbakal niya bangod nagagarantiya kuno ini sing kalipay sa puluy-an. Bangod nagduhaduha sia nga may kaangtanan ini sa butig nga pagsimba, ginmartilyo niya ang plorera kag ginpilak ini.

Ang makita ini nga babayi kag ang iban pa nga handa sa paghaboy sang malahalon nga mga butang may kaangtanan sa butig nga pagsimba kag maisugon nga nagbag-o sang ila kabuhi sa pag-alagad kay Jehova amo ang akon labing makapaladya kag makaalayaw nga eksperiensia. Pirme ko ginapasalamatan si Jehova nga nakaalagad ako sing kapin sa 40 ka tuig bilang misyonero sa Japan.

Modernong-Adlaw nga mga “Milagro”

Kon panumdumon ko ang akon kapin sa 70 ka tuig sa bug-os tion nga ministeryo, nahayanghag gid ako sa daw modernong-adlaw nga mga milagro. Subong isa ka mahuluy-on nga pamatan-on, wala ko gid mahunahuna nga magamit ko ang akon bug-os nga kabuhi sa pagpakigsugilanon sa mga tawo tuhoy sa isa ka Ginharian nga indi luyag pamatian sang kalabanan. Apang, indi lamang nga nasarangan ko ina kundi nakita ko man ang ginatos, ayhan linibo, nga iban pa nga nagahimo man sini. Kag ginhimo nila ini sing epektibo gid sa bagay nga ang sulusobra lang sa isa ka libo ka Saksi sa Japan sang nag-abot ako sang 1958 nagdamo sa kapin sa 222,000 karon!

Sang una namon nga pag-abot ni Martha sa Japan,  ginpaistar kami sa sanga talatapan sa Tokyo. Sang 1963 isa ka bag-o, anom-sing-panalgan nga pasilidad sang sanga ang ginpatindog sa sadto nga duog, kag didto kami nag-istar kutob sadto. Sang Nobiembre 1963 lakip kami sa 163 nga nagtambong sa pamulongpulong sa dedikasyon nga ginhatag sang manugtatap sang amon sanga, nga si Lloyd Barry. Nalab-ot namon sadto ang 3,000 ka Saksi sa Japan.

Makalilipay makita ang daku nga pag-uswag sa hilikuton nga pagbantala sing Ginharian, nga naglab-ot sa kapin sa 14,000 sang 1972 sang nahuman ang isa ka bag-ong ginpadakuan nga sanga sa siudad sang Numazu. Apang sang 1982 may kapin na sa 68,000 ka manugbantala sang Ginharian sa Japan, kag ginpatindog ang mas daku pa nga pasilidad sa sanga sa siudad sang Ebina, mga 80 kilometros halin sa Tokyo.

Sa amo man nga tion, ginkay-o ang daan nga tinukod sang sanga sa sentro sang Tokyo. Sang ulihi, gingamit ini subong puluy-an sang kapin sa 20 ka misyonero nga nag-alagad sa Japan sing 40 ukon 50 ka tuig ukon sing mas malawig pa, nga nagalakip sa amon sang akon madugay na nga kaupod, si Martha Hess. Nagaistar man sa amon puluy-an ang isa ka doktor kag ang iya asawa, nga isa ka nars. Ginaatipan nila kami, mahigugmaon nga ginatatap ang amon mga kinahanglanon sa panglawas. Sining karon lang, gindugang ang isa pa ka nars sa talapuanan, kag nagaduaw ang Cristianong mga kauturan nga babayi subong mga kabulig sang nars kon adlaw. Duha ka katapo sang pamilya Bethel sa Ebina ang nagabulosbulos sa pagduaw agod maghanda sing pagkaon kag maninlo sang amon puluy-an. Sa pagkamatuod, maayo gid si Jehova sa amon.​—⁠Salmo 34:​8, 10.

Natabo ang isa ka talalupangdon nga hitabo sa akon kabuhi bilang misyonero sang nagligad nga Nobiembre, 36 ka tuig sa tapos sang pagdedikar sa tinukod nga ginaistaran karon sang madamo sa amon nga madugay na nga mga misyonero. Sang Nobiembre 13, 1999, isa ako sa 4,486, lakip ang ginatos sang madugay na nga mga Saksi halin sa 37 ka pungsod, nga nagtambong sa dedikasyon sang ginpasangkad nga mga pasilidad sang sanga sa Japan sang Watch Tower Bible and Tract Society sa Ebina. Sa karon, may mga 650 sa sina nga pamilya sang sanga.

Sa sulod sang halos 80 ka tuig kutob sang mahuluy-on ako nga nagsugod sa pagpamalaybalay nga nagadala sing mga mensahe sa Biblia, nangin nagapabakod nga bulig si Jehova sa akon. Ginbuligan niya ako nga malandas ang akon pagkamahuluy-on. Nagapati gid ako nga magamit ni Jehova ang bisan sin-o nga nagasalig sa iya, bisan yadtong mahuluy-on katama kaangay ko. Kag daw ano ka malipayon ang akon kabuhi sa pagpakigsugilanon sa mga estranghero tuhoy sa aton Dios, nga si Jehova!

[Retrato sa pahina 21]

Kaupod ni Nanay kag ni Clarence, nga nagduaw sa amon halin sa Bethel

[Retrato sa pahina 23]

Mga katapo sang amon klase nga nagatuon sa ugsaran sa Gilead School malapit sa South Lansing, New York

[Retrato sa pahina 23]

Sa wala: Ako, si Martha Hess, kag si Nanay, sa Hawaii

[Retrato sa pahina 24]

Sa tuo: Mga katapo sang amon puluy-an para sa mga misyonero sa Tokyo

[Retrato sa pahina 24]

Sa ubos: Upod sa akon madugay na nga kaupod, si Martha Hess

[Retrato sa pahina 25]

Gindedikar ang amon ginpasangkad nga mga pasilidad sang sanga sa Ebina sang nagligad nga Nobiembre