Ang Panuytoy sang Dios sa Pagpili sing Tiayon

“Hatagan ko ikaw sing paghantop kag tudluan ikaw sa dalanon nga dapat mo laktan. Laygayan ko ikaw nga ang akon mata nagatulok sa imo.”​—⁠SALMO 32:8.

1. Ano nga mga butang ang kinahanglanon para sa isa ka madinalag-on nga pag-asawahay?

ANG isa ka aerialist (isa ka sahi sang sirkero) naglumpat gikan sa iya nagahabyog nga trapeze, nagbalintuwad, kag maabtik nga nagsirko sa kahanginan. Pagkatapos makasirko kag matadlong ang iya lawas, gin-untay niya ang iya butkon kag ginsalo sia sang isa ka nagabansuli nga sirkero gikan sa pihak nga bahin. Ang isa ka paris nga naga-ice skating magkaupod nga nagapadanlog sa rink. Hingalagan lamang, ginhakwat sang lalaki ang iya paris nga babayi kag gintib-ong sia pa ibabaw. Nagbuyong sia, nagtupa sing matahom sa isa ka skate, kag padayon nga nagbuyong upod sa iya sa yelo. Ang duha ka hinimuan daw mahapos lamang. Apang, sin-o ang magatilaw sini nga wala sing ensayo, nga wala sing isa ka sampaton nga kaupod, kag ilabi na nga wala sing husto nga sahi sang panuytoy ukon instruksion? Sing kaanggid, ang isa ka maayo nga pag-asawahay daw nagakahanabo lamang. Apang, nagadepende man ini sa isa ka maayo nga kaupod, sa nahituhog nga panikasog, kag ilabi na sa maalamon nga laygay. Huo, ang nagakaigo nga panuytoy kinahanglanon gid.

2. (a) Sin-o ang nagtukod sang kahimusan sa pag-asawahay, kag tungod sa ano nga katuyuan? (b) Paano ginahimo ang pila ka kahimusan sa pag-asawahay?

² Natural lamang para sa isa ka soltero ukon dalaga nga hunahunaon ang isa ka tiayon​—⁠isa ka kaupod sa kabuhi. Sugod sang gintukod ini ni Jehova nga Dios, ang pag-asawahay sang isa ka lalaki kag isa ka babayi nangin kinaandan nga dalanon sang kabuhi. Apang indi ang nahauna nga lalaki, nga si Adan, ang nagpili sang iya asawa. Si Jehova mahigugmaon nga nag-aman sing asawa para sa iya. (Genesis 2:18-24) Ang nahauna nga mag-asawa dapat magbuad agod mapuno sa ulihi ang duta sang mga tawo. Pagkatapos sadtong nahauna nga pag-asawahay, ang mga kahimusan sa pag-asawahay masunson nga ginahimo sang mga ginikanan sang magnobyo, kon kaisa sa tapos magpasugot ang mga nadalahig. (Genesis 21:21; 24:2-4, 58; 38:⁠6; Josue 15:​16, 17) Bisan pa kinaandan gihapon sa pila ka kadutaan kag kultura ang mga pag-asawahay nga ang mga ginikanan amo ang nagadesisyon kon sin-o ang pamanahon ukon pangasaw-on sang ila anak, madamo sa karon ang nagapili sang ila kaugalingon nga tiayon.

3. Paano dapat pilion ang isa ka tiayon?

³ Paano dapat pilion ang isa ka tiayon? Ang iban naimpluwensiahan sang hitsura​—⁠sang kon ano ang ila nakita nga matahom kag halandumon sa mata. Ang iban naman nagapangita sing materyal nga mga bentaha, sing isa nga magaatipan sa ila kag magahatag sang ila mga kinahanglanon kag mga luyag. Apang ang bisan diin lamang bala sini nga mga paagi sa pagpili nagadul-ong sa isa ka malipayon kag makaalayaw nga relasyon? “Ang kaalikaya mahimo nga malimbungon, kag ang katahom mahimo nga wala sing pulos,” siling sang Hulubaton 31:​30, “apang ang babayi nga nagakahadlok kay Jehova amo ang isa nga nagaagom sing kadayawan para sa iya kaugalingon.” Kag nasandig diri ang isa ka importante nga punto: Binagbinaga si Jehova kon nagapili sing tiayon.

Mahigugmaon nga Panuytoy Gikan sa Dios

4. Ano nga bulig ang ginaaman sang Dios may kaangtanan sa pagpili sing tiayon?

⁴ Ang aton mahigugmaon nga langitnon nga Amay, si Jehova, nag-aman sang iya nasulat nga Pulong agod tuytuyan kita sa tanan nga butang. Sia nagasiling: “Ako, si Jehova, amo ang imo Dios, ang Isa nga nagatudlo sa imo sa kapuslanan, ang Isa nga nagatuytoy sa imo sa dalanon nga dapat mo laktan.” (Isaias 48:17) Indi makapakibot, kon amo, nga makita sa Biblia ang madugay-na-natilawan nga mga giya para sa pagpili sing tiayon. Luyag ni Jehova nga ang aton pag-asawahay mangin dayon kag malipayon. Gani, nag-aman sia sing bulig  agod mahangpan kag maaplikar naton ining mga giya. Indi bala nga amo sina ang dapat naton mapaabot sa aton mahigugmaon nga Manunuga?​—⁠Salmo 19:8.

5. Ano ang importante gid para sa dayon nga kalipay sa pag-asawahay?

⁵ Sang ginsugdan ni Jehova ang kahimusan sa pag-asawahay, gintuyo niya ini nga mangin isa ka dayon nga relasyon. (Marcos 10:6-12; 1 Corinto 7:​10, 11) Amo ina kon ngaa “ginadumtan niya ang pagdiborsio,” kag ginatugutan lamang ini sa rason nga “pakighilawas.” (Malaquias 2:13-16; Mateo 19:⁠9) Busa, ang pagpili sing tiayon isa sang labing serioso nga mga tikang nga sarang naton mahimo kag indi dapat tamdon sing pasapayan lamang. May pila ka desisyon nga mahimo magresulta sa kalipay ukon kasubo. Samtang ang maayo nga pagpili makapahalipay sa kabuhi sang isa ka tawo kag makahimo sini nga makaalayaw, ang di-maalamon nga pagpili mahimo magresulta sa walay katapusan nga kasubo. (Hulubaton 21:19; 26:21) Agod magpadayon ang kalipay, kinahanglan nga mangin maalamon sa pagpili kag mangin handa sa paghimo sing dayon nga panumpa, kay gintukod sang Dios ang pag-asawahay subong isa ka pag-updanay nga magalambo sa paghiusa kag kooperasyon.​—⁠Mateo 19:6.

6. Ngaa ang mga pamatan-on nga lalaki kag babayi ilabi na nga dapat maghalong kon nagapili sing tiayon, kag paano sila makahimo sing labing maalamon nga desisyon?

⁶ Ang mga pamatan-on nga lalaki kag babayi dapat ilabi na nga maghalong nga wala ginapatiko sang pisikal nga katahom kag mabaskog nga silabo ang ila paghangop kon nagapili sing tiayon. Sa pagkamatuod, ang relasyon nga napasad lamang sa sini nga mga butang madasig nga mangin paghikay ukon pagdumot pa gani. (2 Samuel 13:15) Sa pihak nga bahin, ang dayon nga gugma sarang mapalambo kon makilala na naton ang aton tiayon kag kon mahangpan man naton sing mas maayo ang aton kaugalingon. Dapat man naton hangpon nga ang labing maayo gid para sa aton mahimo nga indi gali ang una nga ginahandum sang aton tagipusuon. (Jeremias 17:⁠9) Amo kon ngaa ang panuytoy sang Dios nga masapwan sa Biblia importante katama. Nagabulig ini sa aton nga mahantop kon paano kita makahimo sing labing maalamon nga mga desisyon sa kabuhi. Gintiglawas sang salmista si Jehova subong nga nagasiling: “Hatagan ko ikaw sing paghantop kag tudluan ikaw sa dalanon nga dapat mo laktan. Laygayan ko ikaw nga ang akon mata nagatulok sa imo.” (Salmo 32:⁠8; Hebreo 4:12) Samtang sarang mapaayawan sang pagminyo ang aton duna nga pagkinahanglan sing gugma kag kaupod, nagahatag man ini sang mga problema nga nagakinahanglan sing pagkahamtong kag paghantop.

7. Ngaa wala ginabaton sang iban ang pasad-sa-Biblia nga laygay tuhoy sa pagpili sing tiayon, apang sa ano nagadul-ong ini nga dalanon?

⁷ Maalamon nga pamatian kon ano ang ginasiling sang Manughimuno sang pag-asawahay tuhoy  sa pagpili sang tiayon. Apang, mahimo nga indi kita magpamati kon ang pasad-sa-Biblia nga laygay naghalin sa mga ginikanan ukon sa Cristianong mga gulang. Mahimo kita magbatyag nga wala nila kita mahangpan sing bug-os, kag ang mabaskog nga mga kailigbon sa emosyon mahimo magtiklod sa aton nga sundon ang huyog sang tagipusuon. Apang, pagligad sang pila ka tion, kon nagaatubang sang mga katunayan sang adlaw-adlaw nga pagkabuhi, mahimo kita maghinulsol nga wala naton ginpamatian ang maalamon nga laygay nga ginhatag para sa aton kaayuhan. (Hulubaton 23:19; 28:26) Mahimo naton masapwan ang aton kaugalingon sa isa ka walay gugma nga pag-asawahay, nga may mga kabataan nga retobado kag ayhan may isa pa gani ka di-tumuluo nga tiayon. Daw ano gid ka makapasubo kon ang pag-asawahay nga makahatag kuntani sa aton sing daku nga kalipay mangin ginhalinan sang daku nga kalisdanan!

Diosnon nga Debosyon—⁠Isa ka Importante nga Butang

8. Paano ang diosnon nga debosyon makabulig agod mangin dayon kag mangin malipayon ang pag-asawahay?

⁸ Matuod, ang pagkaganyat sa isa kag isa nagabulig sa pagpabakod sang pag-asawahay. Apang ang mga prinsipio nga lunsay ginapatihan labi pa ka importante agod mangin dayon kag malipayon ang pag-asawahay. Ang debosyon sang isa kag isa kay Jehova nga Dios nagadihon sang isa ka dayon nga higot kag nagapasanyog sang paghiusa nga wala sing liwan na nga butang nga makahimo. (Manugwali 4:12) Kon ginatuon sang isa ka Cristianong mag-asawa ang ila kabuhi sa matuod nga pagsimba kay Jehova, mahiusa sila sa espirituwal, mental, kag moral. Magatuon sila sa Pulong sang Dios sing magkaupod. Magapangamuyo sila sing tingob, kag nagapahiusa ina sang ila tagipusuon. Magaupuray sila sa pagtambong sa Cristianong mga miting kag sa pag-alagad sa latagon. Ini tanan nagabulig agod mapabakod ang isa ka espirituwal nga higot nga labi nga nagapasuod sa ila sa isa kag isa. Sing labi pa ka importante, nagaresulta ini sa pagpakamaayo ni Jehova.

9. Ano ang ginhimo ni Abraham may kaangtanan sa pagpangita sing asawa para kay Isaac, kag ano ang resulta?

⁹ Bangod sang iya diosnon nga debosyon, gintinguhaan sang matutom nga patriarka nga si Abraham nga pahamut-an ang Dios sang nag-abot na ang tion agod magpili sing asawa para sa iya anak nga si Isaac. Si Abraham nagsiling sa iya ginasaligan  nga alagad sa panimalay: “Pasumpaon ko ikaw paagi kay Jehova, ang Dios sang langit kag ang Dios sang duta, nga indi ka magakuha sing asawa para sa akon anak gikan sa mga anak nga babayi sang mga Canaanhon nga sa tunga nila nagapuyo ako, kundi magakadto ka sa akon duta kag sa akon kahimataan, kag magakuha ka sing asawa para sa akon anak, para kay Isaac. . . . Ipadala [ni Jehova] ang iya anghel nga una sa imo, kag pat-od nga magakuha ka sing asawa para sa akon anak gikan didto.” Si Rebeca napamatud-an nga isa ka tumalagsahon nga asawa, nga ginhigugma gid ni Isaac.​—⁠Genesis 24:​3, 4, 7, 14-21, 67.

10. Anong Makasulatanhon nga mga obligasyon ang ginabutang sa mga bana kag mga asawa?

¹⁰ Kon kita di-minyo nga mga Cristiano, ang diosnon nga debosyon magabulig sa aton nga mapalambo ang mga kinaiya agod masunod ang Makasulatanhon nga mga tulumanon sang pag-asawahay. Lakip sa mga obligasyon sang mag-asawa amo ang ginhinambitan ni apostol Pablo: “Ang mga asawa magpasakop sa ila mga bana subong nga sa Ginuo . . . Mga bana, padayon nga higugmaa ang inyo mga asawa, subong nga si Cristo man naghigugma sang kongregasyon kag nagtugyan sang iya kaugalingon tungod sa sini . . . Ang mga bana dapat maghigugma sang ila mga asawa subong sang ila kaugalingon nga mga lawas. . . . Ang tagsatagsa sa inyo maghigugma man sang iya asawa subong sang iya kaugalingon; sa pihak nga bahin, ang asawa dapat man may tudok nga pagtahod sa iya bana.” (Efeso 5:22-33) Subong sang nakita naton, ginapadaku sang inspirado nga mga pulong ni Pablo ang pagkakinahanglanon sang gugma kag pagtahod. Agod masunod ini nga laygay, kinahanglan ang matinahuron nga pagkahadlok kay Jehova. Nagakinahanglan ini sang bug-os tagipusuon nga pangako maayo man ukon malain ang kahimtangan. Ang mga Cristiano nga nagahunahuna sa pagminyo dapat mag-abaga sini nga responsabilidad.

Pagpamat-od Kon San-o Magminyo

11. (a) Ano nga laygay ang ginahatag sa Kasulatan kon san-o dapat magminyo? (b) Ano nga halimbawa ang nagapakita sang kaalam sang pagsunod sa laygay sang Biblia nga narekord sa 1 Corinto 7:36?

¹¹ Ang paghibalo kon san-o kita handa na sa pagminyo importante gid. Sanglit indi ini palareho sa lainlain nga indibiduwal, ang Kasulatan wala nagapatuman sing edad. Apang, ginapakita sini nga mas maayo nga maghulat tubtob “lampas na [kita] sa kapagsik sang pagkapamatan-on,” sa tion nga mahimo patikuon sang mabaskog nga seksuwal nga silabo ang maayo nga paghantop. (1 Corinto 7:36) “Kon makita ko ang akon mga abyan nga naga-date kag nagaminyo, ang madamo samtang tin-edyer pa, kon kaisa mabudlay iaplikar ini nga laygay,” siling ni Michelle. “Apang nahibaluan ko nga ang laygay naghalin kay Jehova, kag ginasugo lamang niya sa aton kon ano ang para sa kaayuhan naton. Samtang nagahulat sa pagminyo, nahugod ko ang akon igtalupangod sa akon kaangtanan kay Jehova kag sa pagtigayon sing pila ka eksperiensia sa kabuhi, nga ayhan indi mo matigayon sa imo pagkatin-edyer. Pagligad sang pila ka tuig, mas handa na ako sa pag-atubang sa mga responsabilidad subong man sa mga problema nga nagautwas sa pag-asawahay.”

12. Ngaa maalamon nga indi magpadasudaso sa pagminyo samtang bata pa?

¹² Masunson natukiban sang mga tawo nga nagminyo sing padasudaso samtang bata pa nga ang ila mga kinahanglanon kag mga handum nagabag-o samtang nagahamtong sila. Sa amo nga tion narealisar nila nga ang mga butang nga ginkabig nila anay nga halandumon indi na gali tuman ka importante. Ang isa ka pamatan-on nga Cristianong lin-ay determinado sa pagminyo sa edad nga 16. Ang iya lola kag ang iya iloy nagminyo sa amo man nga edad. Sang ginpangindian sia nga pakaslan sang lalaki nga naluyagan niya sadto nga tion, ginpili niya ang isa nga handa sia pakaslan. Apang, sang ulihi sa kabuhi, nanganduhoy sia sing daku tungod sa iya padasudaso nga desisyon.

13. Yadtong nagaminyo samtang bata pa masunson nga kulang sa ano nga bahin?

¹³ Kon nagahunahuna sa pagminyo, importante nga tigayunon ang hamtong nga paghangop sa tanan nga butang nga nadalahig. Ang pagminyo samtang bata pa mahimo magresulta sa madamo nga problema nga ayhan indi pa handa nga atubangon sang lamharon nga mag-asawa. Mahimo nga kulang sila sing eksperiensia kag sing pagkahamtong nga kinahanglanon agod maatubang ang mga kahuol sang pag-asawahay kag pagpadaku sa kabataan. Dapat lamang himuon ang pagminyo kon handa na kita sa pisikal, mental, kag espirituwal nga sugdan ang isa ka dayon nga pag-updanay.

14. Ano ang kinahanglan agod maatubang ang mahuol nga mga kahimtangan sa pag-asawahay?

¹⁴ Si Pablo nagsulat nga ang mga nagaminyo “may kapipit-an sa ila unod.” (1 Corinto 7:28) Ang mga problema magautwas bangod may yara duha ka magkatuhay nga personalidad, kag ang mga  pagtamod magalainlain. Bangod sang tawhanon nga pagkadi-himpit, mahimo mabudlay tumanon ang aton Makasulatanhon nga katungdanan sa kahimusan sang pag-asawahay. (1 Corinto 11:⁠3; Colosas 3:​18, 19; Tito 2:​4, 5; 1 Pedro 3:​1, 2, 7) Kinahanglan ang pagkahamtong kag espirituwal nga kalig-unan sa pagtinguha nga matigayon kag masunod ang panuytoy sang Dios agod malubad ang mahuol nga mga kahimtangan sing mahigugmaon.

15. Ano ang katungdanan sang mga ginikanan sa paghanda sang ila mga anak sa pagminyo? Iilustrar.

¹⁵ Sarang mahanda sang mga ginikanan ang ila mga kabataan para sa pagminyo paagi sa pagbulig sa ila nga mahangpan ang pagkaimportante sang pagsunod sa panuytoy sang Dios. Paagi sa malantipon nga paggamit sa Kasulatan kag Cristianong mga publikasyon, mabuligan sang mga ginikanan ang ila mga anak sa pagpat-od kon bala sila ukon ang ila pamanahon ukon pangasaw-on handa sa pagbaton sang obligasyon sang pag-asawahay.⁠ * Naghunahuna ang 18-anyos nga si Blossom nga ginahigugma niya ang isa ka pamatan-on sa iya kongregasyon. Ang lalaki isa ka bug-os tion nga payunir nga ministro, kag luyag nila magpakasal. Apang ginhingyo si Blossom sang iya mga ginikanan nga maghulat sing isa pa ka tuig, kay sa pagbanta nila, bata pa sia kaayo. Si Blossom nagsulat sang ulihi: “Nagapasalamat gid ako nga ginpamatian ko yadtong maalamon nga laygay. Sa sulod sadto mismo nga tuig, naghamtong ako kag nakita ko nga ini nga pamatan-on wala gali sang mga kinaiya nga nagakaigo para sa isa ka maayo nga tiayon. Nagbiya sia sang ulihi sa organisasyon, kag nalikawan ko ang isa ka kapahamakan kuntani sa akon kabuhi. Daw ano gid ka makalilipay nga makatigayon sing maalam nga mga ginikanan nga ang ila paghantop sarang masaligan!”

‘Magminyo Lamang sa Ginuo’

16. (a) Paano matilawan ang mga Cristiano tuhoy sa ‘pagminyo sa Ginuo’? (b) Kon ginasulay nga magminyo sa isa ka di-tumuluo, ano ang dapat nga binagbinagon sang mga Cristiano?

¹⁶ Tuman kaathag ang sugo ni Jehova para sa mga Cristiano: ‘Magminyo lamang sa Ginuo.’ (1 Corinto 7:39) Ang Cristianong mga ginikanan kag ang ila mga kabataan mahimo tilawan may kaangtanan sini. Paano? Ang mga pamatan-on mahimo nga luyag na magminyo, apang wala sila sing makita nga palamanhon ukon palangasaw-on sa sulod sang kongregasyon. Ayhan amo sini ang pagdumdom nila. Mahimo nga mas diutay ang mga soltero sangsa mga dalaga sa isa ka lugar, ukon mahimo nga daw wala sing isa nga nagakabagay sa isa ka lugar. Mahimo magpakita sing luyag sa isa ka Cristianong dalaga ang isa ka soltero nga indi dedikado nga katapo sang kongregasyon (ukon ang Cristiano nga soltero sa indi Cristiano nga dalaga), kag yara ang pag-ipit nga ikompromiso ang mga talaksan nga ginpahamtang ni Jehova. Sa sini nga mga kahimtangan, maayo nga binagbinagon ang halimbawa ni Abraham. Ang isa ka paagi nga nahuptan niya ang iya maayo nga kaangtanan sa Dios amo ang pagpat-od nga ang iya anak nga si Isaac magaminyo sa isa ka matuod nga sumilimba ni Jehova. Amo man sini ang ginhimo ni Isaac sa iya anak nga si Jacob. Nagkinahanglan ini sang pagpanikasog sang tanan nga nadalahig, apang nagpahamuot ini sa Dios kag nagresulta sa iya pagpakamaayo.​—⁠Genesis 28:1-4.

17. Ngaa ang pagminyo sa isa ka di-tumuluo mahimo nga mangin mabudlay, kag ano ang pinakaimportante nga rason agod ‘magminyo lamang sa Ginuo’?

¹⁷ Sa pila ka hitabo, ang di-tumuluo nangin Cristiano sang ulihi. Apang, ang pagminyo sa mga di-tumuluo masunson napamatud-an nga mabudlay kaayo. Yadtong nagpagota sing sampihakan indi magkapareho sing pagtuluuhan, mga prinsipio, ukon mga tulumuron. (2 Corinto 6:14) Mahimo ini may makahalalit nga epekto sa komunikasyon kag kalipay sang pag-asawahay. Halimbawa, ang isa ka Cristianong babayi nagbakho bangod pagkatapos sang isa ka makapalig-on nga miting, indi niya mabinagbinag sa iya di-tumuluo nga tiayon ang espirituwal nga mga butang sa pagpauli niya. Siempre pa, ang mas importante amo nga ang ‘pagminyo sa Ginuo’ isa ka pagpakita sing katutom kay Jehova.  Kon ginasunod naton ang Pulong sang Dios, ang aton tagipusuon wala nagatagudili sa aton, kay ginahimo naton kon ano ang “kalahamut-an sa iya mga mata.”​—⁠1 Juan 3:​21, 22.

18. Kon nagabinagbinag sa pagminyo, anong importante nga mga butang ang dapat hatagan sing igtalupangod, kag ngaa?

¹⁸ Kon nagabinagbinag sa pagminyo, ang maayo nga moralidad kag espirituwalidad sang palamanhon ukon palangasaw-on dapat amo ang una nga kabalak-an. Ang Cristianong personalidad, upod ang gugma sa Dios kag ang bug-os kalag nga debosyon sa iya, mas daku ang kabilihanan sangsa pisikal nga katahom. Ang kahamuot sang Dios ginaagom sang mga nagaapresyar kag nagatuman sang ila obligasyon nga mangin mabakod sa espirituwal nga mga tiayon. Kag ang pinakadaku nga kusog nga matigayon sang isa ka mag-asawa nagahalin sa debosyon sang isa kag isa sa Manunuga kag sa bug-os nga pagbaton sa iya panuytoy. Sa sining paagi si Jehova ginapadunggan, kag ang pag-asawahay nagasugod sa isa ka malig-on nga kahimtangan sa espirituwal nga magabulig sa isa ka dayon nga paghiusa.

[Nota]

Paano Mo Sabton?

• Ngaa ang panuytoy sang Dios kinahanglanon sa pagpili sing isa ka maayo nga tiayon?

• Paano ang diosnon nga debosyon nagabulig sa pagpabakod sang higot sang pag-asawahay?

• Paano mahanda sang mga ginikanan ang ila mga anak sa pagminyo?

• Ngaa importante nga ‘magminyo lamang sa Ginuo’?

[Mga Pamangkot sa Pagtinuon]

[Mga retrato sa pahina 17]

Ang pag-aplikar sa laygay sang Dios tuhoy sa pagpili sang imo tiayon magaresulta sa daku nga kalipay

[Mga retrato sa pahina 18]

Ang bugana nga mga pagpakamaayo matigayon bangod sang ‘pagminyo lamang sa Ginuo’