Hamili kay Jehova ang mga Nagahigugma sa Iya
Report sang mga Manugbantala sang Ginharian
Hamili kay Jehova ang mga Nagahigugma sa Iya
ANG Lebanon kilala bangod sang kinaugali nga mga manggad sini kutob pa sang panahon sang Biblia. (Salmo 72:16; Isaias 60:13) Ginapabilihan ilabi na amo ang matag-as sini nga mga sedro, nga naluyagan gid subong materyales sa pagtukod bangod sang katahom, kahumot, kag kabakod sini. Sang unang siglo, may isa ka butang nga labi pa ka hamili nga naghalin sa Lebanon. Ang Ebanghelyo ni Marcos nagreport nga gikan sa Tiro kag Sidon, sa dumaan nga teritoryo sang Lebanon, “ang dakung kadam-an, sa pagkabati kon daw ano kadamo nga butang ang ginahimo [ni Jesus], nagpalapit sa iya.”—Marcos 3:8.
Sa karon man, ang Lebanon padayon nga nagapamunga sang hamili gid sa mga mata ni Jehova. Ang masunod nga mga eksperiensia nagapadaku sini.
• Ginpangabay ang pamatan-on nga Saksi nga si Wissam nga maghambal sa iya klase sa eskwelahan sa sulod sang 30 minutos. Namat-od si Wissam nga isa ini ka maayo nga kahigayunan agod makapanaksi. Gani gingamit niya ang libro nga Life—How Did It Get Here? By Evolution or by Creation? kag naghanda sing pamulongpulong sa tema tuhoy sa pagpanuga. Apang, sang nakita ang materyal, nagsiling ang maestro ni Wissam nga bangod importante gid ini nga tema, mahimo palawigon ni Wissam ang iya pamulongpulong tubtob 45 minutos.
Sang nagsugod si Wissam sa iya pamulongpulong, ginpadulog sia sang maestro kag ginpatawag ang prinsipal. Wala madugay nag-abot ang prinsipal, kag nag-umpisa liwat sa puno si Wissam. Samtang nagapamati ang prinsipal sa mga pamangkot ni Wissam sa introduksion sang iya pamulongpulong, nakunyag gid ang prinsipal kag nagsiling nga dapat makabaton sing kopya sang pamulongpulong ang tanan nga estudyante.
Sang ulihi pa gid, isa pa ka maestro, nga naglabay, ang nakatalupangod sang kakunyag sa sulod sang hulot-klasehan kag namangkot kon ano ang nagakatabo. Sang ginpahibalo sia, namangkot sia kon bala ginatinguhaan ni Wissam nga pamatud-an ang pagpanuga ukon ang ebolusyon. “Pagpanuga,” ang sabat. Sang nahibaluan nga si Wissam isa sang mga Saksi ni Jehova, nagsiling ang maestro sa klase: “Makita ninyo sa iya pamulongpulong nga ginasakdag sang siensia ang pagpanuga, indi ang ebolusyon.”
Ini gali nga maestro may kopya sang libro nga Creation kag ginagamit niya ini sa paghatag sing mga lecture sa unibersidad! Antes maglakat, namangkot sia kon puwede sia makabalik sa masunod nga adlaw upod sa iya mga estudyante agod makahambal si Wissam sa iya klase. Nagresulta ina sa isa pa ka maayo gid nga panaksi kay Jehova.
• Ang 22-anyos nga si Nina nauhaw sa tubig sang kamatuoran. Isa ka adlaw ginhatagan sia sang iya pakaisa sing Biblia kag ginpakilala sia sa Pentecostal nga Simbahan. Nalipay si Nina sa pagbasa sing Biblia kag natun-an niya paagi sa iya pagbasa nga dapat magbantala ang mga Cristiano, gani nakighambal sia sa iya mga kakilala. Ang tanan nga nasugilanon niya namangkot sa iya: “Saksi ni Jehova ka bala?” Nagpalibog ina sa iya.
Anom ka tuig sang ulihi, nagduaw ang mga Saksi ni Jehova sa balay ni Nina kag ginsugiran sia tuhoy sa Ginharian sang Dios. Sang primero ginpangitaan niya sing sayop ang ila mga panudlo. Apang, nakita niya nga ang tanan nila nga sabat makatarunganon kag pasad sa Biblia.
Ang natun-an sang ulihi ni Nina—ang ngalan sang Dios, si Jehova; ang mga pagpakamaayo sang Ginharian; kag iban pa—nagkumbinsi sa iya nga nakita na niya ang kamatuoran. Gindedikar niya ang iya kabuhi sa Dios kag nagpabawtismo. Sang nagligad nga pito ka tuig, nag-alagad si Nina subong bug-os tion nga ebanghelisador. Sa pagkamatuod, ginapakamaayo ni Jehova ang mga nagahigugma gid sa iya.—1 Corinto 2:9.