Si Jehova Nagahatag sing Gahom sa Ginakapoy

“Nagahatag [si Jehova] sing gahom sa ginakapoy; kag sa isa nga wala sing dinamiko nga kusog ginapabugana niya sa bug-os nga kusog.”—ISAIAS 40:29.

1. Iilustrar ang gahom nga makita sa mga butang nga gintuga sang Dios.

SI Jehova walay latid sa gahom. Kag daw ano nga dinamiko nga kusog ang makita sa mga butang nga gintuga niya! Ang magamay nga atomo—nga nagahuman mismo sang tanan nga butang—tuman ka gamay amo nga ang isa ka tulo sang tubig may yara isa ka gatos ka bilyon ka bilyon nga atomo. * Ang tanan nga kabuhi sa aton globo nagasandig sa enerhiya nga tuga sang atomiko nga mga reaksion sa adlaw. Apang daw ano ka daku nga enerhiya gikan sa adlaw ang kinahanglanon agod masakdag ang kabuhi sa duta? Ang duta nagabaton sing tuman ka diutay lamang nga bahin sang tanan nga enerhiya nga ginapatubas sang adlaw. Apang, ang tuman ka diutay nga bahin sang enerhiya sang adlaw nga nagatupa sa duta daku gid kaayo sangsa kabug-usan nga enerhiya nga ginagamit sa mga industriya sang kalibutan.

2. Ano gid ang ginasiling sang Isaias 40:26 tuhoy sa gahom ni Jehova?

² Ginahunahuna man naton ang atomo ukon ginatalupangod naton ang malapad nga uniberso, nagadayaw kita sa makahalawhaw nga gahom ni Jehova. Indi katingalahan nga nagsiling sia: “Itangla ang inyo mga mata sa hitaas kag tan-awa. Sin-o ang nagtuga sining mga butang? Amo ang Isa nga  nagapaguwa sang ila kasuldadusan suno sa kadamuon sini, nga sila tanan ginatawag niya sa ngalan. Bangod bugana sa dinamiko nga kusog, makusog man sia sa gahom, wala sing isa sa ila nga nakulang”! (Isaias 40:26) Huo, si Jehova ‘makusog sa gahom,’ kag sia ang Tuburan sang “dinamiko nga kusog” nga gingamit sa pagpaluntad sang bug-os nga uniberso.

Kinahanglan ang Labaw sa Kinaandan nga Gahom

3, 4. (a) Ano ang pila ka butang nga mahimo magpakapoy sa aton? (b) Ano nga pamangkot ang kinahanglan binagbinagon?

³ Samtang ang Dios walay latid sa gahom, ang mga tawo ginakapoy. Diin man kita makadto, makita naton ang ginakapoy nga mga tawo. Nagabugtaw sila nga kapoy, nagakadto sa trabaho ukon sa eskwelahan nga kapoy, nagapauli nga kapoy, kag nagatulog nga wala lamang ginakapoy kundi ginalapyo man. Ang pila nagahandum nga makakadto kuntani sila sa iban nga lugar kag makapahuway sing maayo. Subong mga alagad ni Jehova, ginakapoy man kita, kay ang aton pagkabuhi nga may diosnon nga debosyon nagakinahanglan sing lakas nga pagpanikasog. (Marcos 6:30, 31; Lucas 13:24; 1 Timoteo 4:8) Kag madamo pa nga butang ang nagaubos sang aton kusog.

⁴ Walay sapayan nga mga Cristiano kita, indi kita luwas sa mga problema nga ginaagom sang mga tawo sa kabilugan. (Job 14:1) Ang balatian, pagbaliskad sang pinansial nga kahimtangan, ukon iban pa nga mga kabudlayan nga kinaandan sa kabuhi mahimo bangdan sang pagluya sang buot, lakip ang makapaluya nga epekto sini. Dugang sa sining mga kabudlayan amo ang mga pagtilaw nga pinasahi sa mga ginhingabot tungod sa pagkamatarong. (2 Timoteo 3:12; 1 Pedro 3:14) Bangod sang adlaw-adlaw nga mga pag-ipit gikan sa kalibutan kag sang pagpamatok sa aton pagbantala-sing-Ginharian nga hilikuton, ang iban sa aton mahimo nga kapuyon katama amo nga daw luyag naton maghinay sa pag-alagad kay Jehova. Isa pa, sa panikasog nga gub-on ang aton integridad sa Dios, si Satanas nga Yawa nagagamit sang tanan nga paagi nga sarang niya magamit. Paano, nian, kita makatigayon sing espiri­tuwal nga kusog nga kinahanglanon agod indi kita kapuyon kag mag-untat?

5. Ngaa kapin pa sa tawhanon nga kusog ang kinahanglan agod mahimo ang Cristianong ministeryo?

⁵ Para sa espirituwal nga kusog, dapat kita magsalig kay Jehova, ang labing gamhanan nga Manunuga. Ginpatalupangod ni apostol Pablo nga labaw pa sa kinaandan nga gahom sang di-himpit nga mga tawo ang ginakinahanglan sa Cristianong ministeryo. Sia nagsulat: “May yari kami sining bahandi sa human-sa-daga nga mga suludlan, agod nga ang gahom nga labaw sa kinaandan mangin iya sang Dios kag indi gikan sa amon kaugalingon.” (2 Corinto 4:7) Ginahimo sang hinaplas nga mga Cristiano ang “ministeryo sang pagpasag-uli” upod ang suporta sang ila mga kaupdanan nga may dutan-on nga paglaum. (2 Corinto 5:18; Juan 10:16; Bugna 7:9) Sanglit di-himpit kita nga mga tawo nga nagahimo sang hilikuton sang Dios walay sapayan sang paghingabot, indi naton ini mahimo sa aton lamang kaugalingon nga kusog. Ginabuligan kita ni Jehova paagi sa iya balaan nga espiritu, kag sa amo ginapadaku sang aton kaluyahon ang iya gahom. Kag daku gid nga lugpay para sa aton ang pasalig nga “si Jehova magaalay-ay sa mga matarong”!—Salmo 37:17.

‘Si Jehova Amo ang Aton Kusog’

6. Paano kita ginapasalig sang Kasulatan nga si Jehova amo ang aton Tuburan sang kusog?

⁶ Ang aton langitnon nga Amay ‘makusog sa gahom’ kag mahapos nga makapapagsik sa aton. Sa katunayan, ginasilingan kita: “Nagahatag [si Jehova] sing gahom sa ginakapoy; kag sa isa nga wala sing dinamiko nga kusog ginapabugana niya sa bug-os nga kusog. Ang mga bata nga lalaki kapuyon kag lapyuon, kag ang mga pamatan-on nga lalaki pat-od nga matumba, apang ang mga nagalaum kay Jehova maulian sing kusog. Magatimbuok sila nga may mga pakpak subong sang mga agila. Magadalagan sila kag indi magluya; magalakat sila kag indi paglapyuon.” (Isaias 40:29-31) Bangod sang dugang nga mga pag-ipit, kon kaisa mahimo kita magbatyag subong sang isa ka ginlapyo nga manugdalagan nga ang iya mga batiis daw indi na makaagwanta nga magpadayon pa sia sa pagdalagan. Apang malapit na lang ang inangan sa palumba para sa kabuhi, kag indi kita dapat magdulog. (2 Cronica 29:11) Ang aton Kaaway, ang Yawa, nagaluyong “subong sang isa ka nagangurob nga leon,” kag luyag niya nga magdulog kita. (1 Pedro 5:8) Dumdumon naton nga ‘si Jehova amo ang aton kusog kag ang aton taming,’ kag may bugana sia nga aman agod ‘hatagan ang nakapoy sing gahom.’—Salmo 28:7.

7, 8. Ano ang pamatuod nga ginpabakod ni Jehova sanday David, Habacuc, kag Pablo?

⁷ Ginhatagan ni Jehova si David sing kusog nga kinahanglanon agod magpadayon walay sapayan  sang daku nga mga balagbag. Busa, si David nagsulat nga may bug-os nga pagtuo kag pagsalig: “Paagi sa Dios makatigayon kita sing kusog, kag sia mismo magalinas sang aton mga kasumpong.” (Salmo 60:12) Ginpabaskog man ni Jehova si Habacuc agod matapos niya ang iya hilikuton subong manalagna. Ang Habacuc 3:19 nagasiling: “Si Jehova nga Soberano nga Ginuo amo ang akon kusog; kag himuon niya ang akon mga tiil subong sang iya sang mga babayi nga usa, kag palakton niya ako sa akon mataas nga mga duog.” Talalupangdon man ang halimbawa ni Pablo, nga nagsulat: “Sa tanan nga butang may kusog ako bangod sa [Dios] nga nagahatag sing gahom sa akon.”—Filipos 4:13.

⁸ Kaangay nanday David, Habacuc, kag Pablo, dapat kita magtuo sa ikasarang sang Dios sa pagpabakod sa aton kag sa iya gahom sa pagluwas sa aton. Nakahibalo nga ang Soberanong Ginuo nga si Jehova amo ang aton Tuburan sang “kusog,” binagbinagon naton karon ang pila ka paagi nga makakuha kita sing espirituwal nga kusog gikan sa bugana nga mga aman sang Dios.

Espirituwal nga mga Aman Agod Magpapagsik sa Aton

9. Ano nga papel ang ginatungdan sang Cristianong mga publikasyon sa pagsakdag sa aton?

⁹ Ang maukod nga pagtuon sa Kasulatan paagi sa bulig sang Cristianong mga publikasyon makapapagsik sa aton kag makasakdag sa aton. Ang salmista nag-amba: “Malipayon ang tawo nga . . . [ang iya] kalipay yara sa kasuguan ni Jehova, kag sa iya kasuguan nagabasa sia sing mahinay sa adlaw kag ­gab-i. Mangin kaangay sia sang kahoy nga natanom sa ubay sang mga kasulgan sang tubig, nga nagapamunga sa iya panag-on kag ang iya dahon indi malaya, kag ang bisan ano nga ginahimo niya magamadinalag-on.” (Salmo 1:1-3) Subong nga dapat kita magkaon agod huptan ang pisikal nga kusog, dapat kita magkaon sing espirituwal nga pagkaon nga gin-aman sang Dios paagi sa iya Pulong kag sa Cristianong mga publikasyon agod huptan ang aton espirituwal nga kusog. Busa, ang makahulugan nga pagtuon kag pagpamalandong kinahanglanon.

10. San-o kita mahimo makakita sing tion para sa pagtuon kag sa pagpamalandong?

¹⁰ Makalilipay gid nga pamalandungan ang “madalom nga mga butang sang Dios.” (1 Corinto 2:10) Apang san-o kita makakita sing tion sa pagpamalandong? Ang anak ni Abraham nga si Isaac “naglakat sa guwa agod magpamalandong sa latagon sa kasisidmon.” (Genesis 24:63-67) Si salmista David ‘nagpamalandong sa Dios sa mga pagbantay sa kagab-ihon.’ (Salmo 63:6) Mahimo naton tun-an ang Pulong sang Dios kag pamalandungan ini sa aga, sa kasisidmon, sa gab-i—sa pagkamatuod, sa bisan ano nga tion. Ini nga pagtuon kag pagpamalandong nagadul-ong sa isa pa ka makapabakod sa espirituwal nga mga aman ni Jehova—ang pangamuyo.

11. Ngaa dapat naton hatagan sing daku nga importansia ang tayuyon nga pagpangamuyo?

¹¹ Ang tayuyon nga pagpangamuyo sa Dios nagabulig sa aton agod magpagsik kita. Busa kabay nga “magpadayon [kita] sa pagpangamuyo.” (Roma 12:12) Kon kaisa, dapat kita espesipiko nga magpangabay sing kaalam kag kusog nga kinahanglanon agod mabatas ang isa ka pagtilaw. (Santiago 1:5-8) Magpasalamat man kita kag magdayaw sa Dios kon makita naton ang katumanan sang iya mga katuyuan ukon makita nga ginapabakod niya kita agod magpadayon sa pag-alagad sa iya. (Filipos 4:6, 7) Kon magpabilin kita nga suod kay Jehova sa pangamuyo, indi gid niya kita pagbayaan. “Yari karon!” amba ni David, “ang Dios amo ang akon kabulig.”—Salmo 54:4.

12. Ngaa dapat kita magpangamuyo sa Dios para iya balaan nga espiritu?

¹² Ang aton langitnon nga Amay nagapapagsik sa aton kag nagapabakod sa aton paagi sa iya balaan nga espiritu, ukon aktibo nga kusog. Si Pablo nagsulat: “Ginaluhod ko ang akon mga tuhod sa Amay . . . agod ihatag niya sa inyo suno sa kamanggaran sang iya himaya nga mapabaskog ang inyo pagkatawo sa sulod paagi sa gahom sang iya espiritu.” (Efeso 3:14-16) Dapat kita magpangamuyo sing balaan nga espiritu, nagasalig nga pakamaayuhon kita ni Jehova paagi sini. Si Jesus nangatarungan: Kon ang isa ka bata mangayo sing isda, hatagan bala sia sang isa ka mahigugmaon nga amay sing man-ug? Siempre, indi. Gani, naghinakop sia: “Kon kamo, bisan pa  [makasasala kag sa amo halos] malaut, makahibalo maghatag sing maayong mga dulot sa inyo mga anak, daw ano pa ka labaw nga ang Amay sa langit magahatag sing balaan nga espiritu sa mga nagapangayo sa iya!” (Lucas 11:11-13) Magpangamuyo kita nga may amo sini nga pagsalig kag dumdumon pirme nga ang matutom nga mga alagad sang Dios mahimo mangin “gamhanan” sa kusog paagi sa iya espiritu.

Ang Kongregasyon Isa ka Nagapabakod nga Bulig

13. Paano naton dapat tamdon ang Cristianong mga miting?

¹³ Ginapapagsik kita ni Jehova paagi sa mga miting sang Cristianong kongregasyon. Si Jesus nagsiling: “Kon diin may duha ukon tatlo nga nagatipon sa akon ngalan, yara ako sa tunga nila.” (Mateo 18:20) Sang ginsaad ina ni Jesus, ginbinagbinag niya sadto ang mga butang nga dapat talupangdon sang mga nagapanguna sa kongregasyon. (Mateo 18:15-19) Apang, ang iya mga pulong naaplikar may kaangtanan sa aton tanan nga miting, asambleya, kag kombension, nga ginabuksan kag ginatakpan sing pangamuyo sa iya ngalan. (Juan 14:14) Gani isa ka pribilehiyo nga matambungan ining Cristianong mga pagtilipon, diutay man ukon linibo ang nagatambong. Busa magpasalamat kita tungod sining mga okasyon nga gindesinyo agod pabakuron kita sa espirituwal kag pukawon kita sa gugma kag maayong mga buhat.—Hebreo 10:24, 25.

14. Ano nga benepisyo ang matigayon naton gikan sa mga panikasog sang Cristianong mga gulang?

¹⁴ Ang Cristianong mga gulang nagahatag sing espirituwal nga bulig kag pagpalig-on. (1 Pedro 5:2, 3) Ginbuligan anay kag ginpalig-on ni Pablo ang mga kongregasyon nga gin-alagaran niya, subong sang ginahimo karon sang nagalakbay nga mga manugtatap. Sa katunayan, nahidlaw gid sia nga makaupod ang mga masigkatumuluo agod may makapalig-on nga pagbayluhanay sing pagpalig-on. (Binuhatan 14:19-22; Roma 1:11, 12) Kabay nga pirme kita magpakita sing apresasyon sa aton lokal nga mga gulang kag sa iban pa nga Cristianong mga manugtatap, nga nagatungod sing daku nga bahin sa pagpabakod sa aton sa espirituwal.

15. Paano ang mga masigkatumuluo sa aton kongregasyon napamatud-an nga “nagapabakod nga bulig”?

¹⁵ Ang mga masigkatumuluo nga nagahuman sang aton kongregasyon mahimo mangin “nagapabakod nga bulig.” (Colosas 4:10, 11) Subong ‘matuod nga mga kaupdanan’ makabulig sila sa aton sa mga tion sang kasisit-an. (Hulubaton 17:17) Halimbawa, sang ang 220 ka alagad sang Dios ginpaguwa gikan sa kampo konsentrasyon sa Sachsen­hausen sa idalom sang pagbantay sang mga Nazi sang 1945, kinahanglan sila maglakat sing 200 kilometros. Naglakbay sila sing grupo, kag ginguyod sang mga mabakod ang mga pinakamaluya sakay sa pila ka magagmay nga karito. Ang resulta? Sa martsa padulong sa kamatayon nga nagkutol sang kabuhi sang kapin sa 10,000 ka bilanggo sang kampo konsentrasyon, wala ni isa sang mga Saksi ni Jehova ang napatay. Ini nga mga sugilanon nga mabasa sa mga publikasyon sang Watch ­Tower, pati na sa Year­book of Jeho­vah’s Wit­ness­es kag sa Jeho­vah’s Wit­nesses—Proclaim­ers of God’s King­dom, nagapamatuod nga ginahatagan sing gahom sang Dios ang iya katawhan, agod indi sila magdulog.—Galacia 6:9. *

 Ginapabakod Sang Aton Ministeryo sa Latagon

16. Paano ang tayuyon nga pagpakigbahin sa ministeryo nagapabakod sa aton sa espirituwal?

¹⁶ Ang tayuyon nga pagpakigbahin sa pagbantala-sing-Ginharian nga hilikuton nagapabakod sa aton sa espirituwal. Ini nga hilikuton nagabulig sa aton nga magkonsentrar sa Ginharian sang Dios kag dumdumon pirme ang walay katubtuban kag ang makalilipay nga mga paglaum sini. (Judas 20, 21) Ang Makasulatanhon nga mga saad nga ginasugid naton sa aton ministeryo nagahatag sa aton sing paglaum kag mahimo magpahulag sa aton nga mangin determinado kaangay ni manalagna Miqueas, nga nagsiling: “Kita . . . magalakat sa ngalan ni Jehova nga aton Dios tubtob sa tion nga walay latid, tubtob sa walay katubtuban.”—Miqueas 4:5.

17. Ano nga mga panugda ang ginahatag may kaangtanan sa mga pagtuon sing Biblia sa puluy-an?

¹⁷ Ang aton kaangtanan kay Jehova nagabakod samtang ginagamit naton sing labi pa ang mga Kasulatan sa pagtudlo sa iban. Halimbawa, kon nagadumala sing mga pagtuon sing Biblia sa puluy-an sa bulig sang libro nga Ang Ihibalo nga Nagadul-ong sa Kabuhi nga Walay Katapusan, maalamon nga basahon kag binagbinagon ang pila sang ginsambit nga mga kasulatan. Nagabulig ini sa estudyante kag nagapabakod sang aton espirituwal nga paghantop. Kon ang isa ka estudyante nabudlayan sa paghangop sa isa ka Biblikanhon nga ideya ukon ilustrasyon, ang kapin sa isa ka sesyon sang pagtuon mahimo gamiton sa pagtuptop sa isa ka kapitulo sa Ihibalo nga libro. Daku gid ang aton kalipay sa paghanda sing maayo kag sa pagpanikasog sing labi pa agod buligan ang iban nga magsuod sa Dios!

18. Iilustrar kon paano ginagamit sing epektibo ang Ihibalo nga libro.

¹⁸ Kada tuig, ang Ihibalo nga libro ginagamit sing epektibo agod buligan ang linibo nga mangin dedikado nga mga alagad ni Jehova, kag nagalakip ini sa madamo nga wala sing ihibalo sa Biblia. Halimbawa, sang bata pa sia, nabatian sang isa ka Hindu nga lalaki sa Sri Lanka ang isa ka Saksi nga nagahambal tuhoy sa Paraiso. Pagligad sang pila ka tuig ginpalapitan sia sang pamatan-on, kag wala madugay ginsugdan sang iya bana ang isa ka pagtuon sa Biblia upod sa pamatan-on. Sa katunayan, ining pamatan-on nagakari para sa pagtuon adlaw-adlaw, kag ang Ihibalo nga libro natapos sa malip-ot lamang nga tion. Nagsugod sia sa pagtambong sa tanan nga miting, nagbulag sa iya anay relihion, kag nangin manugbantala sang Ginharian. Sang ginbawtismuhan sia, nagadumala na sia sing isa ka pagtuon sa Biblia sa puluy-an upod sa iya amigo.

19. Samtang ginapangita naton una ang Ginharian, sa ano kita makapat-od?

¹⁹ Ang pagpangita una sang Ginharian nagahatag sa aton sing nagapabakod nga kalipay. (Mateo 6:33) Bisan pa nagaeksperiensia kita sing lainlain nga mga pagtilaw, nagapadayon kita sing malipayon kag makugi nga nagabantala sing maayong balita. (Tito 2:14) Nalab-ot sang madamo sa aton ang mga tulumuron para sa bug-os tion nga pagpayunir, kag ang iban nagaalagad diin kinahanglan ang madamo pa nga ebanghelisador. Ginasakdag man naton sing malipayon ang mga intereses sang Ginharian sa sini ukon sa iban pa nga mga paagi, nagasalig kita nga indi pagkalimtan ni Jehova ang aton hilikuton kag ang gugma nga ginapakita naton sa iya ngalan.—Hebreo 6:10-12.

Magpadayon sa Kusog ni Jehova

20. Paano naton mapakita nga nagadangop kita sing kusog kay Jehova?

²⁰ Ipakita naton sing kinabubut-on kag sing bug-os tagipusuon nga nagalaum kita kay Jehova kag nagadangop sing kusog sa iya. Mahimo naton ini paagi sa paghimulos naton sa espirituwal nga mga aman nga ginaaman niya paagi sa ‘matutom nga ulipon.’ (Mateo 24:45) Ang pribado kag kongregasyon nga pagtuon sa Pulong sang Dios sa bulig sang Cristianong mga publikasyon, tinagipusuon nga pangamuyo, espirituwal nga bulig sang mga gulang, maayo nga mga halimbawa sang matutom nga mga masigkatumuluo, kag tayuyon nga pagpakigbahin sa ministeryo nalakip sa mga aman nga nagapabakod sang aton kaangtanan kay Jehova kag nagahatag sa aton sing gahom agod magpadayon sa iya sagrado nga pag-alagad.

21. Paano ginpabutyag nanday apostol Pedro kag Pablo ang pagkinahanglan sing hatag-Dios nga kusog?

 ²¹ Walay sapayan sang aton tawhanon nga kaluyahon, si Jehova magapabakod sa aton sa paghimo sang iya kabubut-on kon magsalig kita sa iya para sa bulig. Nakahibalo sang pagkinahanglan sini nga bulig, si apostol Pedro nagsulat: “Kon ang bisan sin-o nagaalagad, mag-alagad sia nga nagasalig sa kusog nga ginaaman sang Dios.” (1 Pedro 4:11) Kag ginpakita ni Pablo ang pagsalig niya sa hatag-Dios nga kabakod sang nagsiling sia: “Nagakalipay ako sa mga kaluyahon, sa mga insulto, sa mga kaiwat, sa mga paghingabot kag sa mga kabudlayan, tungod kay Cristo. Kay kon maluya ako, nian gamhanan ako.” (2 Corinto 12:10) Kabay nga ipakita naton ang amo man nga pagsalig kag maghatag sing himaya sa Soberanong Ginuo nga si Jehova, nga nagahatag sing gahom sa ginakapoy.—Isaias 12:2.

[Mga nota]

Paano Mo Sabton?

• Ngaa ang katawhan ni Jehova nagakinahanglan sing labaw sa kinaandan nga gahom?

• Ano ang Makasulatanhon nga pamatuod nga ginahatagan sing gahom sang Dios ang iya mga alagad?

• Ano ang pila ka espirituwal nga mga aman nga ginaaman ni Jehova agod pabakuron kita?

• Paano naton mapakita nga nagadangop kita sing kusog sa Dios?

[Mga Pamangkot sa Pagtinuon]

[Retrato sa pahina 12]

Ang aton kaangtanan kay Jehova ginapabakod samtang ginagamit naton ang Biblia sa pagtudlo sa iban