Ang Paglaum nga Pagkabanhaw Pat-od Gid!

“May paglaum ako sa Dios . . . nga may pagkabanhaw.”—BINUHATAN 24:15.

1. Ngaa makalaum kita sa pagkabanhaw?

SI Jehova naghatag sa aton sing maayong mga rason agod maglaum sa pagkabanhaw. Nagsaad sia sa aton nga ang mga patay banhawon, liwat nga magkabuhi. Kag ang katuyuan niya may kaangtanan sa mga nagatulog sa kamatayon pat-od gid nga matuman. (Isaias 55:11; Lucas 18:27) Sa katunayan, ginpakita na sang Dios ang iya gahom sa pagbanhaw sa mga patay.

2. Paano kita makabenepisyo sa paglaum nga pagkabanhaw?

² Ang pagtuo sa aman sang Dios para sa pagbanhaw sa mga patay paagi sa iya Anak, si Jesucristo, makasakdag sa aton sa tion sang kahuol. Ang kapat-uran sang paglaum nga pagkabanhaw makabulig man sa aton nga huptan ang integridad sa aton langitnon nga Amay bisan tubtob sa kamatayon. Mahimo gid nga mapabakod ang aton paglaum sa pagkabanhaw samtang ginabinagbinag naton ang mga pagpasag-uli sa kabuhi nga ginrekord sa Biblia. Ining tanan nga milagro ginhimo paagi sa gahom gikan sa Soberanong Ginuo nga si Jehova.

Ginbaton Nila ang Ila mga Patay Paagi sa Pagkabanhaw

3. Ano nga gahom ang ginhatag kay ­Elias sang ang anak nga lalaki sang babayi nga balo sa Sarepta napatay?

³ Sa isa ka makakulunyag nga pagrepaso sang  pagtuo nga ginpakita sang antes-Cristiano nga mga saksi ni Jehova, si apostol Pablo nagsulat: “Ginbaton sang mga babayi ang ila mga patay paagi sa pagkabanhaw.” (Hebreo 11:35; 12:1) Ang isa sadtong mga babayi amo ang imol nga balo sa banwa sang Sarepta sa Fenicia. Bangod ginsapopo niya ang manalagna sang Dios nga si ­Elias, ang iya harina kag lana milagruso nga wala maubos sa tion sang tiggulutom nga mahimo kuntani nga nagkutol sang ila kabuhi sang iya anak. Sang napatay sang ulihi ang bata, ginpahigda sia ni ­Elias sa higdaan, nagpangamuyo, ginhap-an ang bata sing makatlo, kag nakitluoy: “O Jehova nga akon Dios, palihug, pabalika ang kalag sining bata sa iya.” Ginpabalik sang Dios ang kalag, ukon ang kabuhi, sa bata. (1 Hari 17:8-24) Handurawa ang kalipay sadtong balo sang ang iya pagtuo ginpadyaan sang nahaunang ginrekord nga pagkabanhaw—ang iya sang iya mismo pinalangga nga anak!

4. Ano nga milagro ang ginhimo ni Eliseo sa Sunem?

⁴ Ang isa pa ka babayi nga nagbaton sang iya patay paagi sa pagkabanhaw nagapuyo anay sa banwa sang Sunem. Asawa sang isa ka tigulang nga lalaki, ginpakitaan niya sing kaayo si manalagna Eliseo kag ang iya suluguon. Ginpadyaan sia sing anak nga lalaki. Apang, pagligad sang pila ka tuig, ginpatawag niya ang manalagna, nga nakita ang bata nga patay sa iya puluy-an. Pagkatapos nga makapangamuyo si Eliseo kag naghimo sing pila ka tikang, “amat-amat nga nag-init ang unod sang bata.” “Nagsugod [sia] sa pagpangatsi sing tubtob sa makapito, nga pagkatapos sini ginmuklat sang bata ang iya mga mata.” Ini nga pagbanhaw nagpahalipay gid sa mag-iloy. (2 Hari 4:8-37; 8:1-6) Apang mangin mas malipayon gid sila kon banhawon sila sa duta sa “maayo pa nga pagkabanhaw”—isa nga nagapahamtang sa atubangan nila sang posibilidad nga indi na liwat mapatay pa! Isa gid ka rason agod magpasalamat sa mahigugmaon nga Dios sang pagkabanhaw, si Jehova!—Hebreo 11:35.

5. Paano nadalahig si Eliseo sa isa ka milagro bisan sang patay na sia?

⁵ Bisan sang napatay kag ginlubong na si Eliseo, ginhimo sang Dios ang iya mga tul-an nga gamhanan paagi sa balaan nga espiritu. Aton mabasa: “Samtang [ang pila ka Israelinhon] may ginalubong nga isa ka tawo, aba, yari karon, nakita nila ang [Moabnon nga] guban sang nagapang-ati. Ginhaboy nila sa gilayon ang tawo sa lulubngan ni Eliseo kag naglakat. Sang natandog sang [patay nga] tawo ang mga tul-an ni Eliseo, nabuhi sia sa gilayon kag nagtindog sa iya mga tiil.” (2 Hari 13:20, 21) Mahimo gid nga nakibot kag nalipay sing daku yadto nga tawo! Handurawa ang kalipay nga maagom kon ang aton mga hinigugma banhawon suno sa wala nagakapaslawan nga katuyuan ni Jehova nga Dios!

Ang Anak Sang Dios Nagbanhaw Sang mga Patay

6. Ano nga milagro ang ginhimo ni Jesus malapit sa siudad sang Nain, kag paano kita mahimo nga maapektuhan sini nga hitabo?

⁶ Ang Anak sang Dios, si Jesucristo, naghatag sa aton sing maayong mga rason agod magpati nga ang mga patay mahimo banhawon, nga may paglaum sang kabuhi nga walay katapusan. Ang isa ka hitabo malapit sa siudad sang Nain makabulig sa aton nga mahangpan kon paano mahanabo ang subong sini nga milagro paagi sa hatag-Dios nga gahom. Sang isa ka bes, nasugata ni Jesus ang mga manuglalaw nga nagapas-an sang bangkay sang isa ka pamatan-on nga lalaki sa guwa sang siudad agod ilubong. Bugtong sia nga anak sang isa ka balo nga babayi. Nagsiling si Jesus sa iya: “Mag-untat ka na sa pagtangis.” Nian gintandog niya ang liyaliya kag nagsiling: “Pamatan-on, nagasiling ako sa imo, Bangon ka!” Sa sina naglingkod sia kag naghambal. (Lucas 7:11-15) Ini nga milagro nagapabakod gid sang aton pagsalig nga ang paglaum nga pagkabanhaw pat-od gid.

7. Ano ang natabo may kaangtanan sa anak nga babayi ni Jairo?

⁷ Binagbinaga, man, ang hitabo may kaangtanan kay Jairo, ang opisyal nga nagadumala sa sinagoga sa Capernaum. Ginpangabay niya si Jesus sa pagkari kag buligan ang iya pinalangga nga 12-anyos nga anak nga babayi, nga nagatagumatayon. Wala madugay, ginbalita nga ang bata napatay na. Nagalaygay sa nagapangalisod nga si Jairo nga magpakita sing pagtuo, gin-updan sia ni Jesus sa iya puluy-an, diin isa ka kadam-an ang nagahaya. Nagkadlaw sila sang ginsilingan sila ni Jesus: “Ang bata wala mapatay, kundi nagakatulog.” Sa pagkamatuod patay na sia, apang buot ipakita ni Jesus nga ang mga tawo mahimo banhawon subong nga mahimo sila pukawon gikan sa mahamuok nga katulugon. Nagauyat sa kamot sang bata, nagsiling sia: “Inday, bangon ka!” Nagbangon sia sa gilayon, kag ang iya mga ginikanan “daw nadula sa ila kaugalingon” sa daku nga kalipay. (Marcos 5:35-43; Lucas 8:49-56)  Sa walay duhaduha, ang mga katapo sang pamilya ‘daw madula sa ila kaugalingon’ kon ang ila mga hinigugma banhawon sa isa ka paraiso nga duta.

8. Ano ang ginhimo ni Jesus sa lulubngan ni Lazaro?

⁸ Si Lazaro apat ka adlaw na nga napatay sang nagkadto si Jesus sa iya lulubngan kag ginpakuha ang bato sa ganhaan sini. Pagkatapos nga makapangamuyo sing dayag agod mahibaluan sang mga tumalan-aw nga nagasalig sia sa hatag-Dios nga gahom, si Jesus nagsiling sa mabaskog nga tingog: “Lazaro, guwa ka!” Kag nagguwa sia! Ang iya mga kamot kag mga tiil nasamburan gihapon sang mga pangputos sa lubong, kag ang iya nawong naputos sang tela. “Hubari ninyo sia kag palakta sia,” siling ni Jesus. Sang nakita ini nga milagro, madamo sang yadto didto agod lugpayan ang mga utod nga babayi ni Lazaro, nga sanday Maria kag Marta, ang nagtuo kay Jesus. (Juan 11:1-45) Indi bala nga ini nga sugilanon nagahatag sa imo sing paglaum nga ang imo mga hinigugma mahimo nga banhawon sa bag-ong kalibutan sang Dios?

9. Ngaa makapat-od kita nga makabanhaw na karon si Jesus sang mga patay?

⁹ Sang si Juan Bautista didto sa bilangguan, ginpadalhan sia ni Jesus sining makalilipay nga mensahe: “Ang mga bulag nakakita liwat, . . . kag ang mga minatay ginabanhaw.” (Mateo 11:4-6) Sanglit nagbanhaw si Jesus sang mga patay sang yari sia sa duta, pat-od gid nga mahimo niya ini subong isa ka gamhanan nga espiritu nga tinuga nga ginhatagan sing gahom sang Dios. Si Jesus amo “ang pagkabanhaw kag ang kabuhi,” kag makalulugpay mahibaluan nga sa malapit nga palaabuton ang “tanan nga yara sa handumanan nga lulubngan makabati sang iya tingog kag magaguwa”!—Juan 5:28, 29; 11:25.

Ang Iban Pa nga mga Pagkabanhaw Nagapabakod Sang Aton Paglaum

10. Paano mo ilaragway ang nahaunang ginreport nga pagbanhaw sang isa ka apostol?

¹⁰ Sang ginpalakat ni Jesus ang iya apostoles subong mga manugbantala sang Ginharian, nagsiling sia: “Banhawa ang mga patay.” (Mateo 10:5-8) Agod mahimo ini, siempre pa, dapat sila magsalig sa gahom sang Dios. Sa Joppe sang 36 C.E., ang diosnon nga babayi nga si Dorcas (si Tabita) nagtulog sa kamatayon. Ang iya maayong mga binuhatan naglakip sang paghimo sing mga panapton para sa imol nga mga balo, nga nagtangis gid sang napatay sia. Ginhanda sia sang mga disipulo para sa lubong kag ginpakadto si apostol Pedro, ayhan sa paglugpay. (Binuhatan 9:32-38) Ginpahalin niya ang tanan gikan sa naibabaw nga hulot, nagpangamuyo, kag nagsiling: “Tabita, bangon ka!” Ginmuklat niya ang iya mga mata, naglingkod, gindaho ang kamot ni Pedro, kag ginpatindog niya sia. Bangod sining nahaunang ginreport nga pagbanhaw sang isa ka apostol, madamo ang nangin mga tumuluo. (Binuhatan 9:39-42) Nagahatag man ini sa aton sing dugang pa nga rason agod maglaum sa pagkabanhaw.

11. Ano ang katapusan nga pagkabanhaw nga ginrekord sa Biblia?

¹¹ Ang katapusan nga pagkabanhaw nga ginrekord sa Biblia natabo sa Troas. Sang naghapit didto si Pablo sa iya ikatlong misyonero nga paglakbay, ginpalawig niya ang iya diskurso tubtob sa  tungang-gab-i. Bangod sang kakapoy kag ayhan sang kainit nga tuga sang madamo nga sulu kag sang nagaginutok nga mga kahimtangan sa duog tilipunan, isa ka pamatan-on nga nagahingalan kay Eutico ang natulugan kag nahulog gikan sa ikatlo-sing-panalgan nga bintana. “Ginhakwat sia nga patay,” indi lamang nga wala sing pangalibutan. Ginhapaan ni Pablo si Eutico, ginhakos sia, kag nagsiling sa mga tumalan-aw: “Indi kamo maggahod, kay ang iya kalag yara sa iya.” Ang buot silingon ni Pablo amo nga ang kabuhi sang pamatan-on nga lalaki ginpasag-uli. Ang mga nakakita “nalugpayan sing di-matakus.” (Binuhatan 20:7-12) Sa karon, ang mga alagad sang Dios nalugpayan sing daku sa paghibalo nga ang ila anay mga kaupdanan sa pag-alagad sa Dios magaagom sang katumanan sang paglaum nga pagkabanhaw.

Pagkabanhaw—Madugay Na nga Paglaum

12. Ano nga pagsalig ang ginpabutyag ni Pablo sa atubangan ni Gobernador Felix sang Roma?

¹² Sang ginkasaba sa atubangan ni Gobernador Felix sang Roma, si Pablo nagpanaksi: “Nagapati ako sa tanan nga butang nga ginpahamtang sa Kasuguan kag ginsulat sa mga Manalagna; kag may paglaum ako sa Dios . . . nga may pagkabanhaw sang mga matarong kag mga di-matarong.” (Binuhatan 24:14, 15) Paano ang mga bahin sang Pulong sang Dios, subong sang “Kasuguan,” nagatudlo sa pagbanhaw sa mga patay?

13. Ngaa masiling nga ginapatuhuyan sang Dios ang pagkabanhaw sang ginhatag niya ang nahauna nga tagna?

¹³ Ginpatuhuyan mismo sang Dios ang pagkabanhaw sang ginhatag niya ang nahaunang tagna sa Eden. Sang ginpamatbatan ang “orihinal nga man-ug,” si Satanas nga Yawa, ang Dios nagsiling: “Butangan ko sing kaawayon sa tunga mo kag sang babayi kag sa tunga sang imo binhi kag sang iya binhi. Dugmukon ka niya sa ulo kag dugmukon mo sia sa tikod.” (Bugna 12:9; Genesis 3:14, 15) Ang pagdugmok sa tikod sang binhi sang babayi nagkahulugan sang pagpatay kay Jesucristo. Agod madugmok sina nga Binhi ang ulo sang man-ug pagkatapos sina, si Cristo kinahanglan nga banhawon gikan sa minatay.

14. Paano nga si Jehova “Dios, indi sang mga patay, kundi sang mga buhi”?

¹⁴ Si Jesus nagsiling: “Nga ang mga patay ginabanhaw bisan gani si Moises nagpahayag, sa panugiron tuhoy sa sapinit, sang gintawag niya si Jehova nga ‘ang Dios ni Abraham kag Dios ni Isaac kag Dios ni Jacob.’ Sia ang Dios, indi sang mga patay, kundi sang mga buhi, kay sila tanan buhi sa iya.” (Lucas 20:27, 37, 38; Exodo 3:6) Sanday Abraham, Isaac, kag Jacob mga patay, apang ang katuyuan sang Dios nga banhawon sila pat-od gid nga matuman amo nga sa iya daw buhi sila.

15. Ngaa may rason si Abraham agod magpati sa pagkabanhaw?

¹⁵ May rason si Abraham agod maglaum sa pagkabanhaw, kay sang sila sang iya asawa, nga si Sara, tigulang na katama, kag patay na sila kon tuhoy sa ikasarang sa pagpanganak, milagruso nga ginpasag-uli sang Dios ang ila mga ikasarang sa pagpanganak. Kaangay ini sa pagkabanhaw. (Genesis 18:9-11; 21:1-3; Hebreo 11:11, 12) Sang ang ila anak, nga si Isaac, mga 25 anyos, ang Dios nagsugo kay Abraham nga ihalad sia. Apang, sang buot na patyon ni Abraham si Isaac, ginpunggan sang anghel ni Jehova ang iya kamot. “Ginkabig [ni Abraham] nga ang Dios makasarang sa pagbanhaw [kay Isaac] bisan gikan sa mga patay; kag gikan didto ginbaton man niya sia sa malaragwayon nga paagi.”—Hebreo 11:17-19; Genesis 22:1-18.

16. Ano karon ang ginahulat ni Abraham, nga nagatulog sa kamatayon?

¹⁶ Si Abraham naglaum sing pagkabanhaw sa idalom sang pagginahom sang Mesias, ang ginsaad nga Binhi. Gikan sa iya antes-tawo nga kahimtangan, nakita sang Anak sang Dios ang pagtuo ni Abraham. Subong ang tawo nga si Jesucristo, busa nagsiling sia sa mga Judiyo: “Si Abraham nga inyo amay nagkalipay sing daku sa paglaum nga makita ang akon adlaw.” (Juan 8:56-58; Hulubaton 8:30, 31) Si Abraham nagatulog na karon sa kamatayon, nagahulat sing pagkabanhaw padulong sa kabuhi sa duta sa idalom sang Mesianikong Ginharian sang Dios.—Hebreo 11:8-10, 13.

Pamatuod Gikan sa Kasuguan kag sa mga Salmo

17. Paano ang “mga butang nga ginpahamtang sa Kasuguan” nagatudlo sa pagbanhaw kay Jesucristo?

¹⁷ Ang paglaum ni Pablo sa pagkabanhaw nahisanto sa “mga butang nga ginpahamtang sa Kasuguan.” Ang Dios nagsugo sa mga Israelinhon: “Magdala kamo sa saserdote sang linaylay nga binugkos sang nahaunang mga bunga sang inyo alanyon. Kag [sa Nisan 16] habugon niya ang linaylay nga binugkos sa atubangan ni Jehova agod maagom ang kahamuot para sa inyo.” (Levitico 23:9-14) Ayhan nagahunahuna sini nga kasuguan, si Pablo nagsulat:  “Si Cristo ginbanhaw gikan sa mga minatay, ang nahauna nga bunga sang mga nagakatulog na sa kamatayon.” Subong “nahauna nga bunga,” si Jesus ginbanhaw sang Nisan 16, 33 C.E. Sa ulihi, sa tion sang iya presensia, banhawon ang ‘sunod nga mga bunga’—ang iya hinaplas-sang-espiritu nga mga sumulunod.—1 Corinto 15:20-23; 2 Corinto 1:21; 1 Juan 2:20, 27.

18. Paano ginpakita ni Pedro nga ang pagbanhaw kay Jesus gintagna sa mga Salmo?

¹⁸ Ginasakdag man sang mga Salmo ang pagkabanhaw. Sang adlaw sang Pentecostes 33 C.E., ginbalikwat ni apostol Pedro ang Salmo 16:8-11, sa pagsiling: “Si David nagsiling nahanungod [kay Cristo], ‘Si Jehova yara pirme sa atubangan sang akon mga mata; bangod yara sia sa akon tuo nga kamot agod nga indi ako matay-ug. Bangod sini ang akon tagipusuon nangin masinadyahon kag ang akon dila nagkasadya sing daku. Dugang pa, bisan ang akon unod magapuyo sa paglaum; bangod indi mo pagbayaan ang akon kalag sa Hades, ni tugutan mo man nga ang imo mainunungon makakita sing kaduluntan.’” Si Pedro nagdugang: “Nakita [ni David] nga daan kag nagpamulong may kaangtanan sa pagkabanhaw ni Cristo, nga wala sia pagpabay-i sa Hades ukon ang iya unod nakakita sing kaduluntan. Ining Jesus ginbanhaw sang Dios.”—Binuhatan 2:25-32.

19, 20. San-o ginbalikwat ni Pedro ang Salmo 118:22, kag paano ini ginaangot sa kamatayon kag pagkabanhaw ni Jesus?

¹⁹ Mga pila ka adlaw sang ulihi, si Pedro nagtindog sa atubangan sang Sanhedrin kag nagbalikwat liwat gikan sa mga Salmo. Sang ginpamangkot kon paano niya gin-ayo ang piang nga manugpakilimos, ang apostol nagsiling: “Mahibaluan ninyo nga tanan kag sang bug-os nga katawhan sang Israel, nga sa ngalan ni Jesucristo nga Nazaretnon, nga ginlansang ninyo apang ginbanhaw sang Dios gikan sa mga patay, paagi sa sining isa ini nga tawo nagatindog diri sa atubangan ninyo nga maayo. Ini [nga Jesus] amo ‘ang bato nga ginpakig-angutan ninyo nga mga manunukod subong wala sing pulos nga nangin ulo sang pamag-ang.’ Dugang pa, wala sing kaluwasan sa bisan kay ­sin-o pa, kay wala sing iban nga ngalan sa idalom sang langit nga ginhatag sa mga tawo nga paagi sa iya kinahanglan kita maluwas.”—Binuhatan 4:10-12.

²⁰ Ginbalikwat diri ni Pedro ang Salmo 118:22, nagpadapat sang ginasiling sini sa kamatayon kag pagkabanhaw ni Jesus. Ginsugyot sang ila relihiosong mga lider, ginsikway sang mga Judiyo si Jesus. (Juan 19:14-18; Binuhatan 3:14, 15) ‘Ang pagsikway sang mga manunukod sa bato’ nagresulta sa kamatayon ni Cristo, apang ang ‘paghimo sa bato nga ulo sang pamag-ang’ nagkahulugan sang pagbanhaw sa iya sa espirituhanon nga kahimayaan sa langit. Subong sang gintagna sang salmista, ‘naghalin ini mismo kay Jehova.’ (Salmo 118:23) Ang paghimo sa “bato” nga Ulo sang pamag-ang nagadalahig sang pagbayaw sa iya subong Gintangdo nga Hari.—Efeso 1:19, 20.

Ginsakdag Sang Paglaum nga Pagkabanhaw

21, 22. Ano nga paglaum ang ginpabutyag ni Job, subong sang ginrekord sa Job 14:13-15, kag paano ini mahimo nga maglugpay sa mga namatyan sa karon?

²¹ Bisan nga wala pa kita sing personal nga nakita nga ginbanhaw gikan sa minatay, nabasa naton ang pila ka sugilanon sa Biblia nga nagapasalig sa aton sang pagkabanhaw. Busa, mahimo naton huptan sa hunahuna ang paglaum nga ginpabutyag sang matarong nga tawo nga si Job. Sang nag-antos sia, nakitluoy sia: “O kabay pa kuntani nga taguon mo [si Jehova] ako sa Sheol, . . . nga tangduan mo ako kuntani sing pinat-od nga tion kag dumdumon ako! Kon ang mapagros nga tawo mapatay, mabuhi pa bala sia? . . . Magapanawag ka, kag ako magasabat sa imo. Kay sa binuhatan sang imo mga kamot magahandum ka.” (Job 14:13-15) Ang Dios ‘magahandum sang binuhatan sang iya mga kamot,’ nagahandum gid sa pagbanhaw kay Job. Daw ano nga paglaum ang ginahatag sina sa aton!

 ²² Ang mahinadlukon-sa-Dios nga katapo sang pamilya mahimo nga magmasakit sing malubha, kaangay anay ni Job, kag mahimo pa gani mag-ampo sa kaaway nga kamatayon. Ang mga namatyan mahimo nga maghibi sa kalisod, subong nga si Jesus naghibi gani bangod sang pagkapatay ni Lazaro. (Juan 11:35) Apang daw ano ka makalulugpay nga mahibaluan nga magapanawag ang Dios kag ang mga yara sa handumanan niya magasabat! Daw subong nga nagpauli sila gikan sa isa ka paglakbay—wala nagamasakit ukon nahalitan, kundi maayo sing panglawas.

23. Paano ang iban nagpabutyag sang ila pagsalig sa paglaum nga pagkabanhaw?

²³ Bangod sang kamatayon sang isa ka matutom nga tigulang nga Cristiano, ang mga masigkatumuluo napahulag sa pagsulat: “Palihug batuna ninyo ang amon hanuot gid nga simpatiya sa pagtaliwan sang inyo iloy. Malip-ot na lamang nga tion kag abiabihon naton sia liwat—matahom kag mapagros!” Ang mga ginikanan nga namatyan sang ila anak nga lalaki nagsiling: “Ginahulat gid namon sing malangkagon ang adlaw nga si Jason magabugtaw! Magapanghulonghulong sia kag makita ang Paraiso nga madugay na niya ginakalangkagan. . . . Daw ano nga pangpapagsik para sa amon nga nagahigugma sa iya nga mangin didto man.” Huo, kag nagapasalamat kita sing daku nga ang paglaum nga pagkabanhaw pat-od gid!

Ano ang Imo Sabat?

• Paano ang pagtuo sa aman sang Dios nga pagbanhaw sa mga patay makabulig sa aton?

• Anong mga hitabo nga ginrekord sa Biblia ang nagahatag sa aton sing rason agod maglaum sa pagkabanhaw?

• Ngaa masiling nga ang pagkabanhaw isa ka madugay na nga paglaum?

• Anong nagasakdag nga paglaum ang mahimo naton huptan sa hunahuna may kaangtanan sa mga patay?

[Mga Pamangkot sa Pagtinuon]

[Retrato sa pahina 10]

May gahom gikan kay Jehova, ginpasag-uli ni Elias ang kabuhi sang pamatan-on nga anak nga lalaki sang babayi nga balo

[Retrato sa pahina 12]

Sang ginbanhaw ni Jesus ang anak nga babayi ni Jairo, ang iya mga ginikanan daw nadula sa ila kaugalingon sa daku nga kalipay

[Retrato sa pahina 15]

Sang adlaw sang Pentecostes 33 C.E., si apostol Pedro masidla nga nagpamatuod nga si Jesus ginbanhaw gikan sa minatay