Kami ang Sahi nga may Pagtuo

Pagbantala sing Ginharian sa Altiplano sa Peru

SA ULOT sang nasidlangan kag nakatundan sang nagakatay nga mga Kabukiran sang Andes—diin nagatabuay ang Bolivia kag Peru—nahamtang ang Alti­plano. Ang ngalan sini nagakahulugan sing “mataas nga patag,” ukon “plateau.” Ang daku nga bahin sini yara sa Bolivia.

Ang Alti­plano may 100 kilometros nga kalaparon kag kapin sa 1,000 kilometros nga kalabaon, kag ang promedyo nga kataason sini mga 3,700 metros sa ibabaw sang nibel sang dagat. Sakay sa eroplano padulong didto gikan sa baybayon nga kapital nga siudad sang ­Peru, ang ­Lima, maagyan mo ang natabunan-sing-niebe nga El ­Misti, isa ka bulkan nga nagalab-ot sa panganod sa kataason nga 5,822 metros. Nagataas sing kapin sa 6,000 metros amo ang malayo nakulapan-sing-niebe nga mga putukputukan sang Ne­va­do Am­pa­to kag Ne­va­do Co­ro­pu­na. Makita sa gilayon ang isa ka malapad nga plateau—ang Altiplano sang nabagatnan nga Peru.

Ang kapital sang Alti­plano sa Peru amo ang Pu­no, nga nahamtang sa aminhan-katundan nga ukbong sang ­Lake Titicaca, ang pinakamataas nga linaw sa kalibutan nga sarang maagihan sang barko. Bangod ang rehiyon kapin sa tatlo ka kilometro ang kataason, nagakinahanglan anay sing tion para sa mga dumuluaw agod makapasibu sa diutay nga hangin. Ang nagapuyo sa Lake Titicaca amo ang Que­chua kag Ay­ma­ra nga mga Indian. Nagasuksok sing maduagon nga pula, berde, ukon asul nga panapton, makita sila nga nagaobra sa ila chac­ras, ukon magagmay nga mga uma. Bisan pa Espanyol ang panguna nga hambal sa Peru, ang Que­chua kag Ay­ma­ra ginagamit man sa Alti­plano.

Pagpanguna sa Pagbantala nga Hilikuton

Madamo sang kubos, mapisan nga mga tawo nga nagahambal sing Que­chua kag Ay­ma­ra ang nakatigayon sining karon lang sing sibu nga ihibalo sang kamatuoran sa Biblia. Bangod gid ini sa bugana nga pagpakamaayo ni Jehova sa makugi nga mga pagpanikasog sang bug-os tion nga mga manugbantala sang Ginharian nga nagaalagad subong mga espesyal payunir.

Halimbawa, ang mga espesyal payunir nga sanday José kag Silvia ginpadala sa banwa sang Pu­ti­na, nga mga 50 kilometros halin sa ­Lake Titicaca. Sa sulod sang duha ka bulan, si Silvia nagdumala sing 16 ka pagtuon sa Biblia sa puluy-an, kag si José,14. Sa anom lamang ka bulan, ang kadamuon sang manugbantala sang kongregasyon nag-uswag halin sa 23 tubtob 41. Sa amo man nga tion, ang tumalambong sa mga miting nagdugang halin sa 48 tubtob sa kataason nga 132.

“Kon nagasugod sa paghiwat sing mga miting sang kongregasyon sa sining nabaw-ing nga mga komunidad,” siling ni José, “nasapwan namon nga praktikal nga unahon ang Miting Publiko kag ang Pagtinuon sang Kongregasyon sa Libro. Bangod sini, nangin mas mahapos para sa bag-o nga mga interesado nga magsugod sa pagtambong sa mga miting.”

Duha ka mag-utod nga babayi—ang isa payunir—ang una nga nagdala sing maayong balita sa nabaw-ing nga kumunidad sang Mu­ña­ni, nga mga 20 kilometros halin sa Putina. Didto nagsugod sila sa pagtuon sa Biblia upod sa isa ka tawo nga bulag nga si Lu­cio. * Gin-agda niya ang iya manghod nga si Mi­guel, isa ka lego nga Katoliko nga misyonero kag lider sang kumunidad gikan sa kaingod nga duog. Sang ginpamangkot sang isa ka abyan si Mi­guel kon ngaa nagakadto sia sa Mu­ña­ni kada semana, nagsiling sia nga agod makatuon tuhoy kay Jehova kag sa iya Pulong. Nian nag-utwas ang pamangkot: “Ngaa indi kita diri magtuon sing Biblia?” Bangod sang interes nga ginpakita sang mga tawo sa kumunidad ni Mi­guel, wala magdugay ang mga Saksi naghimo sing mga kahimusan agod maghiwat sing mga miting didto.

Ginpaambit ni Miguel ang iya mga natun-an sa iban. Apang kamusta naman ang iya palangakuan subong isa ka lego nga Katoliko nga misyonero kag deputado nga gobernador? Sa isa ka miting sa tilipunan sang komunidad, ginpahibalo niya ang iya paghalin subong isa ka Katoliko nga misyonero. May iban bala nga dapat itangdo? Ang isa sang tagpalamati nagsiling: “Ngaa kinahanglan naton ang isa pa ka misyonero samtang nagatuon na kita sing kamatuoran?” Siempre pa, nagapatuhoy ini sa mga butang nga ginatudlo sang mga Saksi ni Jehova. Isa pa  ka tawo ang nagtugda: “Indi kami magpasugot nga ikaw lang ang mahalin. Ngaa indi kita tanan maghalin?” Ang tanan nga tumalambong dayon nagsinggit sing dungan: “Mahalin kita tanan!”

Ginhambalan man ang mga idolo kag mga krusipiho sa isa ka miting sa komunidad wala madugay pagkatapos sadto. Nagpangabay ang isa ka tawo nga basahon sang tanan nga yadto didto ang Deuteronomio 7:25, nga nagasiling: “Dapat mo sunugon sa kalayo ang mga larawan nga tinigban sang ila mga dios. Dili mo pagkaibugan ang pilak ukon ang bulawan nga yara sa ila, ukon kuhaon ini nga sa imo, basi nga masiod ka sa ila; kay ini kangil-aran kay Jehova nga imo Dios.”

Nian ginpangabay sini nga tawo ang bisan sin-o nga pabor nga sunugon ang tanan nga idolo sa pagbayaw sang ila mga kamot. Ang tanan nga kamot nagbayaw sa gilayon. (Binuhatan 19:19, 20) Karon 23 sang 25 ka pamilya sa komunidad ang nagatuon sang Pulong sang Dios. Duha ang nagaalagad subong di-bawtismado nga mga manugbantala, kag lima ka mag-asawa ang nagaplano nga magpakasal agod makatigayon sing matinlo nga tindog sa atubangan ni Jehova.—Tito 3:1; Hebreo 13:4.

Pagtudlo Paagi sa mga Cassette Recording

Bangod madamo ang indi makahibalo magbasa kag magsulat sa Alti­plano, ang mga vid­eo kag mga cas­sette record­ing sang Watch Tower sa lokal nga mga lenguahe isa ka daku nga bulig—bisan sa paghiwat sing mga pagtuon sa Biblia sa puluy-an. Sa bulig sang aud­io cas­sette, ang isa ka espesyal payunir nga si Dora nakahiwat sing mga pagtuon sa brosyur nga Ano ang Ginapatuman Sang Dios sa Aton? Nagapatokar sang isa ka parapo sa isa ka tion, ginapamangkot niya ang estudyante sa Biblia sing mga pamangkot tuhoy sa materyal nga bag-o lang nabatian.

Isa ka lokal nga estasyon sang radyo ang ­regular nga nagpalayag sing mga bahin sang Ginapatuman nga brosyur sa Que­chua nga lenguahe. Amo man sini ang ginahimo sa mga bahin sang Magmata! nga magasin sa Espanyol. Busa, madamo nga tawo ang nagpakita sing apresasyon sa mensahe kag maluyag sa pagtuon sing dugang pa kon magduaw ang mga Saksi ni Jehova sa ila mga puluy-an.

Ang Alti­plano wala matalupangdi sang kalibutan sa kabilugan apang indi gikan sa panulok sang Dios. Bangod sang gugma ni Jehova sa katawhan, madamo nga tawo nga nagapuyo sa mataas nga Alti­plano sa Andes ang nangin bahin sang panong nga nagahimaya sa iya halangdon nga balay sang matuod nga pagsimba.—Hageo 2:7.

[Nota]