Report sang mga Manugbantala sang Ginharian

Si Jehova Nag-aman sa Iya Katawhan sing Duog-Palahuwayan

ANG isa ka mahandong nga duog-palahuwayan sa isa ka banas sa bukid nagapahalipay gid sa isa ka nakapoy nga manlalakbay. Sa Nepal, ini nga duog-palahuwayan ginatawag nga chau­ta­ra. Ang kinaandan nga chau­ta­ra nahamtang sa tupad sang madabong nga kahoy nga lunok, isa ka mahandong nga duog agod lingkuran kag pahunayhunayan. Ang pag-aman sing chau­ta­ra isa ka buhat sang kaayo, kag ang kalabanan nga mga nagahimo sini wala nagapakilala.

Ang mga eksperiensia gikan sa Nepal nagapakita kon paano si Jehova nga Dios nangin Tuburan sang kalipay kag espirituwal nga kapahuwayan sa madamo nga nakapoy nga mga “manlalakbay” sa sining sistema sang mga butang.—Salmo 23:2.

• Si Lil Ku­ma­ri nagapuyo sa matahom nga siudad sang ­Pokhara, diin makita ang tumalagsahon nga natabunan-sing-niebe nga mga Kabukiran sang Himalaya. Apang bangod sang kabalaka tuhoy sa pinansial nga kahimtangan sang pamilya, si Lil Ku­ma­ri nagbatyag nga wala gid sing daku nga malauman. Sang ginduaw sia sang isa sang mga Saksi ni Jehova, natandog sia sang masanag nga paglaum sa Biblia kag nangabay sa gilayon sing isa ka pagtuon sa Biblia sa puluy-an.

Bisan pa luyag gid ni Lil Ku­ma­ri nga magtuon, indi mahapos ang magpadayon bangod sang mabaskog nga paghingabot sang pamilya. Apang wala sia mag-untat. Nagtambong sia sa Cristianong mga miting sing regular kag gin-aplikar ang iya mga natun-an, ilabi na gid ang tuhoy sa pagpasakop sang asawa. Subong resulta, nahantop sang iya bana kag sang iya iloy nga ang pagtuon ni Lil Kumari sa Biblia nagabulig sa bug-os nga pamilya.

Ang iya bana kag ang pila ka kaparyentehan nagatuon na karon sa Pulong sang Dios. Sa sining karon lang nga asambleya nga ginhiwat sa ­Pokhara, si Lil Ku­ma­ri nagpamati sa programa upod sa iya 15 ka kaparyentehan. Sia nagsiling: “Ang akon puluy-an nangin isa ka palahuwayan nga duog bangod ang amon pamilya nahiusa na karon sa matuod nga pagsimba, kag nasapwan ko ang matuod nga kalinong sang hunahuna.”

• Bisan pa ang pagpasulabi sa sosyal nga mga klase ilegal sa Nepal, may mabaskog ini gihapon nga impluwensia sa talaksan sang pagkabuhi sang mga tawo. Sa amo, madamo ang interesado sa ginasiling sang Biblia tuhoy sa pagkaalalangay kag pagkawalay pinasulabi. Sang natun-an ni Sur­ya Ma­ya nga ang “Dios wala sing pinasulabi,” nagbalhin sing daku ang kabuhi nila sang iya pamilya.—Binuhatan 10:34.

Nasubuan gid si Sur­ya Ma­ya bangod sang pagkawalay katarungan sang pagpasulabi sa sosyal nga mga klase kag sang lulan sang madalom-sing-gamot nga mga tradisyon kag mga kinabatasan. Subong isa ka debotado nga babayi, tinuig na nga nagapangayo sing bulig si Sur­ya Ma­ya sa iya mga diosdios. Apang wala gid masabat ang iya mga pangamuyo. Isa ka adlaw samtang nagapakitluoy sia sing bulig, ang iya anom-ka-tuig nga apo nga babayi nga si Ba­bi­ta nagpalapit sa iya kag namangkot: “Ngaa sagad ka pakitluoy sing bulig sa atubangan sang mga diosdios nga wala gid sing mahimo?”

Ang iloy gali ni Ba­bi­ta nagatuon sing Biblia upod sa isa sang mga Saksi ni Jehova. Masinadyahon nga gin-agda ni Ba­bi­ta ang iya lola sa Cristianong miting. Sang nagtambong si Sur­ya Ma­ya, nakibot gid sia nga makita ang mga tawo nga may nanarisari sing sosyal nga mga klase nga malipayon nga nagapakig-upod sa isa kag isa nga wala sing bisan ano man nga pagpasulabi. Sa gilayon nangabay sia sing isa pagtuon sing Biblia sa puluy-an. Bisan pa ginpalayuan sia sang iya mga kaingod bangod sini, wala nagluya ang iya buot; ni ang iya limitado nga ikasarang sa pagbasa kag pagsulat nagpugong sa iya sa paghimo sing espirituwal nga pag-uswag.

Walo ka tuig ang nagligad, kag ang anom ka katapo sang iya pamilya, lakip ang iya bana kag tatlo ka kabataan, nangin mga Saksi ni Jehova. Si Sur­ya Ma­ya isa na karon ka bug-os tion nga ministro, isa ka regular nga payunir, nga malipayon nga nagabulig sa iban sa pagdiskarga sang ila mabug-at nga lulan sa matuod nga duog-palahuwayan nga si Jehova lamang ang makaaman.