Paghidait Para sa Bag-ong Milenyo?

SANG Septiembre 14, 1999, ang International Year for the Culture of Peace ginlansar sa Paris kag New York City. Gindeklarar ini sang General Assembly sang Nasyones Unidas para sa tuig 2000. Ang anay direktor heneral sang UNESCO, nga si Federico Mayor, nag-apelar sing pormal “sa pagtukod sing isa ka bug-os kalibutan nga hublag para sa isa ka kultura nga may paghidait kag walay kasingki.”

May hulubaton ang UNESCO nga “bangod ang mga inaway nagasugod sa hunahuna sang mga tawo, sa hunahuna man sang mga tawo dapat tukuron ang mga depensa sa paghidait.” Nahisuno sa sini, tuyo sang organisasyon nga pauswagon ang isa ka kultura nga may paghidait paagi sa “pagtudlo kag pagtuon, paghambalanay kag pagbuligay.” Si G. Mayor nagsiling nga indi tuman “nga mangin mahidaiton, indi gani tuman nga mangin mga manugpakanay sang inaway ukon gamo, kundi mangin mga manugpaluntad sing paghidait.”

Sing makapasubo, ang tuig 2000 indi mahidaiton. Ang moderno nga maragtas​​—⁠lakip ang mga hitabo sang tuig 2000​​—⁠nagapadaku sang walay ikasarang sang tawo nga tapnaon ang inaway kag kasingki walay sapayan sang sinsero nga mga panikasog batok sini.

Apang, talalupangdon nga ang paghidait naangot gid sa pagtudlo kag pagtuon. Sang nagligad nga kapin sa 2,700 ka tuig, si propeta Isaias nagsiling: “Ang tanan mo nga anak mangin mga tawo nga gintudluan ni Jehova, kag ang paghidait sang imo mga anak mangin bugana.” (Isaias 54:13) Napanan-aw sang amo man nga propeta ang tion nga ang katawhan sang tanan nga pungsod magadugok padulong sa putli nga pagsimba kay Jehova nga Dios sa pagtuon sang Iya mga dalanon. Ano ang resulta? “Salsalon nila ang ila mga espada nga mga punta sang arado kag ang ila mga bangkaw nga mga galab nga inughagbas. Ang pungsod indi na magbayaw sing espada batok sa pungsod, kag indi na sila magtuon sing inaway.” (Isaias 2:​2-4) Nahisanto sa sining tagna, ang mga Saksi ni Jehova nagapakigbahin sa bug-os kalibutan nga hilikuton sa pagtudlo nga nakabulig na sa minilyon nga madaug ang dumot sa tunga sang mga pungsod kag rasa nga amo ang gamot sang kalabanan nga mga inaway.

Madula na sa ulihi ang mga inaway sa idalom sang Ginharian sang Dios, nga magahatag sing dayon nga paghidait kag kalig-unan sa duta. (Salmo 72:​7; Daniel 2:44) Nian, matuman na ang mga pulong sang salmista: “Tan-awa ang mga binuhatan ni Jehova, kon paano sia naghimo sing makahayanghag nga mga hitabo sa duta. Ginapatunong niya ang mga inaway tubtob sa ukbong sang duta.”​​—⁠Salmo 46:​8, 9.