Imo Bala “Ginabakal ang Nagakaigo nga Tion”?

GINLAYGAYAN ni apostol Pablo ang mga Cristiano sa Efeso sang unang siglo: “Magpadayon kamo sa pagbantay sing maayo nga ang inyo paglakat indi subong sang di-maalam kundi subong sang mga tawo nga maalamon, nga ginabakal ang nagakaigo nga tion para sa inyo kaugalingon, bangod nga ang mga adlaw malaut.” (Efeso 5:​15, 16) Ngaa kinahanglan ini nga laygay? Agod masabat ini nga pamangkot, kinahanglan mahibaluan ang mga kahimtangan nga gin-atubang anay sang mga Cristiano sa sadtong dumaan nga siudad.

Ang Efeso nakilal-an tungod sa iya tumalagsahon nga manggad, malaw-ay nga imoralidad, lapnag nga krimen, kag nanuhaytuhay nga mga buhat sang demonismo. Dugang pa, dapat batuan sang mga Cristiano didto ang pilosopiko nga mga pagpati tuhoy sa tion. Ang di-Cristiano nga mga Griego sa Efeso wala nagapati nga ang tion nagalakat sa isa ka direksion. Gintudluan sila sang Griegong pilosopiya nga ang kabuhi ginasulit sa walay katapusan nga mga siklo. Mahimo mabawi sang isa ka tawo nga nag-uyang sang iya tion sa isa ka siklo sang kabuhi ang tanan sa isa pa ka siklo. Bangod sini nga sahi sang panghunahuna, ang mga Cristiano sa Efeso nangin indi interesado sa orasan ni Jehova sang mga hitabo, pati na sa iya orasan sang paghukom. Busa, ang laygay ni Pablo nga ‘baklon ang nagakaigo nga tion’ nagakabagay gid.

Wala nagpamulong si Pablo tuhoy sa tion sa kabilugan lamang nga kahulugan. Ang Griegong tinaga nga iya gingamit nagakahulugan sing isa ka gintalana nga tion, isa ka nagakaigo nga tion para sa isa ka espesipiko nga katuyuan. Ginlaygayan ni Pablo ang unang-siglo nga mga Cristiano nga gamiton sing maalamon ang ila karon nagakaigo nga tion, ukon maayo nga panahon, antes mag-abot ang katapusan sini kag ang kaluoy sang Dios kag ang ginatanyag nga kaluwasan indi na matigayon.​​—⁠Roma 13:11-​13; 1 Tesalonica 5:​6-​11.

Nagakabuhi kita sa kaanggid man nga hut-ong sang tion. Sa baylo nga uyangan ining indi-na-gid masulit nga maayo nga panahon paagi sa paghimud-os sang umalagi nga mga kalipayan nga ginatanyag sang kalibutan, ang mga Cristiano maalamon kon gamiton nila ang ila tion nga matigayon agod maghimo sang “mga buhat sang diosnon nga debosyon” kag sa amo ginapabakod ang ila kaangtanan sa ila Manunuga, si Jehova nga Dios.​​—⁠2 Pedro 3:​11; Salmo 73:28; Filipos 1:⁠10.