Kon Paano ang Pagkabalo Nakaapektar sa Duha ka Babayi
Kon Paano ang Pagkabalo Nakaapektar sa Duha ka Babayi
SI Sandra isa ka balo nga nagapuyo sa Australia. Sang napatay ang iya bana mga pila ka tuig ang nagligad, ang nangin reaksion ni Sandra amo nga daw nadula sia sa iya kaugalingon. “Ginbatyag ko gid ang hinali nga pagkadula sang akon tiayon kag pinakasuod nga abyan. Indi ko gid madumduman kon paano ako nakapauli sadto halin sa ospital ukon kon ano pa ang ginhimo ko sadto nga adlaw. Sa nagsunod nga pila ka semana, ang akon kahadlok ginbuslan sang masunson nga pagpalanakit sang lawas.”
Si Sandra may medyo gulanggulang nga abyan, si Elaine, nga isa man ka balo sing mga anom na ka tuig. Gin-atipan ni Elaine ang iya bana nga si David sing anom ka bulan antes sia mapatay sa kanser. Tuman gid ang iya kasubo amo nga wala lang madugay pagkatapos nga mapatay ang iya bana, nakaeksperiensia sia sing temporaryo nga pagkabulag. Duha ka tuig sang ulihi nalipong sia sa tunga sang mga tawo. Ang iya doktor wala sing nakita nga balatian sa iya. Apang, nadiskobrehan sang doktor nga ginapunggan ni Elaine ang iya kasubo, gani ginhambalan sia nga magpauli kag piliton niya nga makahibi. “Madugaydugay nga nalandas ko ang akon kasubo,” baton ni Elaine, nga nagdugang pa nga kon masubuan gani sia, “nagasulod ako sa kuwarto kag ginalubong ang akon ulo sa mga bayo ni David.”
Huo, ang kamatayon sang isa ka hinigugma nga tiayon makatuga sing nanuhaytuhay nga reaksion, kay ang pagkabalo indi lamang pagkabuhi nga wala sing bana. Halimbawa, sa sulod sang pila ka tion, daw indi na kilala ni Sandra ang iya kaugalingon. Kaangay sang madamo nga bag-o lang mabalo, ginbatyag man niya nga maluya sia kag walay kalig-unan. Si Sandra naghinumdom: “Bangod naanad ako nga ang akon bana ang nagahimo sang katapusan nga mga desisyon, ako na sa hinali ang nabilin nga maghimo sing mga desisyon. Ginatublag ang akon pagtulog. Lapyo ako kag kapoy. Indi ko mahibal-an kon ano ang himuon.”
Sa tagsa ka adlaw may mga eksperiensia nga katulad nanday Sandra kag Elaine sa bug-os nga kalibutan. Bangod sang mga balatian, mga aksidente, mga inaway, pagpapas sa minoridad nga rasa, kag kasingki sa kabilugan, nagadamo pa ang mga balo. * Madamo sini nga mga babayi ang nagaantos sing hipos, nga indi makahibalo kon ano ang himuon. Ano ang mahimo sang mga abyan kag mga himata agod mabuligan yadtong nagapasibu sa pagkabalo? Ang masunod nga artikulo may pila ka panugda nga mahimo makabulig.
[Nota]
^ par. 5 Ang iban nga mga babayi yara sa sitwasyon nga kaangay sang mga balo bangod ginbayaan sila sang ila mga bana. Bisan pa ang pagbulagay kag ang diborsio nagatuga sing pinasahi nga mga problema, ang pila ka prinsipio nga ginbinagbinag sa masunod nga artikulo mahimo nga makabulig man sa mga babayi sa sining mga kahimtangan.
