Ang Paglaum nga Pagkabanhaw May Gahom

“Ginbaton ko ang kadulaan sang tanan nga butang . . . agod makilala [si Jesucristo] kag ang gahom sang iya pagkabanhaw.”—FILIPOS 3:8-10.

1, 2. (a) Sang nagligad nga mga tuig, paano ginlaragway sang isa ka klerigo ang pagkabanhaw? (b) Paano mahanabo ang pagkabanhaw?

SANG maaga nga bahin sang katuigan 1890, ang pangpubliko nga press nagbalita sang isa ka tumalagsahon nga sermon sang isa ka klerigo sa Brook­lyn, New York, E.U.A. Nagsiling sia nga ang pagkabanhaw nagalakip sang pagtipon liwat kag pagbuhi liwat sa tanan nga tul-an kag unod nga nagahuman sang tawhanon nga lawas, nahalitan man ini bangod sang kalayo ukon bangod sang aksidente, ginkaon man ini sang isa ka sapat ukon nangin abono. Ang manugwali nagpati nga sa isa ka 24-oras nga adlaw, ang hangin mapuno sang mga kamot, butkon, tiil, tudlo, tul-an, lutalutahan, kag panit sang binilyon ka patay. Ini nga mga bahin magapangita sang iban pa nga mga bahin sang isa ka lawas. Nian ang mga kalag magahalin sa langit kag impierno agod magpuyo sa sining ginbanhaw nga mga lawas.

² Ang pagbanhaw paagi sa liwat nga pagtipon sa orihinal nga mga atomo indi makatarunganon, kag ang mga tawo wala sing di-mamalatyon nga kalag. (Manugwali 9:5, 10; Ezequiel 18:4) Indi kinahanglan nga tipunon liwat ni Jehova, ang Dios sang pagkabanhaw, ang butang nga nagahuman anay sa isa ka tawhanon nga lawas. Sarang sia makahimo sing bag-ong mga lawas para sa mga banhawon. Ginhatagan ni Jehova ang iya Anak, nga si Jesucristo, sing gahom sa pagbanhaw sa mga patay, nga may paglaum nga kabuhi nga walay katapusan. (Juan 5:26) Gani si Jesus nagsiling: “Ako ang pagkabanhaw kag ang kabuhi. Sia nga nagapakita sing pagtuo sa akon, bisan mapatay pa sia, magakabuhi.” (Juan 11:25, 26) Daw ano ka makalilipay nga saad! Nagapabakod ini sa aton nga batason ang mga pagtilaw kag atubangon pa gani ang kamatayon subong matutom nga mga Saksi ni Jehova.

3. Ngaa kinahanglan nga maghimo si Pablo sing pagpangapin sa pagkabanhaw?

³ Ang pagkabanhaw wala nagahisanto sa panudlo nga ang mga tawo may di-mamalatyon nga kalag—ang pagtamod nga ginpatihan anay sang Griegong pilosopo nga si Plato. Gani, ano ang natabo  sang nagpanaksi si apostol Pablo sa prominente nga mga Griego sa Areopago sa Atenas, nga nagpatuhoy sing indi direkta kay Jesus, kag nagsiling nga ginbanhaw sia sang Dios? “Ti,” siling sang report, “sang pagkabati nila tuhoy sa pagkabanhaw sang mga patay, ang iban nagsugod sa pag-uligyat.” (Binuhatan 17:29-34) Madamo sang nakakita sa ginbanhaw nga si Jesucristo ang buhi gihapon kag, walay sapayan sang pagyaguta, nagpamatuod nga ginbanhaw sia gikan sa minatay. Apang ang butig nga mga manunudlo nga nagapakig-upod sa kongregasyon sang Corinto nagpanghiwala sang pagkabanhaw. Busa naghimo si Pablo sing mabakod nga pagpangapin sa sining Cristianong panudlo sa 1 Corinto kapitulo 15. Ang mahalungon nga pagtuon sa iya mga argumento nagapamatuod gid sang kapat-uran kag gahom sang paglaum nga pagkabanhaw.

Malig-on nga Pamatuod Sang Pagbanhaw kay Jesus

4. Anong nakasaksi nga pamatuod sang pagbanhaw kay Jesus ang ginhatag ni Pablo?

⁴ Talupangda kon paano ginsugdan ni Pablo ang iya pangapin. (1 Corinto 15:1-11) Luwas kon ang mga taga-Corinto nangin mga tumuluo nga wala sing katuyuan, magapanguyapot sila sing hugot sa maayong balita sang kaluwasan. Si Cristo napatay tungod sa aton mga sala, ginlubong, kag ginbanhaw. Sa katunayan, ang ginbanhaw nga si Jesus nagpakita kay Cefas (Pedro), “pagkatapos sini sa napulog-duha.” (Juan 20:19-23) Nakita sia sang mga 500, ayhan sang nagsugo sia: ‘Lakat kamo, maghimo sing mga disipulo.’ (Mateo 28:19, 20) Nakita sia ni Santiago, kag sang tanan man nga matutom nga apostoles. (Binuhatan 1:6-11) Malapit sa Damasco, si Jesus nagpakita kay Saul “subong nga sa isa nga natawo sing maaga”—subong nga daw ginbanhaw na sia sa espirituhanon nga kabuhi. (Binuhatan 9:1-9) Ang mga taga-Corinto nangin mga tumuluo bangod si Pablo nagbantala sa ila, kag ginbaton nila ang maayong balita.

5. Ano ang pangatarungan ni Pablo subong sang ginrekord sa 1 Corinto 15:12-19?

⁵ Tan-awa ang pangatarungan ni Pablo. (1 Corinto 15:12-19) Sanglit ang mga nakasaksi nagabantala nga si Cristo ginbanhaw, paano masiling nga wala sing pagkabanhaw? Kon si Jesus wala ginbanhaw gikan sa minatay, ang aton pagbantala kag ang aton pagtuo walay pulos, kag mga butigon kita nga nagapanaksi batok sa Dios paagi sa pagsiling nga ginbanhaw niya si Cristo. Kon ang mga patay wala ginabanhaw, ‘yara gihapon kita sa aton mga sala,’ kag ang mga napatay nga nahiusa kay Cristo malaglag. Dugang pa, “kon sa sini lamang nga kabuhi naglaum kita kay Cristo, sa tanan nga tawo kita ang labing makaluluoy.”

6. (a) Ano ang ginsiling ni Pablo bilang pamatuod sa pagbanhaw kay Jesus? (b) Ano ang “katapusan nga kaaway,” kag paano ini dulaon?

⁶ Ginapamatud-an ni Pablo ang pagbanhaw kay Jesus. (1 Corinto 15:20-28) Bangod si Cristo ang “nahauna nga bunga” sang mga natulog sa kamatayon, ang iban man pagabanhawon. Subong nga ang kamatayon resulta sang paglapas sang tawo nga si Adan, ang pagkabanhaw matigayon paagi sa isa ka tawo—si Jesus. Ang mga natungod sa iya banhawon sa tion sang iya presensia. ‘Dulaon [ni Cristo] ang tanan nga panguluhan kag ang tanan nga awtoridad kag gahom’ nga nagapamatok sa pagkasoberano sang Dios kag magagahom subong Hari tubtob ibutang ni Jehova ang tanan nga kaaway sa iya mga tiil. Bisan ang “katapusan nga kaaway”—ang kamatayon nga ginpanubli gikan kay Adan—dulaon pasad sa halad ni Jesus. Nian itugyan ni Cristo ang Ginharian sa iya Dios kag Amay, nagapasakop sang iya kaugalingon sa “Isa nga nagpasakop sang tanan nga butang sa iya, agod ang Dios mahimo nga mangin tanan nga butang sa tagsatagsa.”

Ginbawtismuhan Para sa mga Patay?

7. Sin-o ang “ginabawtismuhan sa tuyo nga mangin mga patay,” kag ano ang kahulugan sini para sa ila?

⁷ Ang mga nagapamatok sa pagkabanhaw ginpamangkot: “Ano ang himuon nila nga mga ginabawtismuhan sa tuyo nga mangin mga patay?” (1 Corinto 15:29) Indi buot silingon ni Pablo nga ang mga buhi bawtismuhan tungod sa mga patay, kay ang mga disipulo ni Jesus dapat nga personal nga magtuon, magtuo, kag magpabawtismo. (Mateo 28:19, 20; Binuhatan 2:41) Ang hinaplas nga mga Cristiano “ginabawtismuhan sa tuyo nga mangin mga patay” paagi sa pagkamangin masako sa dalanon sang kabuhi nga nagadul-ong sa kamatayon kag pagkabanhaw. Ini nga sahi sang bawtismo nagasugod sang ginpalambo sang espiritu sang Dios ang langitnon nga paglaum sa ila kag nagatapos sang ginbanhaw sila gikan sa mga patay padulong sa di-mamalatyon nga espiritu nga kabuhi sa langit.—Roma 6:3-5; 8:16, 17; 1 Corinto 6:14.

8. Sa ano makapat-od ang mga Cristiano bisan pa nga mapatay sila ni Satanas kag sang iya mga alagad?

⁸ Subong sang ginapakita sang mga pulong ni Pablo, ang paglaum nga pagkabanhaw nagabulig sa mga Cristiano nga atubangon pirme ang  katalagman kag kamatayon bangod sang paghimo sa hilikuton nga pagbantala sing Ginharian. (1 Corinto 15:30, 31) Nahibaluan nila nga mahimo sila banhawon ni Jehova kon tugutan niya si Satanas kag ang iya mga alagad nga patyon sila. Ang Dios lamang ang makalaglag sang ila kalag, ukon kabuhi, sa Gehena, nga nagalaragway sang dayon nga kalaglagan.—Lucas 12:5.

Ang Kinahanglanon nga Makapangaman

9. Agod ang paglaum nga pagkabanhaw may nagasakdag nga gahom sa aton kabuhi, ano ang dapat naton likawan?

⁹ Ang paglaum nga pagkabanhaw nagsakdag kay Pablo. Samtang didto sia sa Efeso, mahimo nga ginbutang sia sang iya mga kaaway sa mga arena agod makig-away sa mga sapat nga mapintas. (1 Corinto 15:32) Kon natabo yadto, ginluwas sia, kaangay sang pagluwas kay Daniel gikan sa mga leon. (Daniel 6:16-22; Hebreo 11:32, 33) Sanglit naglaum sia sa pagkabanhaw, ang panimuot ni Pablo indi subong sang panimuot sang mga apostata sang Juda sang panahon ni Isaias. Nagsiling sila: “Magkaon kita kag mag-inom, kay buwas mapatay kita.” (Isaias 22:13, Septuagint) Agod ang paglaum nga pagkabanhaw may nagasakdag nga gahom sa aton kabuhi subong sang kay Pablo, dapat naton likawan ang mga tawo nga may amo sining di-maayo nga espiritu. “Indi kamo magtalang,” paandam ni Pablo. “Ang malain nga kaupdanan nagadunot sang mapuslanon nga mga batasan.” (1 Corinto 15:33) Sa pagkamatuod, ini nga prinsipio naaplikar sa lainlain nga mga bahin sang kabuhi.

10. Paano naton huptan nga buhi ang aton paglaum nga pagkabanhaw?

¹⁰ Para sa mga nagaduhaduha sa pagkabanhaw, si Pablo nagsiling: “Magmata kamo nga may kaligdong sa matarong nga paagi kag indi magpakasala, kay ang iban wala sing ihibalo sa Dios. Nagahambal ako agod mahuya kamo.” (1 Corinto 15:34) Sa sining “tion sang katapusan,” dapat kita magpanghikot nahisuno sa sibu nga ihibalo sang Dios kag ni Cristo. (Daniel 12:4; Juan 17:3) Magahupot ini nga buhi sang aton paglaum nga pagkabanhaw.

Ginbanhaw sa Anong Lawas?

11. Paano ginailustrar ni Pablo ang pagbanhaw sa hinaplas nga mga Cristiano?

¹¹ Masunod nga ginbinagbinag ni Pablo ang pila ka pamangkot. (1 Corinto 15:35-41) Ayhan sa panikasog nga magpautwas sing duhaduha sa pagkabanhaw, ang isa nga nagapangusisa mahimo mamangkot: “Paano banhawon ang mga patay? Huo, sa ano nga sahi sang lawas sila magaabot?” Subong sang ginpakita ni Pablo, ang binhi nga gintanom sa duta nagakapatay samtang nagabalhin ini nga mangin similya. Sa kaanggid, ang ginpanganak-sa-espiritu nga tawo kinahanglan nga mapatay. Subong nga ang isa ka tanom nagatubo gikan sa binhi subong isa ka ­bag-o nga lawas, ang ginbanhaw nga lawas sang ginhaplas nga Cristiano tuhay man sa tawhanon nga unod. Bisan pa may pareho sia nga dagway sang kabuhi antes sia mapatay, ginabanhaw sia subong isa ka ­bag-o nga tinuga nga may espiritu nga lawas nga sarang magkabuhi sa langit. Natural lamang nga ang mga ginbanhaw sa duta banhawon sa tawhanon nga mga lawas.

12. Ano ang kahulugan sang mga ekspresyon nga “langitnon nga mga lawas” kag “dutan-on nga mga lawas”?

¹² Subong sa ginsiling ni Pablo, ang tawhanon nga unod tuhay sa mga sapat. Bisan gani ang unod sang mga sapat magkatuhay sa isa kag isa. (Genesis 1:20-25) Ang “langitnon nga mga lawas” sang espiritu nga mga tinuga tuhay sa himaya gikan sa “dutan-on nga mga lawas” sang unod. May kinatuhayan man sa himaya sang adlaw, bulan, kag mga bituon. Apang ang ginbanhaw nga mga hinaplas may daku pa nga himaya.

13. Suno sa 1 Corinto 15:42-44, ano ang ginsab-ug kag ano ang ginbanhaw?

¹³ Sa pagsambit sang mga kinatuhayan, si Pablo nagdugang: “Amo man ang pagkabanhaw sang mga patay.” (1 Corinto 15:42-44) Nagsiling sia: “Ginasab-ug ini sa pagkamadinulunton, ginabanhaw ini sa pagkadi-madinulunton.” Mahimo nga buot silingon diri ni Pablo ang mga hinaplas subong isa ka grupo. Ginsab-ug sa kaduluntan sa kamatayon, ginabanhaw ini sa pagkadi-madinulunton, nga hilway sa sala. Bisan pa wala ginpadunggan sang kalibutan, ginabanhaw ini sa langitnon nga kabuhi kag ginpadayag upod kay Cristo sa himaya. (Binuhatan 5:41; Colosas 3:4) Sa kamatayon ginasab-ug ini sa “pisikal nga lawas” kag ginabanhaw sa “espirituwal nga lawas.” Sanglit posible ini sa kaso sang ginpanganak-sang-espiritu nga mga Cristiano, makapat-od kita nga ang iban pa mahimo banhawon sa kabuhi sa duta.

14. Paano ginpaanggid ni Pablo si Cristo kay Adan?

¹⁴ Masunod nga ginpaanggid ni Pablo si Cristo kay Adan. (1 Corinto 15:45-49) Si Adan, ang nahaunang tawo, “nangin buhi nga kalag.” (Genesis 2:7) “Ang katapusan nga Adan”—si Jesus—“nangin nagahatag-kabuhi nga espiritu.” Ginhatag niya ang iya kabuhi subong halad-gawad, una tungod sa iya hinaplas nga mga sumulunod. (Marcos 10:45) Subong mga tawo,  ‘ginadala nila ang larawan sang isa nga human sa yab-ok,’ apang kon banhawon nangin kaangay sila sang katapusan nga Adan. Sa pagkamatuod, ang halad ni Jesus magabenepisyo sa tanan nga matinumanon nga katawhan, lakip ang mga ginbanhaw sa duta.—1 Juan 2:1, 2.

15. Ngaa ang hinaplas nga mga Cristiano wala ginbanhaw sa unod, kag paano sila ginbanhaw sa tion sang presensia ni Jesus?

¹⁵ Kon ang hinaplas nga mga Cristiano mapatay, wala sila ginabanhaw sa unod. (1 Corinto 15:50-53) Ang madinulunton nga lawas sang unod kag dugo indi makapanubli sang pagkadi-madinulunton kag sang langitnon nga Ginharian. Ang pila ka hinaplas indi na kinahanglan nga magtulog sing malawig sa kamatayon. Bangod natapos nila sing matutom ang ila dutan-on nga kabuhi sa tion sang presensia ni Jesus, sila ‘bag-uhon, sa makadali, sa pagpisok sang mata.’ Banhawon sila sa gilayon sa espiritu nga kabuhi sa pagkadi-madinulunton kag himaya. Sa ulihi, ang langitnon nga “nobya” ni Cristo magadamo sing 144,000.—Bugna 14:1; 19:7-9; 21:9; 1 Tesalonica 4:15-17.

Kadalag-an sa Kamatayon!

16. Suno kay Pablo kag sa nauna nga mga manalagna, ano ang mahanabo sa kamatayon nga ginpanubli gikan sa makasasala nga si Adan?

¹⁶ Si Pablo madinalag-on nga nagpahayag nga ang kamatayon lamunon sing dayon. (1 Corinto 15:54-57) Kon ang madinulunton kag mamalatyon mangin di-madinulunton kag di-mamalatyon, ining mga pulong matuman: “Ang kamatayon ginlamon sing dayon.” “Kamatayon, diin bala ang imo kadalag-an? Kamatayon, diin bala ang imo sudlot?” (Isaias 25:8; ­Oseas 13:14) Ang sudlot nga nagapatubas sing kamatayon amo ang sala, kag ang kusog sang sala amo ang Kasuguan, nga nagtagudili sang mga makasasala sa kamatayon. Apang bangod sang halad kag pagkabanhaw ni Jesus, ang kamatayon nga ginpanubli gikan sa makasasala nga si Adan indi na mangin madinalag-on.—Roma 5:12; 6:23.

17. Paano ang mga pinamulong sang 1 Corinto 15:58 naaplikar sa karon?

¹⁷ “Busa, mga kauturan ko nga hinigugma,” siling ni Pablo, “magpakalig-on kamo, nga di-mationg, nga madamo pirme sing ginahimo sa hilikuton sang Ginuo, sa nahibaluan ninyo nga ang inyo pagpangabudlay may kaangtanan sa Ginuo indi walay pulos.” (1 Corinto 15:58) Ini nga mga pulong naaplikar sa hinaplas nga nagkalabilin sa karon kag sa “iban nga mga karnero” ni Jesus bisan pa nga mapatay sila sa sining katapusan nga mga adlaw. (Juan 10:16) Ang ila mga pinangabudlayan subong mga manugbantala sang Ginharian indi walay pulos, kay ang pagkabanhaw nagahulat sa ila. Kon amo, subong mga alagad ni Jehova, magpabilin kita nga masako sa hilikuton sang Ginuo samtang nagahulat sang adlaw nga makasinggit kita sing malipayon: “Kamatayon, diin bala ang imo kadalag-an?”

Ang Paglaum nga Pagkabanhaw Natuman!

18. Daw ano kabakod ang paglaum ni Pablo sa pagkabanhaw?

¹⁸ Ang mga pulong ni Pablo nga narekord sa 1 Corinto kapitulo 15 nagapamatuod nga ang paglaum nga pagkabanhaw may gahom sa iya kabuhi. Nakapat-od gid sia nga si Jesus ginbanhaw gikan sa minatay kag nga ang iban hilwayon man gikan sa kinaandan nga lulubngan sang katawhan. Kamo bala may subong sini kabakod nga pagsalig? Ginkabig ni Pablo ang makagod nga mga bentaha nga “mga sagbot” kag ‘ginbaton ang kadulaan sang tanan nga butang’ agod mahimo niya ‘makilala si Cristo kag ang gahom sang iya pagkabanhaw.’ Ang apostol handa nga magpasakop sa kamatayon kaangay sang kay Cristo sa paglaum nga makabaton sing ‘mas nauna nga pagkabanhaw.’ Gintawag man nga “nahaunang pagkabanhaw,” ginaagom ini sang 144,000 ka hinaplas nga mga sumulunod ni Jesus. Huo, ginbanhaw sila sa espiritu nga kabuhi sa langit, samtang ang “nabilin nga mga patay” banhawon sa duta.—Filipos 3:8-11; Bugna 7:4; 20:5, 6.

19, 20. (a) Sin-o nga mga indibiduwal sa rekord sang Biblia ang banhawon sa duta? (b) Kay ­sin-o pagkabanhaw ang ginahulat mo sing malangkagon?

 ¹⁹ Ang paglaum nga pagkabanhaw nangin isa ka mahimayaon nga katunayan para sa mga hinaplas nga nangin matutom tubtob sa kamatayon. (Roma 8:18; 1 Tesalonica 4:15-18; Bugna 2:10) Makita sang mga makalampuwas sa “dakung kapipit-an” ang katumanan sang paglaum nga pagkabanhaw sa duta samtang ‘ginahatag sang dagat ang mga patay nga yara sa sini, kag ginahatag sang kamatayon kag Hades ang mga patay nga yara sa sini.’ (Bugna 7:9, 13, 14; 20:13) Lakip sa mga banhawon sa duta amo si Job, nga namatyan sang iya pito ka anak nga lalaki kag tatlo ka anak nga babayi. Handurawa ang iya kalipay sa pag-abiabi liwat sa ila—kag daw ano ka malipayon sila nga may yara sila pito pa ka utod nga lalaki kag tatlo pa ka matahom nga mga utod nga babayi!—Job 1;1, 2, 18, 19; 42:12-15.

²⁰ Daw ano gid nga pagpakamaayo kon sanday Abraham kag Sara, sanday Isaac kag Rebeca—huo kag ang madamo pa nga iban, lakip ang “tanan nga manalagna”—banhawon sa duta! (Lucas 13:28) Ang isa sining mga manalagna amo si Daniel, nga ginsaaran sing pagkabanhaw sa idalom sang paggahom sang Mesias. Sa sulod sang mga 2,500 ka tuig, si Daniel nagpahuway sa lulubngan, apang sa gahom sang pagkabanhaw, sa dili madugay ‘magatindog sia sa iya madangatan’ subong isa sang mga “prinsipe sa bug-os nga duta.” (Daniel 12:13; Salmo 45:16) Daw ano nga kalipay nga abiabihon indi lamang ang mga matutom sang una kundi subong man ang imo mismo amay, iloy, anak nga lalaki, anak nga babayi, ukon ang iban pa nga mga pinalangga nga ginkuha sa imo sang kaaway nga kamatayon!

21. Ngaa indi kita dapat magpalantang sa paghimo sing maayong mga butang sa iban?

²¹ Ang pila sang aton mga abyan kag mga hinigugma mahimo nga nag-alagad sa Dios sa sulod sang mga dekada kag mga tigulang na. Bangod sa katigulangon, mahimo nga nabudlayan sila sa pag-atubang sa mga hangkat sang kabuhi. Daw ano ka mahigugmaon nga hatagan sila sing bisan ano man nga bulig nga masarangan naton karon na mismo! Nian indi kita maghinulsol nga wala naton mahimo sa ila ang aton mga obligasyon sa pila ka paagi kon angkunon sila sang kamatayon subong mga biktima sini. (Manugwali 9:11; 12:1-7; 1 Timoteo 5:3, 8) Makapat-od kita nga indi pagkalimtan ni Jehova ang maayong mga butang nga ginahimo naton para sa iban, walay sapayan sang ila edad ukon mga sirkunstansia. “Samtang may kahigayunan kita sa sini,” sulat ni Pablo, “magbuhat kita sing maayo sa tanan, apang labi na gid sa mga may labot sa aton sa pagtuo.”—Galacia 6:10; Hebreo 6:10.

22. Sa wala pa ang katumanan sang paglaum nga pagkabanhaw, ano ang dapat naton determinado nga himuon?

²² Si Jehova amo ang “Amay sang mapinalanggaon nga kaluoy kag ang Dios sang bug-os nga kalugpayan.” (2 Corinto 1:3, 4) Ang iya Pulong nagalugpay sa aton kag nagabulig sa aton sa paglugpay sa iban paagi sa gamhanan nga paglaum nga pagkabanhaw. Sa wala pa naton masaksihan ang katumanan sina nga paglaum paagi sa pagbanhaw sa mga patay sa duta, mangin subong kita ni Pablo, nga may pagtuo sa pagkabanhaw. Kabay nga ilugon naton ilabi na si Jesus, nga ang iya paglaum sa gahom sang Dios nga banhawon sia natuman. Yadtong sa handumanan nga mga lulubngan magapamati sa dili madugay sang tingog ni Cristo kag magaguwa. Kabay nga magahatag ini sa aton sing lugpay kag kalipay. Apang labaw sa tanan, kabay nga pasalamatan naton si Jehova, nga nagdaug sang kamatayon paagi sa aton Ginuong Jesucristo!

Ano ang Imo Sabat?

• Anong nakasaksi nga pamatuod sang pagbanhaw kay Jesus ang ginhatag ni Pablo?

• Ano ang “katapusan nga kaaway,” kag paano ini dulaon?

• Sa bahin sang hinaplas nga mga Cristiano, ano ang ginsab-ug kag ano ang ginbanhaw?

• Sin-o nga mga indibiduwal sa rekord sang Biblia ang luyag mo masugilanon kon banhawon sila sa kabuhi sa duta?

[Mga Pamangkot sa Pagtinuon]

[Retrato sa pahina 16]

Si apostol Pablo naghatag sing mabakod nga pangapin sa pagkabanhaw

[Mga retrato sa pahina 20]

Ang pagbanhaw kay Job, sa iya panimalay, kag sa madamo pa nga iban mangin rason sang di-matupungan nga kalipay!