Walay Dugo nga Pagbusbos—“Isa ka Tumalagsahon nga Pamaagi sang Pagbulong”

SA UBOS sang uluhan nga “ ‘Walay Dugo’ nga Pagbusbos,” ang magasin nga Maclean’s nagreport nga ang mga doktor sa bug-os nga Canada “naghimo sing bag-o nga mga pamaagi nga, sang nagligad nga lima ka tuig, naghimo sang ginatawag nga walay dugo nga pagbusbos subong isa ka tumalagsahon nga pamaagi sang pagbulong.” Ang isa sa ila amo si Brian Muirhead, isa ka manug-anestisya sa Health Sciences Centre sa Winnipeg. Ano ang nagpahulag sa iya nga magpanalawsaw sing alternatibo nga walay dugo nga pagbulong?

Sang 1986, ginbaton ni Dr. Muirhead ang hangkat nga operahan ang isa ka 70-anyos nga lalaki nga may nagadugo nga ulser nga, bangod sang iya pasad-sa-Biblia nga mga pagpati subong isa sang mga Saksi ni Jehova, nagpangabay sing pagbulong nga wala nagakinahanglan sang pagtayon sing dugo. (Binuhatan 15:​28, 29) Si Dr. Muirhead “naggamit sang talagsa-lang-ginagamit nga pamaagi sang pagtayon sa pasyente sing saline solution agod huptan nga mataas ang presyon sang iya dugo,” report sang Maclean’s. “Nangin madinalag-on ang pamaagi, kag nagpabakod pa gid ini sang pagpati ni Muirhead nga ‘nagahimo kita sing tuman kadamo nga pagtayon sing dugo. Sa banta ko tion na agod mangita sing mga alternatibo.’ ”

Ang pagpangita sing walay dugo nga pagbusbos “ginpalig-on bangod sang mga kabalaka sa palaabuton nga suplay sang gindonar nga dugo​—⁠kag bangod sang kahadlok sang madamo nga pasyente nga makakuha sing virus sang balatian paagi sa pagpatayon.” Bangod sa pagpanalawsaw sang mapahituon nga mga doktor, indi lamang ang mga Saksi ni Jehova kundi madamo pa ang nakabenepisyo. “Magluwas nga ginadula ang pagtayon sa madamo nga kaso, ang walay dugo nga pagbusbos nagabuhin sang katalagman​—⁠bisan daw ano man ka diutay⁠​—⁠​sang impeksion gikan sa mahigko nga dugo,” siling sang Maclean’s. Apang bisan ang “matinlo” nga dugo mahimo makatuga sing impeksion paagi sa temporaryo nga pagpugong sa mga sistema sang imyunidad.

Ano ang rason sang malig-on nga pagpati sang mga Saksi ni Jehova tuhoy sa alternatibo nga pagbulong nga walay dugo? Mahimo interesado ka nga basahon ang brosyur nga How Can Blood Save Your Life? Malipay ang mga Saksi ni Jehova nga ipaambit ini sa imo.