Pagpaayo sa mga Pilas sang Inaway

KATAPO anay si Abraham sang isa ka grupo sang mga gerilya sa sulod sang 20 ka tuig.⁠ * Apang nag-untat na sia sa pagpakig-away kag indi na gid liwat makig-away. Ang matuod, ang pila sang iya anay mga kaaway mahirop nga mga abyan na niya karon. Ano ang nagpabag-o sa iya? Ang Biblia. Naghatag ini kay Abraham sing paglaum kag kaalam, nagbulig sa iya nga tamdon ang mga hilikuton sang tawo suno sa pagtamod sang Dios. Gindula sang Biblia ang handum niya nga makig-away, kag ginsugdan niya nga ayuhon ang iya kalisod, kasubo, dumot, kag kaakig. Nakita niya nga ang Biblia may epektibo nga bulong para sa tagipusuon.

Paano ginabuligan sang Biblia ang isa ka tawo agod mapaayo ang mga pilas sa emosyon? Indi sini maislan ang natabo kay Abraham. Apang, ang pagbasa kag pagpamalandong sa Pulong sang Dios nagpasibu sang iya panghunahuna sa iya sang Manunuga. May paglaum na sia karon para sa palaabuton, kag bag-o na ang iya mga prioridad. Nangin importante sa iya ang mga butang nga importante sa Dios. Sang natabo ini, amat-amat nga nag-ayo ang mga pilas sa iya tagipusuon. Amo sina kon paano nabuligan si Abraham nga magbag-o.

Pagtugdang sa Inaway Sibil

Natawo si Abraham sa Aprika sang katuigan 1930. Pagkatapos sang ikaduha nga inaway sa bug-os nga kalibutan, ang iya pungsod nasakop sang isa ka gamhanan nga kaingod, apang luyag sang madamo sang mga kasimanwa ni Abraham ang kahilwayan. Sang 1961, nagbuylog si Abraham sa isa ka hublag para sa kahilwayan nga nakig-away sa gerilya nga paagi batok sa gamhanan nga kaingod.

“Mga kaaway namon sila. Buko nila kami patyon, gani ginsugdan namon nga patyon sila,” paathag ni Abraham.

Masami nga yara sa katalagman ang kabuhi ni Abraham, gani sang 1982, pagkatapos sang 20 ka tuig sang armado nga pagpakig-away, nagpalagyo sia padulong sa Europa. Sadto nga tion manugsingkwentahon na sia, kag may tion na sia nga pamalandungan ang iya kabuhi. Ano na ang natabo sa iya mga handum? Ano ang yara sa palaabuton? Nasugilanon ni Abraham ang pila ka Saksi ni Jehova kag nagtambong sia sa ila mga miting. Nadumduman niya nga sa Aprika sang pila ka tuig nga nagligad, nakabasa sia sing isa ka tract nga ginhatag sa iya sang isa ka Saksi. Ginlaragway sang tract ang isa ka nagapakari nga paraiso sa duta kag ang isa ka langitnon nga panguluhan nga magagahom sa katawhan. Matuod gid ayhan yadto?

 Si Abraham nagsiling: “Natun-an ko sa Biblia nga ang tanan sadtong tuig sang pagpakig-away nauyang lamang. Ang lamang nga panguluhan nga magapakig-angot sing makatarunganon sa tanan amo ang Ginharian sang Dios.”

Wala madugay nga nabawtismuhan si Abraham subong isa ka Saksi ni Jehova, nalagyo si Robert halin sa Aprika pakadto sa siudad sa Europa nga ginaistaran ni Abraham. Nakig-away anay sanday Robert kag Abraham sa isa ka inaway apang magkontrahanay sila. Ginpaligban pirme ni Robert ang matuod nga katuyuan sa kabuhi. Relihioso sia nga tawo, kag bangod nakabasa sing mga bahin sang Biblia, nahibaluan niya nga Jehova ang ngalan sang Dios. Sang nagtanyag ang mga Saksi halin sa kongregasyon ni Abraham nga buligan si Robert agod mahangpan sing maayo pa ang Biblia, nagpasugot sia sa gilayon.

Si Robert nagpaathag: “Halin gid sa umpisa, nagdayaw gid ako kon paano ginagamit sang mga Saksi ang ngalan ni Jehova kag ni Jesus, ginakilala nga sila magkatuhay nga mga persona. Suno ini sa nahibaluan ko na sa Biblia. Nagapanapot man sing mahipid ang mga Saksi kag mabuot sila sa iban, ano man ang nasyonalidad. Daku gid ang epekto sini nga mga butang sa akon.”

Ang mga Magkaaway Nangin Mag-abyan

Mahirop na karon nga mag-abyan sanday Robert kag Abraham, nga magkaaway anay. Nagaalagad sila subong bug-os tion nga mga ebanghelisador sa isa ka kongregasyon sang mga Saksi ni Jehova. “Sang panahon sang inaway, pirme ko ginpaligban kon ngaa ang mga tawo sa magkaiping nga mga pungsod​—⁠ang madamo sa ila isa lang sing relihion⁠—​nagadumtanay sa isa kag isa,” paathag ni Abraham. “Isa lang anay ang relihion namon ni Robert, apang nakig-away kami kontra sa isa kag isa. Mga Saksi ni Jehova na kami karon, kag ginhiusa kami sang amon pagtuo.”

“Amo ina ang kinatuhayan,” dugang pa ni Robert. “Katapo kami karon sang isa ka relihion nga naghimo sa amon nga bahin sang isa ka matuod nga paghiliutod. Indi na kami liwat makig-away pa.” May daku gid nga impluwensia ang Biblia sa tagipusuon sining magkaaway anay. Amat-amat nga ginbuslan sing pagsalig kag pagpakig-abyan ang dumot kag kaakig.

Sadto man nga tion nga nakig-away sanday Abraham kag Robert, duha pa ka pamatan-on nga lalaki ang nakig-away sing kontrahanay sa isa pa ka inaway sa ulot sang duha ka magkaiping nga pungsod. Sang ulihi nangin epektibo man nga bulong ang Biblia sa pagpaayo sang ila tagipusuon. Paano?

Magpatay​—⁠Nian Mapatay nga Isa ka Martir

Si Gabriel, nga nagdaku sa isa ka relihioso nga pamilya, gintudluan nga ang iya dutang natawhan nagapakig-away sing balaan nga inaway. Gani, sa edad nga 19 anyos, nagboluntaryo sia nga magsoldado kag nagpangabay nga ipadala sa patag-awayan. Sa sulod sang 13 ka bulan nakig-away sia sa pinakamasingki nga inaway, kon kaisa isa lamang ka kilometro kag tunga ang kalayuon sa mga kaaway. “Madumduman ko ilabi na ang isa ka tion,” siling niya. “Ginsilingan kami sang amon kumander nga magaatake ang mga kaaway sadto nga gab-i. Akig gid kami kaayo amo nga bug-os nga gab-i namon nga ginpalupok ang amon kanyon.” Ginkabig niya ang mga tawo halin sa kaiping nga pungsod subong iya mga kaaway, nga takus pamatyon. “Tuyo ko nga makapatay sing madamo kon mahimo pa.  Nian, kaangay sang madamo ko nga abyan, gusto ko mapatay nga isa ka martir.”

Apang, nalugaw-an sang ulihi si Gabriel. Nagpalagyo sia padulong sa mga bukid, mainandamon nga nagtabok sa dulunan pasulod sa isa ka neutral nga pungsod, kag naglakbay padulong sa Europa. Pirme niya ginapamangkot ang Dios kon ngaa tuman kabudlay sang kabuhi, kon bala silot halin sa Dios ang mga problema. Nasugilanon sia sang mga Saksi ni Jehova, nga nagpakita sa iya halin sa Biblia kon ngaa puno gid sing problema ang kabuhi karon.​—⁠Mateo 24:​3-​14; 2 Timoteo 3:​1-5.

Sa labi nga pagtuon ni Gabriel sa Biblia, labi pa nga nakita niya nga nagaunod ini sing kamatuoran. “Natun-an ko nga mahimo gali kita mabuhi sing dayon sa paraiso nga duta. Sing makatilingala, amo gid sina ang handum ko sang bata pa ako.” Ginlugpayan sang Biblia si Gabriel kag ginlipay ang iya sadto nagasakit nga tagipusuon. Ang labing madalom niya nga mga pilas sa emosyon nagsugod nga mag-ayo. Gani sang makilala niya si Daniel, nga isa anay ka kaaway, si Gabriel wala na nagabatyag sing dumot. Apang ngaa nagkadto si Daniel sa Europa?

“Kon Matuod Gid nga Nagaluntad Ka, Buligi Ako Palihug!”

Nagdaku si Daniel subong Katoliko kag sa edad nga 18 gintawag sia agod magsoldado. Ginpadala sia sa inaway nga ginpadalhan man kay Gabriel apang sa iya sang kontra. Malapit sa patag-awayan, si Daniel nagasakay sa isa ka tangke de guerra sang maigo ini. Napatay ang iya mga abyan, kag nasamaran sia sing grabe kag gindala nga priso. Binulan sia nga nagtener sa ospital kag sa kampamento antes gintapok sa isa ka neutral nga pungsod. Nagaisahanon kag imol, ginhunahuna niya nga maghikog. Nangamuyo si Daniel sa Dios: “Kon matuod gid nga nagaluntad ka, buligi ako palihug!” Pagkadason gid nga adlaw, ginduaw sia sang mga Saksi ni Jehova kag ginsabat ang madamo sang iya mga pamangkot. Sang ulihi, naglakbay sia padulong sa Europa subong isa ka refugee. Nakig-upod liwat si Daniel sa mga Saksi kag nagtuon sa Biblia. Naghaganhagan ang iya kabalaka kag kaakig bangod sang iya natun-an.

Mahirop nga mag-abyan na karon sanday Gabriel kag Daniel, nahiusa sa isa ka espirituwal nga paghiliutod subong bawtismado nga mga Saksi ni Jehova. “Ang akon gugma kay Jehova kag ang ihibalo sa Biblia nagbulig sa akon nga tamdon ang mga butang subong sang pagtamod niya. Indi ko na kaaway si Daniel. Sang nagligad nga mga tinuig nalipay gid kuntani ako nga patyon sia. Kabaliskaran gid ang gintudlo sa akon sang Biblia​—⁠nga mangin handa mapatay tungod sa iya,” siling ni Gabriel.

“Nakita ko nga nagpinatyanay ang mga tawo nga may lainlain nga relihion kag nasyonalidad,” siling ni Daniel. “Kag may mga tawo nga isa lang ang relihion nga kontrahanay sa inaway ang nagapinatyanay. Sang nakita ko ini, abi ko Dios ang dapat basulon. Karon nahibaluan ko na nga si Satanas gali ang sa likod sang tanan nga inaway. Mga masigkatumuluo na kami ni Gabriel. Indi na kami makig-away pa liwat!”

 “Ang Pulong Sang Dios Buhi kag Gamhanan”

Ngaa daku gid ang pagbag-o nanday Abraham, Robert, Gabriel, kag Daniel? Paano nila nadula ang nanggamot sing madalom nga dumot kag kasubo gikan sa ila tagipusuon?

Ang kada isa sining mga lalaki nagbasa, nagpamalandong, kag nagtuon sang kamatuoran halin sa Biblia, nga “buhi kag gamhanan.” (Hebreo 4:12) Ang Awtor sang Biblia amo ang Manunuga sang katawhan, nga nakahibalo kon paano impluwensiahan para sa kaayuhan ang tagipusuon sang isa nga handa magpamati kag magtuon. “Ang bug-os nga Kasulatan ginbugna sang Dios kag mapuslanon sa pagpanudlo, sa pagsabdong, sa pagtadlong sang mga butang, sa pagdisiplina sa pagkamatarong.” Sa tion nga ang isa ka bumalasa magpatuytoy sa Biblia, matigayon niya ang bag-o nga mga prinsipio kag mga talaksan. Matun-an niya nga tamdon ang mga butang suno sa pagtamod ni Jehova. Nagahatag ini sing madamo nga benepisyo, lakip ang pag-ayo sang mga pilas sang inaway.​—⁠2 Timoteo 3:⁠16.

Ginapaathag sang Biblia nga wala sing pungsod, rasa, ukon etniko nga grupo ang mas maayo ukon mas malain sangsa iban. “Ang Dios wala sing ginapasulabi, apang sa tagsa ka pungsod ang tawo nga nagakahadlok sa iya kag nagahimo sing pagkamatarong kalahamut-an sa iya.” Ang bumalasa nga nagabaton sini ginabuligan sing amat-amat nga malandas ang pagdumot sa rasa ukon pungsod.​—⁠Binuhatan 10:​34, 35.

Ginapakita sang mga tagna sa Biblia nga sa indi madugay ibulos sang Dios ang iya Mesianikong Ginharian sa sistema sang paggahom sang tawo karon. Paagi sa sining panguluhan, “ginapatunong [sang Dios] ang mga inaway tubtob sa ukbong sang duta.” Dulaon ang mga institusyon nga nagapasanyog sang mga inaway kag nagapalig-on sa mga tawo nga mag-ilinaway. Ang mga biktima sang inaway pagabanhawon kag hatagan sing kahigayunan nga mabuhi sa paraiso nga duta. Wala na sing kinahanglan pa nga magpalagyo sa manugsalakay ukon manugpigos.​—⁠Salmo 46:​9; Daniel 2:​44; Binuhatan 24:⁠15.

Tuhoy sa mga tawo nga magakabuhi sa sina nga tion, ang Biblia nagasiling: “Pat-od nga magapatindog sila sing mga balay kag magapuyo sa sini; kag pat-od nga magatanom sila sing mga ulubasan kag magakaon sang bunga sini. Indi sila magpatindog kag iban ang magapuyo . . . Indi sila magapangabudlay sa walay pulos, ukon magapanganak nga sa kalalat-an.” Wala sing halit ukon samad nga indi mapaayo. Ang pagsalig sa sini nga paglaum amat-amat nga magadula sang kasubo kag kalisod halin sa tagipusuon sang tawo.​—⁠Isaias 65:​21-23.

Epektibo gid nga bulong sa tagipusuon ang Biblia. Ginapaayo na sang mga panudlo sini ang mga pilas sang inaway. Ang mga magkaaway anay ginahiusa sa isa ka bug-os kalibutan nga paghiliutod. Magapadayon ini nga pagpang-ayo sa bag-ong sistema sang Dios tubtob wala na sing dumot kag kaakig, kalisod kag kasubo sa mga tagipusuon sang katawhan. Ang Manunuga nagapanaad nga “ang nagligad nga mga butang indi na pagdumdumon, ukon magsulod sa tagipusuon.”​—⁠Isaias 65:⁠17.

[Nota]

[Blurb sa pahina 4]

“Natun-an ko sa Biblia nga ang tanan sadtong tuig sang pagpakig-away nauyang lamang”

[Blurb sa pahina 5]

Makaimpluwensia gid sing daku ang Biblia sa tagipusuon sang magkaaway anay

[Blurb sa pahina 6]

Amat-amat nga ginbuslan sing pagsalig kag pagpakig-abyan ang dumot kag kaakig

[Blurb sa pahina 6]

Sa tion nga ang isa ka bumalasa magpatuytoy sa Biblia, matigayon niya ang bag-o nga mga prinsipio kag mga talaksan

[Retrato sa pahina 7]

Ang mga magkaaway anay nahiusa na karon sa isa ka bug-os kalibutan nga paghiliutod

[Picture Credit Line sa pahina 4]

Refugee camp: UN PHOTO 186811/J. Isaac