Makabulig Gid Bala ang Pangamuyo?

SA PILA ka tion, halos ang tanan nagabatyag nga kinahanglan magpangamuyo. Sa pagkamatuod, ang mga tawo sang halos tanan nga relihion hanuot nga nagapangamuyo. Halimbawa, linibo ka beses sa isa ka adlaw, mahimo ginasulitsulit sang isa ka Bu­dhista ang pangadi nga “Nagatuo ako kay Amida Buddha.”

Bangod sang nagapadayon nga mga problema sa bug-os nga duta, makatarunganon nga mamangkot: Ano ang ginapaabot sang mga tawo nga matigayon paagi sa pagpangamuyo? Makabulig gid bala ining tanan nga pangamuyo?

Ngaa Nagapangamuyo ang mga Tawo?

Madamong taga-Sidlangan ang nagapangamuyo sa ila mga katigulangan kag sa mga dios sang Shinto ukon Tao. Ginahimo nila ini sa paglaum nga makapasar sa mga eksaminasyon sa eskwelahan, makaani sing maayo nga alanyon, ukon makalikaw sa mga balatian. Paagi sa ila pagpanikasog, nagalaum ang mga Budhista nga makatigayon sing kasanagan. Nagapangamuyo sing hugot ang mga Hindu sa ila paborito nga mga dios kag mga diosa para sa ihibalo, manggad, kag pangamlig.

Luyag sang pila ka Katoliko nga makabulig sa katawhan paagi sa pagdedikar sing bug-os sang ila kabuhi subong mga monghe ukon mga madre sa eksklusibo nga mga monasteryo ukon mga kombento, nga pirme nagapangadi. Minilyon ka Katoliko ang nagapangayo sing pabor kay Maria paagi sa pagbungat sing saulado nga mga pangadi, ayhan sa bulig sang rosarito. Sa mga pungsod sa Sidlangan, madamo nga tawo ang nagagamit sing mga ­prayer ­wheel. Ginapangamuyo sang mga Protestante ang Pangamuyo sang Ginuo, bisan pa mahimo nila mapabutyag sing hilway ang ila balatyagon sa Dios. Madamong Judiyo ang nagalakbay sing  malayo agod mangadi sa Nakatundan nga Pader sa Jerusalem, sa paglaum nga mapasag-uli ang templo kag matigayon ang isa ka bag-o nga dag-on sang kahamungayaan kag paghidait.

Bisan pa minilyon ang nagapangamuyo sing lakas, ang katilingban sang tawo labi pa nga ginasalot sang mga problema sang kaimulon, pagkagiyan, naguba nga mga pamilya, krimen, kag inaway. Mahimo ayhan nga ining tanan nga tawo wala nagapangamuyo sa husto nga paagi? Kon amo, may nagapamati gid bala sa mga pangamuyo?

May Nagapamati Bala sa mga Pangamuyo?

Wala pulos ang pangamuyo kon wala ginapamatian. Kon mangamuyo ang isa ka tawo, nagapati gid sia nga may isa nga nagapamati sa di-makita nga duog sang mga espiritu. Apang, ang mga pangamuyo wala ginaliton paagi lamang sa mga ­sound ­wave. Madamo nga tawo ang nagapati nga may isa nga makabasa pa gani sang hunahuna sang isa nga nagapangamuyo. Sin-o ayhan sia?

Isa gid ka tanhaga sa mga manugpanalawsaw kon paano nagasugod ang mga ideya sa binilyon ka neu­ron nga nagahuman sa cere­bral cortex sang aton utok. Apang, makatarunganon nga mabasa sang Isa nga nagdesinyo sang utok ini nga mga ideya. Ina sia wala sing liwan kundi ang aton Manunuga, si Jehova nga Dios. (Salmo 83:18; Bugna 4:11) Dapat ipatuhoy sa iya ang mga pangamuyo. Apang ginapamatian bala ni Jehova ini tanan nga pangamuyo?

Ginapamatian Bala ang Tanan nga Pangamuyo?

Si Hari David sang dumaan nga Israel isa ka tawo nga pirme nagapangamuyo. Subong gin-inspirar sang Dios nga salmista, nag-amba sia: “O Manugpamati sang pangamuyo, sa imo magakari ang katawhan sang tanan nga unod.” (Salmo 65:2) Mahangpan ni Jehova ang mga pangamuyo nga ginasambit sa bisan ano man sang linibo ka len­gua­he nga ginapamulong sang katawhan. Ang kamatuoran nga wala sing tawhanon nga hunahuna nga makasarang sa pagbaton sing amo sina kadamo nga impormasyon wala nagakahulugan nga indi mapamatian sang Dios ang tanan nga nagapangamuyo sa iya sa kalahamut-an nga paagi.

Apang, ginpahayag ni Jesucristo—isa man ka tawo nga pirme nagapangamuyo—nga indi tanan nga pangamuyo nagapahamuot sa Dios. Talupangda ang ginsiling ni Jesus tuhoy sa kinabatasan sadto nga pagsulitsulit sa saulado nga mga pangamuyo. Suno sa Katoliko nga Jerusalem Bi­ble, nagsiling sia: “Sa inyo mga pangamuyo indi maghambal sing sulitsulit sa walay pulos subong sang mga pagano, kay nagahunahuna sila nga paagi sa paggamit sing madamong hambal pamatian sila.” (Mateo 6:7) Indi naton mapaabot nga pamatian ni Jehova ang mga pangamuyo nga wala nagapakita sang aton matuod nga balatyagon.

Agod ipakita kon ngaa ang iban nga mga pangamuyo wala nagapahamuot sa Dios, ang isa ka hulubaton sa Biblia nagasiling: “Sia nga nagapahilayo sang iya igdulungog sa pagpamati sa kasuguan—bisan ang iya pangamuyo kalangil-aran.” (Hulubaton 28:9) Ang isa pa ka hulubaton nagasiling: “Malayo si Jehova sa mga malauton, apang ginapamatian niya ang pangamuyo sang mga matarong.” (Hulubaton 15:29) Sang nakasala sing mabug-at ang mga lider sang dumaan nga Juda, si Jehova nagsiling: “Kon ginauntay ninyo ang inyo mga palad, ginalipnan ko ang akon mga mata gikan sa inyo. Bisan pa maghimo kamo sing madamo nga pangamuyo, wala ako nagapamati; ang inyo mga kamot napuno sang pagpaagay sing dugo.”—Isaias 1:1, 15.

May ginsambit pa si apostol Pedro nga bangod sini mahimo mangin di-kalahamut-an sa Dios ang mga pangamuyo. Si Pedro nagsulat: “Kamo nga mga bana, padayon kamo sa pagpuyo kaupod [sang inyo asawa] sa kaanggid nga paagi suno sa ihibalo, nga nagahatag sa ila sing dungog subong sang isa ka mas maluya nga suludlan, ang isa nga may pangbabayi nga kinaiya, sanglit mga masigkamanunubli man kamo kaupod nila sang di-bagay nga pabor sang kabuhi, agod indi masablagan ang inyo mga pangamuyo.” (1 Pedro 3:7) Ang mga pangamuyo sang isa ka tawo nga wala nagasunod sini nga laygay mahimo nga hasta lang sa iya kuwarto!

Maathag nga dapat tumanon ang pila ka tulumanon agod pamatian ang mga pangamuyo. Apang, madamo sang nagapangamuyo ang halos indi interesado sa paghimo kon ano ang ginapatuman sang Dios sa aton. Amo sina kon ngaa ang madamo nga hanuot nga pangamuyo wala magresulta sa mas maayo nga kalibutan.

Ano, kon amo, ang ginapatuman sang Dios agod pamatian ang aton mga pangamuyo? Ang sabat may yara kahilabtanan sa aton mismo rason sa pagpangamuyo. Sa pagkamatuod, kon luyag naton mahibaluan kon bala makabulig ang mga pangamuyo, dapat naton hangpon ang katuyuan sini. Ngaa ginapaposible ni Jehova nga makapakighambal kita sa iya?

[Picture Credit Line sa pahina 3]

G.P.O., Jerusalem