Ngaa Dapat Landason ang Perpeksionismo?

Pirme mo bala ginatinguhaan nga himuon ang imo pinakamaayo? Maathag gid nga sa madamo nga paagi, para ini sa imo kaayuhan kag sa mga nagapalibot sa imo. Sa pihak nga bahin, nasobrahan ang iban kag nangin mga perpeksionista. Ano ang ginapahangop sina?

BUENO, ang isa ka kahulugan sang tinaga nga “perpeksionismo” amo “ang huyog nga tamdon nga di-kalahamut-an ang bisan ano nga indi himpit.” Ayhan nakasumalang ka na sing mga tawo nga may amo sina nga huyog. Makita mo nga ang ila sobra nga mga ginapangita sa iban mahimo bangdan sang madamo nga problema, nagatuga sing pagkadi-naayawan kag pagluya sing buot. Ginakilala sang kadamuan sang timbang nga mga tawo nga ang perpeksionismo paagi sa sobra kag di-makatarunganon nga ginapangita sa tanan nga bahin sang kabuhi indi gid maayo. Dapat ini landason. Apang, ang problema amo nga kon tuhoy sa aton kaugalingon nga panimuot ukon huyog, mahimo nga mabudlay batunon ang huyog sa sini nga perpeksionismo, gani isa ka hangkat ang paglandas sa sini.

Si Nelson may daku gid nga salabton kag madamong problema nga dapat lubaron. Pirme niya ginausisa ang estadistika, kag pinakaimportante sa iya ang produksion. Ang perpeksionismo masunson nga ginakabig nga kinahanglanon agod magmadinalag-on sa mapaindis-indison nga merkado sang trabaho. Bisan pa mahimo nga ginaapresyar sang iban ang pagkasampaton ni Nelson sa trabaho, ang iya pagkaperpeksionista nagresulta sa mga problema niya sa pisikal, subong sang sakit sang ulo kag kahuol. Kaangay ka bala ni Nelson?

Apektado man sang perpeksionismo ang mga pamatan-on. Sang bata pa, si Rita, nga taga-Rio de Janeiro, nanamian mag-eskwela. Gintinguhaan niya nga mangin indi ambisyusa tan-awon, apang nagalalain gid sia kon indi niya makuha ang pinakamataas nga mga grado. Si Rita nagsiling: “Kutob sa pagkabata, ginapaanggid ko ang akon kaugalingon sa iban nga may madamong tion, samtang ako pirme nahul-an kag nagaparikparik. Wala gid ako magbatyag nga may tion sa pagpahuway bangod daw pirme lang nga may dapat himuon.”

Sang bata pa, nagahibi si Maria sa kaugot kon indi  sia makadrowing sing subong kaayo sa iban. Dugang pa, sa pagtinguha niya nga mangin perpekto sa musika, masami sia nga ginhul-an kag nabalaka sa baylo nga malipay sa iya pagtokar ukon pagkanta. Ang isa pa ka taga-Brazil nga lin-ay, si Tânia, nga nagtinguha nga mangin mainandamon kag naglikaw sa paindis-indis, nagbaton nga nagapahamtang gihapon sia sing tuman kataas nga mga talaksan para sa iya kaugalingon, sa eskwelahan man kag sa puluy-an. Nagbatyag sia nga kon indi himpit ang iya ginahimo, indi gid sia maluyagan sang mga tawo. Dugang pa, kon kaisa sobra man ang ginapaabot ni Tânia sa iban, nga nagpabatyag sa iya nga nalugaw-an kag masubo.

Bisan pa ang kasangkol, kapisan, kag personal nga kaayawan importante, mahimo magresulta ang negatibo nga mga balatyagon, subong sang kahadlok nga mapaslawan, bangod sang pagpahamtang sang di-malab-ot nga mga tulumuron. Mahimo magpahamtang ang mga ginikanan kag ang iban pa sing himpit nga talaksan sa hilikuton sa eskwelahan ukon sa isport nga mabudlay lab-uton sang mga pamatan-on. Halimbawa, daku gid ang ginapaabot sang iloy ni Ricardo sa iya, luyag niya nga mangin doktor sia, makahibalo magpiano, kag makahambal sing lainlain nga mga lenguahe. Makita mo bala nga ini nga paagi, kon pasobrahan, nagadul-ong sa mga problema ukon mga kapaslawan?

Ngaa Likawan ang Perpeksionismo?

Kinahanglanon gid ang trabaho nga may superyor nga kalidad, nakalab-ot sa mataas nga talaksan sang pagkasibu kag pagkaekselente. Gani dapat makigkompetensia ang mga tawo sa merkado sang trabaho. Ang isa pa rason kon ngaa madamo ang nagatinguha sing lakas pa amo ang kahadlok nga madulaan sing palangabuhian. Ang iban nga mamumugon nangin kaangay sang atleta nga nagahimo sing sobra nga mga sakripisyo agod makapahamtang sing bag-o nga rekord. Nian, kon nagaatubang sing mabudlay nga kompetisyon, mahimo mapilitan sia nga maghanas sing labi pa, ayhan nagagamit sing steroid agod mag-uswag kag​—⁠nagalaum sia​—⁠nga magdaug. Sa baylo sang maayo nga pagtinguha nga mangin sampaton, ang perpeksionismo nagatuga sa mga tawo nga “pahulagon sang kahadlok nga mapaslawan” ukon “sugyuton nga mangin numero uno.”​—⁠The Feeling Good Handbook.

Matuod, nagabatyag ang iban nga ang ila mahimo sa taliambong ukon sa isport pirme nga mapauswag pa. Apang, suno kay Dr. Robert S. Eliot, “ang perpeksionismo amo ang pagpaabot sang indi gid matabo.” Nagsiling pa sia: “Ginahuman ini sang pagbatyag nga nakasala, pagpangapin sa kaugalingon, kag sang kahadlok nga mulayon.” Gani, matuod gid ang mga pulong sang maalam nga si Hari Solomon: “Nakita ko ang tanan nga lakas nga pagpangabudlay kag ang tanan nga pagkasampaton sa pagpangabudlay, nga nagkahulugan ini sang pagpaindisanay sang isa kag isa; ini man walay pulos kag pagpanikasog sa hangin.”​—⁠Manugwali 4:⁠4.

Ano ang sarang mo mahimo kon may huyog ka nga mangin perpeksionista? Matuod bala nga sa labi mo nga pagtinguha, labi ka nga nagakapaslawan? Luyag mo bala nga mangin indi sobra ka palapangita sa iban kag kapin ka relaks? Ano ang buot silingon nga mangin himpit? Wala ka bala nagahandum nga gamiton sing bug-os ang imo ikasarang samtang ginalikawan ang perpeksionismo? Kon sarang magamit sang di-himpit nga mga tawo ang ila hatag-Dios nga mga ikasarang sa pagtukib sang mga butang para sa ikaayo sang iban, hunahunaa kon ano ang mahimo sang katawhan sa idalom sang himpit nga mga kahimtangan kag sang pagtuytoy sang Dios!

[Retrato sa pahina 4]

Mahimo magpangita sing kahimpitan ang mga ginikanan ukon ang iban, nga indi malab-ot sang mga pamatan-on