Magtindog sing Bug-os nga May Malig-on nga Pagtuo

“Pirme [sia] nagapanikasog tungod sa inyo sa iya mga pangamuyo, agod nga sa katapusan makatindog kamo sing bug-os kag may malig-on nga pagtuo sa tanan nga kabubut-on sang Dios.”—COLOSAS 4:12.

1, 2. (a) Ano ang natalupangdan sang mga tagaguwa tuhoy sa mga Cristiano sang una? (b) Paano ang tulun-an sang Colosas nagapakita sing mahigugmaon nga interes?

ANG mga sumulunod ni Jesus interesado gid sa mga masigkasumilimba. Si Tertullian (manunulat sang ikaduha kag ikatlo nga siglo C.E.) nagsugid tuhoy sa kaayo nga ginpakita nila sa mga ilo, imol, kag tigulang. Yadtong mga pamatuod sang gugma nga nagapanghikot nagpadayaw gid sa mga di-tumuluo amo nga ang iban nagsiling tuhoy sa mga Cristiano, ‘Tan-awa kon paano sila nagahigugmaanay.’

² Ginapakita sang tulun-an sang Colosas ining mahigugmaon nga interes ni apostol Pablo kag sang iya kaupod nga si Epafras sa mga kauturan sa Colosas. Si Pablo nagsulat sa ila: Si Epafras “pirme nagapanikasog tungod sa inyo sa iya mga pangamuyo, agod nga sa katapusan makatindog kamo sing  bug-os kag may malig-on nga pagtuo sa tanan nga kabubut-on sang Dios.” Sa 2001, ang tuigan nga teksto sang mga Saksi ni Jehova amo ining mga pulong sa Colosas 4:12: ‘Magtindog sing bug-os kag magtuo sing malig-on sa tanan nga kabubut-on sang Dios.’

3. Tungod sa anong duha ka butang nagpangamuyo si Epafras?

³ Makita ninyo nga ang mga pangamuyo ni Epafras tungod sa iya mga hinigugma may duha ka bahin: (1) nga sila ‘sa katapusan magtindog sing bug-os’ kag (2) nga sila magtindog nga “may malig-on nga pagtuo sa tanan nga kabubut-on sang Dios.” Ining mga impormasyon ginlakip sa Kasulatan para sa aton kaayuhan. Gani pamangkuta ang imo kaugalingon, ‘Ano gid ang dapat ko himuon agod makatindog sing bug-os kag may malig-on nga pagtuo sa tanan nga kabubut-on sang Dios? Kag samtang ginahimo ko ini, ano ang mangin resulta?’ Tan-awon naton.

Manikasog sa ‘Pagtindog Sing Bug-os’

4. Sa anong kahulugan nga ang mga taga-Colosas kinahanglan mangin “bug-os”?

⁴ Handum gid ni Epafras nga ang iya mga kauturan sa espirituwal sa Colosas ‘sa katapusan magtindog sing bug-os.’ Ang termino nga gingamit ni Pablo, nga ginbadbad diri nga “bug-os,” mahimo nagakahulugan sing himpit, husto-ang-kagulangon, ukon hamtong. (Mateo 19:21; Hebreo 5:14; Santiago 1:4, 25) Ayhan nahibaluan ninyo nga ang pagkabawtismado nga Saksi ni Jehova sang isa wala nagakahulugan nga isa na sia ka Cristiano nga husto-ang-kagulangon. Nagsulat si Pablo sa mga taga-Efeso, nga nagapuyo sa katundan sang Colosas, nga ang mga manugbantay kag mga manunudlo magtinguha nga buligan ‘ang tanan nga makadangat sa paghiusa sa pagtuo kag sa sibu nga ihibalo tuhoy sa Anak sang Dios, sa isa ka tawo nga husto-ang-kagulangon, sa talaksan sang kataason sang kabug-usan ni Cristo.’ Sa iban nga bahin ginpalig-on ni Pablo ang mga Cristiano nga mangin “husto-ang-kagulangon sa mga ikasarang sang paghangop.”—Efeso 4:8-13; 1 Corinto 14:20.

5. Paano naton mahimo nga isa ka importante nga tulumuron ang pagkabug-os?

⁵ Kon ang pila anay sa Colosas indi pa husto-ang-kagulangon, ukon hamtong sa espirituwal, ina ang kinahanglan nga nangin tulumuron nila. Indi bala dapat mangin subong man sini sa karon? Ginbawtismuhan man kita dinekada na ang nagligad ukon sining karon lang, makita bala naton nga maathag nga nag-uswag kita sa aton ikasarang sa pagpangatarungan kag mga pagtamod? Ginabinagbinag bala naton anay ang mga prinsipio sa Biblia antes kita maghimo sing mga desisyon? May mas daku pa bala nga papel sa aton kabuhi ang mga butang may kaangtanan sa Dios kag mga interes sang kongregasyon, sa baylo nga ginapasapayanan lamang? Indi naton mailustrar diri ang tanan nga paagi nga mahimo naton mapakita ini nga pagtubo padulong sa pagkabug-os, apang binagbinaga ang duha ka halimbawa.

6. Anong isa ka bahin nga ang isa mahimo mag-uswag sa pagkahimpit, subong ni Jehova?

⁶ Una nga halimbawa: Pananglitan nagdaku kita sa kahimtangan nga kilala sa pag-ihig-ihig ukon kaugot sa mga tawo nga tuhay sing rasa, nasyonalidad, ukon rehiyon. Nahibaluan na naton nga ang  Dios wala sing pinasulabi kag dapat nga amo man kita. (Binuhatan 10:14, 15, 34, 35) Sa aton kongregasyon ukon sirkito, may mga indibiduwal nga naggikan sa sinang tuhay nga kahimtangan, gani yara kita sa palibot nila. Apang, sa ano nga kasangkaron nga nagahupot kita sing pila ka negatibo nga balatyagon ukon pangduhaduha sa mga tawo nga may amo sina nga ginhalinan? May maawayon bala kita nga panimuot nga maabtik sa paghunahuna sing negatibo nga butang kon ang isa sa sinang ginhalinan nakasayop ukon nakasaklaw sa aton? Pamangkuta ang imo kaugalingon, ‘Kinahanglan ko bala ang dugang pa nga pag-uswag agod matigayon ang wala sing pinasulabi nga pagtamod sang Dios?’

7. Ang mangin bug-os subong Cristiano mahimo nagadalahig sang pagtigayon sing anong pagtamod sa iban?

⁷ Ikaduha nga halimbawa: Suno sa Filipos 2:3, ‘indi kita dapat maghimo sing bisan ano bangod sang pagbinaisay ukon bangod sang pagkamaiyaiyahon, kundi sing mapainubuson nga ginakabig ang iban nga labaw.’ Paano kita nagauswag may kaangtanan sini? Ang tagsa ka tawo may mga kaluyahon kag mga kabakod. Kon sang nagligad madali naton matalupangdan ang mga kaluyahon sang iban, nag-uswag bala kita, nga wala na nagapaabot sa ila nga mangin halos “himpit”? (Santiago 3:2) Karon, kapin pa sangsa nagligad, makita bala naton—ginapangita pa gani—ang mga paagi nga ang iban labaw? ‘Dapat ko batunon nga ining utod nga babayi mas mapailubon sangsa akon.’ ‘Nagpakita sia sing mas malig-on nga pagtuo.’ ‘Ang matuod, mas maayo sia nga manunudlo sangsa akon.’ ‘Labaw sia sa pagpugong sang iya kaakig.’ Ayhan ang pila ka taga-Colosas kinahanglan anay nga mag-uswag may kaangtanan sini. Kita man bala?

8, 9. (a) Sa anong kahulugan nga nangamuyo si Epafras tungod sa mga taga-Colosas nga ‘magtindog’ sing bug-os? (b) Ano ang ginapahangop sang ‘pagtindog sing bug-os’ may kaangtanan sa palaabuton?

⁸ Nangamuyo si Epafras nga ang mga taga-Colosas ‘magtindog sing bug-os.’ Maathag nga nagpangamuyo si Epafras sa Dios nga sa kasangkaron nga ang mga taga-Colosas bug-os, hamtong, husto-ang-kagulangon nga mga Cristiano, ‘magatindog’ sila, ukon magpabilin nga hamtong.

⁹ Indi kita mahimo maghaumhaum nga ang tagsatagsa nga nangin Cristiano, bisan ang isa ka hamtong, magapadayon nga subong sini. Si Jesus nagsiling nga ang isa ka anghel nga anak sang Dios ‘wala magtindog nga malig-on sa kamatuoran.’ (Juan 8:44) Kag ginpahanumdom ni Pablo ang mga taga-Corinto tuhoy sa pila sang nag-alagad anay kay Jehova sa pila ka tion kag dayon nag-untat. Ginpaandaman niya ang hinaplas sang espiritu nga mga kauturan: “Ang nagahunahuna nga nagatindog sia mag-andam nga indi sia mapukan.” (1 Corinto 10:12) Nagpabaskog ini sa pangamuyo nga ang mga taga-Colosas ‘sa katapusan magtindog sing bug-os.’ Sa tion nga sila nangin bug-os, husto-ang-kagulangon, kinahanglan magpadayon sila, nga wala nagaisol, nagakalapyo, ukon nagakaanod palayo. (Hebreo 2:1; 3:12; 6:6; 10:39; 12:25) Sa amo mangin “bug-os” sila sa adlaw sang pag-usisa kag katapusan nga pagbaton sa ila.—2 Corinto 5:10; 1 Pedro 2:12.

10, 11. (a) Ano nga sulundan tuhoy sa pangamuyo ang ginpahamtang ni Epafras sa aton? (b) May kaangtanan sa ginhimo ni Epafras, ano nga pamat-od ang luyag mo himuon?

¹⁰ Ginbinagbinag na naton ang importansia sang pagpangamuyo tungod sa iban paagi sa pagsambit sang ila ngalan, subong espesipiko sa pagpangabay nga buligan sila, lipayon sila, pakamaayuhon sila, kag hatagan sila sing balaan nga espiritu ni Jehova. Ang mga pangamuyo ni Epafras tungod sa mga taga-Colosas amo sina nga sahi. Kag mahimo kita—sa katunayan dapat kita—makakita sa amo nga mga pulong sing isa ka mapuslanon nga panugda tuhoy sa kon ano ang ipangamuyo naton kay Jehova nahanungod sa aton kaugalingon. Wala duhaduha, dapat kita mangabay sing bulig ni Jehova sa tuyo nga kita sing indibiduwal ‘sa katapusan magatindog sing bug-os.’ Ikaw bala?

¹¹ Ngaa indi mo pagsambiton ang imo kahimtangan sa pangamuyo? Ipakighambal sa Dios ang kasangkaron nga nag-uswag ka padulong sa ‘pagkabug-os,’ husto-ang-kagulangon, pagkahamtong. Makitluoy sa iya nga buligan ka nga makilala ang mga bahin diin kinahanglan mo nga magtubo pa sa espirituwal. (Salmo 17:3; 139:23, 24) Wala duhaduha nga may yara ka sing pila sining mga bahin. Nian, sa baylo nga maluyahan sing buot bangod sini, hanuot nga mangayo sa Dios sing maathag, sing espesipiko nga bulig agod mag-uswag. Himua ini indi lamang sing makaisa. Sa katunayan, ngaa indi mamat-od nga sa sining masunod nga semana magapangamuyo ka sing malawiglawig agod nga ‘sa katapusan magatindog ka sing bug-os.’ Kag magplano nga himuon ini sing dugang pa samtang ginabinagbinag mo ang tuigan nga teksto. Sa imo mga pangamuyo, hatagi sing igtalupangod ang imo mga huyog nga mahimo mag-isol, malapyo, ukon maanod palayo gikan sa pag-alagad sa Dios kag kon paano mo ini malikawan.—Efeso 6:11, 13, 14, 18.

 Mangamuyo Sing Malig-on nga Pagtuo

12. Ngaa ilabi na nga kinahanglan sang mga taga-Colosas ang “malig-on nga pagtuo”?

¹² Nangamuyo man si Epafras sing isa pa ka butang nga importante agod ang mga taga-Colosas masapwan nga sa katapusan nagatindog nga kalahamut-an sa Dios. Importante man ini sa aton. Ano ini? Nangamuyo sia nga magtindog sila nga “may malig-on nga pagtuo sa tanan nga kabubut-on sang Dios.” Napalibutan sila sang erehes kag makapalain nga mga pilosopiya, nga ang pila sini may malalangon nga dagway sang matuod nga pagsimba. Halimbawa, gin-ipit sila nga saulugon ang pinasahi nga mga adlaw upod ang pagpuasa ukon pagpiesta, subong kinahanglanon anay sa pagsimba sang mga Judiyo. Ang butig nga mga manunudlo naghatag sing pinasahi nga igtalupangod sa mga anghel, yadtong gamhanan nga mga espiritu nga nagdul-ong sang Kasuguan kay Moises. Handurawa lamang ang mapaidalom sa mga pag-ipit kaangay sina! May madamong makalilibog nga nagasumpakilay nga mga ideya.—Galacia 3:19; Colosas 2:8, 16-18.

13. Ang pagkilala sa anong butang ang makabulig sa mga taga-Colosas, kag paano ini makabulig sa aton?

¹³ Si Pablo nangatarungan paagi sa pagpadaku sang papel ni Jesucristo. “Sa bagay nga ginbaton ninyo si Cristo Jesus nga Ginuo, magpadayon kamo sa paglakat nga nahiusa sa iya, nga nakapanggamot kag natukod sa iya kag napalig-on sa pagtuo, subong sang gintudlo sa inyo.” Huo, kinahanglan (sang mga taga-Colosas kag naton) ang bug-os nga pagtuo tuhoy sa papel ni Cristo sa katuyuan sang Dios kag sa aton kabuhi. Si Pablo nagpaathag: “Sa iya nagapuyo sing lawasnon ang tanan nga kabug-usan sang diosnon nga kinaiya. Kag gani nagapanag-iya kamo sing kabug-usan paagi sa iya, nga amo ang ulo sang tanan nga panguluhan kag awtoridad.”—Colosas 2:6-10.

14. Ngaa ang paglaum isa ka matuod nga butang para sa mga taga-Colosas?

¹⁴ Ang mga taga-Colosas hinaplas-sing-espiritu nga mga Cristiano. May pinasahi sila nga paglaum, kabuhi sa langit, kag may rason gid sila nga huptan nga masanag ina nga paglaum. (Colosas 1:5) “Kabubut-on sang Dios” nga may malig-on sila nga pagtuo tuhoy sa kapat-uran sang ila paglaum. Dapat bala duhaduhaan sang bisan sin-o sa ila ina nga paglaum? Indi gid! Dapat bala mangin tuhay ini karon sa tanan nga may hatag-Dios nga paglaum nga kabuhi sa isa ka paraiso sa duta? Indi, sa pagkamatuod! Ining makatarunganon nga paglaum maathag nga bahin sang “kabubut-on sang Dios.” Binagbinaga karon ini nga pamangkot: Kon nagapanikasog ka nga mangin isa sang “dakung kadam-an” nga makalampuwas sa “dakung kapipit-an” daw ano ka matuod ang imo paglaum? (Bugna 7:9, 14) Bahin bala ini sang imo “malig-on nga pagtuo sa tanan nga kabubut-on sang Dios”?

15. Anong alagisod nga mga punto ang ginbalay ni Pablo nga nagalakip sang paglaum?

¹⁵ Sa “paglaum” indi naton buot silingon ang isa ka di-maathag nga paghandum ukon pagdalamguhanon. Makita naton ini gikan sa alagisod nga mga punto nga ginpresentar sing una ni Pablo sa mga taga-Roma. Sa sinang alagisod nga mga punto, ang tagsa ka butang nga ginsambit naangot ukon nagadul-ong sa masunod. Talupangda kon diin ginbutang ni Pablo ang “paglaum” sa iya pangatarungan: “Magkasadya kita samtang sa mga kapipit-an, sanglit nahibaluan naton nga ang kapipit-an nagapatubas sing pagbatas; ang pagbatas naman, sing kalahamut-an nga kahimtangan; ang kalahamut-an nga kahimtangan naman, sing paglaum, kag ang paglaum wala nagadul-ong sa kabang-awan; bangod ang gugma sang Dios ginpasagahay sa aton tagipusuon paagi sa balaan nga espiritu.”—Roma 5:3-5.

16. Samtang natun-an mo ang kamatuoran sa Biblia, ano nga paglaum ang natigayon mo?

¹⁶ Sang una nga ginpaambit sang mga Saksi ni Jehova ang mensahe sang Biblia sa imo, mahimo naganyat ka sa pila ka kamatuoran, subong sang kahimtangan sang mga patay ukon sang pagkabanhaw. Para sa madamo, ang pangunang bag-o nga nahisayran amo ang pasad-sa-Biblia nga posibilidad sang kabuhi sa isa ka paraiso sa duta. Hinumduma sang una mo nabatian ina nga panudlo. Daw ano ka makalilipay nga paglaum—ang balatian kag pagtigulang wala na, mahimo ka magkabuhi agod magkalipay sa mga bunga sang imo pinangabudlayan, kag may paghidait upod sa mga sapat! (Manugwali 9:5, 10; Isaias 65:17-25; Juan 5:28, 29; Bugna 21:3, 4) Naagom mo ang isa ka makalilipay nga paglaum!

17, 18. (a) Paano ang alagisod nga mga punto nga ginpresentar ni Pablo sa mga taga-Roma nagdul-ong sa paglaum? (b) Ano nga sahi sang paglaum ang buot silingon sa Roma 5:4, 5, kag may yara ka bala sini nga paglaum?

¹⁷ Sang ulihi, mahimo nag-atubang ka sing pila ka pagpamatok ukon paghingabot. (Mateo 10:34-39; 24:9) Bisan sining karon lang, ang mga puluy-an sang mga Saksi sa nagkalainlain nga pungsod ginkawatan ukon napilitan sila nga mangin mga ­refugee. Ang iban ginsakit, ginkompiskar ang ila mga literatura sa Biblia, ukon nangin sentro sang butig nga mga report sa media. Ano man nga porma sang paghingabot ang mahimo nga gin-atubang mo, subong sang ginsiling sang Roma 5:3, mahimo ka magkasadya sa kapipit-an, kag may maayo ini nga resulta.  Subong sang ginsulat pa gani ni Pablo, ang kapipit-an nagpatubas sa imo sing pagbatas. Pagkatapos ang pagbatas nagdul-ong sa kalahamut-an nga kahimtangan. Nakahibalo ka nga ginahimo mo ang husto, ginahimo ang kabubut-on sang Dios, gani nakapat-od ka nga nahamut-an ka niya. Sa mga pulong ni Pablo, nabatyagan mo nga yara ka sa “kalahamut-an nga kahimtangan.” Sa pagpadayon, si Pablo nagsulat nga “ang kalahamut-an nga kahimtangan naman, [nagapatubas] sing paglaum.” Daw tumalagsahon ini. Ngaa ginlista ni Pablo ang “paglaum” sa ulihi nayon sang alagisod nga mga punto? Wala ka bala sing paglaum antes pa sini, sang una mo nga nabatian ang maayong balita?

¹⁸ Maathag nga wala ginapatuhuyan diri ni Pablo ang aton nauna nga balatyagon tuhoy sa paglaum sang himpit nga kabuhi. Labaw pa sa sina ang ginapatuhuyan niya; mas madalom ini, mas  makapahulag. Kon matutom kita nga nagabatas kag sa amo marealisar nga nahamuot ang Dios sa aton, may daku ini nga epekto sa pagdugang kag sa pagpalig-on sang aton nahauna nga paglaum. Ang aton paglaum karon mangin mas matuod pa, mas malig-on, mas personal. Ining nagtudok nga paglaum nangin mas nagasanag. Nagalatom ini sa aton pagkatawo, sa aton bug-os nga kinaugali. “Kag ang paglaum wala nagadul-ong sa kabang-awan; bangod ang gugma sang Dios ginpasagahay sa aton tagipusuon paagi sa balaan nga espiritu.”

19. Paano ang imo paglaum mangin bahin sang imo regular nga mga pangamuyo?

¹⁹ Hanuot nga nangamuyo si Epafras sadto nga ang iya mga kauturan sa Colosas magpabilin nga apektado kag kumbinsido sa kon ano ang yara sa unahan nila, nga may “malig-on nga pagtuo sa tanan nga kabubut-on sang Dios.” Kabay nga ang tagsatagsa sa aton magdangop man sa Dios sing tayuyon tuhoy sa aton paglaum. Sa imo personal nga mga pangamuyo, ilakip ang imo paglaum nahanungod sa bag-ong kalibutan. Ipabutyag kay Jehova kon daw ano ang paghandum mo sa sini, upod ang bug-os nga pagtuo nga magaabot ini. Mangabay sing bulig niya agod magtudok pa kag magdaku ang imo pagtuo. Subong nga si Epafras nangamuyo nga ang mga taga-Colosas may “malig-on nga pagtuo sa tanan nga kabubut-on sang Dios,” himua man ini. Himua ini sing masunson.

20. Kon may pila nga nagsipak gikan sa Cristianong dalanon, ngaa indi ini dapat magpaluya sa imo?

²⁰ Indi ka dapat matublag ukon maluyahan bangod sang katunayan nga indi tanan nagatindog sing bug-os kag may malig-on nga pagtuo. Ang iban mahimo mapaslawan, magtalikod, ukon mag-untat lamang. Natabo ina sa mga suod gid kay Jesus, sa iya mga apostoles. Apang sang nagluib si Judas, naghinay bala ukon nag-untat ang iban nga mga apostoles? Wala gid! Gin-aplikar ni Pedro ang Salmo 109:8 agod ipakita nga may isa nga magatal-us kay Judas. Ginpili ang tal-us, kag ang mga matutom sa Dios mapagsik nga nagpadayon sa ila pagbantala nga hilikuton. (Binuhatan 1:15-26) Determinado sila nga magtindog sing bug-os nga may malig-on nga pagtuo.

21, 22. Sa anong kahulugan nga ang imo pagtindog sing bug-os nga may malig-on nga pagtuo matalupangdan?

²¹ Makapat-od gid ikaw nga ang imo pagtindog sing bug-os kag may malig-on nga pagtuo sa tanan nga kabubut-on sang Dios indi pagpasapayanan. Talupangdon kag apresyahon ini. Ni sin-o?

²² Bueno, matalupangdan ini sang imo mga kauturan nga nakakilala kag nagahigugma sa imo. Bisan pa wala ini ginapabutyag sang iban sa pulong, ang epekto mangin kaangay sa mabasa naton sa 1 Tesalonica 1:2-6: “Pirme namon ginapasalamatan ang Dios kon ginasambit namon sa amon mga pangamuyo ang may kaangtanan sa inyo tanan, kay wala untat nga ginahunahuna namon ang inyo matutom nga buhat kag ang inyo mahigugmaon nga pagpangabudlay kag ang inyo pagbatas tungod sa inyo paglaum sa aton Ginuong Jesucristo sa atubangan sang aton Dios kag Amay. Kay . . . ang maayong balita nga ginabantala namon indi masapwan sa tunga ninyo paagi sa hambal lamang kundi paagi sa gahom man kag paagi sa balaan nga espiritu kag malig-on nga pagsalig . . . ; kag kamo nangin manug-ilog sa amon kag sa Ginuo.” Kaangay man sini ang batyagon sang matutom nga mga Cristiano sa palibot mo kon matalupangdan nila nga ikaw ‘nagatindog sing bug-os kag may malig-on nga pagtuo sa tanan nga kabubut-on sang Dios.’—Colosas 1:23.

23. Sa sining palaabuton nga tuig, ano dapat ang imo determinasyon?

²³ Sing pat-od gid, ang imo langitnon nga Amay magatalupangod kag mahamuot. Saligi ina. Ngaa? Bangod nagatindog ka sing bug-os kag may malig-on nga pagtuo “sa tanan nga kabubut-on sang Dios.” Si Pablo nagsulat sing makapalig-on sa mga taga-Colosas tuhoy sa ila paglakat “sing takus kay Jehova sa tuyo nga pahamut-an sia sing bug-os.” (Colosas 1:10) Huo, posible para sa di-himpit nga mga tawo nga pahamut-an sia sing bug-os. Ginhimo ini sang imo mga kauturan sa Colosas. Ang mga Cristiano nga yara sa palibot mo karon nagahimo sini. Mahimo mo man ini! Gani, sa sining bug-os nga masunod nga tuig, pama­tud-i sa imo mga pangamuyo adlaw-adlaw kag sa imo regular nga mga buhat nga determinado ka nga ‘sa katapusan magtindog sing bug-os kag may malig-on nga pagtuo sa tanan nga kabubut-on sang Dios.’

Madumduman Mo Bala?

• Ano ang nadalahig sa imo ‘pagtindog sing bug-os’?

• Anong mga butang tuhoy sa imo kaugalingon ang dapat mo ilakip sa imo pangamuyo?

• Subong ginapanugda sang Roma 5:4, 5, ano nga sahi sang paglaum ang luyag mo matigayon?

• Ang aton pagtuon nagpahulag sa imo sa anong tulumuron sa palaabuton nga tuig?

[Mga Pamangkot sa Pagtinuon]

[Retrato sa pahina 20]

Si Epafras nangamuyo nga ang iya mga kauturan magtindog sing bug-os, nga may malig-on nga pagtuo tuhoy kay Cristo kag sa ila paglaum

[Mga retrato sa pahina 23]

Minilyon pa ang may pat-od nga paglaum kag malig-on nga pagtuo kaangay sa imo