Dayawa si Jehova Tungod sa Iya Dalagku nga mga Binuhatan!

“Ginapakadaku sang akon kalag si Jehova . . . bangod ang Isa nga gamhanan naghimo para sa akon sing dalagku nga mga binuhatan.”​—⁠LUCAS 1:46-49.

1. Tungod sa anong dalagku nga mga binuhatan ginadayaw naton sing nagakaigo si Jehova?

SI Jehova takus dayawon tungod sa iya dalagku nga mga binuhatan. Sang gin-asoy ni manalagna Moises ang kahilwayan sang Israel gikan sa Egipto, nagsiling sia: “Ang inyo mga mata amo ang nakakita sang tanan nga dalagku nga mga binuhatan ni Jehova.” (Deuteronomio 11:​1-7) Sing kaanggid, sang ginpahibalo ni anghel Gabriel ang nagapakari nga pagkabun-ag ni Jesus sa ulay nga babayi nga si Maria, nagsiling sia: “Ginapakadaku sang akon kalag si Jehova . . . bangod ang Isa nga gamhanan naghimo para sa akon sing dalagku nga mga binuhatan.” (Lucas 1:46-49) Subong mga Saksi ni Jehova, ginadayaw naton sia tungod sa dalagku nga mga binuhatan subong sang paghilway sa Israel gikan sa pagkaulipon sa Egipto kag sa milagruso nga pagpanamkon sa iya pinalangga nga Anak.

2. (a) Ano ang kahulugan sang “dayon nga katuyuan” sang Dios para sa matinumanon nga katawhan? (b) Ano ang naeksperiensiahan ni Juan sa pulo sang Patmos?

² Madamo sang dalagku nga mga binuhatan ni Jehova ang ginaangot sa iya “dayon nga katuyuan” nga pakamaayuhon niya ang matinumanon nga katawhan paagi sa Mesias kag sa iya paggahom sa Ginharian. (Efeso 3:8-13) Ina nga katuyuan amat-amat nga nagakatuman sang ang tigulang nga si apostol Juan gintugutan sa pagtan-aw sa isa ka bukas nga ganhaan sang langit sa palanan-awon. Nakabati sia sing isa ka katulad-budyong nga tingog nga nagasiling: “Saka diri, kag ipakita ko sa imo ang mga butang nga dapat mahanabo.” (Bugna 4:⁠1) Bisan pa gintapok sia sang panguluhan sang Roma sa pulo sang Patmos “bangod sa paghambal nahanungod sa Dios kag sa pagpanaksi tuhoy kay Jesus,” si Juan nakabaton sing “bugna ni Jesucristo.” Ang nakita kag nabatian sang apostol nagpahayag sing madamo tuhoy sa dayon nga katuyuan sang Dios, sa amo nagahatag sing espirituwal nga kasanagan kag suno-sa-tion nga pagpalig-on para sa tanan nga matuod nga Cristiano.​—⁠Bugna 1:​1, 9, 10.

3. Sin-o ang ginatiglawas sang 24 ka gulang nga nakita ni Juan sa palanan-awon?

³ Paagi sadtong bukas nga ganhaan sa langit, nakita ni Juan ang 24 ka gulang, nga nagalingkod sa trono kag napurungpurungan kaangay sa mga hari. Naghapa sila sa atubangan sang Dios kag nagsiling: “Takus ka, Jehova, nga amon Dios, sa pagbaton sang himaya kag dungog kag gahom, kay ikaw ang nagtuga sang tanan nga butang, kag bangod sang imo kabubut-on nangin amo kag gintuga sila.” (Bugna 4:11) Yadto nga mga gulang nagatiglawas sa tanan nga ginbanhaw nga hinaplas nga mga Cristiano sa ginpakataas nga katungdanan nga ginsaad sang Dios sa ila. Napahulag sila nga dayawon si Jehova bangod sang iya dalagku nga mga binuhatan may kaangtanan sa pagpanuga. Natingala man kita sa pamatuod sang “dayon nga gahom kag pagka-Dios” ni Jehova. (Roma 1:20) Kag kon  mas madamo ang matun-an naton tuhoy kay Jehova, mas madamo pa ang aton rason nga dayawon sia tungod sa iya dalagku nga mga binuhatan.

Ipahayag ang Dalayawon nga mga Binuhatan ni Jehova!

4, 5. Maghatag sing mga halimbawa kon paano gindayaw ni David si Jehova.

⁴ Gindayaw ni salmista David ang Dios tungod sa Iya dalagku nga mga binuhatan. Halimbawa, si David nag-amba: “Mag-amba kamo kay Jehova, nga nagapuyo sa Sion; isugid ninyo sa katawhan ang iya binuhatan. Pakitai ako sing kaluoy, O Jehova; tan-awa ang akon kapipit-an bangod sa mga nagadumot sa akon, O ikaw nga nagabayaw sa akon gikan sa mga gawang sang kamatayon, agod mapahayag ko ang tanan sang imo dalayawon nga binuhatan sa mga gawang sang anak nga babayi sang Sion.” (Salmo 9:​11, 13, 14) Sa tapos niya ginhatag kay Solomon, nga iya anak, ang plano sang arkitektura sang templo, ginpakamaayo kag gindayaw ni David ang Dios, nga nagasiling: “Imo, O Jehova, ang pagkadaku kag ang gahom kag ang katahom kag ang pagkahalangdon kag ang pagkadungganon . . . Imo ang ginharian, O Jehova, ang Isa man nga nagbayaw sang imo kaugalingon subong pangulo sa ibabaw sang tanan. . . . Kag karon, O Dios namon, nagapasalamat kami sa imo kag nagadayaw sang imo matahom nga ngalan.”​—⁠1 Cronica 29:10-13.

⁵ Ang Kasulatan sulitsulit nga nagaagda​—⁠huo, nagapalig-on⁠​—⁠​sa aton nga dayawon ang Dios, subong sang ginhimo ni David. Ang tulun-an sang Mga Salmo may madamong ekspresyon sang pagdayaw sa Dios, kag mga katunga sining mga ambahanon ang ginapatungod kay David. Pirme niya gindayaw kag ginpasalamatan si Jehova. (Salmo 69:30) Isa pa, sugod sang una, ang ginbugna sang Dios nga mga komposisyon ni David kag sang iban pa ginagamit sa pagdayaw kay Jehova.

6. Paano ang inspirado nga Mga Salmo napamatud-an nga mapuslanon sa aton?

⁶ Daw ano gid ka mapuslanon ang Mga Salmo para sa mga sumilimba ni Jehova! Kon luyag naton pasalamatan ang Dios tungod sa tanan niya nga dalagku nga binuhatan para sa aton, nagakaigo gid nga hunahunaon naton ang matahom nga mga pulong nga masapwan sa Mga Salmo. Halimbawa, pagkabugtaw sa isa ka bag-o nga adlaw, mahimo kita mapahulag sa pagpabutyag kaangay sini: “Maayo ang magpasalamat kay Jehova kag ang mag-amba sa imo ngalan, O Labing Mataas; sa pagsugid sa aga sang imo mahigugmaon nga kaayo kag sang imo katutom sa kagab-ihon, . . . kay ginpasadya mo ako, O Jehova, bangod sa imo buhat; bangod sa mga binuhatan sang imo mga kamot nagasinggit ako nga may kalipay.” (Salmo 92:​1-4) Kon malandas naton ang balagbag sa aton espirituwal nga pag-uswag, mahimo kita mahuyog sa pagpabutyag sing kalipay kag pasalamat sa pangamuyo, subong sa ginhimo sang salmista sang nag-amba sia: “O kari maghugyaw kita sing malipayon kay Jehova! Magsinggit kita sa kadalag-an sa aton Igang sang kaluwasan. Magpalapit kita sa atubangan niya nga may pagpasalamat; sa kadalag-an magsinggit kita sa iya nga may mga pag-amba.”​—⁠Salmo 95:​1, 2.

7. (a) Ano ang talalupangdon tuhoy sa madamong ambahanon nga gin-amba sang mga Cristiano? (b) Ano ang isa ka rason agod mag-abot sing temprano sa mga miting kag magpabilin tubtob matapos?

⁷ Masunson naton ginabayaw ang aton mga tingog sa mga ambahanon sang pagdayaw kay Jehova sa mga miting sa kongregasyon, mga asambleya, kag mga kombension. Talalupangdon nga madamo sining mga ambahanon ang napasad sa inspirado nga mga panghunahuna gikan sa tulun-an sang Mga Salmo. Daw ano kita ka malipayon nga may yara kita suno-sa-tion nga koleksion sang makalilipay nga mga ambahanon sang pagdayaw kay Jehova! Ang pag-amba sing mga pagdayaw sa Dios isa ka makahalaylo gid nga rason agod mag-abot sing maaga sa aton mga miting kag agod magpabilin  tubtob matapos, sa amo nagabuylog sa mga masigkasumilimba sa pagdayaw kay Jehova paagi sa ambahanon kag pangamuyo.

“Dayawa Ninyo si Jah!”

8. Ano ang ginapahangop sa tinaga nga “Hallelujah,” kag paano ini masami nga ginabadbad?

⁸ Ang pagdayaw kay Jehova makita sa tinaga nga “Hallelujah,” ang transliterasyon sang isa ka Hebreong ekspresyon nga halos pirme ginabadbad nga “Dayawa ninyo si Jah.” Halimbawa, sa Salmo 135:​1-3, makita naton ining mainit kag madagmit nga imbitasyon: “Dayawa ninyo si Jah! Dayawa ninyo ang ngalan ni Jehova, maghalad kamo sing pagdayaw, O mga alagad ni Jehova, kamo nga nagatindog sa balay ni Jehova, sa mga luwang sang balay sang aton Dios. Dayawa ninyo si Jah, kay si Jehova maayo. Mag-amba kamo sa iya ngalan, kay matahom ini.”

9. Ano ang nagapahulag sa aton agod dayawon si Jehova?

⁹ Samtang ginapamalandungan naton ang dalayawon nga mga buhat sang Dios sa pagpanuga kag ang tanan niya nga binuhatan tungod sa aton, ang tinagipusuon nga apresasyon magapahulag sa aton nga dayawon sia. Kon ginabinagbinag naton ang milagruso nga mga butang nga ginhimo ni Jehova para sa iya katawhan sang nagligad nga mga tion, ang aton tagipusuon nagapahulag sa aton nga dayawon sia. Kag samtang ginapamalandungan naton ang mga saad tuhoy sa dalagku nga mga butang nga himuon pa ni Jehova, nagapangita kita sing mga paagi agod ipabutyag ang pagdayaw kag pagpasalamat.

10, 11. Paano ang aton mismo kabuhi nagahatag sa aton sing rason agod dayawon ang Dios?

¹⁰ Ang aton mismo kabuhi isa ka nagakaigo nga rason agod dayawon si Jah. Si David nag-amba: “Magadayaw ako sa imo [Jehova] bangod sa makahalangawa nga paagi ginhimo ako sing makatilingala. Ang imo mga binuhatan makatilingala, subong nahibaluan sing maayo sang akon kalag.” (Salmo 139:14) Huo, kita ‘ginhimo sing makatilingala’ kag may hamili nga mga dulot subong sang panulok, palamatin-an, kag ikasarang sa paghunahuna. Busa, indi bala dapat nga magkabuhi kita nga nagadayaw sa aton Manughimo? Si Pablo nagpabutyag sing kaanggid nga panghunahuna sang nagsulat sia: “Bisan nagakaon kamo ukon nagainom ukon bisan ano ang inyo ginahimo, himua ang tanan nga butang sa kahimayaan sang Dios.”​—⁠1 Corinto 10:31.

¹¹ Himuon naton ang tanan nga butang sa himaya ni Jehova kon ginahigugma gid naton sia. Si Jesus nagsiling nga ang nahauna nga sugo amo: “Higugmaa si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna kag sa bug-os mo nga kusog.” (Marcos 12:30; Deuteronomio 6:⁠5) Dapat gid naton higugmaon si Jehova kag dayawon sia subong ang aton Manughimo kag Manughatag sang “tagsa ka maayong dulot kag tagsa ka himpit nga regalo.” (Santiago 1:17; Isaias 51:13; Binuhatan 17:28) Ti, ang aton mga ikasarang sa pagpangatarungan, ang aton espirituwal nga kapasidad, kag ang aton pisikal nga kusog​—⁠ang tanan naton nga kinaiya kag abilidad⁠​—⁠​naghalin kay Jehova. Subong aton Manunuga, takus sia sang aton gugma kag pagdayaw.

12. Ano ang imo balatyagon tuhoy sa dalagku nga mga binuhatan ni Jehova kag sa ginasiling sang Salmo 40:5?

¹² Ang dalagku nga mga binuhatan ni Jehova nagahatag sa aton sing di-maisip nga mga rason agod higugmaon kag dayawon sia! “Madamo nga butang ang imo nahimo, O Jehova nga akon Dios, bisan ang imo makatilingala nga mga binuhatan kag ang imo mga hunahuna sa amon,” amba ni David. “Wala sing bisan sin-o nga mapaanggid sa imo. Handumon ko man nga magsugid kag maghambal tuhoy sa sini, mas madamo ini sangsa akon sarang masugid.” (Salmo 40:⁠5) Indi masaysay ni David ang tanan nga dalayawon nga mga binuhatan ni Jehova, kag indi man naton ini masaysay. Apang dayawon naton pirme ang Dios kon ang bisan diin sang iya dalagku nga mga binuhatan ginapatalupangod sa aton.

Mga Binuhatan nga Ginaangot sa Dayon nga Katuyuan Sang Dios

13. Paano ang aton paglaum suod nga ginaangot sa dalagku nga mga binuhatan sang Dios?

¹³ Ang aton paglaum para sa palaabuton suod nga ginaangot sa dalagku kag dalayawon nga mga binuhatan may kaangtanan sa dayon nga katuyuan sang Dios. Pagkatapos sang pagrebelde sa Eden, ginhatag ni Jehova ang nahaunang tagna nga puno sing paglaum. Sa pagpahibalo sang pamatbat sa man-ug, ang Dios nagsiling: “Butangan ko sing kaawayon sa tunga mo kag sang babayi kag sa tunga sang imo binhi kag sang iya binhi. Dugmukon ka niya sa ulo kag dugmukon mo sia sa tikod.” (Genesis 3:15) Ang paglaum sa ginsaad nga Binhi sang babayi nagapabilin sa tagipusuon sang matutom nga mga tawo sa tapos ginhimo ni Jehova ang  daku nga buhat sang pag-amlig kay Noe kag sa iya pamilya paagi sa tugob-globo nga Anaw nga naghapay sa malauton nga kalibutan. (2 Pedro 2:⁠5) Ang matagnaon nga mga saad sa mga tawo sang pagtuo subong nanday Abraham kag David naghatag sing dugang pa nga paghangop sa kon ano ang himuon ni Jehova paagi sa sina nga Binhi.​—⁠Genesis 22:15-18; 2 Samuel 7:12.

14. Ano ang superlatibo nga halimbawa sang dalagku nga mga binuhatan ni Jehova para sa katawhan?

¹⁴ Ang superlatibo nga pagpadayag ni Jehova subong isa nga nagahimo sang dalagku nga mga binuhatan tungod sa katawhan natabo sang ginhatag niya ang iya bugtong nga Anak​—⁠ang ginsaad nga Binhi, si Jesucristo⁠​—⁠​subong halad nga gawad. (Juan 3:16; Binuhatan 2:29-36) Ang gawad nag-aman sing sadsaran para sa pagpasag-uli sa Dios. (Mateo 20:28; Roma 5:11) Gintingob ni Jehova ang nahauna nga mga ginpasag-uli sa Cristianong kongregasyon, nga gintukod sang Pentecostes 33 C.⁠E. Paagi sa bulig sang balaan nga espiritu, ginbantala nila ang maayong balita bisan diin, nga nagapakita kon paano ginbuksan sang kamatayon kag pagkabanhaw ni Jesus ang dalan agod maagom sang matinumanon nga katawhan ang dayon nga mga pagpakamaayo sa idalom sang paggahom sang langitnon nga Ginharian sang Dios.

15. Paano nagpanghikot si Jehova sa makatilingala nga paagi sa aton adlaw?

¹⁵ Sa aton adlaw, si Jehova nagpanghikot sa makatilingala nga paagi agod tipunon ang katapusan nga hinaplas nga mga Cristiano. Ang mga hangin sang kalaglagan ginpunggan agod mapat-inan ang mga nagkalabilin sang 144,000, nga magagahom kaupod ni Cristo sa langit. (Bugna 7:​1-4; 20:⁠6) Ginpat-od sang Dios nga ang hinaplas nga mga Cristiano ginhilway gikan sa espirituwal nga pagkaulipon sa “Babilonia nga Daku,” ang bug-os kalibutan nga emperyo sang butig nga relihion. (Bugna 17:​1-5) Ina nga kahilwayan sang 1919 kag pangamlig sang Dios nga naeksperiensiahan nila sugod sadto nagtugot sa hinaplas nga nagkalabilin nga himuon ang ano? Mag-iwag sa paghatag sing katapusan nga panaksi antes laglagon ni Jehova ang malauton nga sistema sang mga butang ni Satanas sa nagahinampot sing madasig nga “dakung kapipit-an.”​—⁠Mateo 24:21; Daniel 12:⁠3; Bugna 7:14.

16. Ano ang nagakahanabo subong resulta sang hilikuton nga pagbantala sang Ginharian sa bug-os nga kalibutan karon?

¹⁶ Ginapangunahan sing makugi sang hinaplas nga mga Saksi ni Jehova ang hilikuton nga pagbantala sang Ginharian sa bug-os nga kalibutan. Subong resulta, nagadamo pa nga “iban nga mga karnero” ang nangin mga sumilimba ni Jehova karon. (Juan 10:16) Nagakasadya kita sa kahigayunan nga bukas gihapon para sa mga mahagop sang duta ang magbuylog sa aton sa pagdayaw kay Jehova. Ang mga nagabaton sang imbitasyon nga ‘magkari’ pagaamligan sa dakung kapipit-an, upod ang paglaum nga dayawon si Jehova sa walay katubtuban.​—⁠Bugna 22:17.

Ang Linibo Nagadugok sa Matuod nga Pagsimba

17. (a) Paano ginahimo ni Jehova ang dalagku nga mga binuhatan may kaangtanan sa aton hilikuton sa pagbantala? (b) Paano natuman ang Zacarias 8:23?

¹⁷ Ginahimo karon ni Jehova ang dalagku kag dalayawon nga mga binuhatan may kaangtanan sa aton hilikuton nga pagbantala. (Marcos 13:10) Sining ulihi nga tinuig, ‘ginbuksan [niya] ang daku nga ganhaan padulong sa hilikuton.’ (1 Corinto 16:⁠9) Bangod sini, ang maayong balita ginabantala sa malapad nga mga teritoryo nga kontrolado anay sang mga kaaway sang kamatuoran. Madamo sang nagkabuhi anay sa espirituwal nga kadudulman ang nagabaton karon sa imbitasyon nga simbahon si Jehova. Ginatuman nila ining matagnaon nga mga pulong: “Amo ini ang ginsiling ni Jehova sang kasuldadusan, ‘Sa sadtong mga adlaw ang napulo ka tawo gikan sa tanan nga hambal sang mga pungsod magabuyot, huo, aktuwal sila nga magabuyot sang sidsid sang isa ka tawo nga isa ka Judiyo, nga nagasiling: “Magaupod kami sa inyo, kay nabatian namon  nga ang Dios nagaupod sa inyo.” ’ ” (Zacarias 8:23) Yadtong ginasilingan sang ‘napulo ka tawo’ amo ang espirituwal nga mga Judiyo, ang karon nga nagkalabilin sang hinaplas nga mga Cristiano. Sanglit ang napulo mahimo magtiglawas sa kabug-usan sang isa ka dutan-on nga sahi, ang “napulo ka tawo” nagapatuhoy sa “dakung kadam-an,” nga ginpaupod sa “Israel sang Dios,” nga upod sa ila nagahuman sila sa “isa ka panong.” (Bugna 7:​9, 10; Galacia 6:16) Daw ano gid nga kalipay nga makita ang tuman kadamo karon nga nagahimo sing tingob sang sagrado nga pag-alagad subong mga sumilimba ni Jehova nga Dios!

18, 19. Ano ang pamatuod nga ginapakamaayo ni Jehova ang hilikuton nga pagbantala?

¹⁸ Nalipay kita nga linibo​—⁠sa pagkamatuod, ginatos ka libo​—⁠ang nagabaton sang matuod nga pagsimba sa kadutaan nga kontrolado gid anay sang butig nga relihion amo nga ang mga tawo daw indi gid magabaton sang maayong balita. Tan-awa ang bag-o nga Yearbook of Jehovah’s Witnesses, kag talupangda ang mga kadutaan nga nagareport karon sang halin sa 100,000 tubtob sa halos 1,000,000 ka manugbantala sang Ginharian. Mabakod ini nga pamatuod nga ang hilikuton nga pagbantala sang Ginharian ginapakamaayo ni Jehova.​—⁠Hulubaton 10:22.

¹⁹ Subong katawhan ni Jehova, ginadayaw kag ginapasalamatan naton ang aton langitnon nga Amay tungod sa paghatag sa aton sing matuod nga katuyuan sa kabuhi, sing makalilipay nga hilikuton sa pag-alagad sa iya, kag sing masanag nga panan-aw para sa palaabuton. Nagakabuhi kita nga nagapaabot sing malangkagon sa katumanan sang tanan nga saad sang Dios kag determinado nga ‘huptan ang aton kaugalingon sa gugma sang Dios, nga nagatan-aw sa kabuhi nga walay katapusan.’ (Judas 20, 21) Daw ano gid ang kalipay naton nga makita ang dakung kadam-an nga nagadayaw sa Dios nga nagadamo karon sing mga 6,000,000! Upod ang kitaon nga pagpakamaayo ni Jehova, ang hinaplas nga nagkalabilin kag ang ila iban nga mga karnero nga kaupdanan ginaorganisar sa mga 91,000 ka kongregasyon sa 235 ka kadutaan. Kita tanan ginapakaon sing maayo sa espirituwal paagi sa walay kakapoy nga mga panikasog sang “matutom kag mainandamon nga ulipon.” (Mateo 24:45) Mahigugmaon nga ginatatap sang isa ka progresibo nga teokratikong organisasyon ang paghimo sang hilikuton sang Ginharian paagi sa 110 ka sanga talatapan sang mga Saksi ni Jehova. Nagapasalamat kita nga ginpahulag ni Jehova ang tagipusuon sang iya katawhan agod ‘padunggan sia paagi sa ila bilidhon nga mga butang.’ (Hulubaton 3:​9, 10) Gani, ang aton hilikuton nga pagbantala sa bug-os kalibutan nagapadayon, kag ginapatindog ang mga imprintahan, mga puluy-an Bethel kag misyonero, mga Kingdom Hall, kag mga Assembly Hall subong kinahanglanon.

20. Paano ang pagpamalandong sa dalagku kag dalayawon nga mga binuhatan ni Jehova nagaapektar sa aton?

²⁰ Imposible naton mahinambitan ang tanan nga dalagku kag dalayawon nga mga binuhatan sang aton langitnon nga Amay. Apang mapunggan bala ang bisan sin-o nga may matadlong nga tagipusuon sa pagbuylog sa kadam-an sang mga dumalayaw ni Jehova? Siempre indi! Busa, ang tanan nga mahigugmaon sa Dios magsinggit sing malipayon: “Dayawa ninyo si Jah! Dayawa ninyo si Jehova halin sa mga langit, dayawa ninyo sia sa kahitaasan. Dayawa sia, kamo tanan nga anghel niya . . . , kamo nga mga pamatan-on nga lalaki kag kamo man nga mga ulay, kamo nga mga tigulang nga lalaki pati na ang mga bata nga lalaki. Magdayaw sila sang ngalan ni Jehova, kay ang iya ngalan lamang ang di-malab-ot sa kataason. Ang iya dignidad yara sa ibabaw sang duta kag langit.” (Salmo 148:​1, 2, 12, 13) Huo, sa karon kag sa walay katubtuban, dayawon naton si Jehova tungod sa iya dalagku nga mga binuhatan!

Paano Mo Sabton?

• Ano ang pila sang dalayawon nga mga binuhatan ni Jehova?

• Ngaa napahulag ka nga dayawon si Jehova?

• Paano ang aton paglaum naangot sa dalagku nga mga binuhatan sang Dios?

• Paano ginahimo ni Jehova ang dalayawon nga mga binuhatan may kaangtanan sa hilikuton nga pagbantala sang Ginharian?

[Mga Pamangkot sa Pagtinuon]

[Retrato sa pahina 10]

Bug-os tagipusuon ka bala nga nagabuylog sa mga ambahanon sang pagdayaw kay Jehova?

[Mga retrato sa pahina 13]

Nagakasadya kita nga ang kahigayunan bukas gihapon agod makabuylog sa aton ang mga mahagop sa pagdayaw kay Jehova