Ginsakdag ni Jehova sa Akon Bug-os nga Kabuhi
Sugilanon sang Kabuhi
Ginsakdag ni Jehova sa Akon Bug-os nga Kabuhi
PANUGIRON NI FORREST LEE
Bag-o lang ginkompiskar sang mga pulis ang amon ponograpo kag ang amon mga literatura sa Biblia. Ang Bug-os Kalibutan nga Inaway II nangin balibad sang mga manugpamatok agod hayluhon ang bag-o nga gobernador-heneral sang Canada nga ideklarar ang hilikuton sang mga Saksi ni Jehova nga ilegal. Natabo ini sang Hulyo 4, 1940.
WALA mahadlok sa natabo, nagkuha kami sing dugang pa nga mga literatura gikan sa talaguan sini kag nagpadayon sang amon pagbantala. Ginadumdom ko pirme ang ginsiling ni Tatay sa amo nga okasyon: “Indi kita basta lang magdulog. Si Jehova nagsugo sa aton nga magbantala.” Sadto, isa ako ka mapagsik nga dies anyos nga bata. Apang bisan karon, ang determinasyon ni Tatay kag ang iya kakugi sa ministeryo isa gihapon ka dalayon nga pahanumdom sa kon paano ginasakdag sang aton Dios, si Jehova, ang mga matutom sa iya.
Sang masunod nga tion nga ginpadulog kami sang pulis, wala lamang nila ginkuha ang amon mga literatura kundi ginbilanggo man nila si Tatay, nagbilin kay Nanay nga nagaisahanon upod sa apat ka kabataan. Natabo yadto sang Septiembre 1940 sa Saskatchewan. Wala magdugay pagkatapos sadto ginpahalin ako sa eskwelahan bangod sang pagsunod ko sa akon nahanas-sa-Biblia nga konsiensia kag sang indi pagsaludo sa bandera ukon pag-amba sing pungsudnon nga ambahanon. Ang pagpadayon ko sa pag-eskwela paagi sa sulat naghatag sa akon sing mapasibusibuon nga iskedyul, kag nagpakigbahin ako sing bug-os pa sa pagbantala nga hilikuton.
Sang 1948 may panawagan para sa mga payunir, bug-os tion nga mga ministro sang mga Saksi ni Jehova, nga magsaylo sa sidlangan nga baybayon sang Canada. Gani nagpayunir ako sa Halifax, Nova Scotia, kag sa Cape Wolfe, Prince Edward Island. Sang masunod nga tuig, nakabaton ako sing imbitasyon sa pagtrabaho sing duha ka semana sa sanga
talatapan sang mga Saksi ni Jehova sa Toronto. Yadtong duha ka semana naglawig sing tubtob sa kapin sa anom ka makapaladya nga tinuig sang pag-alagad. Sang ulihi, nakilala ko si Myrna, nga nagahigugma man kay Jehova kaangay ko, kag nagpakasal kami sang Disiembre 1955. Nagpuyo kami sa Milton, Ontario, kag wala magdugay isa ka bag-o nga kongregasyon ang natukod didto. Ang silong sang amon puluy-an nangin Kingdom Hall.Ang Handum sa Pagpasangkad Sang Amon Ministeryo
Sa nagsunod nga mga tinuig, nangin mga ginikanan kami sa anom ka nagasinundanay nga mga anak. Si Miriam ang amon panganay. Dayon si Charmaine, si Mark, si Annette, si Grant, kag ang kinagot, si Glen. Masunson nga sa pagpauli ko halin sa trabaho maabtan ko ang magamay nga mga kabataan nga nagalumpagi sa salog malapit sa tsimenea, kag ginabasahan ni Myrna sing Biblia, ginapaathagan sing mga kasaysayan sa Biblia kag ginapatudok sa ila tagipusuon ang matuod nga gugma kay Jehova. Bangod sang iya mahigugmaon nga pagsakdag, natigayon sang tanan namon nga kabataan ang nagakaigo nga ihibalo sa Biblia sa lanubo nga edad.
Ang kakugi sang akon amay sa ministeryo nagbilin sing indi mapanas nga epekto sa akon hunahuna kag tagipusuon. (Hulubaton 22:6) Sa amo, sang 1968, sang gin-agda ang mga pamilya sang mga Saksi ni Jehova nga magsaylo sa Sentral kag Bagatnan nga Amerika agod magbulig sa pagbantala nga hilikuton, luyag sang akon pamilya nga sabton ang panawagan. Sadto nga tion ang amon mga kabataan nagaedad sing halin 5 tubtob 13, kag wala gid sing nakahibalo sa amon sing isa ka tinaga nga Kinatsila. Bilang pagsunod sa panuytoy nga ginhatag, naglakbay ako sa nagkalainlain nga pungsod agod tan-awon ang mga kahimtangan sang pangabuhi. Sang pagpauli ko, subong pamilya mapinangamuyuon nga ginbinagbinag namon ang amon mga pililian kag namat-od nga magsaylo sa Nicaragua.
Pag-alagad sa Nicaragua
Sang Oktubre 1970 yara na kami sa amon bag-o nga puluy-an, kag sa sulod sang tatlo ka semana ginhatagan ako sing malip-ot nga bahin sa programa sa miting sang kongregasyon. Ginpanikasugan ko nga ihatag ang akon bahin sa akon limitado kaayo nga Kinatsila kag naghinakop paagi sa pag-agda sa bug-os nga kongregasyon sa amon puluy-an agod mag-cerveza sa Sabado sa alas 9:30 s.a. Ang akon buot silingon amo ang servicio, ang tinaga para sa pag-alagad sa latagon, apang sa katunayan, gin-agda ko ang tanan agod magserbesa. Ang pagtuon sing lenguahe isa gid ka hangkat!
Sang primero, ginasulat ko ang presentasyon sa akon kamot kag ginaensayo ini sa dalan pakadto sa ganhaan. Nagasiling ako: “Upod sa libro matigayon mo ang isa ka wala bayad nga pagtuon sa Biblia.” Ang isa ka tawo nga nagbaton sang akon gintanyag nagsiling pagkatapos sadto nga matambong sia sa amon mga miting agod hibaluon kon ano gid ang akon ginatinguhaan nga isiling sa iya. Ini nga tawo nangin isa sang mga Saksi ni Jehova. Maathag gid 1 Corinto 3:7.
nga ang Dios amo ang nagapatubo sa binhi sang kamatuoran sa mapainubuson nga mga tagipusuon, subong sang ginbaton ni apostol Pablo!—Pagligad sang mga duha ka tuig sa kapital nga siudad sang Managua, ginpangabay kami nga magsaylo sa nabagatnan nga bahin sang Nicaragua. Nanghikot kami didto upod sa kongregasyon sa Rivas kag upod sa kaiping nga naligwin nga mga grupo sang mga interesado. Gin-updan ako ni Pedro Peña, isa ka matutom nga tigulang nga Saksi, sang ginduaw namon ini nga mga grupo. Ang isa nahamtang sa may bulkan nga isla sa Lake Nicaragua, diin may isa lamang ka pamilya sang mga Saksi ni Jehova didto.
Bisan pa ini nga pamilya kulabos sa materyal, nagpanikasog sila sing daku agod ipakita ang ila apresasyon sa amon pagduaw. Pag-abot namon sa gab-i, nakahanda na ang panihapon para sa amon. Nagtener kami sing isa ka semana, kag madamo sang mapinalanggaon nga mga tawo didto nga mahigugmaon sa Biblia ang nagpaambit sang ila pagkaon sa amon. Nalipay gid kami nga 101 ang nagtambong sa pamulongpulong publiko sa Biblia sang Domingo.
Nabatyagan ko nga ang nagasakdag nga gahom ni Jehova napadayag sang, isa ka bes, magaduaw anay kami sa isa ka grupo sang interesado nga mga tawo sa kabukiran malapit sa dulunan sang Costa Rica. Sang adlaw nga magalakat kami, ginsugat ako ni Pedro, apang nagahigda ako bangod sa malaria. “Indi ako makaupod, Pedro,” siling ko. Ginhikap niya ang akon agtang kag nagsabat: “Mataas ang imo hilanat, apang kinahanglan nga mag-upod ka! Ang mga kauturan nagahulat.” Nian nagbungat sia sing isa sang labing tinagipusuon nga mga pangamuyo nga nabatian ko.
Pagkatapos sadto, nagsiling ako: “Mag-inom ka anay sing fresco (duga sang prutas nga ilimnon). Nakahimos na ako sa sulod sang mga dies minutos.” Duha ka pamilya nga Saksi ang nagapuyo sa lugar nga ginduaw namon, kag gin-atipan gid nila kami sing maayo. Sang masunod nga adlaw nagbantala kami upod sa ila, walay sapayan nga maluya gihapon ako bangod sang hilanat. Makapalig-on gid nga makita ang kapin sa isa ka gatos ka tawo nga nagtambong sa amon miting sang Domingo!
Pagsaylo Liwat
Sang 1975 natawo ang amon ikapito nga anak, si Vaughn. Sang masunod nga tuig, kinahanglan kami nga magpauli sa Canada tungod sa pinansial nga mga rason. Ang pagbiya sa Nicaragua indi mahapos bangod nabatyagan gid namon ang nagasakdag nga gahom ni Jehova sa tion sang amon pagtener didto. Sang paghalin namon, kapin sa 500 sa teritoryo sang kongregasyon namon ang nagatambong sa mga miting.
Antes sini, sang ang amon anak nga si Miriam kag ako gintangdo nga mga espesyal payunir sa Nicaragua, ginpamangkot ako ni Miriam: “Daddy, kon magbalik gid man kamo sa Canada, tugutan mo bala ako nga magpabilin diri?” Wala ako sing tuyo nga maghalin, gani nagsiling ako: “Siempre, huo!” Gani sang nagbiya kami, nagpabilin si Miriam agod padayunon ang iya bug-os tion nga ministeryo. Sang ulihi, napamana niya si Andrew Reed. Sang 1984 nag-eskwela sila sa ika-77 nga klase sa Gilead, ang eskwelahan para sa mga misyonero sang mga Saksi ni Jehova, nga nahamtang anay sa Brooklyn, New York. Nagaalagad karon si Miriam upod sa iya bana sa Dominican Republic, nagatuman sang handum nga ginpatudok sa iya sang maayo gid nga mga misyonero sa Nicaragua.
Samtang, ang mga pulong ni Tatay nga, “indi kita basta lang magdulog,” yara gihapon sa akon tagipusuon. Gani sang 1981 sang nakasupot kami sing bastante nga kuwarta agod makabalik sa Sentral Amerika, nagsaylo kami liwat, sa sining tion sa Costa Rica. Samtang nagaalagad kami didto, gin-agda kami nga magbulig sa pagtukod sang ila bag-o nga mga pasilidad sang sanga. Apang, sang 1985, kinahanglan nga magpabulong ang amon anak nga lalaki nga si Grant, gani nagbalik kami sa Canada. Nagpabilin si Glen sa Costa Rica agod magtrabaho sa pagtukod sa sanga, samtang sanday Annette kag Charmaine nag-alagad subong mga espesyal payunir. Kami nga nagbiya sa Costa Rica wala gid maglaum nga indi na makabalik.
Pag-atubang sa Kasisit-an
Ang Septiembre 17, 1993, nagpamanagbanag sing masanag kag nagsilak ang adlaw. Kami sang akon subang nga anak nga lalaki, nga si Mark, nagatukap sing atop. Nag-obra kami nga nagatuparay kag nagaistoryahanay tuhoy sa espirituwal nga mga butang, subong sang amon kinabatasan. Sa ano man nga paagi nadula ko ang akon panimbang kag nahulog ako gikan sa atop. Sang maulian ako, ang akon lamang makita amo ang masanag nga mga suga kag mga tawo nga nagapanapot sing puti. Isa yadto ka pang-emerhensia nga hulot sang ospital.
Bangod sang ginasiling sang Biblia, ang akon una nga reaksion amo: “Wala sing dugo, wala sing dugo!” (Binuhatan 15:28, 29) Makapasalig gid nga mabatian si Charmaine nga nagasiling: “OK lang, Dad. Yari kami tanan diri.” Nahibaluan ko sang ulihi nga nakita sang mga doktor ang akon dokumento sa pagpabulong, kag indi gid nangin problema ang tuhoy sa paggamit sing dugo. Nabali ang akon liog kag naparalisar ako sing bug-os, nga indi gani makaginhawa sing kinaugalingon.
Bangod indi makahulag, kapin pa nga kinahanglan ko ang pagsakdag ni Jehova. Bangod sang operasyon sa trachea, nga ginhimo agod masal-ut ang tubo sang respirator, nasupnan ang pag-agi sang hangin sa akon vocal cords. Indi ako makahambal. Dapat basahon sang mga tawo ang akon mga bibig agod mahangpan nila ang akon gusto ihambal.
Hinali lang nagdaku ang kagastuhanan. Bangod ang akon asawa kag kalabanan sang akon mga anak yara sa bug-os tion nga ministeryo, nagpalibog ako kon bala dapat sila mag-untat sa sining pag-alagad agod matatap ining pinansial nga mga salabton. Apang, nakakita sing trabaho si Mark nga sa sulod lamang sang tatlo ka bulan nakabulig sing daku sa sining kagastuhanan. Subong resulta, ang tanan nakapabilin sa bug-os tion nga ministeryo luwas sa amon nga mag-asawa.
Makita sa dingding sang akon hulot sa ospital ang ginatos ka card kag sulat gikan sa anom ka nagkalainlain nga pungsod. Ginsakdag gid ako ni Jehova. Ginbuligan man sang kongregasyon ang akon pamilya paagi sa paghanda sing mga pagkaon para sa ila sa sulod sang lima ka bulan kag tunga nga yara ako sa intensive care unit. Kada adlaw, isa ka Cristianong gulang ang nagahinguyang sing hapon sa akon, nagabasa sa akon sing Biblia kag mga publikasyon sa Biblia, subong man nagasaysay sing makapalig-on nga mga eksperiensia. Duha ka katapo sang akon pamilya ang nagahanda sang tagsa ka miting sa kongregasyon upod sa akon, gani wala gid ako sing nawasi nga importante nga espirituwal nga pagkaon.
Sang yara pa ako sa ospital, ginhimo ang kahimusan agod makatambong ako sa programa sang isa ka pinasahi nga adlaw nga asambleya. Gin-areglar sang talapuanan sang ospital nga updan ako sa bug-os nga adlaw sang isa ka nars kag sang isa ka respiratory technician. Daw ano ka makalilipay nga
mangin kaupod liwat ang akon Cristianong mga kauturan! Indi ko gid malipatan ang ginatos nga nagalinya, nga nagahulat sang ila turno sa pagtamyaw sa akon.Paghupot Sing Espirituwalidad
Mga isa ka tuig pagkatapos sang aksidente, nakapauli gid man ako sa akon pamilya, bisan pa nagakinahanglan gihapon ako sing 24-oras-kada-adlaw nga pag-atipan sang nars. Isa ka nasangkapan sing pinasahi nga van ang nakabulig sa akon agod makatambong sa mga miting, nga talagsa ko lang mapalyahan. Apang, ginabaton ko nga kinahanglan ang determinasyon agod makakadto sa mga miting. Kutob sang pagpauli ko, natambungan ko ang tanan nga distrito nga kombension.
Sang ulihi, sang Pebrero 1997, nakahambal ako liwat sing limitado lamang. Ang pila sang akon mga nars nalipay sa pagpamati samtang ginasugid ko sa ila ang akon pasad-sa-Biblia nga paglaum. Nabasa na sang isa ka nars ang bug-os nga libro nga Jehovah’s Witnesses—Proclaimers of God’s Kingdom sa akon subong man ang iban pa nga mga publikasyon sang Watch Tower. Nagasulat ako sa mga tawo paagi sa paggamit sing lipak sa pagmakinilya sa kompyuter. Bisan pa makakalapoy ini kaayo, makalilipay gid nga padayon ako nga nakapakigbahin sa ministeryo.
Nagapalanakit ang akon mga nerve. Apang kon nagapaambit ako sang kamatuoran sang Biblia sa iban ukon nagapamati nga ginabasa ini sa akon, daw nagahaganhagan ini. Sa pulupanag-on, nagapanaksi ako sa kalye upod sa akon masinakdagon nga asawa, nga nagapatpat para sa akon kon nagakinahanglan ako sing bulig. Sa pila ka higayon, nakaauxiliary payunir ako. Ang pag-alagad subong isa ka Cristianong gulang nagapahalipay sa akon, ilabi na kon ang mga kauturan nagapalapit sa akon sa mga miting ukon nagaduaw sa akon sa puluy-an kag nakabulig kag nakapalig-on ako sa ila.
Ginabaton ko nga madali ako mapung-awan. Gani kon nasubuan ako, nagapangamuyo ako gilayon agod malipay. Sa gab-i kag adlaw nagapangamuyo ako nga padayon ako nga sakdagon ni Jehova. Ang isa ka sulat ukon pagduaw sang iban pirme nagapahalipay sa akon. Ang pagbasa sing Lalantawan ukon sing Magmata! nga magasin nagapuno man sang akon hunahuna sing makapalig-on nga mga panghunahuna. Kon kaisa, lainlain nga mga nars ang nagabasa sining mga magasin sa akon. Kutob sang maaksidente ako, napamatian ko ang pagbasa sa bug-os nga Biblia sa mga cassette tape sing pito ka beses. Pila ini sang nanuhaytuhay nga paagi nga ginasakdag ako ni Jehova.—Salmo 41:3.
Ang pagbag-o sang akon kahimtangan naghatag sa akon sing madamo nga tion sa pagpamalandong kon paano ang aton Daku nga Instruktor, si Jehova, nagatudlo sa amon sa kabuhi. Ginahatagan niya kami sing sibu nga ihibalo tuhoy sa iya kabubut-on kag katuyuan, sing isa ka makahulugan nga ministeryo, sing laygay tuhoy sa sekreto sang kalipay sa pamilya, kag sing paghantop sa paghibalo kon ano ang himuon sa tion sang kasisit-an. Ginpakamaayo ako ni Jehova sing isa ka matutom kag dalayawon nga asawa. Ang akon mga kabataan matutom man nga nagsakdag sa akon, kag nalipay gid ako nga tanan sila nagapakigbahin sa bug-os tion nga ministeryo. Sa katunayan, sang Marso 11, 2000, ang amon anak nga si Mark kag ang iya asawa, si Allyson, naggradwar sa ika-108 nga klase sang Gilead School kag gin-asayn sa Nicaragua. Nakatambong kami nga mag-asawa sa ila gradwasyon. Masiling ko gid nga ang kasisit-an nagbag-o sang akon kabuhi apang indi sang akon tagipusuon.—Salmo 127:3, 4.
Nagapasalamat gid ako kay Jehova tungod sa kaalam nga ginhatag niya nga nakabulig sa akon nga maliton sa akon pamilya ang espirituwal nga palanublion nga nabaton ko. Napabakod ako kag napalig-on nga makita ang akon kabataan nga nagaalagad sa ila Manunuga nga may panimuot kaangay sang akon amay, nga nagsiling, “Indi kita basta lang magdulog. Si Jehova nagsugo sa aton nga magbantala.” Sa pagkamatuod, si Jehova nagsakdag sa akon kag sa akon pamilya sa amon bug-os nga kabuhi.
[Retrato sa pahina 24]
Upod kay Tatay, sa akon mga magulang nga lalaki, kag magulang nga babayi, sa tupad sang amon balay nga salakyan, nga gingamit sa amon pagpayunir. Yara ako sa tuo
[Retrato sa pahina 26]
Upod sa akon asawa, si Myrna
[Retrato sa pahina 26]
Bag-o nga larawan sang amon pamilya
[Retrato sa pahina 27]
Nagapanaksi gihapon ako paagi sa sulat