Ang mga Saksi ni Jehova Nagaabante nga may Malig-on nga Pagtuo!

Report sa Tuigan nga Miting

SA SINING panahon sang pagkamaduhaduhaon kag pagkawalay pagtuo, talalupangdon ang mga Saksi ni Jehova subong mga Cristiano nga may malig-on nga pagtuo. Gin-athag ini sa tuigan nga miting sang Watch Tower Bible and Tract Society of Pennsylvania, nga ginhiwat sa Assembly Hall sang mga Saksi ni Jehova sa Jersey City, New Jersey, sang Sabado, Oktubre 7, 2000.⁠ *

Sa iya nagabukas nga pamulongpulong, ang tsirman nga si John E. Barr, nga isa ka katapo sang Nagadumala nga Hubon sang mga Saksi ni Jehova, nagsiling: “Sa binilyon sa bug-os nga duta, nakahibalo kag nagatuo kita nga ang hinigugma nga Anak ni Jehova, si Cristo Jesus, nagalingkod na karon sa trono sa langit kag nagagahom sa tunga sang iya mga kaaway.” Ginpresentar ang pamatuod sining malig-on nga pagtuo sa anom ka makakulunyag nga report halin sa bug-os nga kalibutan.

Paglutos sa Espiritismo Paagi sa Kamatuoran Sang Biblia sa Haiti

Lapnag gid ang espiritismo sa Haiti. “Sa masami,” siling sang coordinator sang Komite sang Sanga nga si John Norman, “ang mga tawo nagahimo sang voodoo agod amligan ang ila kaugalingon.” Isa ka manughiwit ang nagduhaduha sang nakumpol ang iya isa ka batiis sa aksidente. ‘Ngaa natabo ini sa akon kon ginaamligan ako sang mga espiritu?’ palibog niya. Kaangay sa madamo pa nga iban, gintudluan sang mga Saksi ni Jehova ini nga tawo sang kamatuoran kag ginbuligan nga makapanginpalos sa espiritismo. Ang posible nga pag-uswag sa Haiti makita sa katunayan nga sang Abril 19, 2000, apat ka pilo sang kadamuon sang mga manugbantala sang Ginharian sa sina nga pungsod ang nagtambong sa Memoryal sang kamatayon ni Cristo.

Kakugi sa Malapad nga Teritoryo Sang Korea

Sa Korea, 40 porsiento sang mga Saksi ni Jehova ang yara sa bug-os tion nga pag-alagad. “Bangod sining madamo kaayo nga manugbantala,” siling sang coordinator sang Komite sang Sanga nga si Milton Hamilton, “matuptupan ang amon teritoryo nga may kapin sa 47 ka milyon ka tawo sing halos makaisa kada bulan.” Talalupangdon ilabi na ang pag-uswag sa mga kongregasyon nga nagagamit sing sign language. Sa isa ka sirkito nga nagagamit sing sign language, 800 ka pagtuon sa Biblia sa puluy-an ang ginahiwat. Sa promedyo, isa ini ka pagtuon sa kada manugbantala. Sing makapasubo, ang pamatan-on nga mga kauturan nga lalaki yara gihapon sa prisuhan bangod sang ila neutralidad. Apang, ginatratar sing maayo ining matutom nga mga Cristiano, kag masami nga ginahatagan sila sing masaligan nga mga trabaho.

 Pagpaayaw sa mga Kinahanglanon Bangod Sang Pag-uswag sa Mexico

Ang pinakamataas nga kadamuon nga 533,665 ka manugbantala sang Ginharian nagreport sang pag-alagad sa latagon sa Mexico sang Agosto 2000. Kapin sa tatlo ka pilo sina nga kadamuon sang mga indibiduwal ang nagtambong sa Memoryal. “Tulumuron namon sini nga tuig ang pagtukod sing 240 pa ka Kingdom Hall,” siling sang coordinator sang Komite sang Sanga nga si Robert Tracy. “Apang,” dugang niya, “madamo pa ang kinahanglan namon.”

Huwaran gid ang mga pamatan-on sa tunga sang mga Saksi ni Jehova sa Mexico. Tuhoy sa isa ka pamatan-on, nagsiling ang isa ka Katoliko nga pari: “Luyag ko ang bisan isa lang nga kaangay niya sa akon mga sumulunod. Ginadayaw ko ining mga tawo bangod sang ila determinasyon kag maalamon nga paggamit sa Biblia. Ginapangapinan nila ang Dios, bisan mabutang pa sa katalagman ang ila kabuhi.”

Integridad Walay Sapayan Sang Kagamo sa Sierra Leone

Halin sang Abril 1991, sang nag-utwas ang inaway sibil sa Sierra Leone, linibo ka tawo ang napatay, nahalitan, ukon nabalda. “Daku gid ang epekto sang inaway kag kabudlayan sa mga tawo,” report sang coordinator sang Komite sang Sanga nga si Bill Cowan. “Madamo sang wala anay nagasapak sa amon mensahe ang interesado na karon sa pagpamati. Kinaandan na lamang nga nagakadto nga wala ginaagda ang mga tawo sa amon mga Kingdom Hall agod magtambong sa miting sa nahauna nga tion. Masami nga ginapadulog ang mga kauturan sa dalan kag ginapangabay sing pagtuon sa Biblia.” Walay sapayan sang padayon nga pagkawalay kalig-unan sa pungsod, nagapamunga ang hilikuton nga pagbantala sang Ginharian sa Sierra Leone.

Daku nga Programa sa Pagtukod sa Bagatnan nga Aprika

Sa sining tion, kinahanglan ang pila ka libo ka Kingdom Hall sa teritoryo nga ginaatipan sang sanga talatapan sa Bagatnan nga Aprika. Ginatos ka tilipunan ang napatindog na. “Sa baylo nga magtipon sa isa ka hayobhayob ukon sa idalom sang kahoy, subong sang ginahimo anay, ang amon kauturan nagatipon na sa isa ka nagakaigo nga duog nga may nagakabagay nga mga lingkuranan,” siling sang katapo sang Komite sang Sanga nga si John Kikot. “Bisan pa simple lamang ang desinyo sang kalabanan sining mga Kingdom Hall, masami nga matalupangdan ini subong labing dalayawon nga mga tinukod sa lugar. Sa iban nga mga duog, nakita nga sa tapos makapatindog sing Kingdom Hall, kapin pa sa doble ang pag-uswag sang kongregasyon sa masunod nga tuig.”

Isa ka Bag-ong Henerasyon Sang mga Saksi sa Ukraine

Sang 2000 nga tuig sa pag-alagad, ini nga pungsod may pinakamataas nga kadamuon nga 112,720 ka manugbantala. Kapin sa 50,000 sa ila ang nakatuon sang kamatuoran sang Biblia sang nagligad nga lima ka tuig. “Sa pagkamatuod, nagbangon si Jehova sing isa ka bag-o kag batan-on nga henerasyon sang mga Saksi ni Jehova agod magbantala sang iya ngalan!” siling ni John Didur, ang coordinator sang Komite sang Sanga. “Sang nagligad nga duha ka tuig,” dugang niya, “nakapahamtang kami sing kapin sa 50 ka milyon nga magasin, nga katumbas sa populasyon sang pungsod. Kada bulan, sa promedyo, nagabaton kami sing isa ka libo ka sulat halin sa interesado nga mga tawo nga nagapangabay sing dugang pa nga impormasyon.”

Ang Iban Pa Makatalandog ngamga Bahin Sang Programa

Si Daniel Sydlik, nga katapo sang Nagadumala nga Hubon, naghatag sing makawiwili nga pamulongpulong. Ang artikulo nga “Kon Paano ang Nagadumala nga Hubon Tuhay sa Legal nga Korporasyon,” nga makita sa sini nga magasin, ginpasad sa sinang impormatibo nga presentasyon.

Ginhatag ni Theodore Jaracz sang Nagadumala nga Hubon ang nagapukaw-sa-hunahuna nga diskurso nga natig-uluhan sing “Ang mga Manugtatap kag mga Ministeryal nga Alagad Gintangdo Sing Teokratiko.” Ang isa sang mga artikulo nga makita sa sini nga magasin ginpasad sa sina nga tema.

Ginlakip man sa tuigan nga miting ang makatalandog nga pamulongpulong nga ginhatag sang katapo sang Nagadumala nga Hubon nga si David Splane pasad sa teksto para sa tuig 2001. Pasad sa mga pulong ni apostol Pablo, ini amo ang: ‘Magtindog sing bug-os kag magtuo sing malig-on sa tanan nga kabubut-on sang Dios.’ (Colosas 4:12) Determinado ang mga Saksi ni Jehova sa bug-os nga kalibutan nga himuon ina samtang matutom nila nga ginabantala ang maayong balita sang Ginharian sang Dios sa bug-os nga duta.​—⁠Mateo 24:⁠14.

[Nota]