Ang “Natago nga Katalagman sa Kapagros sang Publiko”

IKATLO nga bahin sang mga adulto nga nagagamit sing Internet sa Estados Unidos ang nagatan-aw sa isa ka sahi sang Web site tuhoy sa sekso, ginapakita sang isa ka surbe sining karon lang tuhoy sa sekso sa kompyuter. Madamo nga tawo sa karon ang nagapaayaw sang ila silabo sa sekso pinaagi sa Internet. “Isa ini ka natago nga katalagman sa kapagros sang publiko nga nagasilabo, sing bahin, bangod pila lamang ang nagakilala sini subong amo sini ukon nagakabig sini nga serioso,” siling ni Dr. Al Cooper, ang sikologo nga naghimo sing surbe.

Sin-o ilabi na ang mabiktima sang sekso sa kompyuter? “Yadtong mga nagagamit nga ang ila seksuwalidad mahimo nga ginpunggan kag ginlimitehan sa ila bug-os nga kabuhi” apang nga “sa hinali nakakita sang walay latid nga suplay sang seksuwal nga mga kahigayunan” sa Internet, siling ni Dr. Cooper.

Apang, ginakabig sang kalabanan sadtong pirme nagatan-aw sa site may kaangtanan sa sekso ang bisyo subong nga di-makahalalit. Amo bala? Subong nga ang isa ka giyan sa droga amat-amat nga nagakabalan sa droga nga nakagiyan sa iya, madamo nga giyan sa sekso sa kompyuter ang nagapanikasog nga dugangan pa ang “kadamuon” sang seksuwalidad sa Internet agod mabusog ang ila mga handum. Aba, mahimo pa gani nga madula nila ang ila palamugnan kag maguba ang relasyon nila nga mag-asawa!

Apang, ang mga tawo nga maluyag pahamut-an ang Dios may dugang pa nga rason agod likawan ang seksuwal nga mga site sa Internet. Ang Pulong sang Dios nagapaandam: “Busa, patya ninyo ang mga bahin sang inyo lawas nga yara sa ibabaw sang duta may kaangtanan sa pakighilawas, pagkadi-matinlo, seksuwal nga kailigbon, malaut nga handum, kag pagkamahamkunon, nga amo ang idolatriya. Bangod sa sining mga butang ang kasingkal sang Dios nagaabot.” (Colosas 3:​5, 6) Agod ‘patyon ang iya mga bahin sang lawas’ kon tuhoy sa mahigko nga gana sa sekso, ang isa ka tawo dapat magpalambo sang mabaskog nga gugma kay Jehova nga Dios. (Salmo 97:10) Kon masapwan niya ang iya kaugalingon nga ginasulay sang katalagman sa kapagros sang sekso sa kompyuter, dapat niya pabakuron ang iya gugma kay Jehova paagi sa pagtuon sang Pulong sang Dios, ang Biblia. Ang maayo nga pagpakig-upod sa mga Saksi ni Jehova sa lokal nga Kingdom Hall makabulig sing daku sa isa ka tawo agod mapabakod ang iya determinasyon nga pahamut-an ang Dios.