“Wala Pa Mag-abot ang Iya Takna”

“Wala sing isa nga nagdakop sa iya, bangod wala pa mag-abot ang iya takna.”—JUAN 7:30.

1. Ano ang duha ka butang nga nagtuytoy sang hilikuton ni Jesus?

“ANG Anak sang tawo nagkari, indi agod alagdon, kundi sa pag-alagad, kag sa paghatag sang iya kalag nga gawad sang madamo,” siling ni Jesucristo sa iya mga apostoles. (Mateo 20:28) Sa gobernador sang Roma nga si Poncio Pilato, sia nagsiling: “Tungod sini natawo ako, kag tungod sini nagkari ako sa kalibutan, agod magpanaksi ako sa kamatuoran.” (Juan 18:37) Nakahibalo gid si Jesus kon ngaa dapat sia mapatay kag kon ano nga hilikuton ang kinahanglan niya nga himuon antes sia mapatay. Nakahibalo man sia kon daw ano kalawig ang iya tion agod matuman ang iya misyon. Ang ministeryo niya sa duta subong Mesias magalawig lamang sing tatlo ka tuig kag tunga. Nagsugod ini sang ginbawtismuhan sia sa tubig sa Suba Jordan (sang 29 C.E.) sa pamuno sang gintagna nga ika-70 nga simbuliko nga semana kag natapos ini sang napatay sia sa usok sang pag-antos sang tungatunga sadto nga semana (sang 33 C.E.). (Daniel 9:24-27; Mateo 3:16, 17; 20:17-19) Gani, ang bug-os nga hilikuton ni Jesus sa duta gintuytuyan sang duha ka butang: ang katuyuan sang iya pagkari kag ang maayo nga paghantop sa tiempo.

2. Paano si Jesucristo ginalaragway sa mga Ebanghelyo, kag paano niya ginpakita nga nahibaluan niya ang iya misyon?

² Ang kasaysayan sang mga Ebanghelyo nagalarawan kay Jesucristo subong isa ka nagapanghikot nga tawo nga naglakbay sa bug-os nga Palestina, nga nagapahayag sing maayong balita sang Ginharian sang Dios kag nagahimo sing madamong gamhanan nga buhat. Sadtong maaga nga bahin sang aktibo nga ministeryo ni Jesus, amo ini ang ginsiling tuhoy sa iya: “Wala pa mag-abot ang iya takna.” Si Jesus mismo nagsiling: “Ang akon gintalana nga tion wala pa mag-abot.” Sa  talipuspusan sang iya ministeryo, gingamit niya ang ekspresyon nga “nag-abot na ang takna.” (Juan 7:8, 30; 12:23) Ang pagkahibalo ni Jesus sang takna, ukon sang tion para sa hilikuton nga gintangdo sa iya, lakip na ang iya mahalaron nga kamatayon, nakaapektar sang ginsiling kag ginhimo niya. Ang paghangop sini makahatag sa aton sing paghantop sa iya personalidad kag panghunahuna, nagabulig sa aton nga ‘sundon ang iya mga tikang’ sing maayo pa.—1 Pedro 2:21.

Determinado sa Paghimo Sang Kabubut-on Sang Dios

3, 4. (a) Ano ang natabo sa punsion sa kasal sa Cana? (b) Ngaa ginpamatukan sang Anak sang Dios ang panugda ni Maria nga dapat may himuon sia nahanungod sa kakulang sang alak, kag ano ang matun-an naton sa sini?

³ Tuig 29 C.E. Pila ka adlaw pa lamang ang nakaligad sugod sang si Jesus mismo nagpili sang iya nahaunang mga disipulo. Nagkadto karon sila tanan sa minuro sang Cana sa distrito sang Galilea sa pagtambong sa isa ka punsion sa kasal. Didto man ang iloy ni Jesus, nga si Maria. Naubos ang alak. Sa pagpanugda nga maghimo sia sing paagi, si Maria nagsiling sa iya anak: “Wala na sila sing alak.” Apang si Jesus nagsabat: “Ano bala ang labot ko sa imo, babayi? Ang akon takna wala pa mag-abot.”—Juan 1:35-51; 2:1-4.

⁴ Ang sabat ni Jesus, “Ano bala ang labot ko sa imo, babayi?” isa ka karaan nga porma sang pamangkot nga nagapakita sing pagpamatok sa kon ano ang ginapanugyan ukon ginapanugda. Ngaa nagpamatok si Jesus sa ginsiling ni Maria? Ti, 30 anyos na sia. Sang nagligad lamang nga pila ka semana, ginbawtismuhan sia, ginhaplasan sing balaan nga espiritu, kag ginpakilala ni Juan Bautista subong “ang Kordero sang Dios nga nagakuha sang sala sang kalibutan.” (Juan 1:29-34; Lucas 3:21-23) Ang sugo sa iya dapat karon maggikan sa Supremo nga Awtoridad nga nagpadala sa iya. (1 Corinto 11:3) Wala sing bisan ­sin-o, bisan ang isa ka suod nga miembro sang pamilya, ang tugutan nga magpasilabot sa hilikuton nga himuon ni Jesus sa pagkari sa duta. Ang sabat ni Jesus kay Maria nagapakita nga determinado gid sia nga himuon ang kabubut-on sang iya Amay! Kabay nga mangin determinado man kita sa pagtuman sang aton “bug-os nga katungdanan” sa Dios.—Manugwali 12:13.

5. Ano nga milagro ang ginhimo ni Jesucristo sa Cana, kag ano ang epekto sini sa iban?

⁵ Nakahangop sang pinamulong sang iya anak, si Maria gilayon nga nagpahigad kag nagsiling sa mga suluguon: “Ang bisan ano man nga isiling niya sa inyo, himua ninyo.” Kag ginlubad ni Jesus ang problema. Ginpapuno niya ang mga tadyaw sing tubig sa mga suluguon, kag ginhimo niya ang tubig nga pinakamaayo nga klase sang alak. Natabo ini subong panugod sang gahom ni Jesus sa paghimo sing milagro, nagapatimaan nga ang espiritu sang Dios yara sa iya. Sang nakita sang bag-ong mga disipulo ining milagro, ang ila pagtuo nagbakod.—Juan 2:5-11.

Makugi sa Balay ni Jehova

6. Ngaa naakig si Jesus sa nakita niya sa templo sa Jerusalem, kag ano ang ginhimo niya?

⁶ Wala magdugay kag tigragas na sang 30 C.E., kag si Jesus kag ang iya mga kaupdanan manugkadto sa Jerusalem sa pagsaulog sang Paskwa. Samtang didto sila, nakita sang iya mga disipulo ang ila Lider nga nagpanghikot sa isa ka paagi nga ayhan wala pa anay nila sia makita. Ang makagod nga Judiyong mga negosyante nagabaligya sing mga sapat kag mga pispis para sa halad sa sulod mismo sang templo. Kag ginapamahalan nila ang matutom nga Judiyong mga sumilimba. Sa daku nga kaakig, si Jesus nagpanghikot. Naghimo sia sing latigo nga mga pisi kag gintabog ang mga manugbaligya. Sa pag-ula sang mga sensilyo sang mga manugbaylo sing kuwarta, ginbaliskad niya ang ila mga lamesa. “Kuhaa ninyo ining mga butang gikan diri!” sugo niya sa mga nagabaligya sing mga salampati. Sang nakita sang mga disipulo ni Jesus nga nagpanghikot sia nga may amo sadto nga kainit, nadumduman nila ang tagna tuhoy sa Anak sang Dios: “Ang kakugi para sa imo balay magahalunhon sa akon.” (Juan 2:13-17; Salmo 69:9) Dapat man kita magbantay sing makugi batok sa pagtugot nga dagtaan sang kalibutanon nga mga huyog ang aton pagsimba.

7. (a) Ano ang nagpahulag kay Nicodemo nga duawon ang Mesias? (b) Ano ang matun-an naton gikan sa pagpanaksi ni Jesus sa isa ka Samaritana?

⁷ Samtang sa Jerusalem, si Jesus naghimo sing talalupangdon nga mga tanda, kag madamo nga tawo ang nagtuo sa iya. Bisan si Nicodemo, nga miembro sang Sanhedrin, ukon mataas nga hukmanan sang mga Judiyo, nagdayaw kay Jesus kag nagkadto sa iya sa kagab-ihon agod makatuon sing dugang pa. Nian, si Jesus kag ang iya mga disipulo nagpabilin sa “pungsod sang Judea” sing mga walo ka bulan, nga nagabantala kag nagahimo sing mga  disipulo. Apang, sang nabilanggo si Juan Bautista, nagkadto sila sa Galilea halin sa Judea. Sang nag-agi sila sa distrito sang Samaria, ginhimuslan ni Jesus ang kahigayunan nga mapanaksihan sing maid-id ang isa ka Samaritana. Nagbukas ini sang dalan para sa madamong Samariahanon nga mangin mga tumuluo. Mangin alisto man kita sa mga kahigayunan nga mabantala ang tuhoy sa Ginharian.—Juan 2:23; 3:1-22; 4:1-42; Marcos 1:14.

Lapnag nga Pagpanudlo sa Galilea

8. Ano nga hilikuton ang ginsugdan ni Jesus sa Galilea?

⁸ Antes sang “takna” sang kamatayon ni Jesus, madamo sia sing dapat himuon sa pag-alagad sa iya langitnon nga Amay. Sa Galilea, ginsugdan ni Jesus ang ministeryo nga lapnag pa sangsa Judea kag Jerusalem. Nagkadto sia “sa bug-os nga Galilea, nga nagapanudlo sa ila mga sinagoga kag nagabantala sing maayong balita sang ginharian kag nagapang-ayo sang tanan nga sahi sang balatian kag sang tanan nga sahi sang masakit sa tunga sang mga tawo.” (Mateo 4:23) Ang iya makahalangkat nga mga pulong: “Maghinulsol kamo, kay ang ginharian sang mga langit malapit na,” nabatian sing lapnag sa bug-os nga distrito. (Mateo 4:17) Sa sulod lamang sang pila ka bulan, sang ang duha ka disipulo ni Juan Bautista nagkari agod makabalita mismo tuhoy kay Jesus, nagsiling sia sa ila: “Lakat kamo, sugiri ninyo si Juan sang inyo nakita kag nabatian: ang mga bulag nagabaton sang itululok, ang mga piang nagalakat, ang mga aruon natinluan kag ang mga bungol nakabati, ang mga patay ginabanhaw, ang mga imol ginasugiran sing maayong balita. Kag malipayon sia nga wala masandad sa akon.”—Lucas 7:22, 23.

9. Ngaa nagdugok ang mga kadam-an kay Cristo Jesus, kag ano nga leksion ang mahimo naton nga matun-an gikan sini?

⁹ ‘Ang maayo nga pulong nahanungod kay Jesus naglapnag sa tanan nga palibot nga pungsod,’ kag ang daku nga kadam-an nagdugok sa iya—halin sa Galilea, Decapolis, Jerusalem, Judea, kag sa tabok sang Suba Jordan. (Lucas 4:14, 15; Mateo 4:24, 25) Nagkari sila sa iya indi lamang bangod sang iya milagruso nga mga pagpang-ayo kundi bangod man sang iya makatilingala nga mga panudlo. Ang iya mensahe makagalanyat kag makapalig-on. (Mateo 5:1–7:27)  Ang mga pulong ni Jesus makabibihag kag makalilipay. (Lucas 4:22) Ang mga kadam-an “natingala sa iya paagi sang pagpanudlo,” kay nagapamulong sia gikan sa Kasulatan nga may awtoridad. (Mateo 7:28, 29; Lucas 4:32) ­Sin-o ang indi maganyat sa sini nga tawo? Kabay nga palambuon man naton ang arte sang pagpanudlo agod ang mga tawo nga may bunayag sing tagipusuon maganyat sa kamatuoran.

10. Ngaa ang mga tawo sang Nasaret nagtinguha sa pagpatay kay Jesus, kag ngaa napaslawan sila?

¹⁰ Apang, indi tanan sang tagpalamati ni Jesus ang namati. Bisan sang maaga nga bahin sang iya ministeryo, sang nagapanudlo sia sa sinagoga sang iya kaugalingon nga banwa sa Nasaret, gintinguhaan sia nga patyon. Bisan pa nga ang mga tawo natingala sa iya “makabibihag nga mga pulong,” luyag nila makakita sing mga milagro. Apang, sa baylo nga maghimo didto sing madamong gamhanan nga mga buhat, ginbuyagyag ni Jesus ang ila kakagod kag kakulang sing pagtuo. Sa daku nga kaakig, yadtong yara sa sinagoga nagtindog, gindakop si Jesus, kag gindala sia sa bibi sang bukid agod ibulhog sia nga una-ulo sa pil-as. Apang nakabuhi sia gikan sa ila kag nakapalagyo nga wala maano. Ang “takna” sang iya kamatayon wala pa mag-abot.—Lucas 4:16-30.

11. (a) Ngaa ang pila ka relihiosong lider nagkari sa pagpamati kay Jesus? (b) Ngaa ginsumbong si Jesus nga naglapas sang Adlaw nga Inugpahuway?

¹¹ Ang relihiosong mga lider—mga escriba, mga Fariseo, mga Saduceo kag iban pa—masunson man nga yara kon diin nagabantala si Jesus. Yara ang madamo sa ila, indi agod magpamati kag magtuon, kundi agod magpangita sing sayop kag tinguhaan nga siuron sia. (Mateo 12:38; 16:1; Lucas 5:17; 6:1, 2) Halimbawa, samtang nagaduaw sa Jerusalem para sa Paskwa sang 31 C.E., gin-ayo ni Jesus ang isa ka tawo nga 38 ka tuig na nga nagamasakit. Ginsumbong si Jesus sang Judiyong relihiosong mga lider nga ginlapas niya ang Adlaw nga Inugpahuway. Sia nagsabat: “Ang akon Amay padayon nga nagapangabudlay tubtob karon, kag padayon ako nga nagapangabudlay.” Ginsumbong sia karon sang mga Judiyo sing pasipala bangod sang pag-angkon nga Anak sang Dios paagi sa pagtawag sa iya nga Amay. Gintinguhaan nila nga patyon si Jesus, apang sia kag ang iya mga disipulo nagbiya sa Jerusalem kag nagkadto sa Galilea. Sa kaanggid, maalamon nga likawan man naton ang di-nagakaigo nga mga komprontasyon sa mga nagapamatok samtang ginahugod naton ang aton kusog sa hilikuton nga pagbantala sing Ginharian kag paghimo sing disipulo.—Juan 5:1-18; 6:1.

12. Daw ano kaid-id gintuptupan ni Jesus ang teritoryo sa Galilea?

¹² Sa nagsunod nga isa ka tuig kag tunga ukon kapin pa, ginhugod ni Jesus ang kalabanan sang iya ministeryo sa Galilea, nagduaw lamang sa Jerusalem sa pagtambong sa tatlo ka tuigan nga piesta sang mga Judiyo. Sa kabug-usan, makatlo sia nga naglakbay sa pagbantala sa Galilea: ang una upod sa 4 ka bag-ong disipulo, ang ikaduha upod sa 12 ka apostoles, kag ang isa pa nga mas madugay upod sa ginpadala man nga ginhanas nga mga apostoles. Isa gid ka maid-id nga panaksi sa kamatuoran ang nahatag sa Galilea!—Mateo 4:18-25; Lucas 8:1-3; 9:1-6.

Maisugon nga Pagpanaksi sa Judea kag Perea

13, 14. (a) Sa anong okasyon gintinguhaan sang mga Judiyo nga dakpon si Jesus? (b) Ngaa wala madakpan sang mga opisyales si Jesus?

¹³ Tigragas na sang 32 C.E., kag ang “takna” ni Jesus wala pa mag-abot. Ang Piesta sang mga Tabernakulo malapit na. Ang mga utod sa iloy ni Jesus nagpalig-on karon sa iya: “Taliwan ka halin diri kag magkadto sa Judea.” Luyag nila nga ipakita ni Jesus ang iya milagruso nga mga gahom sa tanan nga nagtipon sa piesta sa Jerusalem. Apang, nakahibalo si Jesus sang katalagman. Gani nagsiling sia sa iya mga utod: “Indi pa ako magataklad sa sining piesta, bangod ang akon gintalana nga tion wala pa mag-abot.”—Juan 7:1-8.

¹⁴ Nagpabilin sing madugaydugay sa Galilea, si Jesus nagtaklad sa Jerusalem “indi sa dayag kundi sa tago.” Matuod gid nga ginapangita sia sang mga Judiyo sa piesta, nga nagasiling: “Diin na ina nga tawo?” Sang nagahinunga na ang piesta, si Jesus nagsulod sa templo kag maisugon nga nagsugod sa pagpanudlo. Gintinguhaan nila nga dakpon sia, ayhan agod ipabilanggo ukon ipapatay sia. Apang, wala sila magmadinalag-on bangod ‘wala pa mag-abot ang iya takna.’ Madamo karon ang nagtuo kay Jesus. Bisan ang mga opisyales nga ginpadala sang mga Fariseo sa pagdakop sa iya nagbalik nga wala dala, nga nagasiling: “Wala pa gid sing iban nga tawo nga nakapamulong kaangay sini.”—Juan 7:9-14, 30-46.

15. Ngaa nagpudyot sing bato ang mga Judiyo agod ihaboy kay Jesus, kag anong kampanya sa pagbantala ang masunod niya nga ginsugdan?

¹⁵ Ang banggianay sa ulot ni Jesus kag sang mga  Judiyo nga nagapamatok sa iya nagpadayon samtang nagatudlo sia nahanungod sa iya Amay sa templo sa tion sang piesta. Sang katapusan nga adlaw sang piesta, nagsingkal sa ginsiling ni Jesus tuhoy sa iya kabuhi antes mangin tawo, ang mga Judiyo nagpudyot sing mga bato agod ihaboy sa iya. Apang nagpanago sia kag nakapalagyo nga wala mahalitan. (Juan 8:12-59) Nagtener sa guwa sang Jerusalem, ginsugdan ni Jesus ang isa ka maid-id nga pagpanaksi sa Judea. Nagpili sia sing 70 ka disipulo kag, sa tapos nga mahatagan sila sing instruksion, ginpalakat niya sila sing tigduhaduha agod magbantala sa teritoryo. Nag-una sila sa tanan nga duog kag siudad nga kadtuan ni Jesus, kaupod sang iya mga apostoles.—Lucas 10:1-24.

16. Ano nga katalagman ang nalikawan ni Jesus sang Piesta sang Dedikasyon, kag sa anong hilikuton nangin masako sia liwat?

¹⁶ Sang tigtulugnaw sang 32 C.E., ang “takna” ni Jesus nagahilapit na. Nagkadto sia sa Jerusalem para sa Piesta sang Dedikasyon. Ang mga Judiyo nagatinguha gihapon sa pagpatay sa iya. Samtang nagalakat si Jesus sa kolonada sang templo, ginlibutan nila sia. Nagasumbong liwat sa iya sing pasipala, nagpudyot sila sing bato agod patyon sia. Apang subong sang ginhimo niya sa nagligad nga mga okasyon, si Jesus nagpalagyo. Wala madugay kag naglakbay sia sa pagpanudlo, sini nga tion sa mga siudad kag mga minuro sa distrito sang Perea, sa tabok sang Jordan halin sa Judea. Kag madamo ang nagtuo sa iya. Apang ang balita may kaangtanan sa iya hinigugma nga abyan nga si Lazaro nagkinahanglan nga magbalik sia sa Judea.—Lucas 13:33; Juan 10:20-42.

17. (a) Anong importante nga mensahe ang nabaton ni Jesus samtang nagabantala sa Perea? (b) Ano ang nagapakita nga nakahibalo si Jesus sang katuyuan sang dapat niya himuon kag sang tiempo sang mga hitabo?

¹⁷ Ang importante nga mensahe naghalin kanday Marta kag Maria, mga utod ni Lazaro, nga nagapuyo sa Betania sang Judea. “Ginuo, tan-awa! ang isa nga ginapalangga mo nagamasakit,” siling sang mensahero. “Ining masakit indi ikamatay,” sabat ni Jesus, “kundi ini tungod sa himaya sang Dios, agod ang Anak sang Dios mahimaya paagi sini.” Agod mahimo ini nga katuyuan, si Jesus hungod nga nagpabilin sa kon diin sia sa sulod sang duha ka adlaw. Nian nagsiling sia sa iya mga disipulo: “Makadto kita liwat sa Judea.” Indi makapati, nagsabat sila: “Rabbi, ­bag-o pa lamang ang mga Judeano nagtinguha sa pagbato sa imo, kag makadto ka liwat didto?” Apang nakahibalo si Jesus nga malip-ot na lang ang nabilin sang “oras nga kasanag sang adlaw,” ukon sang tion nga gintalana sang Dios para sa iya ministeryo sa duta. Nakahibalo gid sia kon ano ang dapat niya himuon kag kon ngaa.—Juan 11:1-10.

Isa ka Milagro nga Indi Mahimo Pasapayanan Sang Isa

18. Sang nag-abot si Jesus sa Betania, ano ang kahimtangan didto, kag ano ang natabo sang mag-abot sia?

¹⁸ Sa Betania, si Marta amo ang una nga nagsug-alaw kay Jesus, nga nagasiling: “Ginuo, kon yari ka, wala kuntani mapatay ang akon utod.” Si Maria kag ang madamo nga nagkari sa ila balay nagsunod. Ang tanan nagahaya. “Diin ninyo sia ginbutang?” pamangkot ni Jesus. Nagsabat sila: “Ginuo, kari kag tan-awa.” Sang nag-abot sila sa handumanan nga lulubngan—isa ka lungib nga may bato nga nagatakop sa sini—si Jesus nagsiling: “Kuhaa ninyo ang bato.” Bangod wala makahangop sa tuyo nga himuon ni Jesus, si Marta nagpamatok: “Ginuo, sa karon mabaho na sia, kay apat ka adlaw na.” Apang namangkot si Jesus: “Wala bala ako magsiling sa imo nga kon magtuo ka makakita ka sang himaya sang Dios?”—Juan 11:17-40.

19. Ngaa nangamuyo sing dayag si Jesus antes ginbanhaw si Lazaro?

¹⁹ Samtang ginakuha ang bato nga nagatakop sa lulubngan ni Lazaro, si Jesus nagpangamuyo sing mabaskog agod mahibaluan sang mga tawo nga ang buot niya nga himuon ginahimo paagi sa gahom sang Dios. Nian nagsinggit sia sa mabaskog nga tingog: “Lazaro, guwa ka!” Si Lazaro nagguwa nga ang iya mga tiil kag mga kamot nasamburan pa sing mga isalambod sa lubong kag ang iya  nawong naputos sing tela. “Hubari sia kag palakta sia,” siling ni Jesus.—Juan 11:41-44.

20. Ano ang reaksion sang mga nakakita sang pagbanhaw ni Jesus kay Lazaro?

²⁰ Sang makita ini nga milagro, madamo sang mga Judiyo nga nagkari sa paglugpay kanday Marta kag Maria ang nagtuo kay Jesus. Ang iban naman naglakat agod sugiran ang mga Fariseo sang natabo. Ang ila reaksion? Sa gilayon, sila kag ang puno nga mga saserdote nagpatawag sing emerhensia nga sinapol sang Sanhedrin. Sa pagsalangisag, nanalambiton sila: “Ano ang aton himuon, bangod ining tawo nagahimo sing madamong tanda? Kon pabay-an naton sia, sila tanan magatuo sa iya, kag ang mga Romano magakari kag magakuha sang aton duog kag sang aton pungsod.” Apang ang Mataas nga Saserdote nga si Caifas nagsiling sa ila: “Wala kamo mangatarungan nga sa kaayuhan ninyo nga ang isa ka tawo mapatay tungod sa mga tawo kag indi malaglag ang bug-os nga pungsod.” Gani, kutob sadto nga adlaw nagsinapol sila nga patyon si Jesus.—Juan 11:45-53.

21. Sa ano ang milagro sang pagbanhaw kay Lazaro isa ka panugod?

²¹ Gani bangod sang pagpalantang sang iya pag-abot sa Betania, si Jesus nakahimo sing isa ka milagro nga indi mahimo pasapayanan sang isa. Bangod ginhatagan sing gahom sang Dios, ginbanhaw ni Jesus ang isa ka tawo nga apat ka adlaw na nga napatay. Bisan ang dungganon nga Sanhedrin napilitan sa pagtalupangod kag sa pagpamatbat sing kamatayon sa Manughimo sing Milagro! Sa amo ang milagro nangin panugod sang isa ka importante nga tion sang ministeryo ni Jesus—ang pagsaylo halin sa panag-on nga “wala pa mag-abot ang iya takna” padulong sa tion nga “nag-abot na ang takna.”

Paano Mo Sabton?

• Paano ginpakita ni Jesus nga nahibaluan niya ang hilikuton nga gintangdo sang Dios sa iya?

• Ngaa ginpamatukan ni Jesus ang panugda sang iya iloy tuhoy sa alak?

• Ano ang matun-an naton gikan sa kon paano masunson nga ginpakig-angutan ni Jesus ang mga nagapamatok?

• Ngaa ginpalantang ni Jesus ang pag-ayo sa masakit ni Lazaro?

[Mga Pamangkot sa Pagtinuon]

[Mga retrato sa pahina 12]

Ginhugod ni Jesus ang iya kusog sa responsabilidad nga gintangdo sang Dios sa iya