Ang mga Talaksan sa Moral Naganubo

“INA nga sahi sang butang wala gid anay matabo,” komento ni Hel­mut ­Schmidt, anay chan­cel­lor sang Alemanya. Nahanusbo sia sa ulihi nga mga kaso sang tuman nga pagkadi-bunayag sang kilala nga mga opisyales sang gobierno nga nangin mga ulong-dinalan. “Ang mga talaksan sa moral nadula bangod sang kakagod,” siling niya.

Madamo ang magaugyon sa iya. Ang mga talaksan sa moral gikan sa Pulong sang Dios, ang Biblia, kag madugay na ginabaton sing lapnag subong giya kon ano ang husto kag kon ano ang sayop ginakabig nga indi importante. Amo ini ang nagakatabo bisan sa mga kadutaan nga ginakabig nga mga Cristiano.

Importante Bala ang Moralidad Sang Biblia?

Ang moralidad pasad sa mga panudlo sang Biblia nagalakip sang pagkabunayag kag integridad. Apang, ang daya, kagarukan, kag limbong lapnag. Ang The Times sang London nagreport nga ang pila ka sekreta “nagbulsa kuno sang tubtob sa £100,000 gikan sa mga droga nga ginkompiskar sang mga pulis kag ginpabaligya ini liwat sa mga kriminal ukon nagdula sang ebidensia batok sa kilala nga mga katapo sang dalagku nga grupo sang mga kriminal.” Sa Austria ang paglimbong sa seguro amo kuno ang kinaandan nga ginahimo. Kag sa Alemanya ang isa ka hubon sang mga sientipiko nakugmat sang  natukiban sining karon lang sang mga manugpanalawsaw ang “isa sang labing iskandaluso nga mga kaso sang paglimbong sa siensia sa Alemanya.” Isa ka propesor, “isa nga nagapanguna sa tunga sang mga genetiko sa Alemanya,” ang ginsumbong nga nagpalsipikar kuno ukon nag-imbento sang mga ebidensia sa daku nga kasangkaron.

Ang moralidad nga napasad sa Biblia nagalakip man sang katutom sa pag-asawahay, nga gintuyo nga mangin isa ka permanente nga kaangtanan. Apang nagadamo nga mag-asawa ang nagadangat sa hukmanan sang diborsio. Ang Katoliko nga pamantalaan nga Christ in der Gegenwart (Ang Moderno nga Cristiano) nagreport nga “bisan sa ‘konserbatibo’ nga Swit­zer­land, dugang kag dugang nga pag-asawahay ang nagakaguba.” Sa Nether­lands, 33 porsiento sang tanan nga pag-asawahay ang nagadangat sa diborsio. Ang isa ka lin-ay nga nakatalupangod sang sosyal nga mga pagbalhin sa Alemanya sang nagligad nga pila ka tuig nagsulat tuhoy sa iya pagkabalaka: “Ang pag-asawahay ginakabig na karon subong sinadto kag dinumaan. Ang mga tawo wala na nagaminyo sing tubtob-buhi.”

Sa pihak nga bahin, minilyon ang nagakabig sang mga talaksan sa moral nga ginatudlo sa Biblia subong masaligan kag importante sa kabuhi sa aton moderno nga kalibutan. Natukiban sang isa ka mag-asawa nga nagapuyo sa dulunan sang Swit­zer­land kag Alemanya nga ang pagtuon nga magkabuhi nahisuno sa mga talaksan sa moral sang Biblia nagpahalipay sa ila sing labi. Para sa ila, “may isa lamang ka panuytoy sa tanan nga bahin sang kabuhi. Ina nga panuytoy amo ang Biblia.”

Ano sa banta mo? Ang Biblia bala mahimo mangin mapuslanon nga panuytoy? Praktikal bala karon ang moralidad nga napasad sa Biblia?