Ang Adlaw sang Paghukom ni Jehova Malapit Na!

“Ang dakung adlaw ni Jehova malapit na. Malapit na ini, kag nagadalidali ini sing tama.”​—⁠SOFONIAS 1:⁠14.

1. Ano nga paandam ang ginhatag sang Dios paagi kay Sofonias?

SI Jehova nga Dios buot na nga magapanghikot batok sa mga malauton. Pamatii! Amo ini ang iya paandam: “Papason ko ang dutan-on nga tawo . . . papason ko ang tawo gikan sa kadaygan sang duta.” (Sofonias 1:⁠3) Ini nga mga pulong sang Soberanong Ginuong Jehova ginpamulong paagi sa iya manalagna nga si Sofonias, ayhan ang apo-sa-tuhod sang matutom nga si Hari Ezequias. Yadto nga pahayag, nga ginhatag sang panahon sang maayo nga si Hari Josias, wala nagapatimaan sing maayo nga mahanabo sa mga malauton nga nagapuyo sa pungsod sang Juda.

2. Ngaa wala matapna sang mga buhat ni Josias ang adlaw sang paghukom ni Jehova?

² Pat-od gid nga ang tagna ni Sofonias labi nga nagpaalisto sa pamatan-on nga si Josias sa kinahanglanon nga tinluan ang Juda gikan sa di-matinlo nga pagsimba. Apang ang mga ginhimo sang hari agod tinluan ang pungsod gikan sa butig nga relihion wala magdula sang tanan nga kalautan sang katawhan ukon magtumbas sang mga kasal-anan sang iya lolo, nga si Hari Manases, nga ‘nagtugob sang Jerusalem sing dugo nga wala sing sala.’ (2 Hari 24:​3, 4; 2 Cronica 34:⁠3) Gani ang adlaw sang paghukom ni Jehova pat-od nga magaabot.

3. Paano kita makapat-od nga posible makalampuwas sa “adlaw sang kaakig ni Jehova”?

³ Apang, may mga makalampuwas sa sinang makakulugmat nga adlaw. Gani, ang manalagna sang Dios naglaygay: “Sa wala pa ang kasuguan magbun-ag sing bisan ano, sa wala pa ang adlaw magligad subong sang labhang, sa wala pa mag-abot sa inyo ang nagadabdab nga kaakig ni Jehova, sa wala pa mag-abot sa inyo ang adlaw sang kaakig ni Jehova, pangitaa ninyo si Jehova, kamo tanan nga mga mahagop sang duta, nga nagahimo sang Iya hudisyal nga desisyon. Pangitaa ang pagkamatarong, pangitaa ang pagkahagop. Ayhan malipdan kamo sa adlaw sang kaakig ni Jehova.” (Sofonias 2:​2, 3) Ginahunahuna ang paglaum nga makalampuwas sa adlaw sang paghukom ni Jehova, binagbinagon naton ang tulun-an ni Sofonias sa Biblia. Ginsulat sa Juda antes sang 648 B.⁠C.⁠E., bahin ini sang “matagnaon nga pulong” sang Dios, nga dapat naton tanan talupangdon sing tinagipusuon.​—⁠2 Pedro 1:⁠19.

Ang Kamot ni Jehova Gin-untay

4, 5. Paano natuman ang Sofonias 1:​1-3 sa mga malauton sa Juda?

⁴ Ang “pulong ni Jehova” kay Sofonias nagasugod sa paandam nga ginsambit kaina. Ang Dios nagpahayag: “ ‘Pat-od nga papason ko ang tanan nga butang sa kadaygan sang duta,’ siling ni Jehova. ‘Papason ko ang dutan-on nga tawo kag ang sapat. Papason ko ang nagalupad nga mga tinuga sa langit kag ang mga isda sa dagat, kag ang mga ginasandaran upod sa mga malauton; kag papason ko ang tawo gikan sa kadaygan sang duta,’ siling ni Jehova.”​—⁠Sofonias 1:​1-3.

⁵ Huo, tapuson ni Jehova ang daku nga kalautan sa pungsod sang Juda. Sin-o ang gamiton sang Dios sa ‘pagpapas sa tanan nga butang sa kadaygan sang duta’? Sanglit si Sofonias maathag nga nagtagna sadtong maaga nga bahin sang paggahom ni Hari Josias, nga nagsugod sang 659 B.⁠C.⁠E., yadtong matagnaon nga mga pulong natuman sang ginhapay sang mga Babilonianhon ang Juda kag ang kapital nga siudad sini, ang Jerusalem, sang 607 B.⁠C.⁠E. Sadto nga tion, ang mga malauton sa Juda ‘ginpapas.’

6-8. Ano ang gintagna sa Sofonias 1:​4-6, kag paano natuman ina nga tagna sa dumaan nga Juda?

 ⁶ Sa pagtagna sang mga buhat sang Dios batok sa butig nga mga sumilimba, ang Sofonias 1:​4-6 nagasiling: “Untayon ko ang akon kamot batok sa Juda kag sa tanan nga pumuluyo sang Jerusalem, kag papason ko gikan sa sining duog ang mga nabilin ni Baal, ang ngalan sang mga saserdote sang dumuluong nga dios upod sa mga saserdote, kag ang mga nagayaub sa mga kasuldadusan sang langit sa ibabaw sang mga atop, kag ang mga nagayaub, nga nagapanumpa kay Jehova kag nagapanumpa paagi kay Malcam; kag ang mga nagapalayo sa pagsunod kay Jehova kag wala nagapangita kay Jehova kag wala nagapamangkot tuhoy sa iya.”

⁷ Ang kamot ni Jehova gin-untay batok sa mga taga-Juda kag mga taga-Jerusalem. Determinado sia nga papason sa kamatayon ang mga sumilimba sang dios sang pertilidad sang Canaan nga si Baal. Ang lainlain nga lokal nga mga diosdios gintawag anay nga mga Baal bangod ang mga nagasimba sa ila naghunahuna nga nagapanag-iya kag may impluwensia sa partikular nga mga lugar. Halimbawa, yara ang Baal nga ginsimba sang mga Moabnon kag mga Midianhon sa Bukid Peor. (Numeros 25:​1, 3, 6) Sa bug-os nga Juda, papason ni Jehova ang mga saserdote ni Baal, subong man ang di-matutom nga saserdotenhon nga mga Levinhon nga naglapas sang kasuguan sang Dios paagi sa pagpakig-upod sa ila.​—⁠Exodo 20:​2, 3.

⁸ Papason man sang Dios ang ‘nagayaub sa kadam-an sang langit,’ ayhan naghimo sing astrolohiya kag nagsimba sa adlaw. (2 Hari 23:​11; Jeremias 19:​13; 32:29) Ang kasingkal sang Dios ipakita man sa mga nagatinguha nga isimpon ang matuod nga pagsimba sa butig nga relihion paagi sa ‘pagpanumpa kay Jehova kag kay Malcam.’ Si Malcam mahimo nga isa pa ka tawag kay Molec, ang pangulo nga dios sang mga Amonhon. Ang pagsimba kay Molec naglakip sang paghalad sa bata.​—⁠1 Hari 11:⁠5; Jeremias 32:⁠35.

Ang Kalaglagan Sang Cristiandad Malapit Na!

9. (a) Sa ano nakasala ang Cristiandad? (b) Indi kaangay sang mga di-matutom sang Juda, ano ang dapat nga determinado naton nga himuon?

⁹ Ini tanan mahimo magpahanumdom sa aton sang Cristiandad, nga hil-ob sang butig nga pagsimba kag astrolohiya. Kag ang iya papel sa paghalad sa minilyon ka kabuhi sa halaran sang suportado-sang-klerigo nga inaway makangilil-ad gid! Indi gid kita mangin kaangay sa mga di-matutom sang Juda, nga ‘nagpalayo sa pagsunod kay Jehova,’ nga nangin di-masinapakon kag wala na magpangita sa iya ukon magpangabay sang iya panuytoy. Sa baylo, huptan naton ang aton integridad sa Dios.

10. Paano mo ipaathag ang matagnaon nga kahulugan sang Sofonias 1:​7?

¹⁰ Ang masunod nga mga pulong sang manalagna nagakabagay sa mga nagahimo sing malain sa Juda kag sa mga malauton sa panahon naton. Ang Sofonias 1:7 nagasiling: “Hipos ka sa atubangan sang Soberanong Ginuong Jehova; kay ang adlaw ni Jehova malapit na, kay si Jehova nag-aman sing halad; ginpakabalaan niya ang iya mga inagda.” Ining “mga inagda” maathag nga amo ang Caldeanhon  nga mga kaaway sang Juda. Ang “halad” amo mismo ang Juda, pati na ang iya kapital nga siudad. Sa amo ginpahibalo ni Sofonias ang katuyuan sang Dios nga laglagon ang Jerusalem, kag ini nga tagna nagatudlo man sa kalaglagan sang Cristiandad. Sa katunayan, bangod ang adlaw sang paghukom sang Dios tuman na kalapit karon, ang bug-os nga kalibutan dapat ‘maghipos sa atubangan sang Soberanong Ginuong Jehova’ kag magpamati sa ginasiling niya paagi sa “diutay nga panong” sang hinaplas nga mga sumulunod ni Jesus kag sang ila mga kaupdanan, ang iya “iban nga mga karnero.” (Lucas 12:​32; Juan 10:16) Ang kalaglagan nagahulat sa tanan nga indi magapamati kag busa nagapahamtang sang ila kaugalingon nga batok sa paggahom sang Ginharian sang Dios.​—⁠Salmo 2:​1, 2.

Sa Dili Madugay​—⁠Isa ka Adlaw Sang Paghaya!

11. Ano ang sadsaran nga kahulugan sang Sofonias 1:​8-11?

¹¹ Nahanungod sa adlaw ni Jehova, ang Sofonias 1:​8-11 nagadugang: “ ‘Mahanabo sa adlaw sang halad kay Jehova nga talupangdon ko ang mga prinsipe, kag ang mga anak sang hari, kag ang tanan nga napanaptan sing panapton nga dumuluong. Kag talupangdon ko ang tagsatagsa nga nagasaka sa plataporma sa amo nga adlaw, nga ginapuno ang balay sang ila mga agalon sing kasingki kag paglimbong. Kag mahanabo sa amo nga adlaw,’ siling ni Jehova, ‘ang gahod sang singgit gikan sa Gawang Sang Isda, kag sang paghaya gikan sa ikaduha nga puod, kag ang mabaskog nga paghugpaas gikan sa kabakuluran. Maghaya kamo, kamo nga mga pumuluyo sang Maktes, kay ang tanan nga negosyante ginpahipos; ang tanan nga nagatimbang sing pilak ginpapas.’ ”

12. Paano ang iban nasapwan nga “napanaptan sing panapton nga dumuluong”?

¹² Si Hari Josias pagabuslan nanday Joacaz, Joaquim, kag Joaquin. Nian magaabot ang paggahom ni Sedequias, nga makilal-an bangod sang paglaglag sa Jerusalem. Bisan pa ini nga kalamidad nagahulat sa ila, ang iban nagpanikasog nga kahamut-an sang kaingod nga mga pungsod paagi sa ‘pagpanapot sing panapton nga dumuluong.’ Sing kaanggid, madamo karon ang nagapakita sa lainlain nga paagi nga indi sila bahin sang organisasyon ni Jehova. Bangod maathag nga bahin sang organisasyon ni Satanas, sila pagasilutan.

13. Nahisanto sa tagna ni Sofonias, ano ang mahanabo kon salakayon sang mga Babilonianhon ang Jerusalem?

¹³ Ang “amo nga adlaw” sang paghusay para sa Juda nagaanggid sa adlaw ni Jehova sa pagpatuman sang paghukom sa iya mga kaaway, sa pagtapos sang kalautan, kag sa pagpamatuod sang iya pagkagamhanan. Samtang ginasalakay sang mga Babilonianhon ang Jerusalem, isa ka singgit ang magagikan sa Gawang Sang Isda. Mahimo nga ginhingalanan ini sing amo sini bangod malapit ini sa tiendahan sang isda. (Nehemias 13:16) Ang mga panong sang Babilonia magasulod sa bahin nga ginatawag nga ikaduha nga puod, kag ang “paghugpaas gikan sa kabakuluran” mahimo nagapatimaan sang tunog sang nagahilapit nga mga Caldeanhon. Ang mga pumuluyo sang Maktes, ayhan sa naibabaw nga Tyropoeon Valley, ‘magahaya.’ Ngaa magahaya sila? Bangod ang komersio, pati na ang “nagatimbang sing pilak,” magadulog didto.

14. Daw ano kasangkad ang pag-usisa sang Dios sa iya nagapangangkon nga mga sumilimba?

¹⁴ Daw ano kasangkad ang pag-usisa ni Jehova sa iya nagapangangkon nga mga sumilimba? Ang tagna nagapadayon: “Mahanabo sa amo nga tion nga usisaon ko sing maayo ang Jerusalem paagi sa mga lampara, kag talupangdon ko ang mga lalaki nga subong sang linugdang sa ila linugdang sang alak kag nagasiling sa ila tagipusuon, ‘Si Jehova indi magahimo sing maayo, kag indi sia magahimo sing malain.’ Kag ang ila manggad mangin inatihan kag ang ila mga balay mangin hinapay. Kag magapatindog sila sing mga balay, apang indi sila magapuyo sa sini; kag magatanom sila sing mga ulubasan, apang indi sila magainom sing alak sini.”​—⁠Sofonias 1:​12, 13.

15. (a) Ano ang mahanabo sa apostata nga mga saserdote sang Jerusalem? (b) Ano ang nagahulat sa mga nagabuhat sang butig nga relihion sa karon?

¹⁵ Ginasimpon sang apostata nga mga saserdote sang Jerusalem ang pagsimba kay Jehova sa butig nga relihion. Bisan pa nagabatyag sila nga may kalig-unan, pangitaon sila sang Dios kaangay sang masanag nga mga lampara nga nagalusot sa espirituwal nga kadudulman nga gindangpan nila. Wala sing isa nga makapalagyo sa proklamasyon kag sa pagpatuman sa paghukom sang Dios. Yadtong  kontento nga mga apostata nagpahimunong na lamang kaangay sang mga linugdang sa idalom sang bariles sang alak. Indi nila luyag matublag sang bisan ano man nga deklarasyon sang pagpasilabot sang Dios sa mga hilikuton sang tawo, apang indi sila makalikaw sa pagpatuman sang paghukom sang Dios sa ila. Indi man makalikaw ang karon nga mga nagabuhat sang butig nga relihion, pati na ang mga katapo sang Cristiandad kag ang mga nag-apostata gikan sa pagsimba kay Jehova. Sa pagpanghiwala nga amo na ini ang “katapusan nga mga adlaw,” nagasiling sila sa ila tagipusuon, “si Jehova indi magahimo sing maayo, kag indi sia magahimo sing malain.” Nagsayop gid sila!​—⁠2 Timoteo 3:​1-5; 2 Pedro 3:​3, 4, 10.

16. Ano ang mahanabo kon ang paghukom sang Dios ipatuman sa Juda, kag paano kita maapektuhan sang ihibalo tuhoy sina?

¹⁶ Ang mga apostata sang Juda ginpaandaman nga atihon sang mga Babilonianhon ang ila manggad, hapayon ang ila mga balay, kag kuhaon ang bunga sang ila mga ulubasan. Ang materyal nga mga butang mangin walay pulos kon ang paghukom sang Dios ipatuman sa Juda. Amo man sini ang mahanabo sa adlaw sang paghukom ni Jehova sa karon nga sistema sang mga butang. Busa, kabay nga may espirituwal nga pagtamod kita kag ‘magtipon sing mga bahandi sa langit’ paagi sa pag-una sa aton kabuhi sang pag-alagad kay Jehova!​—⁠Mateo 6:​19-21, 33.

“Ang Dakung Adlaw ni Jehova Malapit Na”

17. Suno sa Sofonias 1:​14-16, daw ano na kalapit ang adlaw sang paghukom ni Jehova?

¹⁷ Daw ano na kalapit ang adlaw sang paghukom ni Jehova? Suno sa Sofonias 1:​14-16, ang Dios nagahatag sini nga pasalig: “Ang dakung adlaw ni Jehova malapit na. Malapit na ini, kag nagadalidali ini sing tama. Ang tingog sang adlaw ni Jehova mapait. Didto ang gamhanan nga tawo nagasinggit. Ina nga adlaw isa ka adlaw sang kasingkal, isa ka adlaw sang kasisit-an kag sang kalisang, isa ka adlaw sang bagyo kag sang pagkahapay, isa ka adlaw sang kadulom kag sang kaguom, isa ka adlaw sang mga gal-um kag sang madamol nga kaguom, isa ka adlaw sang budyong kag sang paandam nga sinyales, batok sa napamakuran nga mga siudad kag batok sa mataas nga pamusod nga mga torre.”

18. Ngaa indi kita dapat maghinakop nga ang adlaw sang paghukom ni Jehova malayo pa?

¹⁸ Ang makasasala nga mga saserdote, mga prinsipe, kag katawhan sang Juda ginpaandaman nga “ang dakung adlaw ni Jehova malapit na.” Para sa Juda ‘ginadalidali sing tama ang adlaw ni Jehova.’ Sa aton man panahon, wala sing isa ang dapat maghunahuna nga ang pagpatuman sa paghukom ni Jehova batok sa mga malauton madugay pa mahanabo. Sa baylo, subong nga ang Dios naghikot sa  gilayon sa Juda, ‘dalidalion’ man niya ang adlaw sang iya paghukom. (Bugna 16:​14, 16) Daw ano kasakit nga tion ina para sa tanan nga wala magsapak sang mga paandam ni Jehova nga ginahatag sang iya mga Saksi kag wala magbaton sang matuod nga pagsimba!

19, 20. (a) Ano ang pila ka bahin sang pagpatuman sa kasingkal sang Dios sa Juda kag Jerusalem? (b) Bangod sang may pinilian nga paglaglag nga ginaatubang sining sistema sang mga butang, ano nga mga pamangkot ang nag-utwas?

¹⁹ Ang pagpatuman sa kasingkal sang Dios sa Juda kag Jerusalem “isa ka adlaw sang kasisit-an kag sang kalisang.” Ang nagsalakay nga mga Babilonianhon naghimo sing daku nga pagpaantos sa mga pumuluyo sang Juda, pati na ang kalisang sa hunahuna sa atubangan sang kamatayon kag kalaglagan. Yadto nga “adlaw sang bagyo kag sang pagkahapay” isa nga madulom, magal-umon, kag maguom, ayhan indi lamang sing malaragwayon kundi sing literal man, kay ang aso kag pagpamatay yara bisan diin. Isa yadto ka “adlaw sang budyong kag sang paandam nga sinyales,” apang ang mga paandam ginpatunog sing walay pulos.

²⁰ Ang mga bantay sang Jerusalem wala sing mahimo kay ginpukan sang mga hangaway sang Babilonia ang “mataas nga pamusod nga mga torre.” Ang mga pamakod sang malauton nga sistema sang mga butang karon mangin walay pulos man batok sa mga hinganiban sa langitnon nga talaguan sang Dios, nga handa agod gamiton niya sa dili madugay sa may pinilian nga paglaglag. Nagalaum ka bala nga maluwas? Malig-on ka na bala nga nagadampig kay Jehova, ‘nga nagabantay sang tanan nga nagahigugma sa iya apang magalaglag sang tanan nga malauton’?​—⁠Salmo 145:⁠20.

21, 22. Paano matuman ang Sofonias 1:​17, 18 sa aton adlaw?

²¹ Daw ano ka makasiligni nga adlaw sang paghukom ang gintagna sa Sofonias 1:​17, 18! “Pahanabuon ko nga magkalisod ang mga tawo,” siling ni Jehova nga Dios, “kag magalakat gid sila kaangay sang mga tawo nga bulag; bangod nakasala sila batok kay Jehova. Kag ang dugo nila ulaon subong sang yab-ok, kag ang ila tinai subong sang ipot. Bisan ang ila pilak ukon ang ila bulawan indi sarang makaluwas sa ila sa adlaw sang kasingkal ni Jehova; apang paagi sa kalayo sang iya kakugi halunhunon ang bug-os nga duta, kay magahimo sia sing pagpapas, isa nga makangilidlis gid, sa tanan nga pumuluyo sang duta.”

²² Subong sa ginhimo niya anay sang panahon ni Sofonias, pahanabuon ni Jehova ang kalisod sa  “tanan nga pumuluyo sang duta,” sa mga tawo nga nagadumili sa pagpamati sa iya paandam. Bangod nagpakasala sila batok sa Dios, magalakat sila nga walay inugpangapin subong bulag nga mga tawo, nga indi makakita sing kaluwasan. Sa adlaw sang paghukom ni Jehova, ang ila dugo “ulaon subong sang yab-ok,” subong butang nga walay pulos. Sa pagkamatuod, mangin makahuluya gid ang ila kalaglagan, kay laptahon sang Dios ang mga bangkay​—⁠bisan ang mga tinai⁠​—⁠​sining mga malauton sa duta, “subong sang ipot.”

23. Bisan nga ang mga makasasala indi makalampuwas sa “adlaw sang kasingkal ni Jehova,” ano nga paglaum ang ginahatag sang tagna ni Sofonias?

²³ Wala sing isa nga makaluwas sa mga tawo nga nagapakig-away batok sa Dios kag sa iya katawhan. Bisan ang pilak ukon bulawan indi makaluwas sa mga makasasala sang Juda, subong nga ang tinago nga manggad kag hamham indi makahatag sing pangamlig ukon kaluwasan “sa adlaw sang kasingkal ni Jehova” sa Cristiandad kag sa iban pa nga bahin sining sistema sang mga butang. Sa sinang adlaw sang desisyon, “halunhunon ang bug-os nga duta” sang kalayo sang kakugi sang Dios samtang ginalaglag niya ang mga malauton. Bangod nagatuo kita sa matagnaon nga pulong sang Dios, kumbinsido kita nga yara na kita karon sa ulihi nga bahin sang “tion sang katapusan.” (Daniel 12:⁠4) Ang adlaw sang paghukom ni Jehova malapit na, kag sa dili madugay timalusan niya ang iya mga kaaway. Apang, ang tagna ni Sofonias nagatanyag sing paglaum nga kaluwasan. Ano, nian, ang ginapatuman sa aton agod malipdan kita sa adlaw sang kaakig ni Jehova?

Paano Mo Sabton?

• Paano natuman ang tagna ni Sofonias sa Juda kag Jerusalem?

• Ano ang nagahulat sa Cristiandad kag sa tanan nga malauton sa panahon naton?

• Ngaa indi kita dapat maghunahuna nga ang adlaw sang paghukom ni Jehova malayo pa?

[Mga Pamangkot sa Pagtinuon]

[Retrato sa pahina 13]

Si Sofonias masidla nga nagpahayag nga ang adlaw sang paghukom ni Jehova malapit na

[Credit Line]

Halin sa Self-Pronouncing Edition of the Holy Bible, nga nagaunod sing King James kag Revised nga mga bersion

[Retrato sa pahina 15]

Ang adlaw ni Jehova nagkari sa Juda kag Jerusalem sa kamot sang mga Babilonianhon sang 607 B.⁠C.⁠E.

[Retrato sa pahina 16]

Nagalaum ka bala nga maluwas kon laglagon ni Jehova ang mga malauton?