Madumduman Mo Bala?

Naapresyar mo bala ang pagbasa sang ulihi nga mga guwa sang Ang Lalantawan? Bueno, tan-awa kon masabat mo ang masunod nga mga pamangkot:

• Sa Roma 5:​3-5, ngaa ginpaulihi ni apostol Pablo ang paglaum?

Ginpresentar ni Pablo ang alagisod nga mga butang nga maeksperiensiahan sang mga Cristiano​​—⁠ang kapipit-an, pagbatas, kalahamut-an nga kahimtangan, kag paglaum. Ining “paglaum” indi ang nauna nga paglaum nga matigayon sang isa gikan sa Biblia, kundi amo ang napabakod, madalom, tudok nga paglaum nga matigayon sang isa ka Cristiano sa pagligad sang tion.​​—⁠12/15, pahina 22-3.

• Ngaa mangin interesado sa karon ang isa ka Cristiano sa atletiko nga mga hinampang nga ginhiwat sa dumaan nga Gresya?

Ang paghangop sa sahi kag mga kustombre sadtong mga hinampang makahatag sing kapawa sa madamo nga bersikulo sa Biblia. Ang pila sini nagapatuhoy sa ‘pagpakigsumpong suno sa mga pagsulundan,’ ‘pagsikway sa tagsa ka kabug-atan kag pagtulok sa huwaran ni Jesus,’ ‘pagdalagan sa dalanon tubtob sa katapusan,’ kag pagtigayon sa purongpurong, ukon padya. (2 Timoteo 2:⁠5; 4:​7, 8; Hebreo 12:​1, 2; 1 Corinto 9:​24, 25; 1 Pedro 5:⁠4)​​—⁠1/1, pahina 28-​30.

• Anong bag-o nga paagi sa pagpahayag sing maayong balita ang ginsugdan sang Enero 1914?

Ang “Photo-Drama of Creation” ginpaguwa sadto. Nagalakip ini sing apat-ka-bahin nga presentasyon nga nagagamit sang nagahulag nga pelikula kag sang ginatos ka may duag nga mga slide, kalabanan sini ginapahisanto ukon ginaakompanyaran sang narekord sa ponograpo nga mga pamulongpulong subong paathag. Beinte ka set sini nga Drama ang ginhanda kag lapnag nga gingamit sa pagtudlo sa mga tawo sang mensahe sang Biblia.​​—⁠1/15, pahina 8-9.

• Paano ang Nagadumala nga Hubon tuhay sa legal nga korporasyon?

Samtang ang mga direktor sang isa ka legal nga korporasyon ginaboto sa palangakuan sang mga katapo sini, ang Nagadumala nga Hubon wala ginatangdo sang bisan sin-o man nga tawo kundi ginatangdo ini ni Jesucristo. Indi kinahanglan nga ang mga direktor sang nanuhaytuhay nga korporasyon nga ginagamit sang mga Saksi ni Jehova mangin katapo sang Nagadumala nga Hubon. Sa tuigan nga miting sang Watch Tower Bible and Tract Society of Pennsylvania sining karon lang, ang mga katapo sang Nagadumala nga Hubon nga nagapangalagad subong mga direktor kag mga opisyal kinabubut-on nga naghalin sa ila mga palangakuan. Ang bakante nga mga palangakuan ginbuslan sang hamtong nga mga kauturan sang “iban nga mga karnero.” (Juan 10:16) Sa amo ang Nagadumala nga Hubon makahinguyang sing dugang pa nga tion sa paghanda sing espirituwal nga pagkaon kag sa pagtatap man sa espirituwal nga mga kinahanglanon sang bug-os kalibutan nga paghiliutod.​​—⁠1/15, pahina 29, 31.

• Ano ang duha ka halimbawa sa Biblia nga mahimo naton usisaon sa paghibalo kon paano atubangon ang pagluya sang buot?

Ang isa amo si Ana, ang iloy ni Samuel. Mahimo kuntani magluya ang iya buot sang sayop nga ginhukman sia ni Eli, ang mataas nga saserdote sang Israel. Sa baylo, prangka apang matinahuron nga ginsugid niya ang mga kamatuoran sa iya. Dugang pa, wala magdumot si Ana kay Eli. Ang ikaduha amo si Marcos, nga mahimo gid ginluyahan sang buot sang si apostol Pablo wala magsugot nga paupdon sia sa isa ka paglakbay subong misyonero. Sa baylo nga magluya bangod sining nawasi nga pribilehiyo, nagpadayon sia sa iya aktibo nga pag-alagad, nga naglakbay upod kay Bernabe.​​—⁠2/1, pahina 20-2.

• Ngaa ang mga Cristiano dapat maghalong sa paghatag sa iban, ukon pagbaton gikan sa ila, sing mga kopya sang software nga mga programa para sa kompyuter?

Ang kalabanan nga mga programa sa kompyuter (lakip ang mga hampang) ginakobrehan sang isa ka lisensia nga nagalimite sa tag-iya ukon sa nagagamit sa pag-instalar sing programa sa isa ka kompyuter. Kon kaisa ang paghimo sing mga kopya para sa iban isa ka paglapas sa kasuguan sa copyright, bisan pa ginahatag naton ini nga libre. Luyag sang mga Cristiano nga tumanon ang kasuguan, ‘ginahatag kay Cesar ang mga butang nga iya ni Cesar.’ (Marcos 12:17)​​—⁠2/15, pahina 28-9.

• Sin-o si Cyril kag si Methodius, kag ano ang naamot nila sa pagtuon sa Biblia?

Mag-utod sila nga natawo sa Tesalonica, Gresya, sang ikasiam nga siglo. Naghimo sila sing isa ka sistema sang pagsulat para sa Slaviko nga mga hambal kag ginbadbad nila ang daku nga bahin sang Biblia sa Slavoniko.​​—⁠3/1, pahina 28-9.

• Ano ang kahulugan sang ekspresyon nga “paghunahuna sa espiritu”?​​—⁠Roma 8:6.

Nagakahulugan ini nga ginakontrol, ginagamhan, kag ginapahulag sang aktibo nga kusog ni Jehova. Ang espiritu sang Dios makapanghikot sa aton paagi sa pagbasa kag pagtuon sang Biblia, paagi sa pagtuman sa kasuguan sang Dios sing bug-os tagipusuon, kag paagi sa pagpangamuyo sa Dios nga nagapangayo sang iya espiritu.​​—⁠3/15, pahina 15.

• Ano ang himuon naton kon ginabatyag naton nga wala lang kita mahangpan?

Importante gid nga husayon ang mga butang sing mahigugmaon. Kon daw indi ini gihapon magmadinalag-on, indi magkalisod. Pangayua ang paghangop kag bulig gikan kay Jehova, nga “nagatimbang sang mga tagipusuon.” (Hulubaton 21:⁠2; 1 Samuel 16:7)​​—⁠4/1, pahina 21-3.