Magpakalig-on Paagi sa Gugma

“Higugmaa si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna.”​—⁠MATEO 22:⁠37.

1. (a) Ano ang pila ka butang nga ginapalambo sang isa ka Cristiano? (b) Ano ang labing importante nga Cristianong kinaiya, kag ngaa?

ANG isa ka Cristiano nagapalambo sing madamo nga butang agod mangin isa ka epektibo nga ministro. Ang tulun-an sang Hulubaton nagapadaku sang kabilihanan sang ihibalo, paghangop, kag kaalam. (Hulubaton 2:​1-10) Ginbinagbinag ni apostol Pablo ang pagkakinahanglanon sang mabakod nga pagtuo kag malig-on nga paglaum. (Roma 1:​16, 17; Colosas 1:​5; Hebreo 10:39) Ang pagbatas kag pagpugong sa kaugalingon importante man. (Binuhatan 24:​25; Hebreo 10:36) Apang, may isa ka kinaiya nga kon wala ini, ang tanan nga iban pa nga mga kinaiya mabuhinan sing kapuslanan kag nagahimo gani sini nga wala kabilihanan. Ina nga kinaiya amo ang gugma.​—⁠1 Corinto 13:​1-3, 13.

2. Paano ginpakita ni Jesus ang pagkaimportante sang gugma, kag ano nga mga pamangkot ang ginapautwas sini?

² Ginpakita ni Jesus ang pagkaimportante sang gugma sang nagsiling sia: “Sa sini ang tanan makahibalo nga kamo mga disipulo ko, kon maghigugmaanay kamo.” (Juan 13:35) Sanglit ang gugma amo ang tanda nga nagapakilala sa isa ka matuod nga Cristiano, dapat kita mamangkot sing subong sang, Ano ang gugma? Ngaa tuman ini ka importante amo nga si Jesus nagsiling nga ini, labaw sa tanan iban pa nga butang, nagapakilala sa iya mga disipulo? Paano naton mapalambo ang gugma? Sin-o ang dapat pakitaan sang aton gugma? Binagbinagon naton ining mga pamangkot.

Ano ang Gugma?

3. Paano malaragway ang gugma, kag ngaa nagadalahig ini sa hunahuna kag sa tagipusuon?

³ Ang isa ka paglaragway sa gugma amo ang ‘pagbatyag sing mainit nga personal nga pagpalangga ukon tudok nga paghigugma, isa ka mainit nga kahamuot ukon kaluyag sa iban.’ Isa ini ka kinaiya nga nagapahulag sa mga tawo sa pagpanghikot para sa kaayuhan sang iban, kon kaisa may daku nga personal nga sakripisyo. Ang gugma, subong sang paglaragway sini sa Biblia, nagadalahig sang hunahuna kag tagipusuon. Ang hunahuna, ukon ikasarang sa paghunahuna, nagatungod sing isa ka papel bangod ang tawo nga nagahigugma nagahimo sini nga may ihibalo, nakahisayod nga sia kag ang iban nga mga tawo nga ginahigugma niya, tanan may mga kaluyahon kag maayo man nga mga kinaiya. Ang ikasarang sa paghunahuna dugang pa nga nadalahig bangod may mga tawo nga ginahigugma sang isa ka Cristiano​—⁠ayhan, kon kaisa, nga supak sa iya kinaugali nga mga huyog⁠​—⁠​bangod nahibaluan niya paagi sa pagbasa niya sang Biblia nga luyag sang Dios nga himuon niya ini. (Mateo 5:​44; 1 Corinto 16:14) Apang, ang gugma nagagikan gid sa tagipusuon. Ang matuod nga gugma subong sang ginapahayag sa Biblia indi sa hunahuna gid lamang. Nagalakip ini sang tudok nga pagkahanuot kag bug-os nga balatyagon.​—⁠1 Pedro 1:⁠22.

4. Sa anong paagi ang gugma isa ka mabakod nga higot?

⁴ Ang mga tawo nga mahamkunon sing tagipusuon talagsa lang may ikasarang sa pagtigayon sing mahigugmaon gid nga kaangtanan bangod ang isa ka tawo nga nagahigugma handa sa pag-una sang mga intereses sang iban sangsa iya kaugalingon. (Filipos 2:​2-4) Ang mga pulong ni Jesus nga “mas daku ang kalipay sa paghatag sangsa pagbaton” matuod ilabi na kon ang paghatag isa ka buhat sang gugma. (Binuhatan 20:35) Ang gugma isa ka mabakod nga higot. (Colosas 3:14) Masunson ini nagalakip sang pag-abyanay, apang ang mga higot  sang gugma mas mabakod sangsa pag-abyanay. Ang romantiko nga kaangtanan sa ulot sang mag-asawa ginalaragway kon kaisa nga gugma; apang, ang gugma nga ginapalig-on sa aton sang Biblia nga palambuon mas nagadugay sangsa pisikal nga kaluyag. Kon ang mag-asawa tunay nga nagahigugmaanay sa isa kag isa, nagapabilin sila nga magkaupod bisan pa indi na posible ang pisikal nga kaangtanan bangod sang mga balatian ukon kaluyahon nga tuga sang katigulangon ukon bangod ang isa sa ila may sablag.

Gugma​—⁠Isa ka Importante Gid nga Kinaiya

5. Ngaa ang gugma isa ka importante nga kinaiya para sa isa ka Cristiano?

⁵ Ngaa ang gugma isa ka importante gid nga kinaiya para sa isa ka Cristiano? Una, bangod si Jesus nagsugo sa iya mga sumulunod nga maghigugmaanay sa isa kag isa. Nagsiling sia: “Kamo akon mga abyan kon ginahimo ninyo ang ginasugo ko sa inyo. Ining mga butang ginasugo ko sa inyo, nga maghigugmaanay kamo.” (Juan 15:​14, 17) Ikaduha, bangod si Jehova amo ang personipikasyon sang gugma, kag subong mga sumilimba niya dapat naton sia ilugon. (Efeso 5:​1; 1 Juan 4:16) Ang Biblia nagasiling nga ang pagkuha sing ihibalo tuhoy kay Jehova kag kay Jesus nagakahulugan sing kabuhi nga walay katapusan. Paano naton masiling nga kilala naton ang Dios kon wala kita nagatinguha nga mangin kaangay niya? Si apostol Juan nangatarungan: “Sia nga wala nagahigugma wala makakilala sa Dios, bangod ang Dios gugma.”​—⁠1 Juan 4:⁠8.

6. Paano mabalanse sang gugma ang lainlain nga mga aspekto sang aton kabuhi?

⁶ Ang gugma importante bangod sang ikatlo nga rason: Nagabulig ini sa aton sa pagbalanse sang lainlain nga mga aspekto sang aton kabuhi kag ginalakip ang maayong motibo sa ginahimo naton. Halimbawa, importante nga magpadayon sa pagkuha sing ihibalo sa Pulong sang Dios. Para sa isa ka Cristiano, ini nga ihibalo kaangay sang pagkaon. Nagabulig ini sa iya sa pagtubo padulong sa pagkahamtong kag sa pagpanghikot nahisuno sa kabubut-on sang Dios. (Salmo 119:​105; Mateo 4:​4; 2 Timoteo 3:​15, 16) Apang, si Pablo nagpaandam: “Ang ihibalo nagapahambog, apang ang gugma nagapalig-on.” (1 Corinto 8:1) Wala, wala sing malain sa sibu nga ihibalo. Ang problema yara sa aton​—⁠may yara kita makasasala nga mga huyog. (Genesis 8:21) Kon wala ang nagabalanse nga impluwensia sang gugma, ang ihibalo mahimo magpahambog sa isa ka tawo, sa paghunahuna nga mas maayo sia sangsa iban. Indi ina matabo kon ginapahulag sia sang gugma. ‘Ang gugma . . . wala nagapabugal, wala nagapahambog.’ (1 Corinto 13:4) Ang Cristiano nga ginapahulag sang gugma wala nagapabugal, bisan pa makatigayon sia sing madalom nga ihibalo. Ang gugma nagahupot sa iya nga mapainubuson kag nagapugong sa iya sa pagtinguha nga mangin bantog.​—⁠Salmo 138:​6; Santiago 4:⁠6.

7, 8. Paano ang gugma nagabulig sa aton nga magkonsentrar sa mas importante nga mga butang?

⁷ Si Pablo nagsulat sa mga taga-Filipos: “Amo ini ang padayon ko nga ginapangamuyo, nga kabay nga ang inyo gugma magbugana sing labi kag labi pa gid sa ihibalo kag sa bug-os nga paghantop; agod mapat-od ninyo ang mas importante nga mga butang.” (Filipos 1:​9, 10) Ang Cristianong gugma magabulig sa aton nga sundon ining pagpalig-on nga pat-uron ang mas importante nga mga butang. Subong isa ka halimbawa, binagbinaga ang mga pulong ni Pablo kay Timoteo: “Kon ang bisan sin-o nga lalaki nagalab-ot sang palangakuan sang manugtatap, nagahandum sia sing maayong hilikuton.” (1 Timoteo 3:1) Sa bug-os nga tuig sa pag-alagad sang 2000, ang kadamuon sang mga kongregasyon sa bug-os nga kalibutan nadugangan sing 1,502, nagahatag sing bag-ong kabug-usan nga 91,487. Gani, kinahanglan gid ang dugang pa nga mga gulang, kag ang mga nagatinguha nga malab-ot ang pribilehiyo dapat hatagan sing komendasyon.

⁸ Apang, mahuptan sang mga nagatinguha nga malab-ot ang mga pribilehiyo sang manugtatap ang nagakaigo nga pagkabalanse kon dumdumon nila ang katuyuan sini nga pribilehiyo. Ang pagtigayon lamang sing awtoridad ukon kabantugan indi ang importante nga butang. Ang mga gulang nga nagapahamuot kay Jehova ginapahulag sang gugma sa iya kag sa ila mga kauturan. Wala sila nagapangita sing kabantugan ukon impluwensia. Si apostol Pedro, sa tapos laygayan ang mga gulang sang kongregasyon nga huptan ang nagakaigo nga panimuot, nagpadaku sang pagkakinahanglanon sang “pagkakubos sing hunahuna.” Ginlaygayan niya ang tanan sa kongregasyon: “Magpaubos kamo . . . sa idalom sang gamhanan nga kamot sang Dios.” (1 Pedro 5:​1-6) Ang bisan sin-o nga nagatinguha nga malab-ot ang mga pribilehiyo maayo nga magabinagbinag sang halimbawa sang di-maisip nga mga gulang sa bug-os nga kalibutan nga mapisan, mapainubuson, kag busa isa ka pagpakamaayo sa ila mga kongregasyon.​—⁠Hebreo 13:⁠7.

 Ang Maayo nga Motibo Nagabuligsa Aton sa Pagbatas

9. Ngaa ginadumdom pirme sang mga Cristiano ang ginsaad nga mga pagpakamaayo ni Jehova?

⁹ Ang importansia sang kinaiya nga ginapahulag sang gugma makita sa isa pa ka paagi. Para sa mga nagahimud-os sang diosnon nga debosyon bangod sang gugma, ang Biblia nagasaad sing bugana nga mga pagpakamaayo karon kag sing di-mahanduraw nga makalilipay nga mga pagpakamaayo sa palaabuton. (1 Timoteo 4:8) Ang isa ka Cristiano nga nagapati sing malig-on sa sining mga saad kag kumbinsido nga si Jehova “nangin manugpadya sadtong hanuot nga nagapangita sa iya” ginabuligan nga magtindog sing mabakod sa pagtuo. (Hebreo 11:6) Ang kalabanan sa aton nagahandum nga makita ang katumanan sang mga saad sang Dios kag nagapalanog sang balatyagon ni apostol Juan: “Kabay pa! Kari, Ginuong Jesus.” (Bugna 22:20) Huo, ang pagpamalandong sa mga pagpakamaayo nga magaabot kon kita matutom nagapabakod sa aton sa pagbatas, subong nga ang pagdumdom “sa kalipay nga ginbutang sa iya atubang” nagbulig kay Jesus sa pagbatas.​—⁠Hebreo 12:​1, 2.

10, 11. Bangod ginapahulag sang gugma, paano ini nagabulig sa aton sa pagbatas?

¹⁰ Apang, kamusta naman kon ang handum naton nga magkabuhi sa bag-ong kalibutan amo lamang ang aton motibo sa pag-alagad kay Jehova? Nian madali kita nga mangin di-mapailubon ukon di-kontento kon ang mga kahimtangan nagabudlay ukon ang mga hitabo wala mahanabo subong sang ginalauman naton. May katalagman gid nga mahimo kita maanod palayo. (Hebreo 2:​1; 3:12) Si Pablo nagsambit sa anay kaupod nga si Demas, nga nagbiya sa iya. Ngaa? Bangod “ginhigugma niya ang karon nga sistema sang mga butang.” (2 Timoteo 4:10) Ang bisan sin-o nga nagaalagad tungod sa mahamkunon lamang nga mga rason yara sa katalagman nga himuon man ini. Mahimo sila maganyat sa karon nga mga kahigayunan nga ginatanyag sang kalibutan kag mangin indi handa sa paghimo sing mga sakripisyo karon sa paglaum sa mga pagpakamaayo nga magaabot.

¹¹ Samtang nagakaigo kag kinaugali nga handumon nga makabaton sing mga pagpakamaayo sa ulihi kag sing ginalauman nga mga kaumpawan gikan sa mga pagtilaw, ang gugma nagapalig-on sang aton apresasyon sa kon ano ang dapat nga importante gid sa aton kabuhi. Ang kabubut-on ni Jehova, indi ang aton, ang importante nga butang. (Lucas 22:​41, 42) Huo, ang gugma nagapalig-on sa aton. Nagabulig ini sa aton nga mangin kontento sa paghulat sing mapailubon sa aton Dios, kontento sa ano man nga mga pagpakamaayo nga ginahatag niya kag nagasalig nga sa iya gintalana nga tion batunon naton ang tanan nga butang nga ginsaad niya​—⁠kag ang madamo pa. (Salmo 145:​16; 2 Corinto 12:​8, 9) Samtang, ang gugma nagabulig sa aton nga magpadayon sa pag-alagad sing di-mahamkunon bangod “ang gugma . . . wala nagapangita sang kaugalingon nga mga kaayuhan.”​—⁠1 Corinto 13:​4, 5.

Sin-o ang Dapat Higugmaon Sang mga Cristiano?

12. Suno kay Jesus, sin-o ang dapat naton higugmaon?

¹² Si Jesus naghatag sing kabilugan nga pagsulundan sa kon sin-o ang dapat naton higugmaon sang ginbalikwat niya ang duha ka pinamulong gikan sa Mosaikong Kasuguan. Nagsiling sia: “Higugmaa si Jehova nga imo Dios sa bug-os mo nga tagipusuon  kag sa bug-os mo nga kalag kag sa bug-os mo nga hunahuna,” kag, “Higugmaa ang imo isigkatawo subong sang imo kaugalingon.”​—⁠Mateo 22:​37-39.

13. Paano naton matun-an nga higugmaon si Jehova, bisan pa indi naton sia makita?

¹³ Gikan sa mga pulong ni Jesus, maathag nga una sa tanan dapat naton higugmaon si Jehova. Apang, wala kita matawo nga may napalambo sing bug-os nga gugma kay Jehova. Butang ina nga dapat ginapalambo naton. Sang una naton mabatian ang tuhoy sa iya, naganyat kita sa iya paagi sa aton nabatian. Sing amat-amat, natun-an naton kon paano niya ginhanda ang duta para sa katawhan. (Genesis 2:​5-23) Natun-an naton kon paano sia nakig-angot sa katawhan, wala nagbiya sa aton sang una nga nagsulod ang sala sa tawhanon nga pamilya, kundi naghimo sing mga tikang agod gawaron kita. (Genesis 3:​1-5, 15) Nakig-angot sia sing mainayuhon sa mga matutom, kag sang ulihi ginhatag niya ang iya bugtong nga anak para sa kapatawaran sang aton mga sala. (Juan 3:​16, 36) Ining nagadugang nga ihibalo nagapalig-on sang aton apresasyon kay Jehova. (Isaias 25:1) Si Hari David nagsiling nga ginahigugma niya si Jehova bangod sang Iya mahigugmaon nga pag-ulikid. (Salmo 116:​1-9) Sa karon, si Jehova nagaulikid sa aton, nagatuytoy sa aton, nagapabakod sa aton, kag nagapalig-on sa aton. Sa labi nga pagtuon naton tuhoy sa iya, labi nga nagatudok ang aton gugma.​—⁠Salmo 31:​23; Sofonias 3:​17; Roma 8:⁠28.

Paano Naton Mapakita ang Aton Gugma?

14. Sa anong paagi mapakita naton nga ang aton gugma sa Dios matuod?

¹⁴ Sa pagkamatuod, madamo sa bug-os nga kalibutan ang nagasiling nga ginahigugma nila ang Dios, apang ang ila paggawi nagahimutig sang ila ginapangangkon. Paano naton mahibaluan nga ginahigugma gid naton si Jehova? Mahimo kita makighambal sa iya sa pangamuyo kag sugiran sia sang aton balatyagon. Kag makapanghikot kita sa paagi nga nagapakita sang aton gugma. Si apostol Juan nagsiling: “Ang bisan sin-o nga nagatuman sang pulong [sang Dios], tunay nga sa sining tawo ang gugma sang Dios ginhimo nga himpit. Paagi sini may ihibalo kita nga nahiusa kita sa iya.” (1 Juan 2:​5; 5:3) Lakip sa iban nga mga butang, ang Pulong sang Dios nagasugo sa aton nga magtipon sing tingob kag magkabuhi sing matinlo kag sing nagakaigo. Ginalikawan naton ang pagkasalimpapaw, nagahambal kita sang kamatuoran, kag nagahupot sang aton hunahuna nga matinlo. (2 Corinto 7:​1; Efeso 4:​15; 1 Timoteo 1:​5; Hebreo 10:​23-25) Nagapakita kita sing gugma paagi sa paghatag sing materyal nga bulig sa mga nagakinahanglan. (1 Juan 3:​17, 18) Kag wala kita nagaisol sa pagsugid sa iban tuhoy kay Jehova. Nagalakip ina sang pagpakigbahin sa bug-os kalibutan nga pagbantala sing maayong balita sang Ginharian. (Mateo 24:​14; Roma 10:10) Ang pagtuman sa Pulong sang Dios sa sining mga butang pamatuod nga ang aton gugma kay Jehova matuod.

15, 16. Paano ang gugma kay Jehova nakaapektar sa madamong kabuhi sang nagligad nga tuig?

¹⁵ Ang gugma kay Jehova nagabulig sa mga tawo sa paghimo sing maayo nga mga desisyon. Sang nagligad nga tuig, ini nga gugma nagpahulag sa 288,907 ka indibiduwal nga idedikar ang ila kabuhi sa iya kag simbuluhan ina nga desisyon paagi sa bawtismo sa tubig. (Mateo 28:​19, 20) Ang ila dedikasyon may katuyuan. Nangin patimaan ini sang pagbalhin sa ila kabuhi. Halimbawa, si Gazmend isa anay sang kilala nga humalampang sang basketbol sa Albania. Sa pila ka tuig, nagtuon sila nga mag-asawa sa Biblia kag walay sapayan sang mga sablag nangin kalipikado sang ulihi subong mga manugbantala sang Ginharian. Sang nagligad nga tuig, si Gazmend ginbawtismuhan, isa sang 366 nga ginbawtismuhan sa Albania sadtong 2000 nga tuig sa pag-alagad. Ang isa ka pamantalaan nagbalhag sing artikulo tuhoy sa iya kag nagsiling: “Ang iya kabuhi may katuyuan, kag bangod sini, sia kag ang iya pamilya nakaeksperiensia sang pinakamalipayon nga mga adlaw sang ila kabuhi. Para sa iya, indi na importante  nga makita kon pila ang kitaon niya kundi, sa baylo, kon daw ano ang mahatag niya agod makabulig sa iban nga mga tawo.”

¹⁶ Sa kaanggid, ang isa ka bag-ong nabawtismuhan nga utod nga babayi nga nagatrabaho sa isa ka kompanya sang langis sa Guam nakabaton sing makasululay nga tanyag. Sa tapos mapasakaan sing posisyon sa korporasyon sa sulod sang mga tinuig, gintanyagan sia sang ulihi sing kahigayunan nga mangin ang nahaunang babayi nga bise-presidente sa maragtas sang kompanya. Apang, gindedikar na niya ang iya kabuhi kay Jehova. Gani sa tapos mabinagbinag ini nga butang sa iya bana, gindis-ayrihan sang bag-ong utod nga babayi ang tanyag kag sa baylo naghimo sing kahimusan para makatrabaho sing part-time agod mag-uswag sia nga mangin isa ka bug-os tion nga ministro, isa ka payunir. Bangod sang gugma niya kay Jehova, napahulag sia nga handumon nga mag-alagad sa iya subong payunir sa baylo nga himud-usan ang pinansial nga mga intereses sining kalibutan. Sa katunayan, sa bug-os nga kalibutan ini nga gugma nagpahulag sa 805,205 sa pagpakigbahin sa lainlain nga bahin sang payunir nga ministeryo sa bug-os nga tuig sa pag-alagad sang 2000. Daw ano nga pagpadayag sang gugma kag pagtuo ang ginpakita sini nga mga payunir!

Napahulag sa Paghigugma kay Jesus

17. Anong maayo nga halimbawa sang gugma ang makita naton kay Jesus?

¹⁷ Si Jesus isa ka maayo gid nga halimbawa sang isa nga ginpahulag sang gugma. Sa iya pagkabuhi antes mangin tawo, ginhigugma niya ang iya Amay kag ginhigugma niya ang katawhan. Subong personipikasyon sang kaalam, nagsiling sia: “Sadto yara ako sa tupad [ni Jehova] subong batid nga manugpangabudlay, kag ako ang labi nga ginapalangga niya sa adlaw-adlaw, nagakalipay ako sa atubangan niya sa tanan nga tion, nga nagakalipay sa mabungahon nga duta sang iya duta, kag ang mga butang nga akon nahamut-an yara sa mga anak sang tawo.” (Hulubaton 8:​30, 31) Bangod sang gugma ni Jesus, ginbiyaan niya ang iya langitnon nga puluy-an kag natawo subong wala sing mahimo nga lapsag. Nakig-angot sia sing mapailubon kag mainayuhon sa mga mahagop kag mga mapainubuson kag nag-antos sa mga kamot sang mga kaaway ni Jehova. Sa katapusan, napatay sia tungod sa tanan nga katawhan sa usok sang pag-antos. (Juan 3:​35; 14:​30, 31; 15:​12, 13; Filipos 2:​5-11) Daw ano kaayo nga halimbawa sang nagakaigo nga motibo!

18. (a) Paano naton mapalambo ang gugma kay Jesus? (b) Sa anong paagi mapakita naton nga ginahigugma naton si Jesus?

¹⁸ Kon mabasa sang mga tawo nga may nagakaigo nga kahimtangan sa tagipusuon ang rekord tuhoy sa kabuhi ni Jesus sa mga Ebanghelyo kag mapamalandungan  kon daw ano kadamo nga pagpakamaayo ang ginhatag sa ila sang iya matutom nga dalanon, labi ini nga nagapatudok sang ila gugma sa iya. Kita karon kaangay sang mga ginsulatan ni Pedro sang nagsiling sia: “Bisan wala pa ninyo makita [si Jesus], ginhigugma ninyo sia.” (1 Pedro 1:8) Ang aton gugma makita kon magtuo kita sa iya kag mag-ilog sang iya nagasakripisyo-sa-kaugalingon nga kabuhi. (1 Corinto 11:​1; 1 Tesalonica 1:​6; 1 Pedro 2:​21-25) Sang Abril 19, 2000, ang kabug-usan nga 14,872,086 ginpahanumdom sang aton mga rason agod higugmaon si Jesus sang nagtambong sila sa tuigan nga Memoryal sang iya kamatayon. Daw ano gid ina kadamo! Kag makapalig-on gid mahibaluan nga madamo kaayo ang interesado nga makalampuwas paagi sa halad ni Jesus! Sa pagkamatuod, ginapalig-on kita paagi sa gugma ni Jehova kag ni Jesus sa aton kag sang aton gugma sa ila.

19. Anong mga pamangkot tuhoy sa gugma ang binagbinagon sa masunod nga artikulo?

¹⁹ Si Jesus nagsiling nga dapat naton higugmaon si Jehova upod ang aton bug-os nga tagipusuon, kalag, hunahuna, kag kusog. Apang nagsiling man sia nga dapat naton higugmaon ang aton isigkatawo subong sang aton kaugalingon. (Marcos 12:​29-31) Sin-o ang ginalakip sa sina? Kag paano ang gugma sa isigkatawo nagabulig sa aton nga huptan ang maayo nga pagkabalanse kag nagakaigo nga motibo? Ini nga mga pamangkot binagbinagon sa masunod nga artikulo.

Nadumduman Mo Bala?

• Ngaa ang gugma isa ka importante nga kinaiya?

• Paano naton matun-an nga higugmaon si Jehova?

• Paano ang aton paggawi nagapamatuod nga ginahigugma naton si Jehova?

• Paano naton mapakita ang aton gugma kay Jesus?

[Mga Pamangkot sa Pagtinuon]

[Mga retrato sa pahina 10, 11]

Ang gugma nagabulig sa aton sa paghulat sing mapailubon sa paumpaw

[Retrato sa pahina 12]

Ang daku nga halad ni Jesus nagapahulag sa aton nga higugmaon sia