Nagapahalipay ang Daku nga Kaalwan

SUBONG isa ka mahigugmaon nga Cristianong manugtatap, tunay gid nga nabalaka si apostol Pablo sa iya mga masigkatumuluo kag luyag niya sila buligan. (2 Corinto 11:28) Gani, sang gin-organisar niya ang pagpanipon sing kuwarta para sa nagakinahanglan nga mga Cristiano sa Judea sang tungatunga sang katuigan 50 sang nahauna nga siglo sang aton Kumon nga Dag-on, gingamit niya ang kahigayunan sa pagtudlo sing mapuslanon nga leksion tuhoy sa kaalwan. Ginpadaku ni Pablo nga ginapabilihan gid ni Jehova ang paghatag sing malipayon: “Maghimo ang kada isa suno sa ginpamat-od niya sa iya tagipusuon, indi nga may aligutgot ukon sa pagpilit, kay ang Dios nagahigugma sa manughatag nga malipayon.”—2 Corinto 9:7.

Tama ka Imol, Apang Maalwan

Ang kalabanan sang mga Cristiano sang unang siglo indi prominente sa katilingban. Nagsiling si Pablo nga sa tunga nila ‘indi madamo ang gamhanan.’ Sila “ang mga maluya sang kalibutan,” “ang mga kubos sang kalibutan.” (1 Corinto 1:26-28) Halimbawa, ang mga Cristiano nga nagapuyo sa Macedonia yara sa “daku nga kaimulon” kag “sa kapipit-an.” Apang, yadtong kubos nga mga tumuluo sa Macedonia nagpangabay sing pribilehiyo nga mag-amot sing pinansial sa “ministeryo para sa mga balaan”; kag ang ila ginhatag, suno sa pamatuod ni Pablo, “labaw pa sa ila ikasarang”!—2 Corinto 8:1-4.

Apang, ining maalwan nga paghatag wala ginahukman suno sa balor nga ginhatag. Sa baylo, importante ang motibo, kahanda sa paghatag, kag panimuot sang tagipusuon. Ginsiling ni Pablo sa mga Cristiano sa Corinto nga nadalahig ang hunahuna kag tagipusuon sa pag-amot. Sia nagsiling: “Nahibaluan ko ang kahanda sang inyo hunahuna nga bangod sini ginapabugal ko kamo sa mga taga-Macedonia, . . . kag ang inyo kakugi nakapukaw sang kalabanan sa ila.” ‘Namat-od sila sa ila tagipusuon’ nga maghatag sing maalwan.—2 Corinto 9:2, 7.

‘Ginpahulag Sila Sang Ila Espiritu’

Mahimo ginhunahuna ni apostol Pablo ang mas nauna pa nga halimbawa sang maalwan nga paghatag, nga natabo sa kahanayakan kapin na sa 15 ka siglo antes sang panahon niya. Ang 12 ka tribo sang Israel ginhilway gikan sa pagkaulipon sa Egipto. Didto na sila sa kunsaran sang Bukid Sinai, kag ginsugo sila ni Jehova nga magtukod sing tabernakulo para sa pagsimba kag sangkapan ini sing mga gamit sa pagsimba. Nagakinahanglan ini sing madamong galastuhan, kag gin-agda ang pungsod sa pag-amot.

Ano ang reaksion sang mga Israelinhon? “Nag-abot sila, ang tagsatagsa nga napahulag sang iya tagipusuon, kag nagdala sila, ang tagsatagsa nga napahulag sang iya espiritu, sing amot kay Jehova para sa paghuman sang kayangkayang nga tilipunan.” (Exodo 35:21) Nagdulot bala sing maalwan ang pungsod? Sing tuman gid kaalwan! Ginreport ang masunod kay Moises: “Ang katawhan nagdala sing labi pa kadamo sangsa kinahanglan sang buluhaton nga ginsugo ni Jehova nga himuon.”—Exodo 36:5.

Ano ang pinansial nga kahimtangan sang mga Israelinhon sadto? Antes gid lang sadto, makaluluoy gid sila anay nga mga ulipon, ‘ginsakit sa mga lulan nila,’ ‘nagkabuhi sing masubo,’ nagkabuhi sing ‘mapiot.’ (Exodo 1:11, 14; 3:7; 5:10-18) Gani, indi mahimo nga manggaranon sila sa materyal. Matuod, nagbiya ang mga Israelinhon sa pungsod nga nag-ulipon sa ila nga may mga panong kag kasapatan. (Exodo 12:32) Apang mahimo nga indi yadto tanto kadamo, kay wala madugay sa tapos magbiya sa Egipto, nagreklamo sila nga wala sila sing makaon nga karne kag tinapay.—Exodo 16:3.

Diin, kon amo, naghalin ang mga pagkabutang sang mga Israelinhon nga gin-amot nila sa pagtukod sing tabernakulo? Halin sa ila anay mga  agalon, sa mga Egiptohanon. Ang Biblia nagsiling: “Nagpangayo [ang mga anak ni Israel] sa mga Egiptohanon sing mga butang nga pilak kag mga butang nga bulawan kag mga panapton. . . . Ginhatagan sila [sang mga Egiptohanon] sang ila ginpangayo.” Ining maalwan nga mga buhat sang mga Egiptohanon isa ka pagpakamaayo halin kay Jehova, indi halin kay Paraon. Ang rekord sang Biblia nagasiling: “Ginhimo ni Jehova nga kalahamut-an ang katawhan sa panulok sang mga Egiptohanon, sa bagay nga ginhatagan sila nila sang ila ginpangayo.”—Exodo 12:35, 36.

Gani, handurawa ang ginbatyag sang mga Israelinhon. Nag-antos ang mga kaliwatan sing mapintas nga pagkaulipon kag pagdingot. Karon hilway na sila kag may madamong materyal nga pagkabutang. Ano ang ila balatyagon sa pagpaambit sang pila sadtong pagkabutang? Mahimo nila isiling nga ginpangabudlayan nila ini kag may kinamatarong sila nga huptan ini. Apang, sang ginpangabay nga mag-amot sa pinansial sa pagsakdag sa putli nga pagsimba, ginhimo nila ini—kag indi sing nagapangalag-ag ukon sing hawothawot! Wala nila ginkalimtan nga tungod kay Jehova nga natigayon nila yadtong materyal nga mga butang. Gani, ginhatag nila sing maalwan ang ila pilak kag bulawan kag kasapatan. ‘Handa sila sing tinagipusuon.’ ‘Ginpahulag sila sang ila tagipusuon.’ ‘Ginpahulag sila sang ila espiritu.’ Isa gid yadto ka “kinabubut-on nga dulot kay Jehova.”—Exodo 25:1-9; 35:4-9, 20-29; 36:3-7.

Kahanda sa Paghatag

Ang kadakuon sang amot wala gid man nagapakita sang pagkaalwan sang manughatag. Isa ka bes nagalantaw si Jesucristo samtang nagahulog sing kuwarta ang mga tawo sa bahandian sang templo. Naghulog sing madamo nga sensilyo ang mga manggaranon, apang nahamuot si Jesus sang nakita niya nga naghulog sing duha ka diutay nga sensilyo nga nagabalor sing tama ka diutay ang imol nga balo. Sia nagsiling: “Ini nga balo, bisan pa imol, naghulog sing labi pa sa ila tanan. . . . Sa iya kinawad-on naghulog [sia] sang tanan nga inugpangabuhi niya.”—Lucas 21:1-4; Marcos 12:41-44.

Ang komento ni Pablo sa mga taga-Corinto nahisanto sa sini nga panghunahuna ni Jesus. Kon tuhoy sa pag-amot agod buligan ang nagakinahanglan nga mga masigkatumuluo, si Pablo nagsiling: “Kon ang pagkahanda yara na nga daan, labi ini nga kalahamut-an suno sa yara sa isa ka tawo, indi suno sa wala sa iya.” (2 Corinto 8:12) Huo, ang mga amot indi butang nga magpaindis-indis ukon magpaanggiray. Nagahatag ang isa ka tawo suno sa iya masarangan, kag nahamuot si Jehova sa maalwan nga espiritu.

Bisan nga wala sing isa ang makapamanggad kay Jehova, nga nagapanag-iya sang tanan nga butang, ang pag-amot isa ka pribilehiyo nga nagahatag sing kahigayunan sa mga sumilimba nga ipakita ang ila gugma sa iya. (1 Cronica 29:14-17) Ang ginahatag nga amot, indi tungod ipakitakita ukon tungod sa iban pa makagod nga motibo, kundi upod ang nagakaigo nga panimuot kag agod  pauswagon ang matuod nga pagsimba, nagapahalipay kag upod sini ang pagpakamaayo sang Dios. (Mateo 6:1-4) Si Jesus nagsiling: “Mas daku ang kalipay sa paghatag sangsa pagbaton.” (Binuhatan 20:35) Makaambit kita sa sina nga kalipay paagi sa paghatag sang aton kusog sa pag-alagad kay Jehova kag sa pagpain sang pila ka bahin sang aton materyal nga mga pagkabutang sa pagsakdag sang matuod nga pagsimba kag sa pagbulig sa mga takus sini.—1 Corinto 16:1, 2.

Kahanda sa Paghatag Karon

Sa karon, nalipay ang mga Saksi ni Jehova nga makita ang bug-os kalibutan nga pag-uswag sa pagbantala sining “maayong balita sang ginharian.” (Mateo 24:14) Sang katapusan nga dekada sang ika-20 nga siglo, kapin sa 3,000,000 ka tawo ang ginbawtismuhan sa pagsimbulo sang ila dedikasyon kay Jehova nga Dios, kag mga 30,000 ka bag-o nga kongregasyon ang natukod. Huo, ikatlo nga bahin sang mga kongregasyon sang mga Saksi ni Jehova sa karon ang natukod sang nagligad nga napulo ka tuig! Ang kalabanan sini nga pag-uswag resulta sang lakas nga pagpangabudlay sang sinsero nga Cristianong mga lalaki kag babayi nga naghatag sang ila tion kag kusog agod maduaw ang ila mga isigkatawo kag masugiran sila sang mga katuyuan ni Jehova. Ang pila ka pag-uswag resulta sang hilikuton sang mga misyonero, nga nagbiya sang ila mga puluy-an kag naglakbay pakadto sa malayo nga mga pungsod agod magbulig sa pagbantala sing Ginharian didto. Bangod sang pag-uswag gin-organisar ang bag-o nga mga sirkito, nga nagakinahanglan sing bag-o nga mga manugtatap sa sirkito. Dugang pa, madamo pa nga Biblia ang kinahanglanon agod gamiton sa pagbantala kag personal nga pagtuon. Dugang pa nga naimprinta nga literatura ang kinahanglanon. Kag sa madamo nga pungsod, ang mga tinukod sang sanga kinahanglan padakuan ukon buslan sing mas dalagku nga mga tinukod. Nahatag ining tanan dugang pa nga mga kinahanglanon sa bulig sang boluntaryo nga mga amot sang katawhan ni Jehova.

Kinahanglan ang mga Kingdom Hall

Nangin daku nga kinahanglanon ang mga Kingdom Hall bangod sang pagdamo sang mga Saksi ni Jehova. Ginpakita sang mga surbe nga ginhimo sang maaga nga bahin sang tuig 2000 nga kinahanglan ang kapin sa 11,000 ka Kingdom Hall sa imol nga mga pungsod, diin maiwat ang kuwarta. Binagbinaga ang Angola. Walay sapayan sang tinuig nga inaway sibil, mga 10 porsiento ang promedyo nga tuigan nga pag-uswag sa kadamuon sang manugbantala sang Ginharian sa sina nga pungsod. Apang, ang kalabanan sang 675 ka kongregasyon sa sining daku nga pungsod sa Aprika nagatipon sa wayang. May yara lamang 22 ka Kingdom Hall sa pungsod, kag 12 lamang sini ang may atop.

Kaanggid man ang kahimtangan sa Democratic Republic of Congo. Bisan pa may halos 300 ka kongregasyon sa kapital nga siudad sang Kinshasa, napulo lamang ang Kingdom Hall. Sa bug-os nga pungsod, kinahanglan gid ang kapin sa 1,500 ka Kingdom Hall. Bangod sang madasig nga pag-uswag sa mga pungsod sa Nasidlangan nga Europa, nagreport ang Rusya kag ­Ukraine sing kinahanglanon nga ginatos ka Kingdom Hall. Ang madasig nga pag-uswag sa Latin nga Amerika makita sa Brazil, diin may kapin sa tunga sa milyon ka Saksi kag kinahanglanon gid ang dugang pa nga mga Kingdom Hall.

Agod mahatag ang mga kinahanglanon sa sini nga mga pungsod, ginagamit sang mga Saksi ni Jehova ang ginpadasig nga programa sa pagtukod sing mga Kingdom Hall. Ginasakdag ang programa sang maalwan nga mga amot sang bug-os kalibutan nga paghiliutod, agod bisan ang pinakaimol nga mga kongregasyon makatigayon sing nagakaigo nga duog sa pagsimba.

Kaanggid sa panahon sang dumaan nga Israel, daku ang mahimo bangod ang sinsero nga mga Cristiano ‘nagapadungog kay Jehova paagi sa ila bilidhon nga mga butang.’ (Hulubaton 3:9, 10) Luyag gamiton sang Nagadumala nga Hubon sang mga Saksi ni Jehova ini nga kahigayunan agod ipabutyag ang daku nga pasalamat sa tagsatagsa nga ginpahulag sang iya tagipusuon nga makigbahin sa sining boluntaryo nga paghatag. Kag makasalig kita nga ang espiritu ni Jehova padayon nga magatandog sa tagipusuon sang iya katawhan sa pagsakdag sa mga kinahanglanon sang nagasangkad pa nga hilikuton sang Ginharian.

Samtang nagapadayon ang pag-uswag sa bug-os nga kalibutan, kabay nga padayon kita nga mangita sing kahigayunan nga ipakita ang aton kalipay kag kahanda sa paghatag sang aton kusog, aton tion, kag aton manggad. Kag kabay nga maeksperiensiahan naton ang matuod nga kalipay nga mahatag sining mahinatagon nga espiritu.

[Kahon sa pahina 29]

“GAMITA INI SING MAALAMON!”

“Dies anyos ako. Ginapadala ko sa inyo ini nga kuwarta agod makabakal kamo sing papel ukon sing bisan ano pa nga butang sa paghimo sing mga libro.”—Cindy.

“Gusto ko ipadala sa inyo ini nga kuwarta agod makahimo sing madamo pa nga libro para sa amon. Nasupot ko ini nga kuwarta paagi sa pagbulig sa akon tatay. Gani gamita ini sing maalamon!”—Pam, siete anyos.

“Masubo ako bangod sang buhawi. Kabay pa nga maayo na ang inyo kahimtangan. Amo na lang ini [$2, U.S.] ang akon kuwarta sa bangko.”—Allison, kuwatro anyos.

“Ako si Rudy, kag 11 anyos ako. Seis anyos ang akon manghod nga si Ralph. Kag duha ka tuig kag tunga ang akon manghod nga si Judith. Nagsupot kami halin sa amon ­allowance sa sulod sang tatlo ka bulan agod buligan ang amon mga kauturan sa [may inaway nga duog]. Nakasupot kami sing 20 ka dolyar nga ginapadala namon subong.”

“Nagapangasubo gid ako tungod sa mga kauturan [nga ginbagyo]. Nakasupot ako sing 17 ka dolyar paagi sa pagtrabaho upod sa akon tatay. Wala ako sing nahunahuna nga espesipiko nga butang nga gamitan sining ginapadala ko nga kuwarta, gani kamo na lang ang bahala.”—Maclean, otso anyos.

 [Kahon sa pahina 31]

Mga Paagi nga Ginpili sang Iban sa Paghatag sing

MGA AMOT SA BUG-OS KALIBUTAN NGA HILIKUTON

Madamo ang nagapain, ukon nagabadyet, sing kantidad nga ginahulog nila sa mga kahon-alamutan nga may ngalan “Con­tri­bu­tions for the So­ciety’s World­wide Work—Mat­thew 24:14.” Kada bulan ginapadala sang mga kongregasyon ini nga kantidad sa bug-os kalibutan nga ulong-talatapan sa Brooklyn, New York, ukon sa lokal nga sanga talatapan.

Ang boluntaryo nga mga amot nga kuwarta mahimo man mapadala sing direkta sa Trea­surer’s Of­fice, Watch ­Tower ­Bible and Tract So­ciety of the Philip­pines, P. O. Box 2044, 1060 Manila, ukon sa talatapan sang Sosiedad nga nagapangalagad sa inyo pungsod. Ang mga alahas ukon iban pa nga mga bahandi mahimo man maamot. Ang isa ka malip-ot nga sulat nga nagasiling nga ini isa ka kinabubut-on nga dulot dapat ilakip sa sining mga amot.

KAHIMUSAN SA PAGDONAR NGA MAY KONDISYON

Mahimo ihatag ang kuwarta sa Watch Tower Society upod ang pinasahi nga kondisyon nga kon kinahanglan ini sang nagdonar, ang donasyon iuli sa iya. Para sa dugang nga impormasyon, makig-angot palihug sa Trea­surer’s Of­fice sa direksion nga yara sa ibabaw.

GINPLANO NGA PAGHATAG

Dugang sa direkta nga mga dulot nga kuwarta kag pagdonar sing kuwarta nga may kondisyon, may iban pa nga paagi sa paghatag nga makabulig sa pag-alagad sa Ginharian sa bug-os nga kalibutan. Ini nagalakip sa:

Pasiguro: Ang Watch Tower Society mahimo hingadlan subong benepisyaryo sang isa ka ­life in­surance poli­cy ukon sang isa ka plano sang pagretiro ukon pension.

Mga Kuwenta sa Bangko: Ang mga kuwenta sa bangko, mga sertipiko sang deposito, ukon indibiduwal nga kuwenta sa pagretiro mahimo ipatago subong butang nga ginpiyar ukon ibayad sa tion sang kamatayon sa Watch ­Tower So­ciety, nahisuno sa mga kinahanglanon sang lokal nga bangko.

Stocks kag Bonds: Mahimo idonar ang stocks kag bonds sa Watch ­Tower So­ciety subong isa ka direkta nga regalo.

Real Estate: Ang mahimo mabaligya nga real estate mahimo idonar sa Watch ­Tower So­ciety paagi sa paghimo sing direkta nga regalo ukon paagi sa pagtigana sing bug-os kabuhi nga propiedad sa nagdonar, nga padayon nga makaistar sa sini tubtob buhi sia. Dapat ang isa makig-angot sa Sosiedad antes himuan sing kasulatan ang bisan ano nga ­real es­tate sa Sosiedad.

Testamento kag mga Butang nga Ginapiyar: Ang propiedad ukon kuwarta mahimo ipapanubli sa Watch ­Tower So­ciety paagi sa legal nga testamento, ukon ang Sosiedad mahimo mahingadlan subong benepisyaryo sang isa ka kasugtanan tuhoy sa mga butang nga ginapiyar. Ang pagpiyar sing isa ka butang sa isa ka relihioso nga organisasyon subong amo ang benepisyaryo mahimo may mga bentaha sa buhis.

Subong ginapahangop sang termino nga “ginplano nga paghatag,” ini nga mga sahi sang pagdonar kinaandan nga nagakinahanglan sing pagplano sa bahin sang nagadonar. Agod buligan ang mga indibiduwal nga luyag magbulig sa Sosiedad paagi sa pila ka porma sang ginplano nga paghatag, ang Sosiedad naghanda sing Ingles kag Espanyol nga brosyur nga natig-uluhan Chari­table Planning to Bene­fit Kingdom Ser­vice World­wide. Ginsulat ang brosyur bilang sabat sa madamo nga pamangkot nga nabaton sang Sosiedad tuhoy sa mga regalo, testamento, kag mga butang nga ginpiyar. Nagaunod man ini sing dugang kag mapuslanon nga impormasyon tuhoy sa pagplano sa es­tate, sa pinansial, kag sa buhis. Kag gindesinyo ini sa pagbulig sa mga indibiduwal sa Estados Unidos nga nagaplano sa paghatag sing espesyal nga regalo sa Sosiedad karon ukon magbilin sing palanublion sa tion sang kamatayon sa pagpili kon ano ang labing maayo kag mapuslanon nga paagi nga ginabinagbinag ang ila pamilya kag personal nga mga kahimtangan. Ini nga brosyur sarang matigayon paagi sa pagpangabay sing isa ka kopya sing direkta gikan sa Chari­table Planning ­Office.

Sa tapos mabasa ang brosyur kag makapakig-angot sa Chari­table Planning Of­fice, madamo ang nakabulig sa Sosiedad kag sa amo man nga tion, sa paghimo sini napanginpuslan sing daku ang mga benepisyo nga ginatugot sang kahimusan sa buhis. Ang Chari­table Planning Of­fice dapat pahibaluon ukon hatagan sing kopya sang bisan anong importante nga dokumento tuhoy sa sining mga kahimusan. Kon interesado ka sa bisan diin sini nga kahimusan sang ginplano nga paghatag, dapat ikaw magpakig-angot sa Chari­table Planning Of­fice, paagi sa pagsulat ukon paagi sa telepono, sa direksion nga ginlista sa ubos ukon sa talatapan sang Sosiedad sa inyo pungsod.

CHARITABLE PLANNING OFFICE

Watch Tower Bible and Tract Society of Pennsylvania

100 Watchtower Drive, Patterson, New York 12563-9204

Telepono: (845) 306-0707