Ang mga Manugtatap kag mga Ministeryal nga Alagad Gintangdo sing Teokratiko

“Tatapa ninyo ang inyo kaugalingon kag ang bug-os nga panong, nga sa ila gintangdo kamo sang balaan nga espiritu nga mga manugtatap.”​—⁠BINUHATAN 20:⁠28.

1, 2. Paano natuman ang Isaias 60:​22?

SI Jehova nagtagna anay nga may talalupangdon nga butang nga mahanabo sa tion sang katapusan. Paagi kay manalagna Isaias, ginsiling anay: “Ang diutay mangin isa ka libo, kag ang magamay mangin isa ka gamhanan nga pungsod. Ako, si Jehova, magapadali sini sa iya kaugalingon nga tion.”​—⁠Isaias 60:⁠22.

² May pamatuod bala nga ini nga tagna natuman karon? Huo, sa pagkamatuod! Sang katuigan 1870, isa ka kongregasyon sang katawhan ni Jehova ang gintukod sa Allegheny, Pennsylvania, E.⁠U.⁠A. Gikan sa sadtong diutay nga ginsuguran, linibo ka kongregasyon ang natukod kag nagauswag sa bug-os nga kalibutan. Minilyon ka manugbantala sang Ginharian​—⁠isa ka gamhanan nga pungsod⁠—​ang nagapakig-upod na karon sa kapin sa 91,000 ka kongregasyon sa 235 ka kadutaan sa bug-os nga duta. Nagapamatuod gid ini nga ginapadasig ni Jehova ang pagtipon sa matuod nga mga sumilimba sa wala pa magsugod ang “dakung kapipit-an,” nga tuman na kalapit karon.​—⁠Mateo 24:​21; Bugna 7:​9-14.

3. Ano ang kahulugan sang bawtismuhan ‘sa ngalan sang Amay, sang Anak, kag sang balaan nga espiritu’?

³ Pagkatapos nga gindedikar ang kaugalingon kay Jehova, kag nahisanto sa mga instruksion ni Jesus, ining minilyon ginbawtismuhan “sa ngalan sang Amay kag sang Anak kag sang balaan nga espiritu.” (Mateo 28:19) Bangod ginbawtismuhan “sa ngalan sang Amay,” nagakahulugan ini nga ginakilala sining dedikado nga mga indibiduwal si Jehova subong ang ila langitnon nga Amay kag Manughatag-Kabuhi kag nagapasakop sila sa iya pagkasoberano. Ang bawtismo ‘sa ngalan sang Anak’ nagakahulugan nga ginabaton nila si Jesucristo subong ang ila Manuggawad, Lider, kag Hari. Ginakilala man nila ang papel sang balaan nga espiritu, ukon aktibo nga kusog sang Dios, sa pagtuytoy sang ila kabuhi. Nagapakita ini nga ginbawtismuhan sila ‘sa ngalan sang balaan nga espiritu.’

4. Paano ginatangdo ang Cristianong mga ministro?

⁴ Sa pagbawtismo sa ila, ang bag-ong mga disipulo gintangdo subong mga ministro ni Jehova nga Dios. Sin-o ang nagtangdo sa ila? Sa pagpasangkad, ang mga pulong nga narekord sa 2 Corinto 3:⁠5 naaplikar sa ila: “Ang amon pagkasangkol sing nagakaigo [subong mga ministro] gikan sa Dios.” Wala na sing daku pa nga kadungganan ang mahimo nila handumon kundi ang tangduan ni Jehova nga Dios mismo! Pagkatapos sang ila bawtismo, padayon sila nga magatubo sa espirituwal subong mga ministro sang “maayong balita” kon batunon nila ang mga pag-ubay sang espiritu sang Dios kag padayon nga sundon ang iya Pulong.​—⁠Mateo 24:​14; Binuhatan 9:⁠31.

Teokratiko​—⁠Indi Demokratiko​—⁠nga Pagtangdo

5. Ang Cristianong mga manugtatap kag mga ministeryal nga alagad ginapili bala sing demokratiko? Ipaathag.

⁵ Agod maatipan ang espirituwal nga mga kinahanglanon sang nagadugang nga kadamuon sang aktibo nga mga ministro, ang hamtong nga pagtatap sang sangkol nga mga manugtatap kag ang lantip nga pagbulig sang mga ministeryal nga alagad kinahanglanon. (Filipos 1:⁠1) Paano ginatangdo ining espirituwal nga mga lalaki? Indi sa mga paagi subong sang ginagamit sa Cristiandad. Halimbawa, ang Cristiano nga mga manugtatap wala ginapili sing demokratiko, kon sayuron, ginaboto sang kalabanan nga mga tawo nga nagapakig-upod sa isa ka kongregasyon. Sa baylo, ini nga mga pagtangdo  ginahimo sing teokratiko. Ano ang kahulugan sina?

6. (a) Ano ang matuod nga teokrasya? (b) Ngaa ang pagtangdo sa mga manugtatap kag mga ministeryal nga alagad teokratiko?

⁶ Sa simple nga hambal, ang matuod nga teokrasya amo ang pagginahom sang Dios. Ang mga Saksi ni Jehova kinabubut-on nga nagapasakop sa iya pagginahom kag nagabinuligay sa paghimo sang kabubut-on sang Dios. (Salmo 143:​10; Mateo 6:​9, 10) Ang mga pagtangdo sa Cristianong mga manugtatap, ukon mga gulang, kag sa mga ministeryal nga alagad teokratiko bangod ang proseso sa pagrekomendar kag pagtangdo sa sining masaligan nga mga lalaki ginahimo suno sa kahimusan sang Dios nga ginabalay sa Balaan nga Kasulatan. Kag subong “pangulo sa ibabaw sang tanan,” si Jehova may kinamatarong gid sa pagpat-od kon paano magapanghikot ang iya kitaon nga organisasyon.​—⁠1 Cronica 29:​11; Salmo 97:⁠9.

7. Paano ginadumalahan ang mga Saksi ni Jehova?

⁷ Tuhay sa madamong relihion sang Cristiandad, ang mga Saksi ni Jehova wala nagapamat-od para sa ila kaugalingon sang porma sang espirituwal nga gobierno nga sa idalom sini nagapanghikot sila. Ining sinsero nga mga Cristiano nagapanikasog nga sundon ang mga talaksan ni Jehova. Ang mga manugtatap sa tunga nila wala ginbutang sa ila katungdanan paagi sa kongregasyon, hirarkiya, ukon presbiteryo nga porma sang gobierno sang simbahan. Kon ang mga kalibutanon magatinguha sa pagpasilabot sa sining mga pagtangdo, ang katawhan ni Jehova wala nagakompromiso. Sing di-mationg, ginahuptan nila ang panindugan nga ginpabutyag sing maathag sang mga apostoles sadtong unang siglo sang nagsiling sila: “Dapat namon tumanon ang Dios subong manuggahom sa baylo sang mga tawo.” (Binuhatan 5:29) Sa amo, ang mga Saksi nagapasakop sang ila kaugalingon sa Dios sa tanan nga butang. (Hebreo 12:⁠9; Santiago 4:⁠7) Ang pagsunod sa teokratikong paagi nagapahamuot sa Dios.

8. Ano ang kinatuhayan sang demokratiko kag teokratiko nga mga paagi?

⁸ Subong mga alagad sang Dakung Teokrata, si Jehova, maayo nga dumdumon naton ang mga kinatuhayan sang demokratiko kag teokratiko nga mga paagi. Ang demokratiko nga mga proseso nagakinahanglan sing alangay nga representasyon kag masunson nga makilal-an paagi sa pagkampanya para sa katungdanan kag pagpili paagi sa boto sang mayoriya. Ini nga mga paagi wala ginahimo sa teokratikong mga pagtangdo. Wala ini maghalin sa mga tawo; ni maggikan ini sa pila ka legal nga ahensia. Ayhan nagapatuhoy sa pagtangdo sa iya mismo ni Jesus kag ni Jehova subong “apostol sa mga pungsod,” si Pablo nagsiling sa mga taga-Galacia nga gintangdo sia “indi gikan sa mga tawo ni paagi sa tawo, kundi paagi kay Jesucristo kag sa Dios nga Amay, nga nagbangon sa iya gikan sa minatay.”​—⁠Roma 11:​13; Galacia 1:⁠1.

Gintangdo Sang Balaan nga Espiritu

9. Ano ang ginasiling sang Binuhatan 20:​28 tuhoy sa pagtangdo sa Cristianong mga manugtatap?

⁹ Ginpahanumdom ni Pablo ang mga manugtatap sa Efeso nga gintangdo sila sang Dios paagi sa balaan nga espiritu. Sia nagsiling: “Tatapa ninyo ang inyo kaugalingon kag ang bug-os nga panong, nga sa ila gintangdo kamo sang balaan nga espiritu nga mga manugtatap, agod bantayan ang kongregasyon sang Dios, nga ginbakal niya sang dugo sang iya kaugalingon nga Anak.” (Binuhatan 20:28) Ining Cristianong mga manugtatap kinahanglan nga padayon nga ubayan sang balaan nga espiritu samtang ginahimo nila ang ila mga katungdanan subong mga manugbantay sang panong sang Dios. Kon ang tawo nga gintangdo sa isa ka katungdanan wala na nagasunod sa talaksan sang Dios, sa ulihi ang balaan nga espiritu magapanghikot agod pahalinon sia sa iya katungdanan.

10. Ngaa ang balaan nga espiritu nagatungod sing importante nga papel sa teokratikong mga pagtangdo?

¹⁰ Ngaa ang balaan nga espiritu nagatungod sing importante nga papel? Una sa tanan, ang rekord nga nagabalay sang mga butang nga dapat himuon agod nagakabagay sa espirituwal nga pagdumala gin-inspirar sang balaan nga espiritu. Sa iya mga sulat kanday Timoteo kag Tito, ginbalay ni Pablo ang mga talaksan nga dapat sundon sang mga manugtatap kag mga ministeryal nga alagad. Sa kabilugan, ginsambit niya ang 16 ka butang. Halimbawa, ang mga manugtatap dapat nga di-salabdungon, mahaganhaganon sa mga batasan, maligdong sing hunahuna, mahim-ong, maabiabihon, kalipikado sa pagtudlo, kag huwaran subong mga ulo sang pamilya. Dapat sila mangin timbang sa paggamit sing alkoholiko nga ilimnon, indi mangin  mga mahigugmaon sang kuwarta, kag dapat nga may pagpugong sa kaugalingon. Sa kaanggid, ang mataas nga mga talaksan ginpatuman sa mga lalaki nga nagatinguha nga tangduan subong mga ministeryal nga alagad.​—⁠1 Timoteo 3:​1-10, 12, 13; Tito 1:​5-9.

11. Ano ang pila sang mga kalipikasyon nga dapat lab-uton sang mga lalaki nga nagatinguha nga matigayon ang responsabilidad sa kongregasyon?

¹¹ Ang pagrepaso sa sining mga kalipikasyon nagapakita nga ang mga tawo nga nagapanguna sa pagsimba kay Jehova dapat mangin huwaran sa Cristianong paggawi. Ang mga lalaki nga nagatinguha nga makatigayon sing responsabilidad sa kongregasyon dapat magpakita sing pamatuod nga ang balaan nga espiritu nagapanghikot sa ila. (2 Timoteo 1:14) Dapat makita nga ang espiritu sang Dios nagapatubas sa sining mga lalaki sang bunga sang “gugma, kalipay, paghidait, pagkamainantuson, pagkalulo, pagkaayo, pagtuo, pagkakalmado, pagpugong sa kaugalingon.” (Galacia 5:​22, 23) Ini nga mga bunga makita sa ila mga pagpakig-angot sa mga masigkatumuluo kag sa iban pa. Sa pagkamatuod, ang iban mahimo nga nagalabaw sa pagpakita sing pila ka bunga sang espiritu, samtang ang iban naman mahimo nagasunod sang iban pa nga mga kalipikasyon para sa mga manugtatap sa maayo gid nga paagi. Apang, sa ila kabug-usan nga pagkabuhi, ang tanan nga nagalaum nga matangdo subong mga manugtatap ukon mga ministeryal nga alagad dapat magpakita nga sila espirituwal nga mga tawo, nga nagasunod sa mga butang nga ginapatuman sang Pulong sang Dios.

12. Sin-o ang masiling nga gintangdo sang balaan nga espiritu?

¹² Sang ginlaygayan ni Pablo ang iban nga mangin mga manug-ilog niya, ginhimo niya ini nga may kahilwayan sa paghambal bangod gin-ilog niya mismo si Jesucristo, nga ‘nagbilin sa aton sing huwaran agod masunod naton sing maayo ang iya mga tikang.’ (1 Pedro 2:​21; 1 Corinto 11:⁠1) Sa amo, ang mga tawo nga nagasunod sang mga butang nga ginapatuman sang Kasulatan sa tion nga gintangdo sila subong mga manugtatap ukon mga ministeryal nga alagad masiling nga gintangdo sang balaan nga espiritu.

13. Paano ginabuligan sang balaan nga espiritu ang mga nagarekomendar sang mga lalaki nga magaalagad sa kongregasyon?

¹³ May isa pa ka butang nga nagapakita kon paano nagapanghikot ang balaan nga espiritu sa pagrekomendar kag sa pagtangdo sa mga manugtatap. Si Jesus nagsiling nga ‘ang Amay sa langit nagahatag sing balaan nga espiritu sa mga nagapangayo sa iya.’ (Lucas 11:13) Gani kon ang mga gulang sa lokal nga kongregasyon nagasapol agod magrekomendar sing mga lalaki para sa responsabilidad sa kongregasyon, nagapangamuyo sila nga ubayan sila sang espiritu sang Dios. Ginapasad nila ang ila mga rekomendasyon suno sa ginasiling sang inspirado nga Pulong sang Dios, kag ang balaan nga espiritu nagabulig sa ila sa paghantop kon bala ang indibiduwal nga ginabinagbinag nga tangduan nagasunod sang mga butang nga ginapatuman sang Kasulatan. Ang mga nagahimo sing mga rekomendasyon indi dapat di-nagakaigo nga maimpluwensiahan sang nagguwa nga dagway, tinun-an, ukon kinaugali nga mga ikasarang. Ang ila panguna nga ginatalupangod amo ang kon bala isa sia ka espirituwal nga tawo, isa nga walay pangalag-ag nga mapalapitan sang mga katapo sang kongregasyon agod pangayuan sing espirituwal nga laygay.

14. Ano ang matun-an naton gikan sa Binuhatan 6:​1-3?

¹⁴ Samtang ginabuligan sang hubon sang mga gulang ang nagalakbay nga mga manugtatap sa pagrekomendar sa mga kauturan nga lalaki agod mag-alagad subong mga gulang kag mga ministeryal nga alagad, ang aktuwal nga mga pagtangdo ginahimo suno sa sulundan nga ginpahamtang sadtong unang siglo. Sang isa ka bes, ginkinahanglan anay ang mga lalaki nga kalipikado sa espirituwal agod mag-atipan sa isa ka importante nga hilikuton. Ang nagadumala nga hubon naghatag sang masunod nga panuytoy: “Pangita kamo para sa inyo kaugalingon sing pito ka napamatud-an nga lalaki gikan sa tunga ninyo, nga puno sang espiritu kag kaalam, agod matangdo namon sila sa kinahanglanon nga buluhaton.” (Binuhatan 6:​1-⁠3) Samtang ang mga lalaki nga direkta nga nagaatipan sa kahimtangan naghimo sing mga rekomendasyon, ang mga pagtangdo ginhimo sang masaligan nga mga lalaki didto sa Jerusalem. Ini man nga sulundan ang ginasunod karon.

15. Paano nadalahig ang Nagadumala nga Hubon may kaangtanan sa pagtangdo sa mga lalaki?

¹⁵ Ang Nagadumala nga Hubon sang mga Saksi ni Jehova direkta nga nagatangdo sang tanan nga  katapo sang mga Komite sang Sanga. Sa pagpamat-od kon sin-o ang mahimo magbaton sining mabug-at nga responsabilidad, ginadumdom sang Nagadumala nga Hubon ang pinamulong ni Jesus: “Ang tagsatagsa nga ginhatagan sing madamo, madamo ang pangayuon sa iya; kag ang isa nga gintugyanan sang mga tawo sing madamo, labi pa sa kinaandan ang pangayuon nila sa iya.” (Lucas 12:48) Magluwas sa pagtangdo sa mga katapo sang Komite sang Sanga, ang Nagadumala nga Hubon nagatangdo man sang mga gulang sa Bethel kag nagalakbay nga mga manugtatap. Apang, ginahatagan nila sing awtorisasyon ang masaligan nga mga kauturan sa pagpanghikot para sa ila sa paghimo sang iban pa nga mga pagtangdo. May yara man Makasulatanhon nga halimbawa para sa sini.

‘Magtangdo, Suno sa Gintulin Ko sa Imo’

16. Ngaa ginbilin ni Pablo si Tito sa Creta, kag ano ang ginapakita sini tuhoy sa teokratikong mga pagtangdo karon?

¹⁶ Si Pablo nagsiling sa iya kaupod nga manugpangabudlay nga si Tito: “Sa sining rason ginbilin ko ikaw sa Creta, agod nga matadlong mo ang mga butang nga may depekto kag magtangdo sing gulang nga mga lalaki sa mga siudad, suno sa gintulin ko sa imo.” (Tito 1:⁠5) Nian ginbalay ni Pablo ang mga kalipikasyon nga dapat pangitaon ni Tito sa mga lalaki nga mangin kalipikado sa sining mga pagtangdo. Busa, sa karon, ang Nagadumala nga Hubon nagatangdo sing kalipikado nga mga kauturan nga lalaki sa mga sanga agod magtiglawas sa sini sa paghimo sing mga pagtangdo sang mga gulang kag mga ministeryal nga alagad. Yadtong nagapanghikot bilang tiglawas sang Nagadumala nga Hubon dapat maghalong nga nahangpan nila sing maayo kag ginasunod ang Makasulatanhon nga mga giya sa paghimo sini nga mga pagtangdo. Gani, sa idalom sang pagtuytoy sang Nagadumala nga Hubon nga ang sangkol nga mga lalaki ginatangdo sa pag-alagad sa mga kongregasyon sang mga Saksi ni Jehova sa bug-os nga kalibutan.

17. Paano ginahimo sang sanga talatapan ang mga rekomendasyon para sa pagtangdo sa mga manugtatap kag mga ministeryal nga alagad?

¹⁷ Kon ang mga rekomendasyon sa pagtangdo sing mga manugtatap kag mga ministeryal nga alagad ginapadala sa sanga talatapan sang Watch Tower Society, ang eksperiensiado nga mga lalaki nagasandig sa pag-ubay sang espiritu sang Dios sa paghimo sing mga pagtangdo. Ining mga lalaki nagabatyag nga may salabton, nakahangop nga indi nila dapat pag-itakdong ang ila mga kamot sing padasudaso kay bisan sin-o, kay basi makig-ambit sila sa iya mga sala.​—⁠1 Timoteo 5:⁠22.

18, 19. (a) Paano ginapaalinton ang pila ka pagtangdo? (b) Paano ginahimo ang bug-os nga proseso sang rekomendasyon kag pagtangdo?

 ¹⁸ Ang pila ka pagtangdo mahimo mapaalinton paagi sa isa ka sulat nga may opisyal nga timbre gikan sa isa ka legal nga ahensia. Ini nga sulat mahimo gamiton sa pagtangdo sa kapin sa isa ka utod nga lalaki sa kongregasyon.

¹⁹ Ang teokratiko nga mga pagtangdo nagahalin kay Jehova paagi sa iya Anak kag sa kitaon nga alagyan sang Dios sa duta, “ang matutom kag mainandamon nga ulipon” kag ang Nagadumala nga Hubon sini. (Mateo 24:​45-47) Ang bug-os nga proseso sini nga rekomendasyon kag pagtangdo ginatuytuyan, ukon ginaubayan, sang balaan nga espiritu. Amo gid sini ang kahimtangan bangod ang mga kalipikasyon ginabalay sa Pulong sang Dios, nga inspirado sang balaan nga espiritu, kag ang indibiduwal nga gintangdo nagahatag sing pamatuod nga nagapatubas sang bunga sina nga espiritu. Busa, ang mga pagtangdo dapat tamdon subong nga ginhimo sang balaan nga espiritu. Subong nga ang mga manugtatap kag mga ministeryal nga alagad gintangdo anay sing teokratiko sang unang siglo, amo man ini sa karon.

Nagapasalamat sa Pagtuytoy ni Jehova

20. Ngaa nagaugyon kita sa balatyagon ni David nga narekord sa Salmo 133:​1?

²⁰ Sa sining tion sang espirituwal nga kabuganaan kag teokratiko nga pag-uswag sa hilikuton nga pagbantala sing Ginharian, nagapasalamat kita nga si Jehova amo gid ang may salabton sa pagtangdo sa mga manugtatap kag sa mga ministeryal nga alagad. Ining Makasulatanhon nga kahimusan nagabulig agod mahuptan ang iya sang Dios mataas nga mga talaksan sang pagkamatarong sa tunga naton subong mga Saksi ni Jehova. Isa pa, ang Cristianong espiritu kag hanuot nga mga panikasog sining mga lalaki nagaamot sing daku sa aton dalayawon nga paghidait kag paghiusa subong mga alagad ni Jehova. Busa, kaangay ni salmista David, ginapahulag kita sa pagtu-aw: “Yari karon! Daw ano kaayo kag daw ano katahom sang mag-ulutod nga magpuyo sing tingob sa paghiliusa!”​—⁠Salmo 133:⁠1.

21. Paano karon natuman ang Isaias 60:​17?

²¹ Daku gid ang aton pasalamat tungod sa pagtuytoy ni Jehova paagi sa iya Pulong kag balaan nga espiritu! Kag may kahulugan gid ang mga pulong nga narekord sa Isaias 60:​17: “Sa baylo sang saway magadala ako sing bulawan, kag sa baylo sang salsalon magadala ako sing pilak, kag sa baylo sang kahoy, saway, kag sa baylo sang mga bato, salsalon; kag itangdo ko ang paghidait subong imo mga manugdumala kag ang pagkamatarong subong imo mga manughatag sing buluhaton.” Samtang ang teokratiko nga mga paagi progresibo nga ginapatuman sing labi pa sa tunga sang mga Saksi ni Jehova, naagom naton ining makalilipay nga mga kahimtangan sa dutan-on nga organisasyon sang Dios.

22. Tungod sa ano nga nagapasalamat gid kita, kag ano ang dapat nga determinado naton nga himuon?

²² Nagapasalamat gid kita tungod sa teokratikong mga kahimusan nga ginapatuman sa tunga naton. Kag nagapasalamat gid kita sa lakas apang makalilipay nga hilikuton nga ginahimo sang mga manugtatap kag mga ministeryal nga alagad nga gintangdo sing teokratiko. Bug-os tagipusuon naton nga ginabayaw ang aton mahigugmaon nga langitnon nga Amay, nga naghatag sa aton sing espirituwal nga kabuganaan kag nagpakamaayo sa aton sing bugana gid. (Hulubaton 10:22) Busa, mangin determinado kita nga padayon nga makigdungan sa organisasyon ni Jehova. Labaw sa tanan, padayon kita nga mag-alagad sing nahiusa sa kadungganan, kadayawan, kag kahimayaan sang daku kag balaan nga ngalan ni Jehova.

Paano Mo Sabton?

• Ngaa makasiling kita nga ang pagtangdo sa mga manugtatap kag sa mga ministeryal nga alagad teokratiko, indi demokratiko?

• Paano ang masaligan nga Cristianong mga lalaki ginatangdo sang balaan nga espiritu?

• Paano nadalahig ang Nagadumala nga Hubon sa pagtangdo sa mga manugtatap kag sa mga ministeryal nga alagad?

• Tuhoy sa teokratikong mga pagtangdo, ngaa dapat kita magpasalamat kay Jehova?

[Mga Pamangkot sa Pagtinuon]

[Mga retrato sa pahina 15]

Ang mga gulang kag mga ministeryal nga alagad may pribilehiyo nga mag-alagad paagi sa teokratiko nga pagtangdo