Isa ka Manugdala sing Kapawa sa Madamo nga Pungsod
Sugilanon sang Kabuhi
Isa ka Manugdala sing Kapawa sa Madamo nga Pungsod
SUGILANON NI GEORGE YOUNG SUNO SA PANUGIRON NI RUTH YOUNG NICHOLSON
“Ngaa, nian, may amo sini nga paghipos sa aton mga pulpito? . . . Mangin ano nga sahi kita sang mga tawo kon padayon kita nga maghipos sa tapos naton mapamatud-an nga ining mga butang nga akon ginsulat matuod? Indi naton paghuptan ang mga tawo nga walay hinalung-ong, kundi ipahayag naton ang kamatuoran sa paagi nga wala nagadepensa ukon nagatago.”
INI nga mga pulong bahin sang 33-pahina nga sulat ni Tatay nga nagapangabay nga kuhaon ang iya ngalan sa listahan sang simbahan. Tuig 1913 sadto. Sugod sadto, ginsugdan niya ang kabuhi nga puno sing importante nga mga hitabo nga nagdul-ong sa iya sa pag-alagad subong isa ka manugdala sing kapawa sa madamo nga pungsod. (Filipos 2:15) Sugod sang bata pa ako, gintipon ko ang mga sugilanon tuhoy sa mga inagihan ni Tatay gikan sa mga paryente kag gikan sa maragtason nga materyal, kag ginbuligan ako sang mga abyan nga bilugon ang iya kabuhi. Sa madamo nga paagi ang kabuhi ni Tatay nagapahanumdom sa akon sang kabuhi ni apostol Pablo. Kaangay sadtong “apostol sa mga pungsod,” pirme handa si Tatay sa paglakbay agod dalhon ang mensahe ni Jehova sa katawhan sang tanan nga kadutaan kag kapuluan. (Roma 11:13; Salmo 107:1-3) Tuguti ako sa pagsugid sa inyo tuhoy sa akon amay, si George Young.
Ang Una nga mga Tuig
Si Tatay amo ang kinagot nga anak nga lalaki nanday John kag Margaret Young, taga-Scotland nga mga Presbiteryano. Natawo sia sang Septiembre 8, 1886, wala magdugay nga nagsaylo ang pamilya halin sa Edinburg, Scotland, pakadto sa British Columbia sa nakatundan nga Canada. Ang iya tatlo ka magulang nga lalaki—sanday Alexander, John, kag Malcolm—natawo sa Scotland pila ka tuig antes sini. Si Marion, ang manghod nga babayi sang mag-ulutod nga lalaki, nga maanggaon nila nga ginhayuan Nellie, manghod sing duha ka tuig kay Tatay.
Nalipay ang kabataan nga nagdaku sa isa ka kaumhan sa Saanich, indi malayo sa Victoria, British Columbia. Sa amo man nga tion, natun-an nila nga mag-abaga sing responsabilidad. Gani kon ang ila mga ginikanan magpauli halin sa pagbiyahe sa Victoria, ang mga hilikuton sa guwa tapos na kag ang balay matinlo.
Sang ulihi, si Tatay kag ang iya mga utod nga lalaki nangin interesado sa pagmina kag subong man sa pagtroso. Napalambo sang mag-ulutod nga Young ang maayo nga reputasyon subong mga krusero sang troso (mga tawo nga nagausisa sang duta para sa posible nga mapatubasan sang troso) kag subong mga manugbakal kag manugbaligya sang troso. Si Tatay ang nagauyat sang pinansial nga transaksion.
Sang ulihi, bangod sang huyog ni Tatay sa espirituwal nga mga butang namat-od sia nga mangin isa ka Presbiteryano nga ministro. Apang, sadto man nga tion, ang mga sermon sa pamantalaan ni Charles Taze Russell, una nga presidente sang Zion’s Watch Tower Tract Society, nag-apektar sing daku sang iya kabuhi. Bangod sang natun-an ni Tatay, ginsulat kag ginpadala niya ang sulat sang paghalin nga ginhinambitan sa panugod.
Mainayuhon apang maathag nga gingamit ni Tatay ang mga bersikulo sa Biblia agod pamatud-an nga sayop ang mga panudlo sang simbahan nga ang tawhanon nga kalag di-mamalatyon kag nga ang Dios magapaantos sang tawhanon nga kalag sa kalayuhon nga impierno sing dayon. Ginbuyagyag man niya ang doktrina sang Trinidad, ginapamatud-an nga wala ini maghalin sa Cristiano kag wala gid ginasakdag sang Kasulatan. Sugod sadto ginpadayon niya ang Cristianong ministeryo bilang pag-ilog kay Jesucristo, mapainubuson nga gingamit ang tanan niya nga ikasarang kag kusog sa kahimayaan ni Jehova.
Sang 1917, sa idalom sang panuytoy sang Watch Tower Society, nagsugod si Tatay sa pag-alagad subong isa ka peregrino, nga amo anay ang pagtawag sa nagalakbay nga mga tiglawas sang mga Saksi ni Jehova. Sa mga siudad kag mga banwa sa bug-os nga Canada, naghatag sia sing mga pamulongpulong kag nagpasalida sang sine kag slide nga kilala subong ang “Photo-Drama of Creation.” Puno sing mga tawo ang mga sinehan para sa mga pagduaw ni Tatay. Ang iskedyul sang iya mga pagduaw bilang peregrino makita sa The Watchtower tubtob sang 1921.
Ang isa ka pamantalaan sa Winnipeg nagreport nga si Ebanghelisador Young nagpamulongpulong sa 2,500 ka tawo kag madamo ang wala makasulod bangod gutok na ang duog-tilipunan. Sa Ottawa, nagpamulongpulong sia sa tema nga “To Hell and Back.” Didto ang isa ka tigulang nga lalaki nagreport: “Sang natapos na, gin-agda ni George Young ang isa ka kubay sang mga klerigo sa plataporma agod hambalan ang tema upod sa iya, apang wala sa ila ang naghulag. Nahibal-an ko dayon nga nasalapuan ko na ang kamatuoran.”
Gintinguhaan ni Tatay nga paiguon ang madamong espirituwal nga hilikuton sa iya mga pagduaw bilang peregrino. Pagkatapos sini, nagahingagaw sia nga maabtan ang tren pakadto sa isa pa ka naiskedyul nga kaladtuan. Kon nagalakbay sakay sa awto, masunson nga nagalakat sia pakadto sa iya masunod nga kaladtuan antes pa ang tigpalamahaw. Dugang pa sa pagkakugi, si Tatay may reputasyon subong isa ka mapatugsilingon nga tawo kag nakilal-an bangod sang iya Cristianong mga buhat kag kaalwan.
Sa madamo nga kombension nga iya natambungan, ang isa nga indi gid niya malipatan amo ang ginhiwat sa Edmonton, Alberta, sang 1918. Ang tanan nga katapo sang iya pamilya nagtambong didto para sa pagpabawtismo ni Nellie. Amo man yadto ang katapusan nga tion nga nag-ulupod ang mag-ulutod nga lalaki. Pagligad sang duha ka tuig, napatay si Malcolm bangod sa pulmonya. Kaangay sang iya tatlo ka utod nga lalaki kag sang iya amay, si Malcolm may paglaum nga langitnon nga kabuhi, kag nagpabilin sila tanan nga matutom sa Dios tubtob sa ila kamatayon.—Filipos 3:14.
Padulong sa Latagon sa Luwas
Sang natapos ni Tatay ang paglakbay agod magbantala sa Canada sang Septiembre 1921, ginhingyo sia ni Joseph F. Rutherford, presidente anay sang Watch Tower Society, nga magpadulong sa mga isla sang Caribbean. Bisan diin man nga ginpasalida ni Tatay ang “Photo-Drama of Creation,” ginbaton ini sing maayo. Halin sa Trinidad, nagsulat sia: “Ang duog puno, kag madamo ang ginpalakat na lang bangod wala na sing lugar. Sang ikaduha nga gab-i nagginutok ang mga tawo sa tinukod.”
Nian, sang 1923, ginpakadto si Tatay sa Brazil. Namulongpulong sia didto sa madamo kaayo nga tumalambong, kon kaisa nagagamit sing ginasuhulan nga mga manugbadbad. Ang The Watchtower sang Disiembre 15, 1923, nagreport: “Kutob sang Hunyo 1 tubtob Septiembre 30 nakahiwat si Utod Young sing 21 ka pamulongpulong publiko, nga may kabug-usan nga tumalambong nga 3,600; 48 ka miting sa klase, nga may tumalambong nga 1,100; nakapanagtag sing wala bayad nga mga literatura sa Portuguese sa kadamuon nga 5,000 ka kopya.” Madamo ang nagpakita sing interes sang ginhatag ni Tatay ang pamulongpulong nga “Millions Now Living Will Never Die.”
Sang ang bag-o nga mga pasilidad gindedikar sa Brazil sang Marso 8, 1997, ang brosyur sa dedikasyon nagreport: “1923: Si George Young nag-abot sa Brazil. Gin-organisar niya ang sanga talatapan sa sentro sang Rio de Janeiro.” Bisan pa ang mga literatura sa Biblia matigayon anay sa Kinatsila, kinahanglanon man ini sa Portuguese, ang panguna nga lenguahe sa Brazil. Sa amo, sang Oktubre 1, 1923, ginsugdan ang pagbalhag sing The Watchtower sa Portuguese.
Madamo ang napakig-angutan ni Tatay sa Brazil nga indi gid niya malipatan. Ang isa amo ang manggaranon nga Portuguese nga si Jacintho Pimentel Cabral, nga nagtanyag sang iya balay nga gamiton para sa mga miting. Wala magdugay ginbaton ni Jacintho ang kamatuoran sang Biblia kag sang ulihi nangin katapo sang talapuanan sang sanga. Ang isa pa amo si Manuel da Silva Jordão, isa ka lamharon nga Portuguese nga hardinero. Nakapamati sia sa pamulongpulong publiko ni Tatay amo nga napahulag sia nga magpauli sa Portugal agod mag-alagad subong colporteur, subong amo anay ang pagtawag sa bug-os tion nga mga ministro sang mga Saksi ni Jehova.
Masunson nga naglakbay si Tatay sa bug-os nga Brazil paagi sa tren, kag nakasalapo sia sing mga interesado. Sa isa sang iya mga paglakbay, nasugilanon niya sanday Bony kag Catarina Green, kag nagdayon sia sa ila sa sulod sang mga duha ka semana, nga nagapaathag sing Kasulatan sa ila. Pagkatapos sadto, mga pito sa pamilya ang nagsimbulo sang ila dedikasyon kay Jehova paagi sa bawtismo sa tubig.
Ang isa pa nga napakig-angutan niya amo si Sarah Bellona Ferguson sang 1923. Sang 1867 sang bata pa sia, sila sang iya magulang nga lalaki nga si Erasmus Fulton Smith kag sang iban pa nga mga miembro sang pamilya, nagsaylo sa Brazil halin sa Estados Unidos. Kutob sang 1899 regular sia nga nagabaton sing Watchtower nga magasin paagi sa koreo. Ang pagduaw ni Tatay amo ang madugay-na-ginahulat nga kahigayunan para kay Sarah, sa iya apat ka kabataan, kag sa isa ka paryente nga ginatawag ni Tatay nga Aunt Sallie nga mabawtismuhan. Marso 11, 1924 yadto.
Wala madugay, nagbantala si Tatay sa iban pa nga mga pungsod sa Bagatnan nga Amerika. Sang Nobiembre 8, 1924, nagsulat sia halin sa Peru: “Bag-o lang ako nakatapos sa pagpanagtag sing 17,000 ka tract sa Lima kag Callao.” Masunod nagkadto sia sa Bolivia agod managtag sing mga tract didto. Tuhoy sadto nga pagduaw, sia nagsulat: “Ginapakamaayo sang aton Amay ang panikasog. Isa ka Indian ang nagbulig sa akon. Ang iya balay nahamtang sa uluhan sang Amazon. Dalhon niya ang 1,000 ka tract kag pila ka libro pauli.”
Paagi sa mga panikasog ni Tatay, ang mga binhi sang kamatuoran naglapta sa madamo nga pungsod sang Sentral kag Bagatnan nga Amerika. Ang Disiembre 1, 1924, nga Watchtower nagreport: “Si George Young didto na sa Bagatnan nga Amerika sing sobra sa duha ka tuig. . . . Pribilehiyo sining pinalangga nga utod nga dalhon ang mensahe sang kamatuoran sa Punta Arenas, sa Straits of Magellan.” Ginpangunahan man ni Tatay ang pagbantala nga hilikuton sa mga pungsod subong sang Costa Rica, Panama, kag Venezuela. Nagpadayon sia walay sapayan nga nagbalatian sia sing malaria kag naapektuhan ang iya kapagros.
Masunod Padulong sa Europa
Sang Marso 1925, naglayag si Tatay pa Europa, diin naglaum sia nga makapanagtag sing 300,000 ka tract sa Biblia sa Espanya kag Portugal kag makahimo sing kahimusan para sa pagpamulongpulong publiko ni Utod Rutherford. Apang, sang pag-abot sa Espanya, nagpabutyag sing pagpamatok si Tatay sa paghatag ni Utod Rutherford sini nga mga pamulongpulong bangod sang nagaluntad nga pagkapanatiko sa relihion.
Sa pagsabat, si Utod Rutherford nagsulat, nga nagakutlo sang Isaias 51:16: “Ginbutang ko ang akon mga pulong sa imo baba, kag gintabunan ko ikaw sa landong sang akon kamot, agod nga matanom ko ang kalangitan, kag mapasad ang mga sadsaran sang duta, kag masiling sa Sion, Ikaw ang akon katawhan.” (King James Version) Sa sini, si Tatay naghinakop: “Pat-od gid nga kabubut-on sang Ginuo nga magpadayon ako kag itugyan ang mga resulta sa iya.”
Sang Mayo 10, 1925, ginhatag ni Utod Rutherford ang iya pamulongpulong nga may manugbadbad sa Novedades Theater sa Barcelona. Kapin sa 2,000 ang nagtambong, lakip ang isa ka opisyal sang gobierno kag isa ka badigard sa entablado. Amo man sini ang ginhimo sa Madrid, nga may 1,200 ka nagtambong. Bangod sang interes nga ginpakita sa sining mga pamulongpulong, isa ka sanga talatapan ang gintukod sa Espanya nga gintulin, suno sa ginsiling sang 1978 Yearbook of Jehovah’s Witnesses, “sa idalom sang pagdumala ni George Young.”
Sang Mayo 13, 1925, namulongpulong si Utod Rutherford sa Lisbon, Portugal. Nagmadinalag-on man sing daku ang iya pagduaw didto, walay sapayan sang mga pagtinguha sang klero nga tublagon ang miting paagi sa pagsinggitan kag pagguba sa mga siya. Pagkatapos sang mga pamulongpulong ni Utod Rutherford sa Espanya kag Portugal, padayon nga ginpasalida ni Tatay ang “Photo-Drama,” kag naghimo man sia sing kahimusan nga maimprinta kag mapanagtag ang mga literatura sa Biblia sa amo nga mga duog. Sang 1927 nagreport sia nga ang maayong balita “ginbantala sa tanan nga siudad kag banwa sa Espanya.”
Pagbantala sa Unyon Sobyet
Ang masunod nga teritoryo ni Tatay sa pagmisyonero amo ang Unyon Sobyet, diin nag-abot sia sang Agosto 28, 1928. Ang isa niya ka sulat, nga napetsahan sing Oktubre 10, 1928, mabasa sing bahin:
“Sugod sang nagkari ako sa Rusya, makapangamuyo gid ako, ‘Magkari ang imo ginharian’ sing hugot sa tagipusuon. Ginatun-an ko ang lenguahe, apang mahinay ini. Ang akon manugbadbad isa ka maayo gid nga tawo, isa ka Judiyo, apang nagatuo sia kay Cristo kag naluyagan niya ang Biblia. May pila ako ka makawiwili nga eksperiensia apang wala ako makahibalo kon tubtob san-o ako tugutan nga magtener. Sang nagligad nga semana nakabaton ako sing abiso nga maghalin sa sulod sang 24 oras apang nadispunihan ini agod makapabilin ako sing malawiglawig pa.”
Ginpakig-angutan ang pila ka Estudyante sang Biblia sa Kharkov, nga karon isa na ka daku nga siudad sa Ukraine, kag ang mahigugmaon nga paghambalanay nagresulta sa mga luha sang kalipay sa ila mga mata. Isa ka magamay nga kombension ang ginhiwat kada gab-i tubtob sa tunganggab-i. Nagsulat sang ulihi tuhoy sini nga pagpakigsapol sa mga kauturan, si Tatay nagsiling: “Makaluluoy nga kauturan, ang pila nila ka libro ginkompiskar kag ang mga awtoridad di-mainabyanon, apang malipayon sila.”
Ang ministeryo ni Tatay sa Unyon Sobyet ginpadaku sa isa ka pinasahi nga brosyur nga ginpanghatag sa mga nagtambong sa dedikasyon sang bag-o nga pasilidad sang sanga sa St. Petersburg, Rusya, sang Hunyo 21, 1997. Ang brosyur nagasiling nga ginpadala si Tatay sa Moscow, kag ini nagareport nga nakakuha sia sing pahanugot nga “magbalhag sing 15,000 ka kopya sang pulyeto nga Freedom for the Peoples kag Where Are the Dead? agod ipanagtag sa Rusya.”
Sang pagbalik halin sa Rusya, gintangdo si Tatay sa hilikuton sang peregrino sa Estados Unidos. Sa Bagatnan nga Dakota nagduaw sia sa puluy-an nanday Nellena kag Verda Pool, ang mag-utod nga pagligad sang pila ka tuig nangin mga misyonera sa Peru. Nagpahayag sila sing mahigugmaon nga apresasyon sa wala-kakapoy nga ministeryo ni Tatay kag nagsiling: “Ang mga kauturan sadto nga panahon may espiritu gid sang pagpayunir sang nagkadto sila sa sining mga lugar sa luwas nga diutay lamang sing pagkabutang sining kalibutan apang may tagipusuon nga puno sang gugma kay Jehova. Amo sina ang nagpahulag sa ila nga himuon ang ila ginhimo.”
Pagminyo kag Ikaduha nga Paglakbay
Sa sulod sang tinuig nagasulat si Tatay kay Clara Hubbert sang Manitoulin Island, Ontario. Nagtambong sila nga duha sa kombension sa Columbus, Ohio, sang Hulyo 26, 1931, sang ginbaton sang mga Estudyante sang Biblia ang ngalan nga Mga Saksi ni Jehova. (Isaias 43:10-12) Pagligad sang isa ka semana nagpakasal sila. Wala magdugay, naglakat liwat si Tatay, sa iya ikaduha nga paglakbay bilang misyonero sa mga isla sang Caribbean. Nagbulig sia didto sa pag-organisar sang mga miting kag sa paghanas sa iban sa pamalaybalay nga ministeryo.
Nakabaton si Nanay sing mga laragway, mga kard, kag mga sulat halin sa Suriname, sa St. Kitts, kag sa madamo pa nga lugar. Ang sulat nagasugid tuhoy sa pag-uswag sang pagbantala nga hilikuton kag kon kaisa nagalakip sing mga impormasyon tuhoy sa mga pispis, mga sapat, kag mga tanom sa partikular nga pungsod nga ginkadtuan ni Tatay. Sang Hunyo 1932, natapos ni Tatay ang iya hilikuton sa Caribbean kag, sakay sa pinakabarato sing plete nga bahin sang barko subong sang kinaandan, nagbalik sia sa Canada. Pagkatapos sadto, magkaupod sila ni Nanay nga nagpakigbahin sa bug-os tion nga pagbantala nga hilikuton, ginhinguyang ang tigtulugnaw sang 1932/33 sa Ottawa upod sa isa ka daku nga grupo sang iban pa nga bug-os tion nga mga ministro.
Isa ka Malip-ot nga Pagkabuhi Upod sa Pamilya
Sang 1934, natawo ang akon utod nga lalaki, si David. Sang bata pa sia, nagatindog sia sa kahon nga bulutangan sang kalo ni Nanay kag nagaensayo sa paghatag sang iya “mga pamulongpulong.” Sa bug-os niya nga kabuhi, nagpakita sia sing kakugi kay Jehova kaangay sang iya amay. Naglakbay sila nga tatlo sakay sa awto, nga ang kagamitan sa tunog ginahigot sa atop, samtang nagaduaw sila sa mga kongregasyon halin sa sidlangan nga baybayon sang Canada pakadto sa katundan nga baybayon. Natawo ako sang 1938 samtang nagaalagad si Tatay sa British Columbia. Nadumduman ni David nga ginakulan ako ni Tatay sa katre kag nagaluhod sanday Tatay, Nanay, kag David sa palibot sini samtang nagapangamuyo si Tatay sa pagpasalamat para sa akon.
Sang tigtulugnaw sang 1939, nagpuyo kami sa Vancouver samtang ginaduaw ni Tatay ang mga kongregasyon sa amo nga duog. Lakip sa madamo nga sulat nga natipon namon sa sulod sang tinuig amo ang isa nga napetsahan sing Enero 14, 1939, nga ginsulat sang didto sia sa Vernon, British Columbia. Ginsulat ini ni Tatay kanday Clara, David, kag Ruth, nga nagasiling: “Isa ka diutay nga halok kag isa ka hakos.” May mensahe ini para sa kada isa sa amon. Naghambal sia tuhoy sa pag-ani nga daku didto apang diutay lamang ang mamumugon.—Mateo 9:37, 38.
Isa ka semana pagkatapos makabalik sa Vancouver halin sa iya asaynment, nalipong si Tatay sa isa ka miting. Ang masunod nga pagsayasat nagpakita nga may makapakanser nga tumor sia sa utok. Sang Mayo 1, 1939, natapos niya ang iya dutan-on nga kabuhi. Siam ka bulan ang akon edad sadto, kag si David manuglima ka tuig. Ang amon pinalangga nga iloy, nga may langitnon man nga paglaum, nagpabilin nga matutom sa Dios tubtob sang mapatay sia sang Hunyo 19, 1963.
Ang balatyagon ni Tatay sa iya pribilehiyo nga pagdala sing maayong balita sa madamo nga pungsod matahom nga ginlaragway sa isa sang iya mga sulat kay Nanay. Nagsiling sia sa bahin: “Mainayuhon nga gintugutan ako ni Jehova nga magkadto sa sini nga mga pungsod subong isa ka kapawa sa pagdala sing mensahe sang Ginharian. Dayawon ang iya balaan nga ngalan. Sa kahuyangon kag pagkadisangkol kag kaluyahon, ang iya himaya nagasiga.”
Sa karon, ang mga anak, mga apo, kag mga apo sa tuhod nanday George kag Clara Young nagaalagad man sa aton mahigugmaon nga Dios, si Jehova. Ginsugiran ako nga masunson ginakutlo ni Tatay ang Hebreo 6:10, nga nagasiling: “Ang Dios indi di-matarong nga malimot sang inyo binuhatan kag sang gugma nga ginpakita ninyo tungod sa iya ngalan.” Kami man wala malipat sa binuhatan ni Tatay.
Ang akon amay, sa tuo, upod sa iya tatloka utod nga lalaki
Si Tatay (nagatindog) upod sanday Utod Woodworth, Rutherford,kag Macmillan
Sa ubos: Si Tatay (sa pinakawala) sa grupo upod si Utod Russell
Sanday Tatay kag Nanay
Sa ubos: Ang adlaw sang ila kasal
Upod si David kag si Nanay pila ka tuig sa tapos mapatay si Tatay
