Ano ang Espirituwal nga Paraiso?

SI Gustavo nagdaku sa diutay nga siudad sang Brazil.⁠ * Kutob sa pagkabata gintudluan sia nga ang mabuot nga mga tawo nagakadto sa langit kon mapatay. Wala sia sing namang-an tuhoy sa katuyuan sang Dios nga sa pila ka adlaw matigayon sang matutom nga katawhan ang himpit nga kabuhi sa dutan-on nga paraiso. (Bugna 21:⁠3, 4) Kag may isa pa ka butang nga wala niya mahibaluan. Wala sia makahibalo nga bisan sa karon, mahimo sia mangin sa espirituwal nga paraiso.

Nakabati ka na bala tuhoy sinang espirituwal nga paraiso? Nakahibalo ka bala kon ano ini kag ano ang kinahanglan agod mangin bahin sa sini? Ang bisan sin-o nga luyag gid mangin malipayon dapat makahibalo tuhoy sa sining paraiso.

Pagpangita sa Espirituwal nga Paraiso

Mahimo nga daw indi matuod ang magsiling nga bisan sa karon ang isa mahimo makapuyo sa paraiso. Ining kalibutan indi gid isa ka paraiso. Madamo gid nga tawo ang nakaeksperiensia sang ginlaragway sang dumaan nga Hebreong hari: “Yari karon! ang mga luha sang mga ginapigos, apang wala sila sing manuglugpay; kag sa bahin sang ila mga manugpigos may gahom, amo nga wala sila sing manuglugpay.” (Manugwali 4:1) Minilyon ka tawo ang nagaantos sa garok nga sistema sa politika, relihion, kag ekonomiya, kag wala sila sing kaumpawan, wala sing “manuglugpay.” Madamo pa ang nagahimakas sa pagbayad sang ila mga balayran, sa pagpadaku sang ila mga kabataan, kag sa paghimo sing madamong iban pa kinahanglanon nga mga butang agod makatibawas. Mahimo nga nalipay man sila sa pagbaton sa isa ka manuglugpay, isa nga makapahaganhagan bisan diutay sang lulan. Para sa ila tanan, ang kabuhi indi gid isa ka paraiso.

Kon amo, diin ang espirituwal nga paraiso? Ti, ang Hiligaynon nga tinaga nga “paraiso” may yara kaangtanan sa Griego, Persiano, kag Hebreong mga tinaga nga nagapahangop sing isa ka parke ukon hardin, isa ka mahidaiton kag makaparepresko nga duog. Ang Biblia nagasaad nga sa pila ka adlaw ang duta mangin isa ka pisikal nga paraiso, isa ka tulad-hardin nga puluy-an para sa walay sala nga tawhanon nga rasa. (Salmo 37:​10, 11) Ginahunahuna ini, mahangpan naton nga ang espirituwal nga paraiso isa ka palibot nga makalilipay sa mata kag malinong, nga nagatugot sa isa nga matigayon ang paghidait upod sa isigkatawo kag upod sa Dios. Sa karon, subong sang natukiban ni Gustavo, ina nga paraiso nagaluntad, kag nagalakip ini sa nagadugang nga kadamuon sang tawo.

Sa edad nga 12, namat-od si Gustavo nga mangin isa ka Romanong Katoliko nga pari. Sa pahanugot sang iya mga ginikanan, nagsulod sia sa isa ka relihioso nga seminaryo. Didto nangin interesado sia sa musika, teatro, kag politika, nga ginpauswag sang simbahan sa pagganyat sa mga pamatan-on. Nahibaluan niya nga ang isa ka pari dapat maghugod sang iya kaugalingon sa mga tawo kag nga indi sia mahimo makapangasawa. Apang, ang pila sang mga pari kag mga seminarista nga kilala ni Gustavo nagapaduyog sa imoral nga mga buhat. Sa sini nga palibot, si Gustavo nagsugod sa pag-inom sing lakas sang ulihi. Sing maathag, wala pa niya makita ang espirituwal nga paraiso.

Isa ka adlaw, nakabasa si Gustavo sing isa ka tract sa Biblia nga nagasugid tuhoy sa isa ka dutan-on nga paraiso. Nagpahunahuna ini sa iya tuhoy sa katuyuan sang kabuhi. Sia nagsiling: “Ginsugdan ko nga basahon ang Biblia sing masunson, apang wala ko ini mahangpan. Wala ko pa gani mahibaluan nga ang Dios gali may ngalan.” Naghalin sia sa seminaryo kag nakigsugilanon sa mga Saksi ni Jehova, nga nagpangayo sing bulig agod  mahangpan ang Biblia. Pagkatapos sadto, madasig sia nga nag-uswag kag sang ulihi nagdedikar sang iya kabuhi sa Dios. Natun-an ni Gustavo ang tuhoy sa espirituwal nga paraiso.

Katawhan Para sa Ngalan Sang Dios

Natun-an ni Gustavo nga ang ngalan sang Dios, si Jehova, indi lamang isa ka diutay nga butang para sa isa ka estudyante sang Biblia. (Exodo 6:3) Isa ini ka importante gid nga bahin sang matuod nga pagsimba. Gintudluan ni Jesus ang iya mga sumulunod sa pagpangamuyo: “Amay namon nga yara sa mga langit, pakabalaanon ang imo ngalan.” (Mateo 6:9) Nagahambal sa mga Gentil nga nangin Cristiano, si disipulo Santiago nagsiling: “Ang Dios . . . nagliso sang iya igtalupangod sa mga pungsod sa pagkuha gikan sa ila sing katawhan para sa iya ngalan.” (Binuhatan 15:14) Sadtong unang siglo, ang “katawhan para sa iya ngalan” amo ang Cristianong kongregasyon. May katawhan bala para sa ngalan sang Dios karon? Huo, kag nahisayran ni Gustavo nga inang katawhan amo ang mga Saksi ni Jehova.

Ang mga Saksi ni Jehova aktibo sa 235 ka kadutaan kag teritoryo. Nagadamo sila sing kapin sa anom ka milyon nga ministro, kag walo pa ka milyon nga interesado ang nakatambong sa ila mga miting. Nakilal-an sing lapnag tungod sa ila publiko nga pagministeryo, ginatuman nila ang mga pinamulong ni Jesus: “Ining maayong balita sang ginharian ibantala sa bug-os napuy-an nga duta subong panaksi sa tanan nga kapungsuran.” (Mateo 24:14) Apang, ngaa nagbatyag si Gustavo nga nakita niya ang isa ka espirituwal nga paraiso sa pagpakig-upod sa mga Saksi ni Jehova? Sia nagsiling: “Ginpaanggid ko ang akon nakita sa kalibutan kag ilabi na sa seminaryo sa akon nakita sa tunga sang mga Saksi ni Jehova. Ang daku nga kinatuhayan amo ang gugma sa tunga sang mga Saksi.”

Ang iban nagkomento sing amo man tuhoy sa mga Saksi ni Jehova. Ang isa ka taga-Brazil nga lamharon nga babayi, nga si Miriam, nagsiling: “Indi ako anay makahibalo kon paano magmalipayon, indi bisan sa akon pamilya. Ang una nga tion nga nakita ko ang gugma nga nagapanghikot amo ang sa tunga sang mga Saksi ni Jehova.” Ang isa ka lalaki nga si Christian nagsiling: “Sa pulupanag-on nabuyo ako sa espiritismo, apang ang relihion indi importante sa akon. Mas ginapabaloran ko ang akon tindog sa katilingban kag ang akon trabaho bilang enhinyero. Apang, sang ang akon asawa nagtuon sing Biblia upod sa mga Saksi ni Jehova, nakita ko ang pagbag-o sa iya. Nagdayaw man ako sa kalipay kag sa kakugi sang Cristianong mga babayi nga nagaduaw sa iya.” Ngaa amo sini ang ginahambal sang mga tawo tuhoy sa mga Saksi ni Jehova?

Ano ang Espirituwal nga Paraiso?

Ang isa ka butang nga nagahimo nga tuhay sa mga Saksi ni Jehova amo ang ila apresasyon sa ihibalo sang Biblia. Nagapati sila nga ang Biblia matuod kag ini Pulong sang Dios. Gani, indi lamang sila kontento nga mahibal-an ang sadsaran nga mga panudlo sang ila relihion. May yara sila padayon nga programa sang personal nga pagtuon kag pagbasa sing Biblia. Kon ang isa mas madugay na nga nagapakig-upod sa mga Saksi ni Jehova, mas madamo ang matun-an niya tuhoy sa Dios kag sa Iya kabubut-on subong sang ginpahayag sa Biblia.

Ini nga ihibalo naghilway sa mga Saksi ni Jehova gikan sa mga butang nga nagakuha sang kalipay sang mga tawo, subong sang mga disparatis kag makahalalit nga mga ideya. Si Jesus nagsiling: “Ang kamatuoran magahilway sa inyo,” kag napamatud-an ini sang mga Saksi ni Jehova. (Juan 8:32) Si Fernando, nga naduyog anay sa espiritismo, nagsiling: “Ang ihibalo tuhoy sa kabuhi nga walay katapusan isa gid ka daku nga kaumpawan. Nahadlok ako nga basi mapatay kami sang akon mga ginikanan.” Ang kamatuoran naghilway kay Fernando gikan sa iya kahadlok sa kalibutan sang mga espiritu kag sa ginatawag nga pihak nga kinabuhi.

Sa Biblia, ang ihibalo tuhoy sa Dios naangot gid sa paraiso. Si manalagna Isaias nagsiling: “Indi sila magahimo sing bisan ano nga halit ukon magatuga sing bisan ano nga kagulub-an sa bug-os ko nga bukid nga balaan; bangod ang duta pat-od gid nga matugob sang ihibalo ni Jehova subong sang tubig nga nagatabon sa dagat.”​​—⁠Isaias 11:⁠9.

 Siempre pa, ang ihibalo indi bastante sa pagpaluntad sang paghidait nga gintagna ni Isaias. Ang isa dapat magpanghikot suno sa iya mga natun-an. Si Fernando nagkomento: “Kon ang isa ka tawo nagapalambo sing mga bunga sang espiritu, nagaamot sia sa espirituwal nga paraiso.” Ginpatuhuyan ni Fernando ang mga pulong ni apostol Pablo, nga nagtawag sang maayong mga kinaiya nga dapat palambuon sang isa ka Cristiano nga “bunga sang espiritu.” Ginlista niya ini subong “gugma, kalipay, paghidait, pagkamainantuson, pagkalulo, pagkaayo, pagtuo, pagkakalmado, pagpugong-sa-kaugalingon.”​​—⁠Galacia 5:​22, 23.

Nahangpan mo bala kon ngaa ang pagpakig-upod isa ka hubon sang mga indibiduwal nga nagapanikasog sa pagpalambo sining mga kinaiya kaangay gid nga yara sa paraiso? Ang espirituwal nga paraiso nga gintagna ni manalagna Sofonias nagaluntad sa tunga sang subong sini nga mga tawo. Sia nagsiling: “Indi sila maghimo sing kalautan, ni magpamulong sing kabutigan, ni may masapwan sa ila baba nga isa ka dila nga malimbungon; kay sila magakaon kag magahigda, kag wala gid sing magpakurog sa ila.”​​—⁠Sofonias 3:⁠13.

Ang Importante nga Papel Sang Gugma

Ayhan natalupangdan mo nga ang una sang mga bunga sang espiritu nga ginsambit ni Pablo amo ang gugma. Amo ini ang kinaiya nga madamo sing ginahambal ang Biblia. Si Jesus nagsiling: “Sa sini ang tanan makahibalo nga kamo mga disipulo ko, kon maghigugmaanay kamo.” (Juan 13:35) Matuod, ang mga Saksi ni Jehova indi himpit. Wala sila kon kaisa nagahangpanay kaangay sang mga apostoles ni Jesus. Apang nagahigugmaanay gid sila sa isa kag isa, kag ila ginapangamuyo ang bulig sang balaan nga espiritu samtang ila ginapalambo ining kinaiya.

Subong resulta, pinasahi gid ang ila pag-inupdananay. Wala sing tribalismo ukon nabahinbahin nga nasyonalismo sa tunga nila. Sa katunayan, ang madamo nga Saksi nga nagapuyo sa mga lugar nga may pagpapas sang isa ka etniko nga grupo kag rasa sang ulihi nga tinuig sang ika-20 nga siglo nag-amlig sa isa kag isa bisan pa nga ang ila mismo kabuhi nabutang sa katalagman. Bisan pa “gikan sa tanan nga pungsod kag tribo kag katawhan kag hambal,” nagaagom sila sing paghiusa nga mabudlay mahangpan kon wala mo pa ini maeksperiensiahan.​​—⁠Bugna 7:⁠9.

Paraiso sa Tunga Sang mga Nagahimo Sang Kabubut-on Sang Dios

Wala sing duog sa espirituwal nga paraiso ang paghamkon, imoralidad, kag kakagod. Ang mga Cristiano ginasugo: “Indi na kamo magpadihon suno sa sining sistema sang mga butang, kundi magbalhin kamo paagi sa pagbag-o sang inyo painuino, agod nga mapamatud-an ninyo sa inyo kaugalingon ang maayo kag kalahamut-an kag himpit nga kabubut-on sang Dios.” (Roma 12:2) Kon nagakabuhi kita sing matinlo sa moral kag nagahimo sang kabubut-on sang Dios sa iban nga mga paagi, nagabulig kita sa pagtukod sing espirituwal nga paraiso kag nagaamot kita sa aton mismo kalipay. Matuod ini kay Carla. Sia nagsiling: “Gintudluan ako sang akon amay nga magtrabaho sing lakas agod indi na ako magsalig sa iban sa pinansial nga butang. Apang bisan pa ang akon natun-an sa unibersidad naghatag sa akon sing balatyagon nga may kalig-unan, nawasi ko ang paghiusa sa pamilya kag ang kalig-unan nga mahatag lamang sa aton sang ihibalo gikan sa Pulong sang Dios.”

Siempre pa, ang pagtigayon sang espirituwal nga paraiso wala nagadula sang pisikal nga mga problema sa kabuhi. Nagamasakit gihapon ang  mga Cristiano. Ang pungsod nga ginapuy-an nila mahimo madalahig sa inaway sibil. Madamo ang nagabatas sing kaimulon. Apang, ang pagtigayon sing suod nga relasyon kay Jehova nga Dios​​—⁠nga amo ang pinakaimportante nga bahin sang espirituwal nga paraiso​​—⁠nagakahulugan nga makapangayo kita sa iya sing bulig. Sa pagkamatuod, ginaagda niya kita nga ‘ihaboy naton ang aton mga lulan sa iya,’ kag madamo ang makapamatuod nga ginbuligan niya sila sa makatilingala nga paagi sa pinakamabudlay nga mga kahimtangan. (Salmo 55:​22; 86:​16, 17) Nagasaad ang Dios nga mangin kaupod sang iya mga sumilimba bisan “sa nalupyakan sang daku nga kadudulman.” (Salmo 23:4) Ang pagsalig sa kahanda sang Dios sa pagsakdag sa aton nagabulig nga matipigan ang aton “paghidait sang Dios nga nagalabaw sa tanan nga panghunahuna,” nga amo ang yabi sa espirituwal nga paraiso.​​—⁠Filipos 4:⁠7.

Pag-amot sa Espirituwal nga Paraiso

Ang kalabanan nga mga tawo nalipay sa pagpamasyar sa isa ka parke ukon hardin. Luyag nila magdayandayan ukon ayhan maglingkod sa bangko kag magkalipay sa mga palibot sini. Sing kaanggid, madamo ang nalipay sa pagpakig-upod sa mga Saksi ni Jehova. Para sa ila, ang pag-inupdanay makapapagsik, mahidaiton, kag makapabaskog. Apang, ang matahom nga hardin kinahanglan nga pirme atipanon agod padayon ini nga mangin tulad-paraiso. Sing kaanggid, ang espirituwal nga paraiso nagaluntad sa sining indi gid tulad-paraiso nga kalibutan bangod lamang ginaatipan ini sang mga Saksi ni Jehova, kag ginapakamaayo sang Dios ang ila mga panikasog. Paano, nian, ang isa makaamot sing mapuslanon sa sinang paraiso?

Una, dapat ka makig-upod sa kongregasyon sang mga Saksi ni Jehova, magtuon sang Biblia upod sa ila, kag magtigayon sing ihibalo sa Biblia nga amo ang sadsaran sang espirituwal nga paraiso. Si Carla nagsiling: “Wala sing espirituwal nga paraiso kon wala sing espirituwal nga pagkaon.” Nagalakip ini sang pagbasa sing regular sang Pulong sang Dios kag sang paghunahuna sang imo nabasahan. Ang ihibalo nga natigayon magapasuod sa imo kay Jehova nga Dios, kag higugmaon mo sia. Matun-an mo man nga makighambal sa iya paagi sa pangamuyo kag mangabay sang iya panuytoy kag sang iya espiritu sa pagbulig sa imo samtang ginahimo mo ang iya kabubut-on. Ginsugo kita ni Jesus nga padayon sa pagpangamuyo. (Lucas 11:​9-​13) Si apostol Pablo nagsiling: “Magpangamuyo sa walay langan.” (1 Tesalonica 5:17) Ang pribilehiyo nga mahambal ang Dios sa pangamuyo upod ang bug-os nga pagsalig nga ginapamatian ka niya isa ka importante nga bahin sang espirituwal nga paraiso.

Samtang nagaligad ang tion, magaayo pa gid ang imo kabuhi bangod sang imo natun-an, kag sa ulihi luyag mo ini ipakighambal sa iban. Nian imo matuman ang sugo ni Jesus: “Paiwaga ang inyo kapawa sa atubangan sang mga tawo, agod makita nila ang inyo maayong mga buhat kag maghimaya sa inyo Amay nga yara sa mga langit.” (Mateo 5:16) Ang pagpaambit sa iban sang ihibalo tuhoy kay Jehova nga Dios kag kay Jesucristo kag pagdayaw sang ila daku nga gugma nga ginpakita sa katawhan nagahatag sing daku nga kalipay.

Ang tion magaabot nga ang bug-os nga duta mangin pisikal nga paraiso​​—⁠isa ka tulad-hardin nga duog nga wala sing polusyon kag nagakaigo nga puluy-an sang matutom nga katawhan. Ang pagluntad sang espirituwal nga paraiso sa sining “makahalanguyos nga mga tion nga mabudlay pakigbagayan” isa ka ebidensia sang gahom sang Dios kag isa ka tanda kon ano ang iya mahimo kag pagahimuon sa palaabuton.​​—⁠2 Timoteo 3:⁠1.

Bisan karon, yadtong nagaagom sing espirituwal nga paraiso makaeksperiensia sang isa ka espirituwal nga katumanan sang Isaias 49:​10: “Indi sila paggutumon, ni uhawon sila, ni sakiton sila sang nagatagiti nga init ukon adlaw. Kay ang Isa nga naluoy sa ila magatuytoy sa ila, kag sa higad sang mga tuburan sang tubig ubayan niya sila.” Makapamatuod sa sina si José. Naghandum sia nga mangin isa ka bantog nga musikero, apang nakasapo sia sing labi nga kalipay sa pag-alagad sa Dios upod sa Cristianong kongregasyon. Sia nagsiling: “Karon may katuyuan na ang akon kabuhi. Nakabatyag ako sing kalig-unan sa Cristianong paghiliutod, kag kilala ko si Jehova subong isa ka mahigugmaon nga Amay nga aton masaligan.” Ang kalipay ni José​​—⁠kag sang minilyon pa nga iban kaangay niya​​—⁠ginalaragway sing nagakaigo sa Salmo 64:​10: “Ang matarong magakalipay kay Jehova kag magadangop gid sa iya.” Daw ano katahom nga paglaragway sa espirituwal nga paraiso!

[Nota]

[Retrato sa pahina 10]

Samtang nagaagom sing espirituwal nga paraiso, dapat kita magbulig nga pasangkaron ini!