Wala Nagaisahanon sang Gintilawan ang Amon Pagtuo

Si Vicky isa ka matahom nga lapsag​—⁠mapagros, makailima, kag mapagsik. Huo, sang natawo sia sang tigpamulak sang 1993, malipayon gid kami. Nagapuyo kami sa isa ka diutay nga banwa sa bagatnan nga bahin sang Sweden, kag makalilipay gid ang kabuhi.

APANG, sang mag-isa ka tuig kag tunga na ang edad ni Vicky, ang amon kalibutan daw nawasdak. Nagmasakit sia sa malawiglawig nga tion, gani gindala namon sia sa ospital. Indi gid namon malipatan ang tion nga ginsilingan kami sang doktor nga ang amon anak nagamasakit sing malubha nga lymphoblastic leukemia, isa ka sahi sang kanser kutob sa pagkabata nga nagaapektar sa puti nga mga selula sang dugo.

Mabudlay batunon nga ang amon anak may amo sini ka makakulugmat nga balatian. Karon pa lang sia may hinalung-ong sa mga nagakatabo sa palibot niya, kag karon mahimo na sia mapatay. Agod lugpayan kami, ang doktor nagsiling nga mahimo gamiton ang daw madinalag-on nga sahi sang pagbulong, nga nagalakip sang chemotherapy upod ang pila ka pagtayon sing dugo. Labi pa ini nga nagtublag sa amon.

Ang Amon Pagtuo Gintilawan

Palangga gid namon ang amon anak kag luyag namon nga matigayon niya ang pinakamaayo nga sahi sang pagpabulong. Apang, indi gid sia mahimo tayunan sing dugo. Nagapati gid kami sa Pulong sang Dios, ang Biblia, nga maathag nga nagasiling nga ang mga Cristiano dapat ‘maglihi sa dugo.’ (Binuhatan 15:​28, 29) Nahibaluan man namon nga ang mga pagtayon mismo sing dugo makatalagam. Linibo ang nalatnan sang mga balatian kag napatay bangod sa pagpatayon. Ang lamang nga alternatibo amo ang mataas-sing-kalidad nga pagbulong nga wala nagalakip sang mga pagtayon  sing dugo. May kaangtanan sini, ang amon pagpakig-away tungod sa pagtuo nagsugod karon.

Ano ang himuon namon? Ginpakig-angutan namon ang Hospital Information Services sa sanga talatapan sang mga Saksi ni Jehova sa Sweden agod mangayo sing bulig.⁠ * Sa gilayon, ginpadala ang mga fax sa lainlain nga mga ospital sa bug-os nga Europa sa amon pagpangita sing isa ka ospital kag isa ka doktor nga handa magpadapat sing chemotherapy nga wala nagatayon sing dugo. Ang kakugi kag gugma nga ginpakita sang amon Cristianong mga kauturan sa ila panikasog nga buligan kami makapabakod gid. Wala kami ginpabay-an sa amon pagpakig-away tungod sa pagtuo.

Sa sulod sang pila ka oras, nakakita sing isa ka ospital kag isa ka doktor sa Homburg/Saar, Alemanya. Ginhimo ang mga kahimusan agod makakadto kami sakay sa eroplano pagkadason nga adlaw agod tan-awon si Vicky. Sa pag-abot namon, ang amon Cristianong mga kauturan halin sa lokal nga kongregasyon sang mga Saksi ni Jehova sa Homburg, subong man ang pila sang amon mga himata, yadto didto agod abiabihon kami. Kag mainit kami nga gin-abiabi sang isa ka tiglawas sang lokal nga Hospital Liaison Committee. Gin-updan niya kami sa ospital kag ginpakita sa amon ang tanan nga suporta. Nalugpayan kami nga makita nga bisan sa iban nga pungsod, may espirituwal nga mga kauturan kami nga nagasuportar sa amon.

Sang masugilanon namon si Dr. Graf sa ospital, nalugpayan kami liwat. Mahinangpanon gid sia kag ginpasalig niya kami nga himuon niya ang iya tanan nga masarangan nga bulngon si Vicky nga wala nagatayon sing dugo. Bisan pa maganubo ang nibel sang iya hemoglobin sa 5 g/dl, handa sia nga padayunon ang pagbulong nga wala nagatayon sing dugo. Nagsiling man sia nga ang una nga pagsayasat kag maabtik nga ginhimo agod madala didto si Vicky naghatag sa iya sing daku nga tsansa agod mabulong sing madinalag-on. Ginbaton niya nga amo ini ang una nga tion nga ipadapat niya ang chemotherapy nga wala nagatayon sing dugo sa isa ka kaso nga kaangay sang iya ni Vicky. Nagapasalamat gid kami kag nagadayaw sa kaisog kag determinasyon ni Dr. Graf agod makabulig.

Mga Problema sa Ekonomiya

Ang pamangkot karon amo, Paano namon mabayaran ang mga pagpabulong kay Vicky? Nakibot gid kami sang ginsugiran kami nga ang duha ka tuig nga pagpabulong magabili sing mga 150,000 deutsche mark. Wala kami bisan isa ka bahin man lang sina nga kuwarta, apang kinahanglan gid nga masugdan sa gilayon ang pagbulong kay Vicky. Bangod naghalin kami sa Sweden agod magpabulong sa Alemanya, indi kami makakuha sang bisan ano man nga pangpubliko nga seguro sa kapagros. Gani didto kami upod sa amon masakiton kaayo nga anak kag may sampaton nga doktor nga handa sa pagbulig, apang wala kami sing nagakaigo nga kuwarta.

Ginbuligan kami sang ospital kag ginsilingan nga ang mga pagbulong sugdan sa gilayon kon magbayad kami anay sing 20,000 mark kag magpirma sing garantiya nga bayaran ang nabilin. May sinuptan kami, kag sa mahigugmaon nga bulig sang mga abyan kag mga himata, nabayaran namon ang 20,000 mark​—⁠apang kamusta naman ang nabilin pa?

Sa liwat ginpahanumdom kami nga wala kami nagaisahanon sa amon pagpakig-away tungod sa pagtuo. Isa ka espirituwal nga utod nga lalaki, nga indi namon sadto kilala, ang handa sa pagbayad sang amon balanse. Apang, indi na namon kinahanglan ang iya maalwan nga tanyag kay nakahimo kami sang iban pa nga mga kahimusan.

Ang Sampaton nga mga Doktor Nagapanghikot

Ginsugdan ang chemotherapy. Naglipas ang inadlaw kag senemana. Kon kaisa, mabudlay kag makakalapoy gid ini para sa amon anak kag para sa amon. Sa pihak nga bahin, nalipay gid kami kag nagapasalamat kada magpakita sia sing mga tanda sang pag-uswag. Ang chemotherapy naglawig sing walo ka bulan. Ang pinakamanubo nga nibel nga hemoglobin ni Vicky amo ang 6 g/dl, kag gintuman ni Dr. Graf ang iya pangako.

Naglipas ang kapin sa anom ka tuig, kag ang katapusan nga pag-usisa sa pluido sang iya taludtod wala nagapakita sang mga agi sang leukemia. Isa na sia ka malipayon nga bata karon nga wala sing bisan ano man nga palatandaan sang balatian. Huo,  daw isa ka milagro nga nag-ayo sing bug-os si Vicky. Nakahibalo kami nga madamo nga kabataan nga may amo man sini nga balatian ang nagakapatay walay sapayan nga gin-chemotherapy kag gintayunan sing dugo.

Ang amon pagpakig-away tungod sa pagtuo nangin madinalag-on, apang sa bulig ini sang amon mga himata, Cristianong mga kauturan, kag mga eksperto sa medisina. Ang Hospital Information Services naghatag sa amon sing bug-os nga suporta sa sulod sang 24 oras kada adlaw. Gingamit ni Dr. Graf kag sang iya mga kaupod ang ila ikasarang agod buligan si Vicky nga mag-ayo. Tungod sini tanan, nagapasalamat gid kami.

Ang Amon Pagtuo Ginpabakod

Apang, labaw sa tanan, nagapasalamat kami sa amon Dios, si Jehova, tungod sang iya mahigugmaon nga pag-atipan kag sa kusog nga nabaton namon paagi sa iya Pulong, ang Biblia. Sa paghinumdom, narealisar namon kon daw ano ka damo ang amon natun-an kag kon ano ka daku nga pagpabakod sa amon pagtuo ining mabudlay nga inagihan sa kabuhi.

Karon ang amon tinagipusuon nga handum amo ang huptan ang amon suod nga kaangtanan kay Jehova nga Dios kag tudluan ang amon anak sang kabilihanan sang pagkabuhi nahisuno sa Iya mga ginapatuman. Huo, luyag namon sia hatagan sing maayong espirituwal nga palanublion nga kabuhi nga walay katapusan sa nagapakari nga Paraiso diri sa duta.​—⁠Gin-amot.

[Nota]