Ngaa Dapat Palambuon ang Maayo nga Kinaiya?

ANG medyo may edad nga Hapones nga lalaki nga si Kunihito nagsaylo sining karon lang sa Estados Unidos.⁠ * Mga senemana pa lang ang nakaligad nga nag-abot sia, nakaatubang sia sa kahimtangan nga nagguba kuntani sang iya karera. Si Kunihito nag-asoy: “Sang ginpamangkot ako sang akon superbisor kon bala batunon ko ang isa ka responsabilidad, desidido gid ako nga batunon ini. Apang, bangod ginpadaku ako nga tamdon ang kaugdang subong maayo nga kinaiya, nagsabat ako: ‘Indi ako sigurado kon masarangan ko ini, apang tinguhaan ko gid.’ Para sa akon Amerikano nga superbisor, daw indi ako sangkol kag wala sing kompiansa. Sang nahibaluan ko ini, narealisar ko nga dapat ako maghimo sing pila ka pagbag-o.”

Si Maria, nga nagapuyo sa New York City, isa ka maayo gid nga kolehiyala, nga nakahanda pirme sa pagbulig sa iya mga kabutho. Si Juan kabutho ni Maria nga sa pulupanag-on nagapabulig sa iya. Apang naluyag man sia kay Maria kag gintinguhaan niya nga kuhaon ang iya buot. Walay sapayan sang handum ni Maria nga magpabilin nga putli sa moral, nadala sia sa imoral nga mga pagpalahidlahid ni Juan kag nakahimo sing sayop nga seksuwal nga paggawi.

Ang pagpakita sing maayo nga kinaiya sa kalibutan karon nga may nanuhaytuhay nga kultura kag malain nga moral isa gid ka hangkat. Gani ngaa dapat palambuon ang maayo nga kinaiya? Bangod ang maayo nga paggawi nagapahamuot sa Dios, kag pat-od nga luyag sang kalabanan sa aton nga matigayon ang iya kahamuot.

Ginapalig-on sang Pulong sang Dios, ang Biblia, ang mga bumalasa sini nga palambuon ang maayo nga kinaiya. Halimbawa, si apostol Pablo nagsulat: “Bisan ano man nga halangdon kag bisan ano man nga dalayawon, padayon nga binagbinaga ini nga mga butang.” (Filipos 4:8) Kag si apostol Pedro nagasugo sa aton nga ‘panikasugan sing hanuot nga dugangan ang aton pagtuo sing maayong kinaiya.’ (2 Pedro 1:5) Apang ano ang maayo nga kinaiya? Sarang bala ini matudlo sa hulot-klasehan? Paano naton ini mapalambo?

[Nota]