“Si Jehova Nangin Maayo Gid sa Akon!”

SANG isa ka makalilipay gid nga gab-i sang Marso 1985, gintalupangod sang mga lalaki kag mga babayi sa Writing Department sa ulong-talatapan sang mga Saksi ni Jehova sa New York, E.⁠U.⁠A., ang isa ka talalupangdon nga butang. Si Karl F. Klein nakaalagad na sadto sing 60 ka tuig sa bug-os tion nga ministeryo. Mapagsik nga nagsiling si Utod Klein: “Si Jehova nangin maayo gid sa akon!” Nagsiling sia nga ang Salmo 37:4 amo ang iya paborito gid nga teksto sa Biblia. Nian, ginpahalipay niya ang tanan sang magtokar sia sang iya cello.

Sa nagsunod nga 15 ka tuig, si Utod Klein nagpadayon sa pagtrabaho subong katapo sang talapuanan sa pagsulat kag nag-alagad subong katapo sang Nagadumala nga Hubon sang mga Saksi ni Jehova. Nian, sang Enero 3, 2001, sa edad nga 95, matutom nga natapos ni Karl Klein ang iya dutan-on nga kabuhi.

Si Karl natawo sa Alemanya. Nagsaylo ang iya pamilya sa Estados Unidos, kag nagdaku si Karl malapit sa siudad sang Chicago, Illinois. Bata pa si Karl kag ang iya manghod nga si Ted sang mangin interesado gid sila sa Biblia. Ginbawtismuhan si Karl sang 1918, kag ang makakulunyag nga mga butang nga nabatian niya sa isa ka kombension sang mga Estudyante sang Biblia sang 1922 nagpahulag sa iya nga higugmaon ang ministeryo sa latagon tubtob buhi. Indi niya luyag nga maglipas ang isa ka semana nga wala sia makapakigbahin sa pagbantala nga hilikuton, kag ginhimo niya ini bisan sa katapusan nga senemana sang iya kabuhi.

Nangin katapo si Karl sang talapuanan sang ulong-talatapan sang 1925, kag una sia nagtrabaho sa imprintahan. Maluyagon gid sia sa musika, kag sa sulod sang pila ka tuig nagtokar sia sing cello sa orkestra nga gingamit sa mga pagpalayag sa Cristianong estasyunan sang radyo. Pagkatapos sadto, nagtrabaho sia sa Service Department, kag nalipay gid sia sa pagpakig-upod sa manugdumala sini, nga si T. J. Sullivan. Samtang, si Ted nagpangasawa kag upod sa iya asawa nga si Doris, nagmisyonero sila sa Puerto Rico.

Sa sulod sang tunga sa siglo, nagtrabaho si Karl Klein sa Writing Department, diin talalupangdon gid ang iya nabulig bangod maluyagon sia sa pagpanalawsaw kag may madalom nga ihibalo sa Biblia. Sang 1963, ginpangasawa ni Karl si Margareta, isa ka Aleman nga misyonera nga nagaalagad sa Bolivia. Bangod sang iya mahigugmaon nga pagsakdag, ilabi na sang nagbalatian si Karl, nangin mabungahon sia gihapon bisan pa naglampas na sia sa edad nga ang kalabanan nagaretiro. Ang kinaugali nga pagkatampad ni Karl, kag ang iya kapagsik subong isa ka musikero, nakabulig sa halandumon nga mga pamulongpulong sa mga kongregasyon kag sa mga kombension. Wala pa lang madugay antes sia mapatay, gindumalahan niya ang pagbinagbinag sa teksto sa aga para sa daku nga pamilya Bethel sa New York, sa kalipay kag kaayuhan sang tanan.

Madamo nga bumalasa sang Ang Lalantawan ang magahinumdom sa sugilanon sang kabuhi ni Utod Klein, nga isa ka makawiwili nga kasaysayan sang iya mga inagihan nga ginbalhag sa Oktubre 1, 1984, nga guwa. Maluyagan mo gid ang pagbasa ukon pagbasa liwat sina nga kasaysayan, nga ginadumdom nga ang manunulat sini nakahinguyang sing isa pa ka dekada kag tunga subong matutom kag debotado nga Cristiano.

Subong isa sang mga hinaplas sang Ginuo, bug-os tagipusuon nga handum ni Utod Klein ang paghari upod ni Cristo sa langit. May rason gid kita sa pagpati nga gintuman na karon ni Jehova ina nga handum.​—⁠Lucas 22:28-30.

[Retrato sa pahina 31]

Si Karl sang 1943 upod nanday T. J. Sullivan kag Ted kag Doris

[Retrato sa pahina 31]

Si Karl kag si Margareta, Oktubre 2000