Ginpahulag Agod Mag-alagad

ANO ang nagpahulag sa 24 ka nagahingurusgan nga mag-asawa nga biyaan ang ila mga pamilya, mga abyan, kag naandan nga palibot agod magmisyonero sa mga pungsod sa luwas? Ngaa nalipay sila sa pagkadto sa mga duog subong sang Papua New ­Guinea kag Tai­wan, subong man sa mga pungsod sa Aprika kag Latin Amerika? Bangod bala sang kaluyag sa pagpasimpalad? Indi. Sa baylo, ginpahulag sila sang matuod nga gugma sa Dios kag sa isigkatawo.—Mateo 22:37-39.

Sin-o ining mga tawo? Mga naggradwar sila sa ika-109 nga klase sang Watch­tow­er Bi­ble ­School of ­Gilead. Sang Sabado, Septiembre 9, 2000, ang kabug-usan nga 5,198 nagtipon sa Watch­tow­er Ed­u­ca­tion­al Cen­ter—nga nahamtang sa Patterson, New York—kag sa mga duog nga may sat­el­lite sa pagpamati sa mahigugmaon nga laygay nga makabulig sa mga gradwado agod mangin madinalag-on nga mga misyonero.

Ang tsirman sang programa amo si Stephen Lett, isa ka katapo sang Teach­ing Com­mit­tee sang Nagadumala nga Hubon sang mga Saksi ni Jehova. Ginpasad niya ang iya nagabukas nga pamulongpulong sa Mateo 5:13, “Kamo ang asin sang duta.” Ginpaathag ni Utod Lett nga ang ginpamulong ni Jesus naaplikar gid sa manuggradwar nga mga estudyante. Halimbawa, ang asin may ikasarang sa pagpanamit sa mga pagkaon. Sa amo, paagi sa ila epektibo man nga pagbantala nga hilikuton, ang mga misyonero kaangay sa mga asin sa malaragwayon nga paagi.

Nagapaalam nga Pagpalig-on

Ginpakilala dayon ni Utod Lett ang pila sang madugay na nga mga alagad ni Jehova nga naghatag sing malip-ot apang maunod nga mga pamulongpulong sa Kasulatan. Ang una amo si John Wischuk, nga nagaalagad sa Writ­ing De­part­ment. Ang iya tema, “Ang Pinakalip-ot nga Salmo Nagapasanyog Sang Espiritu sa Pagmisyonero,” napasad sa Salmo 117. Sa karon, may bug-os kalibutan nga pagkinahanglan agod magpanaksi sa “mga pungsod” kag “mga katilingban” tuhoy kay Jehova kag sa iya Ginharian. Ginpalig-on ang mga estudyante nga tumanon ang ginsiling sang Salmo 117 paagi sa paglaygay sa iban nga ‘Dayawon si Jah.’

Masunod nga ginpakilala sang tsirman si Guy ­Pierce sang Nagadumala nga Hubon. Namulongpulong sia sa tema nga “Mangin Mapasibusibuon, Apang Malig-on.” Mabakod ang Pulong sang Dios. Si Jehova nga Dios ginatawag nga Igang sa Deuteronomio 32:4, apang ang iya Pulong nagapahanugot sang pagkamapasibusibuon bangod ginsulat ini para sa tanan nga pamulong kag kultura—huo, para sa tanan nga tawo. Ginlaygayan ang mga estudyante nga ibantala ang Pulong sang Dios, nagatugot sa mensahe sini nga magtandog sang tagipusuon kag konsiensia sang mga tawo. (2 Corinto 4:2) “Mangin malig-on sa nagakaigo nga mga prinsipio, apang mangin mapasibusibuon. Indi pagpakanubua ang mga tawo sa imo teritoryo bangod tuhay ang ila kultura,” laygay ni Utod ­Pierce.

Si Karl Adams, isa sang mga instruktor sa ­Gilead, nga nakaalagad na sa ulong talatapan sing halos 53 ka tuig, nagpamulongpulong sa nagapukaw-sing-hunahuna nga tema nga “Diin Kamo Makadto Halin Diri?” Matuod, ang 24 ka mag-asawa nakabaton sang ila mga asaynment subong mga misyonero sa 20 ka nagkalainlain nga pungsod sa bug-os nga duta, apang  ang pamangkot ginpautwas, Sa tion nga didto na kamo kag nakita na ninyo ang inyo bag-o nga pungsod, nian ano ang inyo himuon? Nagakabuhi kita sa isa ka kalibutan nga matinalak-on sing panimuot. Luyag sang mga tawo nga magkadto sa bag-o nga mga duog kag maghimo sing bag-o nga mga butang sa panikasog nga pahamut-an ang ila mga kaugalingon. Sa pihak nga bahin, ang mga estudyante nakabaton sing isa ka asaynment gikan kay Jehova padulong sa lugar kon diin luyag niya nga didto sila agod atipanon sing di-makagod ang iya mga “karnero.” Indi dapat sila mangin kaangay sadtong sa dumaan nga Israel nga bangod sang kakagod, nawasi nila ang kahigayunan nga gamiton ni Jehova agod pakamaayuhon ang tanan nga katawhan. Sa baylo, dapat nila ilugon si Jesucristo, nga pirme naghimo sang kabubut-on sang iya Amay sing di-makagod kag matinumanon sa tagsa ka kahimtangan nga iya naatubang.—Juan 8:29; 10:16.

“Pakabahandia ang Madalom nga mga Butang Sang Dios” amo ang tema ni Wal­lace ­Liverance, ang rehistrador sang Eskwelahan sang ­Gilead. Sing sulitsulit, ginapatuhuyan sang Kasulatan ang Pulong sang Dios subong mga manggad, malahalon nga mga hiyas, malahalon nga mga metal, kag mga butang nga ginapakahamili kag ginapangita. Ginapakita sang Hulubaton 2:1-5 nga agod masapwan ang “ihibalo sang Dios,” dapat naton pangitaon ini subong sang “natago nga mga bahandi.” Ginpalig-on sang humalambal ang mga estudyante nga  magpadayon sa pagkutkot sang madalom nga mga butang sang Dios samtang nagaalagad sila sa ila bag-o nga mga asaynment. Si Utod ­Liverance nangatarungan: “Praktikal ini, kay nagapabakod ini sing pagtuo kag sing pagsalig kay Jehova kag magapalig-on sang inyo determinasyon nga magpabilin sa inyo asaynment. Magabulig ini sa inyo nga maghambal upod ang pagsalig kag mangin isa ka mas epektibo nga manunudlo samtang ginapaathag ninyo ang mga katuyuan sang Dios sa iban.”

Paagi sa paggamit sang isa ka hulot-klasehan subong halimbawa, ang isa pa ka instruktor sang Eskwelahan sang ­Gilead nagrepaso kon paano ginpakamaayo ni Jehova ang mga hilikuton sa latagon sang mga estudyante sang nagligad nga lima ka bulan. Si Law­rence ­Bowen nagpatalupangod sang mga pinamulong ni apostol Pablo sa Binuhatan 20:20 tuhoy sa iya dayag nga pagministeryo sa Efeso, nga nagapadaku nga si Pablo naghimulos sang tanan nga kahigayunan agod makapanaksi. Ang mga eksperiensia sang mga estudyante nagapakita sina nga, kaangay ni apostol Pablo, yadtong napahulag sang gugma para sa Dios kag sa isigkatawo sa aton tion wala nagaisol sa paghambal sing kamatuoran kag sa pagtugot nga ang Pulong sang Dios magpanghikot sa iban. Nagaresulta ini sa bugana nga mga pagpakamaayo ni Jehova.

Ang mga Eksperiensiado Nagahambal

Sa tion sang ila pagtuon, ang mga estudyante sang ­Gilead nakabenepisyo ilabi na sa pagpakig-upod sa mga katapo sang Komite Sang Sanga gikan sa 23 ka kadutaan, nga didto man sa Patterson Ed­u­ca­tion­al Center para sa pinasahi nga paghanas. Si ­Leon ­Weaver kag si Merton Camp­bell sang Ser­vice De­part­ment nag-interbyu sa nagkalainlain nga mga katapo sang Komite sang Sanga, diin ang pila sa ila nakagradwar mismo sa ­Gilead. Makapalig-on gid para sa mga estudyante kag sa ila mga pamilya kag mga abyan nga mabatian ining eksperiensiado nga mga misyonero.

Ang laygay sa manuggradwar nga mga estudyante agod buligan sila nga makapasibu sa ila mga asaynment sa mga pungsod sa luwas naglakip sang mga komento subong sini: “Mangin positibo. Kon makaeksperiensia ka sing pila ka butang nga bag-o para sa imo ukon indi mo mahangpan, indi mag-untat. Magsandig kay Jehova”; “tun-i nga magmalipayon sa kon ano ang matigayon, kag magsalig nga si Jehova magaaman sa imo sang mga kinahanglanon sa kabuhi.” Ang iban nga mga komento nagapadaku sang pagbulig sa mga estudyante nga mahuptan ang kalipay sa ila asaynment. Ang pila sang mga ekspresyon amo: “Indi pag-ipaanggid ang imo asaynment sa duog nga imo ginhalinan”; “tun-i ang lokal nga lenguahe kag ihambal ini sing nagakaigo agod nga makapakig-angot ka sa mga tawo”; “tun-i ang mga kustombre kag kultura sang mga tawo, kay makabulig ini sa imo nga magpabilin sa imo asaynment.” Ini nga mga komento nagpalig-on gid sa bag-o nga mga misyonero.

Pagkatapos sang mga interbyu, si David ­Splane, isa anay ka misyonero kag gradwado sang ika-42 nga klase sang ­Gilead nga nagaalagad karon subong katapo sang Nagadumala nga Hubon sang mga Saksi ni Jehova, nagpaathag sang panguna nga pamulongpulong sa makapulukaw-sing-igtalupangod nga tema “Mga Estudyante ukon mga Gradwado—Diin?” Ginpamangkot niya ang manuggradwar nga klase: “Paano ninyo tamdon ang inyo kaugalingon sa pagkadto ninyo sa inyo asaynment subong misyonero? Subong bala sang gradwado nga nakahibalo sang tanan tuhoy sa misyonero nga hilikuton ukon subong bala sang estudyante nga madamo pa sing dapat mahibaluan?” Ginpakita ni Utod ­Splane nga ang maalam nga naggradwar nagatamod sang iya kaugalingon subong isa ka estudyante. Dapat tamdon sang mga misyonero nga ang tanan nga ila masugilanon sa ila asaynment sa pagmisyonero mahimo nga may matudlo sa ila. (Filipos 2:3) Ginpalig-on ang mga estudyante nga magkooperar sing suod sa ila mga masigkamisyonero, sa sanga talatapan, kag sa lokal nga kongregasyon. “Nakapasar kamo sa katapusan ninyo nga eksaminasyon, apang ang inyo pagka-estudyante wala matapos. Ipaathag sa tanan nga yadto kamo didto agod magtuon,” laygay ni Utod ­Splane.

Pagkatapos sini nga pamulongpulong, nabaton sang mga estudyante ang ila mga diploma, kag ang ila mga asaynment ginpahibalo sa tumalambong. Makatalandog yadto nga tion para sa mga estudyante sang ang tiglawas sang klase nagbasa pagkatapos sini sing isa ka resolusyon nga nagahinambit sang determinasyon sang mga naggradwar nga pahulagon sila sang ila mga natun-an sa Pulong sang Dios nga maghimo sing mas dalagku nga mga buhat sang balaan nga pag-alagad.

Ang tanan nga tumalambong pat-od nga nag-ugyon nga napalig-on ang mga naggradwar sang mga laygay nga ila nabaton nga ipakita ang gugma sa Dios kag sa ila isigkatawo. Naghimo man ini sa ila nga mangin determinado pa nga buligan ang mga tawo sa espirituwal sa ila asaynment subong misyonero.

[Kahon sa pahina 25]

ESTADISTIKA SANG KLASE

Kadamuon sang pungsod nga gintiglawas: 10

Kadamuon sang pungsod nga ginpadalhan: 20

Kadamuon sang mga ­estudyante: 48

Promedyo nga edad: 33.7

Promedyo nga tinuig sa ­kamatuoran: 16.2

Promedyo nga tinuig sa bug-os tion nga ­ministeryo: 12.5

[Retrato sa pahina 26]

Ika-109 nga Naggradwar nga Klase Sang Watchtower Bible School of Gilead

Sa listahan sa ubos, ang mga raya nanumeruhan halin sa atubangan pa likod, kag ang mga ngalan nalista halin sa wala pa tuo sa tagsa ka raya.

(1) Collins, E.; Miles, L.; Alvarado, A.; Lake, J. (2) Van Dusen, L.; Biharie, A.; Heikkinen, H.; Koós, S.; Smith, H. (3) Ashford, J.; Ashford, C.; Boor, C.; Richard, L.; Wilburn, D.; Lake, J. (4) Chichii, K.; Chichii, H.; Ramirez, M.; Baumann, D.; Becker, G.; Biharie, S.; Ramirez, A. (5) Van Dusen, W.; Lemâtre, H.; Pisko, J.; Cutts, L.; Russell, H.; Johnson, R. (6) Becker, F.; Baumann, D.; Johnson, K.; Pifer, Á.; Madsen, C.; Lemâtre, J.; Heikkinen, P. (7) Smith, R.; Russell, J.; Collins, A.; Pisko, D.; Wilburn, R.; Koós, G. (8) Cutts, B.; Boor, J.; Madsen, N.; Pifer, S.; Richard, E.; Miles, B.; Alvarado, R.