Ang Maayong Balita sang Ginharian—Ano Ini?

Sang nagligad nga tuig sa 235 ka kadutaan sa bug-os nga kalibutan, 6,035,564 ka tawo, bata kag tigulang, ang naghinguyang sing 1,171,270,425 ka oras sa pagpakighambal sa iban tuhoy sini. Magluwas sa pagpaalinton sini paagi sa pulong sang bibig, nakapahamtang sila sa mga kamot sang publiko sing kapin sa 700 milyones ka kopya sang naimprinta nga materyal agod ibantala kag ipaathag ini. Nakapanagtag man sila sing linibo ka audiocassette kag videocassette agod ibantala ini. Ano “ini”?

“INI” amo ang maayong balita sang Ginharian sang Dios. Matuod, wala pa gid anay matabo sa maragtas sang tawo nga “ining maayong balita sang ginharian” ginbantala tubtob sa kasangkaron nga makita naton karon.​—⁠Mateo 24:⁠14.

Ang tanan nga nagahimo sining bug-os kalibutan nga pagbantala kag pagtudlo nga hilikuton mga boluntaryo. Gikan sa di-relihioso nga pagtamod, daw di-sangkol sila para sa hilikuton. Kon amo, ngaa maisog kag madinalag-on sila? Ang gahom sang maayong balita sang Ginharian isa ka panguna nga rason, kay balita ini tuhoy sa mga pagpakamaayo nga matigayon sang katawhan. Ini amo ang mga pagpakamaayo nga ginahandum sang tanan nga tawo​—⁠kalipay, kahilwayan sa kapurauton, maayo nga gobierno, paghidait kag kalig-unan, kag isa pa ka butang nga ginakabig sang kalabanan nga mga tawo nga di-mapatihan​—⁠ang kabuhi nga walay katapusan! Isa gid ini ka maayong balita sa mga tawo nga nagapangita sing kahulugan kag katuyuan sang kabuhi. Huo, ini tanan nga pagpakamaayo kag ang madamo pa mahimo nimo maagom kon batunon kag pamatian mo ang ginabantala nga maayong balita sang Ginharian.

Ano ang Ginharian?

Apang, ano ang Ginharian nga ginabantala subong maayong balita? Ini amo ang Ginharian nga gintudlo sa minilyon nga ipangamuyo sa sining pamilyar nga mga tinaga: “Amay namon nga yara sa mga langit, pakabalaanon ang imo ngalan. Magkari ang imo ginharian. Paghimuon ang imo kabubut-on, kon paano sa langit, subong man sa duta.”​—⁠Mateo 6:​9, 10.

Ini amo ang Ginharian nga ginhambal sang Hebreong manalagna nga si Daniel sang nagligad nga kapin sa 25 ka siglo sang nagsulat sia: “Ang Dios sang langit magapatindog sing ginharian nga indi gid malaglag. Kag ang ginharian mismo indi iliton sa iban nga katawhan. Dugmukon sini kag papason ini tanan nga ginharian, kag magapadayon ini tubtob sa walay katubtuban.”​—⁠Daniel 2:⁠44.

Kon amo, ang maayong balita amo ang tuhoy sa Ginharian, ukon gobierno, sang Dios nga magadula sang tanan nga kalautan kag nian magagahom sa bug-os nga duta sa paghidait. Tumanon sini ang orihinal nga katuyuan sang Manunuga para sa katawhan kag para sa duta.​—⁠Genesis 1:⁠28.

 ‘Ang Ginharian Sang mga Langit Malapit Na’

Sang nagligad nga halos 2,000 ka tuig, ang maayong balita sang Ginharian una nga ginbantala sing dayag sang isa ka dedikado nga lalaki nga may talalupangdon nga dagway kag kinaiya. Yadto nga lalaki amo si Juan Bautista, nga anak sang Judiyong saserdote nga si Zacarias kag sang iya asawa, si Elizabeth. Si Juan nagpanapot sing balahibo sang kamelyo, kag nagpangwagkus sing panit sa iya balikawang, sa paagi nga kaangay kay manalagna Elias, nga naglandong sa iya. Apang naganyat ang igtalupangod sang madamo bangod sang iya mensahe. “Maghinulsol kamo,” pahayag niya, “kay ang ginharian sang mga langit malapit na.”​—⁠Mateo 3:​1-6.

Ang mga tagpalamati ni Juan mga Judiyo, nga nagapangangkon nga mga sumilimba sang matuod nga Dios, si Jehova. Subong isa ka pungsod, nabaton nila ang katipan nga Kasuguan paagi kay Moises mga 1,500 ka tuig ang nagligad. Yara gihapon sa Jerusalem ang halangdon nga templo, diin ginadulot ang mga halad suno sa Kasuguan. Sigurado gid ang mga Judiyo nga ang ila pagsimba husto sa mga mata sang Dios.

Apang, sa pagpamati kay Juan, nahisayran sang iban nga mga tawo nga ang ila relihion indi gali subong sang ginahunahuna nila. Ang Judiyong relihiosong mga panudlo ginsimpunan sang Griegong kultura kag pilosopiya. Ang kasuguan nga nabaton sa Dios paagi kay Moises nasimpunan na, ginpakawalay pulos pa gani, sang hinimo-tawo nga mga pagpati kag mga tradisyon. (Mateo 15:⁠6) Ginpatalang sang ila matig-a-sing-tagipusuon kag wala kaluoy nga mga lider sang relihion, ang kalabanan wala na nagasimba sa Dios sing kalahamut-an. (Santiago 1:27) Kinahanglan nila nga hinulsulan ang ila mga kasal-anan batok sa Dios kag batok sa katipan nga Kasuguan.

Sadto nga tion, madamo nga Judiyo ang nagapaabot sa pagluntad sang ginsaad nga Mesias, ukon Cristo, kag nagpalibog ang iban tuhoy kay Juan: “Sia ayhan ang Cristo?” Apang, ginpangindian ini ni Juan kag sa baylo ginpatuhoy sila sa iban, nga tuhoy sa iya nagsiling sia: “Indi ako takus sa paghubad sang higot sang iya sandalyas.” (Lucas 3:​15, 16) Sa pagpakilala kay Jesus sa iya mga disipulo, si Juan nagpahayag: “Tan-awa ninyo, ang Kordero sang Dios nga nagakuha sang sala sang kalibutan!”​—⁠Juan 1:⁠29.

Maayong balita gid yadto, kay si Juan, sa katunayan, nagatudlo sa tanan nga katawhan sang dalan padulong sa kabuhi kag kalipay​—⁠si Jesus, ang isa nga “nagakuha sang sala sang kalibutan.” Subong mga kaliwat nanday Adan kag Eva, ang tanan nga tawo nabun-ag sa mapiguson nga gahom sang sala kag kamatayon. Ang Roma 5:19 nagapaathag: “Subong nga paagi sa pagkadi-matinumanon sang isa ka tawo [si Adan] ang madamo ginkabig nga mga makasasala, subong man paagi sa pagkamatinumanon sang isa ka tawo [si Jesus] ang madamo pakamatarungon.” Si Jesus, nga kaangay sang isa ka mahalaron nga kordero, ‘magakuha sang sala’ kag magabag-o sang masubo nga kahimtangan sang mga tawo. “Ang bayad nga ginabayad sa sala amo ang kamatayon,” paathag sang Biblia, “apang ang dulot nga ginahatag sang Dios amo ang kabuhi nga walay katapusan paagi kay Cristo Jesus nga aton Ginuo.”​—⁠Roma 6:⁠23.

 Subong isa ka himpit nga tawo​—⁠sa katunayan, pinakabantog nga tawo nga nagkabuhi​—⁠ginbantala ni Jesus ang maayong balita. Ang rekord sang Biblia sa Marcos 1:​14, 15 nagasugid sa aton: “Karon pagkatapos nga gindakop si Juan nagkadto si Jesus sa Galilea, nga nagabantala sing maayong balita sang Dios kag nagasiling: ‘Ang gintalana nga tion natuman na, kag ang ginharian sang Dios malapit na. Maghinulsol kamo, kag magtuo sa maayong balita.’ ”

Ang mga nagpamati sa mensahe ni Jesus kag nagtuo sa maayong balita ginpakamaayo sing daku. Ang Juan 1:12 nagasiling: “Sa tanan nga nagbaton [kay Jesus], sa ila niya ginhatag ang awtoridad nga mangin mga anak sang Dios, bangod nagtuo sila sa iya ngalan.” Subong mga anak sang Dios, mahimo nila mabaton ang padya nga kabuhi nga walay katapusan.​—⁠1 Juan 2:⁠25.

Apang ang pribilehiyo nga makabaton sang mga pagpakamaayo sang Ginharian indi lamang limitado sa mga tawo sang unang siglo. Subong sang ginsambit kaina, ang maayong balita sang Ginharian sang Dios ginabantala kag ginatudlo sa bug-os napuy-an nga duta karon. Gani ang mga pagpakamaayo sang Ginharian matigayon gihapon. Ano ang dapat mo himuon agod mabaton ini nga mga pagpakamaayo? Ipaathag ini sang masunod nga artikulo.