Ipabanaag ang Panimuot sang Hunahuna ni Cristo

“Kabay nga itugot sa inyo sang Dios nga nagahatag sing pagbatas kag paglipay nga magluntad sa tunga ninyo ang amo man nga panimuot sang hunahuna nga yara kay Cristo Jesus.”—ROMA 15:5.

1. Paano ang kabuhi sang isa maapektuhan sang iya panimuot?

ANG panimuot importante sa kabuhi. Ang di-masinapakon ukon maukod nga panimuot, ang positibo ukon negatibo nga panimuot, ang mabaison ukon mabinuligon nga panimuot, ang mayinamuhon ukon mapinasalamaton nga panimuot makaimpluwensia gid sing daku kon paano ginaatubang sang isa ka tawo ang mga kahimtangan kag kon ano ang reaksion sang iban nga mga tawo sa iya. Kon may maayo nga panimuot, ang isa mahimo nga mangin malipayon bisan sa mabudlay gid nga mga kahimtangan. Para sa tawo nga may malain nga panimuot, daw wala sing butang nga husto, bisan pa nga—gikan sa bunayag nga pagtamod—ang kabuhi maayo.

2. Paano matun-an sang isa ka tawo ang mga panimuot?

² Ang mga panimuot—maayo man ukon malain—sarang matun-an. Sa katunayan, dapat ini tun-an. Tuhoy sa bag-o nabun-ag nga bata, ang Collier’s Encyclopedia nagasiling: “Ang ano man nga mangin mga panimuot niya sa ulihi dapat niya tigayunon ukon tun-an, subong nga dapat niya tigayunon ukon tun-an ang isa ka hambal ukon ang bisan ano pa nga ikasarang.” Paano naton matun-an ang mga panimuot? Samtang madamo nga butang ang nagabulig, ang palibot kag kaupdanan daku gid nga impluwensia. Ang ginsambit kaina nga ensiklopedia nagasiling: “Matun-an ukon matigayon naton, subong nga daw paagi sa os­mosis (ang paagi kon paano amat-amat nga maimpluwensiahan sang isa ka tawo ukon ideya ang iban), ang mga panimuot sadtong aton suod nga ginapakig-updan.” Sang nagligad nga linibo ka tuig, ang Biblia nagsiling sing butang nga kaanggid: “Sia nga nagalakat upod sa maalam nga mga tawo magaalam, apang sia nga nagapakig-angot sa mga buangbuang magaantos.”—Hulubaton 13:20; 1 Corinto 15:33.

Isa ka Sulundan Para sa Nagakaigo nga Panimuot

3. Sin-o anay ang huwaran may kaangtanan sa iya panimuot, kag paano naton sia mailog?

³ Subong sa tanan pa nga butang, may kaangtanan sa panimuot, si Jesucristo nagpahamtang sing labing maayo nga sulundan. Sia nagsiling: “Naghatag ako sa inyo sing sulundan, nga, subong sang ginhimo ko sa inyo, himuon man ninyo.” (Juan 13:15) Agod mangin kaangay ni Jesus, dapat anay naton tun-an ang tuhoy sa iya. * Ginatun-an naton ang kabuhi ni Jesus sa tuyo nga mahimo ang ginpanugda ni apostol Pedro: “Sa sining dalanon gintawag kamo, bangod bisan si Cristo nag-antos tungod sa inyo, nga nagabilin sa inyo sing huwaran agod nga pagsundon ninyo sing maayo ang iya mga tikang.” (1 Pedro 2:21) Ang tulumuron naton amo nga mangin subong kay Jesus kon posible. Nagalakip ina sang pagpalambo sang iya panimuot sang hunahuna.

4, 5. Ano nga bahin sang panimuot sang hunahuna ni Jesus ang ginapatalupangod sang Roma 15:1-3, kag paano sia mailog sang mga Cristiano?

⁴ Ano ang nalakip sa pagtigayon sang panimuot sang hunahuna ni Cristo Jesus? Ang kapitulo 15 sang sulat ni Pablo sa mga taga-Roma nagabulig sa aton sa pagsabat sina nga pamangkot. Sa nahaunang pila ka bersikulo sini nga kapitulo, ginapatuhuyan ni Pablo ang tumalagsahon nga kinaiya ni  Jesus sang nagsiling sia: “Apang, kita nga mabakod dapat magdala sa mga kaluyahon sang mga indi mabakod, kag indi magpahamuot sa aton kaugalingon. Pahamut-an sang kada isa sa aton ang iya isigkatawo sa kon ano ang maayo sa pagpalig-on sa iya. Kay bisan si Cristo wala magpahamuot sa iya kaugalingon; kundi subong sang nasulat: ‘Ang mga pasipala sang mga nagpasipala sa imo nagtupa sa akon.’”—Roma 15:1-3.

⁵ Sa pag-ilog sang panimuot ni Jesus, ang mga Cristiano ginapalig-on nga mangin handa nga buligan ang iban sa ila mga kinahanglanon sing mapainubuson sa baylo nga handumon nga pahamut-an lamang ang ila kaugalingon. Sa pagkamatuod, ining mapainubuson nga kahanda sa pagbulig sa iban isa ka kinaiya sang mga “mabakod.” Si Jesus, nga mas mabakod sa espirituwal sangsa kay bisan sin-o nga tawo nga nagkabuhi, nagsiling tuhoy sa iya kaugalingon: “Ang Anak sang tawo nagkari, indi agod alagdon, kundi sa pag-alagad, kag sa paghatag sang iya kalag nga gawad sang madamo.” (Mateo 20:28) Subong mga Cristiano, luyag man naton manikasog nga buligan ang iban, pati na ang “mga indi mabakod.”

6. Sa anong paagi mailog naton ang reaksion ni Jesus sa pagpamatok kag pagpasipala?

⁶ Ang isa pa ka maayo nga kinaiya nga ginpakita ni Jesus amo ang sulundan sang panghunahuna kag pagpanghikot nga pirme positibo. Wala gid niya pagtugutan nga ang iya mismo maayong panimuot sa pag-alagad sa Dios maimpluwensiahan sang negatibo nga panimuot sang iban; amo man kita. Sang ginpasipalahan kag ginhingabot bangod sang pagsimba sa Dios sing matutom, si Jesus mapailubon nga nagbatas nga walay pagyamo. Nahibaluan niya nga ang pagpamatok sang di-matinuuhon kag di-mahangpunon nga kalibutan mahimo nga paabuton sang mga nagatinguha nga pahamut-an ang ila isigkatawo “sa kon ano ang maayo sa pagpalig-on sa iya.”

7. Paano ginpakita ni Jesus ang pagpailob, kag ngaa dapat man naton ini himuon?

⁷ Ginpakita ni Jesus ang nagakaigo nga panimuot sa iban nga mga paagi. Wala gid sia  magpabutyag sing indi pagpailob kay Jehova kundi mapailubon nga naghulat para sa katumanan sang Iya mga katuyuan. (Salmo 110:1; Mateo 24:36; Binuhatan 2:32-36; Hebreo 10:12, 13) Dugang pa, si Jesus wala mangin di-mapailubon sa iya mga sumulunod. Nagsiling sia sa ila: “Magtuon kamo sa akon”; bangod “malulo” sia, ang iya panudlo makapalig-on kag makarepresko. Kag bangod “mapainubuson [sia] sing tagipusuon,” indi gid sia matinaastaason ukon makahason. (Mateo 11:29) Ginapalig-on kita ni Pablo nga ilugon ini nga mga bahin sang panimuot ni Jesus sang nagsiling sia: “Hupti ninyo ining panimuot sang hunahuna nga yara man kay Cristo Jesus, nga, bisan pa nagluntad sia sa dagway sang Dios, wala maghunahuna nga mangagaw, buot silingon, nga mangin tupong sia sa Dios. Wala, kundi gin-ula niya ang iya kaugalingon kag nangin sa dagway sang ulipon kag nangin kaanggid sang mga tawo.”—Filipos 2:5-7.

8, 9. (a) Ngaa dapat kita mangabudlay nga ipalambo ang di-makagod nga panimuot? (b) Ngaa indi kita dapat maluyahan sing buot kon indi naton masunod sing himpit ang sulundan nga ginbilin ni Jesus, kag paano si Pablo isa ka maayo nga halimbawa may kaangtanan sini?

⁸ Madali hambalon nga luyag naton mag-alagad sa iban kag luyag naton unahon ang ila mga kinahanglanon sangsa aton. Apang ang bunayag nga pag-usisa sang aton panimuot sang hunahuna mahimo magpakita nga ang aton tagipusuon wala mahuyog sing bug-os sa sina nga paagi. Ngaa wala? Una, bangod napanubli naton ang makagod nga mga panimuot nanday Adan kag Eva; kag ikaduha, bangod nagakabuhi kita sa kalibutan nga nagapauswag sang kakagod. (Efeso 4:17, 18) Ang pagpalambo sang di-makagod nga panimuot masunson nagakahulugan sang pagpauswag sang sulundan sang panghunahuna nga kabaliskaran sa aton duna nga di-himpit nga kinaugali. Nagakinahanglan ina sang determinasyon kag panikasog.

⁹ Bangod tuhay gid ang aton maathag nga pagkadi-himpit sa himpit nga sulundan nga ginbilin ni Jesus sa aton, mahimo ini kon kaisa magpaluya sang aton buot. Mahimo gani kita magduhaduha nga posible nga matigayon ang panimuot sang hunahuna nga kaangay kay Jesus. Apang talupangda ang makapalig-on nga mga pulong ni Pablo: “Nakahibalo ako nga sa akon, kon sayuron, sa akon unod, walay nagapuyo nga maayo; kay ang ikasarang sa paghandum yari sa akon, apang ang ikasarang sa paghimo sang kon ano ang maayo wala. Kay ang maayo nga luyag ko wala ko ginahimo, apang ang malain nga indi ko luyag amo ang ginahimo ko. Nagakalipay gid ako sa kasuguan sang Dios suno sa akon pagkatawo sa sulod, apang nakita ko sa akon mga bahin ang isa pa ka kasuguan nga nagapakig-away batok sa kasuguan sang akon hunahuna kag nagadala sa akon nga bihag sa kasuguan sang sala nga yari sa akon mga bahin.” (Roma 7:18, 19, 22, 23) Matuod, ang pagkadi-himpit ni Pablo liwat-liwat nga nag-upang sa iya nga himuon ang kabubut-on sang Dios subong sang handum niya, apang ang iya panimuot—kon paano sia naghunahuna kag kon ano ang iya balatyagon kay Jehova kag sa Iya kasuguan—huwaran. Ang aton panimuot mahimo man nga mangin huwaran.

Pagtadlong sa Di-himpit nga mga Panimuot

10. Anong panimuot sang hunahuna ang ginpalig-on ni Pablo nga palambuon sang mga taga-Filipos?

¹⁰ Posible bala nga dapat tadlungon sang iban ang di-himpit nga panimuot? Huo. Matuod gid ini sa pila ka Cristiano sang nahaunang siglo. Sa iya sulat sa mga taga-Filipos, si Pablo nagpamulong tuhoy sa pagtigayon sing nagakaigo nga panimuot. Sia nagsulat: “Indi nga naagom ko na ini [ang langitnon nga kabuhi paagi sa nahauna nga pagkabanhaw] ukon nahimpit na ako, kundi nagahimulat ako agod makita kon mauyatan ko man ang ginpauyat sa akon paagi kay Cristo Jesus. Mga kauturan, wala ko pa ginakabig ang akon kaugalingon nga nagauyat na sa sini; apang may isa ka butang tuhoy sini: Ginakalimtan ang mga butang sa likuran kag ginahimulatan ang mga butang sa unahan, nagatinguha ako padulong sa lalambuton tungod sa padya sang langitnon nga pagtawag sang Dios paagi kay Cristo Jesus. Kon amo, kita tanan nga mga hamtong, maghupot sini nga panimuot sang hunahuna.”—Filipos 3:12-15.

11, 12. Sa anong mga paagi ginapakita sa aton ni Jehova ang nagakaigo nga panimuot sang hunahuna?

¹¹ Ginapakita sang mga pulong ni Pablo nga ang bisan sin-o nga, pagkatapos nangin Cristiano, wala magbatyag sang kinahanglanon nga mag-uswag may yara sayop nga panimuot. Wala niya matigayon ang panimuot sang hunahuna ni Cristo. (Hebreo 4:11; 2 Pedro 1:10; 3:14) Ang kahimtangan bala sina nga tawo wala na sing paglaum? Indi gid. Ang Dios makabulig sa aton nga mabag-o ang aton panimuot kon luyag gid naton. Si Pablo nagpadayon sa pagsiling: “Kon kamo sa bisan anong paagi may tuhay nga panghunahuna, ipahayag sang Dios ang nasambit nga panimuot sa inyo.”—Filipos 3:15.

¹² Apang, kon luyag naton nga ipahayag ni Jehova sa aton ang nagakaigo nga panimuot, dapat  naton himuon ang aton bahin. Ang mapangamuyuon nga pagtuon sa Pulong sang Dios sa bulig sang Cristianong mga publikasyon nga gin-aman sang “matutom kag mainandamon nga ulipon” magabulig sa mga “may tuhay nga panghunahuna” nga mapalambo ang nagakaigo nga panimuot. (Mateo 24:45) Ang Cristianong mga gulang, nga gintangdo sang balaan nga espiritu “agod bantayan ang kongregasyon sang Dios,” malipay sa pagbulig. (Binuhatan 20:28) Daw ano gid ang aton pagpasalamat nga ginabinagbinag ni Jehova ang aton mga pagkadi-himpit kag mahigugmaon nga nagabulig sa aton! Batunon naton ini.

Pagtuon Gikan sa Iban

13. Ano ang matun-an naton tuhoy sa nagakaigo nga panimuot gikan sa kasaysayan ni Job sa Biblia?

¹³ Sa Roma kapitulo 15, ginapakita ni Pablo nga ang pagpamalandong sa maragtason nga mga halimbawa makabulig sa aton nga mabag-o ang aton panimuot. Sia nagsulat: “Ang tanan nga butang nga ginsulat sadto anay ginsulat subong instruksion sa aton, agod nga paagi sa aton pagbatas kag paagi sa paglipay gikan sa Kasulatan makatigayon kita sing paglaum.” (Roma 15:4) Ang pila sang matutom nga mga alagad ni Jehova sang una nagkinahanglan anay nga tadlungon ang partikular nga bahin sang ila panimuot. Sa kabilugan, halimbawa, si Job may maayo nga panimuot. Wala gid niya ginpabangod ang malain kay Jehova, kag wala gid niya gintugutan ang pag-antos nga magtay-ug sang iya pagsalig sa Dios. (Job 1:8, 21, 22) Apang, may huyog sia nga pakamatarungon ang kaugalingon. Ginsugo ni Jehova si Elihu nga buligan si Job nga tadlungon ini nga huyog. Sa baylo nga magbatyag nga gin-insultuhan, mapainubuson nga ginbaton ni Job ang kinahanglanon nga magbag-o sing panimuot kag gilayon nga ginsugdan nga himuon ini.—Job 42:1-6.

14. Paano kita mangin subong ni Job kon ginalaygayan tuhoy sa aton panimuot?

¹⁴ Mangin subong bala kay Job ang reaksion naton kon mainayuhon kita nga hambalan sang aton masigka-Cristiano nga nagapakita kita sing pamatuod sang isa ka di-himpit nga panimuot? Kaangay ni Job, kabay nga indi gid naton ‘ipabangod sa Dios ang bisan ano nga butang nga indi nagakaigo.’ (Job 1:22) Kon mag-antos kita sing di-makatarunganon, kabay nga indi gid kita magyamo ukon magbasol kay Jehova tungod sang aton mga kabudlayan. Kabay nga likawan naton nga tinguhaan nga pakamatarungon ang aton kaugalingon, nagadumdom nga ano man ang mga pribilehiyo naton sa pag-alagad kay Jehova, sa gihapon “walay pulos nga mga ulipon” lamang kita.—Lucas 17:10.

15. (a) Anong sayop nga panimuot ang ginpakita sang mga sumulunod ni Jesus? (b) Paano nagpakita sing maayo nga panimuot si Pedro?

¹⁵ Sang nahaunang siglo, ang iban nga nagpamati kay Jesus nagpakita sing di-nagakaigo nga panimuot. Sang isa ka bes, nagpamulong si Jesus sing butang nga mabudlay hangpon. Sa pagsabat, “madamo sa iya mga alagad, sa pagkabati sini, ang  nagsiling: ‘Ini nga mga pulong makakilibang; sin-o ang makapamati sini?’” Ang mga nagpamulong sa sining paagi maathag nga may sayop nga panimuot. Kag ang ila sayop nga panimuot nagdul-ong sa pag-untat nila sa pagpamati kay Jesus. Ang rekord nagasiling: “Bangod sini madamo sa iya mga alagad ang nagbalik sa mga butang sa nagligad kag wala na maglakat upod sa iya.” Ang tanan bala may sayop nga panimuot? Indi. Ang rekord nagapadayon: “Gani si Jesus nagsiling sa napulog-duha: ‘Indi ninyo luyag nga maghalin man, indi bala?’ Si Simon Pedro nagsabat sa iya: “Ginuo, kay sin-o bala kami makadto?’” Sa katunayan, pagkatapos sini ginsabat ni Pedro ang iya mismo pamangkot: “Ikaw may mga pulong sang kabuhi nga walay katapusan.” (Juan 6:60, 66-68) Daw ano kaayo nga panimuot! Kon makasumalang sing mga paathag ukon mga pagtadlong sa paghangop sang Kasulatan nga sa primero mahimo nabudlayan kita sa pagbaton, indi bala maayo nga ipakita ang panimuot nga ginpakita ni Pedro? Daw ano nga kabuangan nga mag-untat sa pag-alagad kay Jehova ukon maghambal sa isa ka paagi nga supak sa “sulundan sang makapapagros nga mga pulong” bangod lamang nga sang primero ang pila ka butang mabudlay hangpon!—2 Timoteo 1:13.

16. Anong makakilibang nga panimuot ang ginpadayag sang Judiyo nga relihiosong mga lider sang adlaw ni Jesus?

¹⁶ Ang Judiyong relihiosong mga lider sang unang siglo napaslawan sa pagpakita sang panimuot sang hunahuna nga kaangay kay Jesus. Ang ila mabakod nga determinasyon nga indi pagpamatian si Jesus nakita sang ginbanhaw niya si Lazaro gikan sa minatay. Para kay bisan sin-o nga may nagakaigo nga panimuot, yadto nga milagro isa kuntani ka mabakod nga pamatuod nga si Jesus ginpadala halin sa Dios. Apang, aton mabasa: “Gani gintipon sang puno nga mga saserdote kag sang mga Fariseo ang Sanhedrin kag nagsiling: ‘Ano ang aton himuon, bangod ining tawo nagahimo sing madamong tanda? Kon pabay-an naton sia sing subong sini, sila tanan magatuo sa iya, kag ang mga Romano magakari kag magakuha sang aton duog kag sang aton pungsod.’” Ang ila solusyon? “Kutob sadtong adlaw nagsinapol sila nga patyon sia.” Luwas sang pagbuko nga patyon si Jesus, ginsugdan nila nga dulaon ang buhi nga pamatuod nga sia isa ka manughimo sing milagro. “Ang puno nga mga saserdote nagsinapol karon nga patyon man si Lazaro.” (Juan 11:47, 48, 53; 12:9-11) Daw ano gid ka di-kalahamut-an kon pauswagon naton ang kaanggid nga panimuot kag mainit ukon maakig sa mga butang nga dapat gid naton kalipayan! Huo, kag daw ano gid ka makatalagam!

Pag-ilog sa Positibo nga Panimuot ni Cristo

17. (a) Sa idalom sang anong mga sirkunstansia nagpakita si Daniel sing walay kahadlok nga panimuot? (b) Paano ginpakita ni Jesus nga maisog sia?

¹⁷ Ang mga alagad ni Jehova nagahupot sing positibo nga panimuot. Sang ang mga kaaway ni Daniel naghimbon nga ipatuman ang isa ka kasuguan nga nagadumili sang pagpangabay sa bisan sin-o nga dios ukon tawo luwas lamang sa hari sa sulod sang 30 ka adlaw, nahibaluan ni Daniel nga mahilabtan sini ang iya kaangtanan kay Jehova nga Dios. Magalihi bala sia sa pagpangamuyo sa Dios sa sulod sang 30 ka adlaw? Indi, walay kahadlok nga nagpadayon sia sa pagpangamuyo kay Jehova sing tatlo ka beses sa isa ka adlaw, subong sang kinabatasan niya. (Daniel 6:6-17) Wala man mapahog si Jesus sang iya mga kaaway. Sang isa ka adlaw sang Inugpahuway, nakasumalang sia sang isa ka tawo nga may naitus nga kamot. Nahibaluan ni Jesus nga madamong Judiyo nga yadto didto ang indi mahamuot kon ayuhon niya ang isa ka tawo sa Adlaw nga Inugpahuway. Ginpangabay niya sila sing prangka nga ipabutyag ang ila kaugalingon tuhoy sini. Sang nangindi sila, ginpadayon ni Jesus ang ginhimo niya kag gin-ayo ang tawo. (Marcos 3:1-6) Wala gid si Jesus mag-isol sa pagtuman sang iya hilikuton kon sa pagbanta niya nagakaigo.

18. Ngaa ang iban nagapamatok sa aton, apang ano ang dapat nga reaksion naton sa ila negatibo nga panimuot?

¹⁸ Nahangpan man karon sang mga Saksi ni Jehova nga indi gid sila dapat mahadlok sa mahimo nga negatibo nga reaksion sang mga manugpamatok. Kay kon mahadlukan sila, wala nila ginapakita ang  panimuot sang hunahuna ni Jesus. Madamo ang nagapamatok sa mga Saksi ni Jehova, ang pila bangod kulang sila sing sibu nga ihibalo kag ang iban naman bangod naugot sila sa mga Saksi ukon sa ila mensahe. Apang indi gid naton pagtugutan ang di-mainabyanon nila nga panimuot nga makaapektar sa aton positibo nga panimuot. Indi gid naton dapat pagtugutan ang iban sa pagdikta kon paano kita nagasimba.

19. Paano naton mapakita ang panimuot sang hunahuna nga kaangay kay Jesucristo?

¹⁹ Si Jesus nagpakita pirme sing positibo nga panimuot sang hunahuna sa iya mga sumulunod kag sa mga kahimusan sang Dios, walay sapayan nga mabudlay ini himuon. (Mateo 23:2, 3) Dapat naton ilugon ang iya halimbawa. Matuod, ang aton mga kauturan di-himpit, apang amo man kita. Kag diin pa kita makakita sing mas maayo nga mga kaupdanan kag mainunungon gid nga mga abyan sangsa aton bug-os kalibutan nga paghiliutod? Si Jehova wala pa maghatag sa aton sing bug-os nga paghangop sa iya nasulat nga Pulong, apang anong relihioso nga grupo ang mas madamo sing nahangpan? Pirme naton huptan ang nagakaigo nga panimuot sang hunahuna, ang panimuot sang hunahuna kaangay sang iya ni Jesucristo. Lakip sa iban pa nga mga butang, nagalakip ini sang paghibalo kon paano maghulat kay Jehova, subong sang binagbinagon naton sa masunod nga artikulo.

[Nota]

Mapaathag Mo Bala?

• Paano ang aton kabuhi naapektuhan sang aton panimuot?

• Ilaragway ang panimuot sang hunahuna ni Jesucristo.

• Ano ang matun-an naton gikan sa panimuot ni Job?

• Ano ang husto nga panimuot sa atubangan sang pagpamatok?

[Mga Pamangkot sa Pagtinuon]

[Mga retrato sa pahina 7]

Ang isa ka Cristiano nga may nagakaigo nga panimuot nagapanikasog nga buligan ang iban

[Retrato sa pahina 9]

Ang mapangamuyuon nga pagtuon sa Pulong sang Dios nagabulig sa aton nga maangkon ang panimuot sang hunahuna ni Cristo