Mahimo Gid Bala Ikaw Mangin Malipayon?

GINTAMYAW ni George ang tagsatagsa nga nagayuhum. Para sa iya, isa ka hamili nga dulot ang mabuhi. Kilala sia bangod sang iya pagkamalipayon kag pagkamalaumon​—⁠ilabi na gid sang nagsugod sia sa pag-antos bangod sang katigulangon. Tubtob sang adlaw nga napatay sia, kilala si George subong isa ka malipayon nga tawo. Malipayon ka man bala kaangay ni George? Ginatamod mo bala ang tagsa ka bag-ong adlaw subong isa ka dulot nga dapat ka malipay? Ukon ang pagpaabot bala sing isa ka bag-ong adlaw nagahimo sa imo nga naluyahan ukon nahangawa pa gani? May butang bala nga nagadula sang imo kalipay?

Ginlaragway ang kalipay subong isa ka maayo nga kahimtangan nga halos permanente. Mapakita ini paagi sa mga emosyon halin sa pagkakontento tubtob sa tudok kag daku nga kalipay kag paagi sa kinaugali nga handum nga magpadayon ini nga kahimtangan. May amo gid bala sina nga kalipay?

Sa karon, ginapadaku sang katilingban ang pagtamod nga magamalipayon lamang ang mga tawo kon manggaranon sila. Nangin masako katama ang minilyon sa ila paninguha nga magmanggaranon. Bangod sini, ginasakripisyo sang madamo ang personal nga mga kaangtanan kag ang iban pa importante nga mga butang sa kabuhi. Kaangay sang mga subay sa isa ka bungsod, pirme sila nagadalidali, kag diutay lang ang ila tion sa pagpamalandong kon ano ang ila ginahimo ukon para sa isa kag isa. Sing halangpunon, “ang mga tawo nga nasayasat nga ginapung-awan padayon nga nagadamo,” siling sang isa ka report sa Los Angeles Times, “kag ang edad sang pagsugod [sang kapung-aw] padayon nga naganubo. . . . Ang mga bulong sa pagpakanay sang kapung-aw amo ang pinakamabakal.” Minilyon ang nagagamit sang ilegal nga mga droga ukon nagatinguha sa paglandas sang ila mga problema paagi sa alkoholiko nga ilimnon. Ang iban  nagapatuyang kon ginapung-awan. Sa isa ka surbe, “ang mga babayi nagaguwa nga amo ang may labi nga huyog sa pagpamalaklon agod maumpawan,” siling sang pamantalaan nga The Guardian sa Britanya. “Tatlo ka beses sila nga nagapamalaklon kon ginapung-awan kon ipaanggid sa mga lalaki.”

Apang, ang matuod nga kalipay indi makita sa balaligyaan, sa makahulubog nga ilimnon, sa pildoras, sa heringgilya, ukon sa kuwarta sa bangko. Ang kalipay wala ginabaligya; libre ini. Diin naton makita ining hamili nga dulot? Binagbinagon naton ini sa masunod nga artikulo.