Kasadya Para sa mga Nagalakat sa Kapawa

“Kari kamo kag maglakat kita sa kapawa ni Jehova.”​—⁠ISAIAS 2:⁠5.

1, 2. (a) Daw ano ka importante ang kapawa? (b) Ngaa ang paandam nga ang kadudulman magatabon sa duta serioso gid?

SI Jehova amo ang Tuburan sang kapawa. Ang Biblia nagatawag sa iya nga “ang Manughatag sing adlaw subong kapawa kon adlaw, sing mga pagsulundan sang bulan kag sang kabituunan subong kapawa kon gab-i.” (Jeremias 31:​35; Salmo 8:⁠3) Sia amo ang Isa nga nagtuga sang aton adlaw, nga, sa katunayan, isa ka daku nga nuklear nga hurno nga nagapaguwa sa kahawaan sing daku kaayo nga enerhiya, ang pila sa dagway sang kapawa kag init. Ang diutay kaayo nga porsiento sina nga enerhiya nga nagalab-ot sa aton subong silak sang adlaw nagasakdag sang kabuhi sa sining duta. Kon wala sing silak sang adlaw, indi kita mabuhi. Ang duta mangin isa ka walay kabuhi nga planeta.

² Nagadumdom sina, mahangpan naton kon daw ano ka importante ang kahimtangan nga ginlaragway ni manalagna Isaias. Sia nagsiling: “Yari karon! ang kadudulman magatabon sang duta, kag ang pitipit nga kadudulman sang pungsudnon nga mga grupo.” (Isaias 60:⁠2) Sa pagkamatuod, wala ini nagapatuhoy sa kadudulman sa pisikal nga kahulugan. Indi buot silingon ni Isaias nga sa pila ka adlaw ang adlaw, bulan, kag mga bituon indi na magasilak. (Salmo 89:​36, 37; 136:​7-9) Sa baylo, nagahambal sia tuhoy sa espirituwal nga kadudulman. Apang ang espirituwal nga kadudulman makapatay. Sa ulihi, indi kita mabuhi kon wala sing espirituwal nga kapawa subong nga indi man kita mabuhi kon wala sing pisikal nga kapawa.​—⁠Lucas 1:⁠79.

3. Bangod sang mga pulong ni Isaias, ano ang dapat himuon sang mga Cristiano?

³ Bangod sini, nagakaigo gid nga talupangdon ang mga pulong ni Isaias, nga bisan pa natuman sa dumaan nga Juda, may daku pa ini nga katumanan karon. Huo, sa aton tion ang kalibutan naligom sang espirituwal nga kadudulman. Sa sining makatalagam nga kahimtangan, ang espirituwal nga kapawa importante gid kaayo. Amo kon ngaa dapat sundon sang mga Cristiano ang laygay ni Jesus: “Paiwaga ang inyo kapawa sa atubangan sang mga tawo.” (Mateo 5:16) Mahimo masugaan sang matutom nga mga Cristiano ang kadudulman para sa mga mahagop, busa nagahatag sa ila sing kahigayunan nga makatigayon sing kabuhi.​—⁠Juan 8:⁠12.

Madulom nga mga Tion sa Israel

4. San-o una nga natuman ang matagnaon nga mga pulong ni Isaias, apang ano nga kahimtangan ang nagaluntad na sadtong panahon niya?

⁴ Ang mga pulong ni Isaias tuhoy sa kadudulman nga nagatabon sa duta natuman primero sang ang Juda ginhapay kag ang iya katawhan gintapok sa Babilonia. Apang, bisan wala pa yadto natabo, sang panahon mismo ni Isaias, ang daku nga bahin sang pungsod naligom na sa espirituwal nga kadudulman, isa ka katunayan nga nagpahulag sa iya agod laygayan ang iya mga kasimanwa: “O mga tawo sang panimalay ni Jacob, kari kamo kag maglakat kita sa kapawa ni Jehova.”​—⁠Isaias 2:​5; 5:⁠20.

5, 6. Ano nga mga butang ang nag-amot sa kadudulman sang panahon ni Isaias?

⁵ Si Isaias nagtagna sa Juda “sa mga adlaw ni Uzias, ni Jotam, ni Ahaz kag ni Ezequias, nga mga hari sang Juda.” (Isaias 1:⁠1) Panahon yadto sang kinagubot sa politika, pagkasalimpapaw sa relihion, kagarukan sa hustisya, kag pagpigos sa mga imol. Bisan sang nagagahom ang matutom nga mga hari, subong ni Jotam, ang mga halaran sang butig nga mga dios makita sa madamong pukatod. Sang naggahom ang di-matutom nga mga hari, ang kahimtangan labi pa nga naglain. Halimbawa, ginhalad pa gani sang malauton nga si Hari Ahaz ang iya anak sa isa ka ritwal nga paghalad  sa dios nga si Moloc. Isa gid yadto ka kadudulman!​—⁠2 Hari 15:​32-34; 16:​2-4.

⁶ Ang internasyonal nga kahimtangan madulom man. Ang Moab, Edom, kag Filistia nagatindog sing mapinahugon sa mga dulunan sang Juda. Ang naaminhan nga ginharian sang Israel, bisan pa magparyentehanay, hayag nga magkaaway. Sa aminhan pa, may katalagman nga tublagon sang Siria ang kalinong sang Juda. Mas makatalagam pa amo ang mapintas nga Asiria, nga pirme nagapangita sing mga higayon nga mapasangkad ang iya kagamhanan. Sang nagpanagna si Isaias, ginlutos sang Asiria ang pungsod sang Israel kag halos ginlaglag ang Juda. Isa ka bes ginsakop sang Asiria ang tanan nga napamakuran nga siudad sa Juda magluwas sa Jerusalem.​—⁠Isaias 1:​7, 8; 36:⁠1.

7. Ano nga banas ang ginpili sang Israel kag Juda, kag paano si Jehova naghulag?

⁷ Ang nakigkatipan nga katawhan sang Dios nag-antos sing kahapayan bangod ang Israel kag Juda indi matutom sa iya. Kaangay sa ginsambit sa tulun-an sang Mga Hulubaton, ‘nagbiya sila sa mga banas sang katadlungan sa paglakat sa mga dalan sang kadudulman.’ (Hulubaton 2:13) Apang, bisan pa naakig si Jehova sa iya katawhan, wala niya sila ginbiyaan sing bug-os. Sa baylo, ginbangon niya si Isaias kag ang iban pa nga mga manalagna agod mag-aman sing espirituwal nga kapawa kay bisan sin-o sa pungsod nga nagatinguha gihapon nga mag-alagad kay Jehova sing matutom. Ang kapawa nga gin-aman paagi sining mga manalagna bilidhon gid. Nagahatag ini sing kabuhi.

Tion Sang Kadudulman sa Karon

8, 9. Anong mga butang ang nakaamot sa kadudulman sang kalibutan sa karon?

⁸ Ang kahimtangan sang panahon ni Isaias kaanggid gid karon. Sa panahon naton, ginsikway sang tawhanon nga mga lider si Jehova kag ang iya nagalingkod-sa-trono nga Hari, si Jesucristo. (Salmo 2:​2, 3) Gindayaan sang relihiosong mga lider sang Cristiandad ang ila mga panong. Ining mga lider nagapangangkon nga nagaalagad sa Dios, apang sa katunayan ang kalabanan sa ila nagapasanyog sang mga dios sining kalibutan​—⁠nasyonalismo, militarismo, manggad, kag prominente nga mga indibiduwal⁠​—⁠​magluwas sa pagtudlo sang paganong mga doktrina.

⁹ Sa nagkalainlain nga lugar, ang mga relihion sang Cristiandad nadalahig sa mga inaway kag sa sibil nga mga binangig nga nagalakip sang pagpapas sa isa ka pangayaw nga minoridad kag sang iban pa nga mga kakugmat. Dugang pa, sa baylo nga manindugan sa pasad-sa-Biblia nga moralidad, madamong simbahan ang wala magsapak ukon aktibo nga nagsakdag sang imoral nga mga buhat subong sang pakighilawas kag homoseksuwalidad. Bangod sining pagsikway sa mga talaksan sang Biblia, ang mga panong sang Cristiandad kaangay sang mga tawo nga ginpamulong sang salmista anay: “Wala sila makahibalo, kag wala sila makahangop; sa kadudulman padayon sila nga nagapakadto pakari.” (Salmo 82:⁠5) Sa pagkamatuod, ang Cristiandad, kaangay sang dumaan nga Juda, yara sa pitipit nga kadudulman.​—⁠Bugna 8:⁠12.

10. Paano ang kapawa nagaiwag sa kadudulman sa karon, kag paano nagabenepisyo ang mga mahagop?

¹⁰ Sa tunga sining kadudulman, ginapaiwag ni Jehova ang kapawa tungod sa mga mahagop. Tungod sini, ginagamit niya ang iya hinaplas nga mga alagad sa duta, “ang matutom kag mainandamon nga ulipon,” kag sila “nagaiwag subong mga sulo sa kalibutan.” (Mateo 24:​45; Filipos 2:⁠15) Ining ulipon nga klase, nga ginasuportahan sang minilyon sang “iban nga mga karnero” nga kaupdanan, nagapabanaag sang espirituwal nga  kapawa pasad sa Pulong sang Dios, ang Biblia. (Juan 10:16) Sa sining madulom nga kalibutan, ini nga kapawa nagahatag sa mga mahagop sing paglaum, nagabulig sa ila nga makatigayon sing kaangtanan sa Dios, kag nagabulig sa ila nga malikawan ang espirituwal nga mga tugalbong. Bilidhon ini kag nagahatag-kabuhi.

“Ginadayaw Ko ang Imo Ngalan”

11. Ano nga impormasyon ang ginhatag ni Jehova sang panahon ni Isaias?

¹¹ Sadtong madulom nga panahon nga nagkabuhi si Isaias kag sa mas madulom pa nga panahon pagkatapos sadto sang gindala nga bihag sang mga Babilonianhon ang pungsod ni Jehova, ano nga sahi sang panuytoy ang ginhatag ni Jehova? Luwas sa paghatag sing moral nga panuytoy, maathag nga ginbalay niya sing abanse kon paano niya tumanon ang iya mga katuyuan may kaangtanan sa iya katawhan. Binagbinaga, halimbawa, ang makalilipay nga mga tagna sa Isaias kapitulo 25 tubtob 27. Ginapakita sang mga pulong sa sining mga kapitulo kon ano anay ang ginhimo ni Jehova kag kon paano niya ini karon ginahimo.

12. Anong tinagipusuon nga ekspresyon ang ginpabutyag ni Isaias?

¹² Una, si Isaias nagsiling: “O Jehova, ikaw ang akon Dios. Ginapakataas ko ikaw, ginadayaw ko ang imo ngalan.” Daw ano ka tinagipusuon nga pagpabutyag sang pagdayaw! Apang ngaa nabungat sang manalagna ini nga pangamuyo? Ang daku nga rason ginasugid sa naulihi nga katunga nga bahin sang bersikulo, diin aton mabasa: “Kay naghimo ka [Jehova] sing makatilingala nga mga butang, mga panugyan kutob sa dumaan nga mga tion, sa katutom, sa pagkamasaligan.”​—⁠Isaias 25:⁠1.

13. (a) Ano nga ihibalo ang nagpabakod sang apresasyon ni Isaias kay Jehova? (b) Paano kita makatuon gikan sa halimbawa ni Isaias?

¹³ Sang panahon ni Isaias, si Jehova naghimo sing madamong makatilingala nga butang para sa Israel, kag ini ginsulat. Si Isaias maathag gid nga pamilyar sa sining mga sulat. Halimbawa, nahibaluan niya nga ginhilway ni Jehova ang iya katawhan gikan sa pagkaulipon sa Egipto kag ginluwas sila gikan sa kasingkal sang hangaway ni Paraon sa Dagat nga Mapula. Nahibaluan niya nga gintuytuyan ni Jehova ang iya katawhan sa kahanayakan kag ginpasulod sila sa Ginsaad nga Duta. (Salmo 136:⁠1, 10-26) Ginpakita sining maragtason nga mga rekord nga si Jehova nga Dios matutom kag masaligan. Ang iya “mga panugyan”​—⁠ang tanan nga butang nga ginatuyo niya⁠​—⁠​natuman. Ang sibu nga ihibalo nga ginhatag sang Dios nagpabakod kay Isaias agod padayon nga maglakat sa kapawa. Sa amo, sia isa ka maayo nga halimbawa para sa aton. Kon mahalungon nga tun-an naton ang nasulat nga Pulong sang Dios kag iaplikar ini sa aton kabuhi, magapabilin man kita sa kapawa.​—⁠Salmo 119:​105; 2 Corinto 4:⁠6.

Ang Isa ka Siudad Ginlaglag

14. Ano ang ginatagna tuhoy sa isa ka siudad, kag mahimo nga ano ini nga siudad?

¹⁴ Ang isa ka halimbawa sang panugyan sang Dios masapwan sa Isaias 25:⁠2, diin aton mabasa: “Ang isa ka siudad ginhimo mo nga tumpok sang mga bato, ang isa ka napamakuran nga banwa nga isa ka kagulub-an, ang isa ka puluy-an nga torre sang mga dumuluong nga indi na mangin siudad, nga indi na patindugon liwat bisan tubtob sa tion nga walay latid.” Ano ining siudad? Si Isaias mahimo nga nagapamulong sing matagnaon tuhoy sa Babilonia. Sa pagkamatuod, nag-abot na ang tion nga ang Babilonia mangin isa na lamang ka tumpok sang mga bato.

15. Anong “daku nga siudad” ang nagaluntad karon, kag ano ang mahanabo sa sini?

¹⁵ Ang siudad bala nga ginsambit ni Isaias may katumbas sa karon? Huo. Ang tulun-an sang Bugna nagahambal tuhoy sa “daku nga siudad nga may ginharian sa mga hari sang duta.” (Bugna 17:18) Inang daku nga siudad amo ang “Babilonia nga Daku,” ang bug-os kalibutan nga emperyo sang butig nga relihion. (Bugna 17:⁠5) Sa karon, ang panguna nga bahin sang Babilonia nga Daku amo ang Cristiandad, nga ang mga klero sini nagapanguna sa pagpamatok sa hilikuton nga pagbantala sing Ginharian sang katawhan ni Jehova. (Mateo 24:14) Apang, kaangay sang dumaan nga Babilonia, ang Babilonia nga Daku pagalaglagon sa dili madugay, nga indi na liwat magabangon.

16, 17. Paano ginhimaya si Jehova sang iya mga kaaway sang una kag sang moderno nga mga tion?

¹⁶ Ano pa ang gintagna ni Isaias tuhoy sa “napamakuran nga banwa”? Nagapatuhoy kay Jehova, si Isaias nagsiling: “Ang mabakod nga katawhan magahimaya sa imo; ang banwa sang mapiguson nga mga pungsod, sila magakahadlok sa imo.” (Isaias 25:⁠3) Paano himayaon si Jehova sining mapintas nga siudad, “ang banwa sang mapiguson  nga mga pungsod”? Ti, dumduma ang natabo sa pinakagamhanan nga hari sang Babilonia, si Nabocodonosor. Pagkatapos sang nagapahunahuna nga eksperiensia nga nagpakita sang iya mismo kaluyahon, napilitan sia nga batunon ang pagkadaku ni Jehova kag ang Iya labing gamhanan nga gahom. (Daniel 4:​34, 35) Kon ipakita ni Jehova ang iya gahom, bisan ang iya mga kaaway mapilitan sa pagbaton, walay sapayan nga may pangalag-ag, sang iya gamhanan nga mga binuhatan.

¹⁷ Napilitan bala ang Babilonia nga Daku nga kilalahon ang gamhanan nga mga binuhatan ni Jehova? Huo. Sadtong nahauna nga inaway sa bug-os nga kalibutan, ang hinaplas nga mga alagad ni Jehova nagbantala nga may kapipit-an. Sang 1918 nabihag sila sa espirituwal nga paagi sang ang nagapanguna nga mga opisyales sang Watch Tower Society ginbilanggo. Ang organisado nga hilikuton sang pagbantala halos nagdulog. Nian, sang 1919, ginpasag-uli sila ni Jehova kag ginpapagsik liwat sila paagi sa iya espiritu, nga pagkatapos sini ginsugdan nila nga tumanon ang sugo nga ibantala ang maayong balita sa bug-os napuy-an nga duta. (Marcos 13:10) Ini tanan gintagna sa tulun-an sang Bugna, subong man ang epekto sini sa ila mga kaaway. Sila “hinadlukan kag naghatag sing himaya sa Dios sang langit.” (Bugna 11:​3, 7, 11-13) Wala ini nagakahulugan nga ang tanan nakumbertir, apang napilitan sila nga kilalahon ang gamhanan nga buhat ni Jehova sa sini nga higayon, suno gid sa gintagna ni Isaias.

“Pamakod sa Kubos”

18, 19. (a) Ngaa napaslawan ang mga kaaway nga bugtuon ang integridad sang katawhan ni Jehova? (b) Paano ang ‘ambahanon sang mga mapiguson’ mapadulog?

¹⁸ Nagapatuhoy karon sang igtalupangod sa mainayuhon nga mga pagpakig-angot ni Jehova sa mga nagalakat sa kapawa, si Isaias nagsiling kay Jehova: “Ikaw nangin pamakod sa kubos, pamakod sa imol sa iya kasakitan, dalangpan sa maulan nga bagyo, handong sa init, kon ang dalimuos sang mga mapiguson subong sang maulan nga bagyo batok sa pader. Subong sang init sa duog nga wala sing tubig, ang gahod sang mga dumuluong imo ginapalinong, ang init paagi sa handong sang panganod. Ang ambahanon mismo sang mga mapiguson napadulog.”​—⁠Isaias 25:​4, 5.

¹⁹ Sugod sang 1919, gintilawan sang mga mapiguson ang tanan nga paagi agod bugtuon ang  integridad sang matuod nga mga sumilimba, apang napaslawan sila. Ngaa? Bangod si Jehova ang pamakod kag dalangpan sang iya katawhan. Nagaaman sia sing mabugnaw nga pasilungan sa makapalaso nga init sang paghingabot kag nagatindog kaangay sang isa ka mabakod nga pader bilang pangamlig sa maulan nga bagyo sang pagpamatok. Kita nga nagalakat sa kapawa sang Dios masinaligon nga nagapaabot sa tion nga ‘ang ambahanon sang mga mapiguson mapadulog.’ Huo, malangkagon naton nga ginahulat ang adlaw nga ang mga kaaway ni Jehova wala na.

20, 21. Anong sinalusalo ang ginaaman ni Jehova, kag ano ang ginalakip sina nga sinalusalo sa bag-ong kalibutan?

²⁰ Wala lamang ginaamligan ni Jehova ang iya mga alagad. Ginaamanan niya sila subong ang ila mahigugmaon nga Amay. Sa tapos mahilway ang iya katawhan gikan sa Babilonia nga Daku sang 1919, naghanda sia sa atubangan nila sing isa ka sinalusalo sang kadalag-an, isa ka bugana nga suplay sang espirituwal nga pagkaon. Gintagna ini sa Isaias 25:⁠6, diin aton mabasa: “Si Jehova sang mga kasuldadusan pat-od nga magahimo para sa tanan nga katawhan, sa sini nga bukid, sing isa ka sinalusalo sang matambok nga mga pagkaon, sing sinalusalo sang alak nga ginhuptan sa labud, sing matambok nga mga kalan-on nga puno sing utok sa tul-an, sing mga alak nga ginhuptan sa labud, nga ginsala.” Bulahan gid kita nga makigsalo sa sinang sinalusalo! (Mateo 4:⁠4) Ang “latok ni Jehova” puno gid sang manamit nga mga pagkaon. (1 Corinto 10:21) Paagi sa “matutom kag mainandamon nga ulipon,” ginahatagan kita sang tanan nga kinahanglan gid naton sa espirituwal nga kahulugan.

²¹ Kag may dugang pa sa sining sinalusalo nga gin-aman sang Dios. Ang espirituwal nga sinalusalo nga ginaagom naton karon nagapahanumdom sa aton sang kabuganaan sang pisikal nga pagkaon nga matigayon sa bag-ong kalibutan nga ginsaad sang Dios. Nian, ang “sinalusalo sang matambok nga mga pagkaon” magalakip sa bugana nga pisikal nga pagkaon. Wala na sing magutuman sa pisikal ukon sa espirituwal nga kahulugan. Daw ano ini nga kaumpawan para sa pinalangga nga mga matutom nga nagaantos karon bangod sang gintagna nga “mga kakulang sa kalan-on” nga bahin sang “tanda” sang presensia ni Jesus! (Mateo 24:​3, 7) Para sa ila, ang mga pinamulong sang salmista makalulugpay gid. Sia nagsiling: “May bugana nga uyas sa duta; sa putukputukan sang kabukiran magaawas ini.”​—⁠Salmo 72:⁠16.

22, 23. (a) Anong “hinabol,” ukon “tabon,” ang kuhaon, kag paano? (b) Paano dulaon ang ‘kahuluy-an sang katawhan ni Jehova’?

²² Pamatii karon ang mas makalilipay pa nga saad. Nagapaanggid sang sala kag kamatayon sa isa ka “hinabol,” ukon “tabon,” si Isaias nagsiling: “Sa sini nga bukid pat-od nga lamunon [ni Jehova] ang tabon nga nagatabon sang tanan nga katawhan, kag ang hinabol nga ginlala sa tanan nga pungsod.” (Isaias 25:⁠7) Hunahunaa lamang! Ang sala kag kamatayon, nga nagatabon sa katawhan subong sang isa ka makapuluot nga habol, madula na. Daw ano gid ang kahidlaw naton sa adlaw nga ang mga benepisyo sang halad nga gawad  ni Jesus bug-os nga ipadapat sa matinumanon kag matutom nga katawhan!​—⁠Bugna 21:​3, 4.

²³ Nagatudlo sa sinang mahimayaon nga tion, ang inspirado nga manalagna nagapasalig sa aton: “Lamunon [sang Dios] ang kamatayon sing dayon, kag pat-od nga pahiran sang Soberanong Ginuong Jehova ang mga luha gikan sa tanan nga nawong. Kag ang kahuluy-an sang iya katawhan kuhaon niya gikan sa bug-os nga duta, kay si Jehova mismo ang nagpamulong sini.” (Isaias 25:⁠8) Wala sing isa ang mapatay bangod sa kinaugali nga kabangdanan ukon magatangis bangod sang pagkapatay sang isa ka hinigugma. Daw ano ka makalilipay nga pagbag-o! Dugang pa, indi mabatian bisan diin sa duta ang pagpakahuya kag butigon nga propaganda nga madugay na ginbatas sang Dios kag sang iya mga alagad. Ngaa indi? Bangod dulaon ni Jehova ang ginhalinan sini​—⁠ang amay sang kabutigan, si Satanas nga Yawa, pati na ang tanan nga binhi ni Satanas.​—⁠Juan 8:⁠44.

24. Paano nagahulag ang mga nagalakat sa kapawa sa gamhanan nga mga binuhatan ni Jehova tungod sa ila?

²⁴ Sa pagpamalandong sa sining mga pagpadayag sang gahom ni Jehova, ang mga nagalakat sa kapawa napahulag sa pagtu-aw: “Yari karon! Ini amo ang aton Dios. Nagalaum kita sa iya, kag luwason niya kita. Ini amo si Jehova. Nagalaum kita sa iya. Magkalipay kita kag magkasadya sa iya pagluwas.” (Isaias 25:⁠9) Sa dili madugay, ang matarong nga katawhan may rason gid sa pagkasadya. Ang kadudulman bug-os nga madula, kag ang mga matutom maligom sang kapawa ni Jehova sa walay katubtuban. May malauman pa bala nga mas mahimayaon? Wala na, sa pagkamatuod!

Mapaathag Mo Bala?

• Ngaa importante gid karon nga maglakat sa kapawa?

• Ngaa gindayaw ni Isaias ang ngalan ni Jehova?

• Ngaa indi gid mabugto sang mga kaaway ang integridad sang katawhan sang Dios?

• Anong bugana nga mga pagpakamaayo ang nagahulat sa mga nagalakat sa kapawa?

[Mga Pamangkot sa Pagtinuon]

[Retrato sa pahina 13]

Ang mga pumuluyo sang Juda naghalad sang mga kabataan kay Moloc

[Mga retrato sa pahina 15]

Ang ihibalo tuhoy sa gamhanan nga mga buhat ni Jehova nagpahulag kay Isaias nga dayawon ang ngalan ni Jehova

[Retrato sa pahina 16]

Ang mga matarong maligom sang kapawa ni Jehova sa walay katubtuban